Ke Kin Ni Mehlel Pwoson Rongamwahu?

“E lelehr ahnsowo, oh Wehin Koht kerendohr! Kumwail eri koluhla oh wiliakapwala oh pwosonla Rongamwahu.”​—MARK 1:15.

1, 2. Iaduwen ke pahn kawehwehda Mark 1:14, 15?

PAHRO iei 30 C.E. me Sises Krais tepida wia doadoahk kesempwal ieu nan Kalili. E kalakalohkseli “Rongamwahu en Koht,” oh tohto mehn Kalili kan kin mwekidkihda sapwellime mahsen kan: “E lelehr ahnsowo, oh Wehin Koht kerendohr! Kumwail eri koluhla oh wiliakapwala oh pwosonla Rongamwahu.”​—Mark 1:14, 15.

² “E lelehr ahnsou” me Sises pahn tepiada sapwellime doadoahk oh ahnsou ong aramas akan en wiahda arail pilipil me pahn kak kahrehong irail en kenikenla rehn Koht. (Luk 12:54-​56) ‘Wehin Koht kerendohr’ pwehki Sises kin ketiket nin sampah nin duwen emen me koasondier en wia Nanmwarki. Sapwellime doadoahk en kalohk kin kamwekid aramas mehlel akan en koluhla. Ahpw, iaduwen irail​—oh pil kitail​—kin “pwosonla Rongamwahu?”

3. Dahme aramas akan kin wia pwen kasalehda me irail kin pwosonla Rongamwahu?

³ Duwehte Sises, wahnpoaron Piter kin kangoange aramas akan en koluhla. Piter mahsanihiong mehn Suhs akan nan Serusalem ni Pendekos 33 C.E.: “Emenemen kumwail en koluhla oh wiliakapwala, oh pil papidaisla ni mwaren Sises Krais, pwe dipamwail kan en lapwada; kumwail ahpw pahn ale Ngehn Sarawi, iei kalahngan ehu sang rehn Koht.” Aramas kid kei me papidaisla, oh wiahla sapwellimen Sises tohnpadahk kan. (Wiewia 2:38, 41; 4:4) Nan 36 C.E., mehn liki kan kin pil wia met. (Wiewia 10:1-​48) Nan atail ahnsou, pwosonla Rongamwahu kin kamwekid aramas kid kei en koluhkihla diparail kan, wiahda ahr inou ong Koht, oh papidaisla. Irail kin kamehlele rongamwahu en komour oh pwosonla sapwellimen Sises meirong en tomw. Oh pil, irail kin wialahr aramas pwung kan oh irail kin utungada Wehin Koht.

4. Ia wehwehn pwoson?

⁴ Ahpw, ia wehwehn pwoson? Wahnpoaron Pohl ntingihdi: “Pwoson iei kamehlele mehkan me kitail kin koapworopworki de kasikasik, kamehlele mehkan me kitail sohte kak kilangki masatail.” (Ipru 11:1) Atail pwoson kin kamehlelehong kitail me soahng koaros me Koht ketin inoukihda nan sapwellime Mahsen, uhdahn pahn pweida. Likamwete kitail nainekier doaropwe ehu me kin kasalehda me kitail kin sapwenikihla sahpw. Pwoson iei “kamehlele mehkan” de kamehlele mehkan me kitail sohte kak kilangki mesatail kan. Sang ni atail kehl en madamadau oh peren sang mongiong mehlel, met kin kadehde ong kitail me mehpwukat me uhdahn mehlel edetehn kitail sohte kak kilangki mesatail.​—2 Korint 5:7; Episos 1:18.

Kitail Anahne Ahneki Pwoson!

5. Dahme kahrehda pwoson inenen kesempwal?

⁵ Kitail kin ipwikihdihte atail anahn en pali ngehn, ahpw kitail sohte kin ipwidi oh ahneki pwoson. Ni mehlel, “kaidehn aramas koaros kin pwoson.” (2 Deselonika 3:2) Ahpw, Kristian akan anahne en pwoson ma irail men sohsohki sapwellimen Koht inou kan. (Ipru 6:12) Mwurin Pohl ntingihdi duwen mehn kahlemeng en pwoson akan, e ntingihdi: “Sounkadehde pwukat me tohto kapilkitailpenehr duwehte depwek kalaimwun ehu. Eri, kitail kesehsang kitail mehkoaros me kerempwai kitail, oh dihp me kin salihkitaildi, oh kitail en nantihong nan atail mour me kitail tapihadahr, rasehng atail kin tang kehlail ni atail kin weirentang. Kitail kainenehiongete kapehditail kan ong Sises, me tepin atail pwoson oh me kaunsekala atail pwoson.” (Ipru 12:1, 2) Ia wehwehn “dihp me kin salihkitaildi”? Ma kitail sohte ahneki pwoson de kitail solahr pwoson duwehte mahs, met wehwehki me kitail pwupwudiong nan “dihp me kin salihkitaildi.” Pwen kolokolte pwoson kehlail, kitail anahne ‘kainenehiongete kapehditail kan ong Sises’ oh kahlemengih ih. Kitail pil anahne liksang dipen nenek, pei ong atail ineng en uduk kan, liksang noahrok mwohni, loalokong en sampah kan, oh tiahk kan me sohte kin poasoanda pohn Paipel. (Kalesia 5:19-​21; Kolose 2:8; 1 Timoty 6:9, 10; Sud 3, 4) Oh pil, kitail anahne kamehlele me Koht kin ketin ieiang kitail oh me sapwellime mahsen en kaweid kin inenen pweida.

6, 7. Dahme kahrehda e konehng kitail en kapakapki pwoson?

⁶ Kitail sohte kak pein nsenkihda en ahneki pwoson sang ni pein atail kehl. Pwe pwoson iei kisehn wahn ngehn en Koht, de sapwellime manaman. (Kalesia 5:22, 23) Eri, dahme kitail kak wia, ma kitail anahne kakehlahda atail pwoson? Sises mahsanih: “Eri, ma kumwail . . . ese kihong noumwail seri kan dahme mwahu ong irail, eri, Samamwail me ketiket nanleng soh pahn ketikihong Ngehn Sarawi irail kan me kin peki reh!” (Luk 11:13) Ei, kitail en kapakapki ngehn sarawi, pwe met pahn kak kakehlahda atail pwoson en wia kupwuren Koht mehndahki kitail kin lelong kahpwal akan.​—Episos 3:20.

⁷ E konehng en kapakapki kalaudehla atail pwoson. Ni ahnsou me Sises kausesang ngehn saut emen sang pwutak pwulopwul emen, semen pwutako wia pekipek wet: “Maing, I patohwan pwoson! Ahpw sohte itar, Komw ketin sewese kalaudehla ei pwoson!” (Mark 9:24) Sapwellimen Sises tohnpadahk ko ahpw patohwanohng Kauno, “Maing, komw ketin kalaudehla aht pwoson.” (Luk 17:5) Ihme kahrehda, kitail en kapakapki kalaudehla atail pwoson, oh kamehlele me Koht pahn ketin sapengki soangen kapakap pwukat.​—1 Sohn 5:14.

Kesempwal en Pwoson Sapwellimen Koht Mahsen

8. Iaduwen pwosonla Mahsen en Koht pahn kak sewese kitail?

⁸ Mwohnte e pwoula nin duwen tohnmetei ieu, Sises mahsanih ong sapwellime tohnpadahk ko: “Kumwail dehr nsensuwed oh pahtou. Kumwail pwoson Koht oh pil pwoson ie.” (Sohn 14:1) Nin duwen Kristian akan, kitail kin pwoson Koht oh sapwellime Ohl. Ahpw, iaduwen sapwellimen Koht Mahsen? E kak wia kamwahu laud ong pein atail mour ma kitail pahn onop Paipel oh kapwaiada kaweid sang loale ni atail kin kamehlele me e kin ketikihda kaweid me keieu mwahu.​—Ipru 4:12.

9, 10. Iaduwen ke pahn kawehwehda duwen pwoson me kohda nan pwuhken Seims 1:5-8?

⁹ Atail mour nin duwen aramas soh unsek akan kin dirkihla kahpwal akan. Ahpw, pwoson Mahsen en Koht pahn kak ni mehlel sewese kitail. (Sohp 14:1) Karasepe ieu, ma kitail sehse iaduwen kitail pahn kak powehdi kahpwal ieu me kitail kin lelohng, sapwellimen Koht Mahsen kin kihda kaweid wet ong kitail: “Ma emen rehmwail anahne erpit, a en kapakap oh peki rehn Koht, oh Koht ahpw pahn ketikihong, pwe Koht me kupwursapan oh kalahngan ong aramas koaruhsie. Ahpw kumwail uhdahn pahn kapakap ni pwoson oh sohte peikasal; pwe me kin peikasal rasehng iloak en nan madau kan me kin pwungupwungudengkiseli kisinieng. Soangen aramas menet sohte kak koasoanehdi eh lamalam, oh pil aramas kohweikohdo ni eh mwekid koaros, eri, en dehr lemehiong me e pahn kak ale mehkot sang rehn Kauno.”​—Seims 1:5-8.

¹⁰ Siohwa Koht sohte pahn kupwursuwedkin kitail ma kitail kin kapakapki erpit. Ahpw, E pahn ketin sewese kitail en kilangwong kahpwalo ni ahl me konehng. Iengatail pwoson akan ele mwein pahn padahkiong kitail duwen iren Paipel konehng kan de ni ahnsou me kitail kin pein onopki Paipel, kitail pahn diarada iren Paipel pwukat. De mwein sapwellimen Siohwa ngehn sarawi pahn kahre kitail. Samatail nanleng pahn ketikihong kitail erpit me anahn ong sewese kitail en powehdi kasongosong kan me kin lelohng kitail ma kitail pahn “kapakap ni pwoson, oh sohte peikasal.” Ma kitail kin peikasal rasehng iloak en nan madau me kin pwungupwungudengkiseli kisinieng, kitail sohte kak kasikasik en alehdi mehkot sang rehn Koht. Dahme kahrehda? Pwehki met pahn wehwehki me kitail sohte kin poadidiong kapakap de wiewia teikan​—ei, pil atail pwoson Koht. Kitail anahne ahneki pwoson kehlail ong Mahsen en Koht oh kaweid kan me E kin ketikihda. Kitail kak wadek duwen ekei ahl akan me E kin ketikihda sawas oh kaweid kan.

Pwoson oh Ketihnain

11. Dahme atail kin pwoson Mahsen en Koht kin kamehlelehong kitail duwen atail anahn akan ni ehu ehu rahn?

¹¹ Ahpw iaduwen ma kitail kin lelong kahpwal en sohte itar kenatail mwenge de ihmw de semwehmwe? Pwoson Mahsen en Koht kin kamehlelehiong kitail me Siohwa pahn ketin apwalih atail anahn akan en ehu ehu rahn oh ehu rahn E pahn uhdahn ketikihong aramas koaros me kin poakohng Ih arail anahn akan ni mwuledek. (Melkahka 72:16; Luk 11:2, 3) Kitail pahn ale kangoang ni ahnsou me kitail pahn doudouloale duwen Siohwa ni eh ketikihong sapwellime soukohp Elaisa ketihnain en pali war ni ahnsou lehk wiawi. Mwurin met, Koht wiahda manaman ieu, me E ketin kahrehong pilawao oh leh en sohte nekla, oh met kin sewese emen lih, nah pwutak oh Elaisa en momour. (1 Nanmwarki 17:2-​16) Siohwa pil ketin sewese soukohp Seremaia ni ahnsou mehn Papilon kan kapilpene Serusalem. (Seremaia 37:21) Edetehn Seremaia oh Elaisa sohte kin ale kenara mwenge laud, Siohwa kin ketin apwalih ira. Rahnwet, E pil kin wia met ong aramas akan me kin pwoson Ih.​—Madiu 6:11, 25-​34.

12. Iaduwen pwoson pahn sewese kitail duwen kenatail mwenge kan?

¹² Pwoson oh kapwaiada mouren kaweid kan en Paipel sohte pahn kahrehong kitail en kepwehpwehla, ahpw e pahn sewese kitail en ale kanatail mwenge me itar ong ehu ehu rahn. Karasepe ieu: Paipel kin kaweidkinkitail en wiahla aramas mehlel, koahiek, oh pwerisekiong atail doadoahk kan. (Lepin Padahk 22:29; Eklesiasdes 5:18, 19; 2 Korint 8:21) Kitail en dehr mwamwahleki kesempwalpen adamwahu nin duwen tohndoadoahk mwahu men. Mendahki nan ekei wasa e sohte mengei en rapahki doadoahk pweilaud kan, irail tohndoadoahk akan me kin mehlel, koahiek kan, oh kin pwerisek nan arail doadoahk, kin pweida mwahu sang aramas teikan. Edetehn tohndoadoahk pwukat mwein kin naineki dipwisou malaulau, irail kin naineki mehkan me itar ong mour, oh irail kin nsenamwahukihla kang mwenge me pein irail pwainda.​—2 Deselonika 3:11, 12.

Pwoson kin Sewese Kitail en Powehdi Atail Pahtou

13, 14. Iaduwen pwoson kin sewese kitail en powehdi atail pahtou?

¹³ Sapwellimen Koht Mahsen kin ni sansal kasalehda, me aramas koaros kin pahtou ni ahnsou me irail me re poakohng mehla. Sahm lelepeko, Eipram kin mwahieiki mehlahn eh pwoud, Sera me e kin poakong. (Senesis 23:2) Depit inenen pahtoula laud mwurin e rong nah pwutak Apsalom mehlahr. (2 Samuel 18:33) Ohl unsek, Sises, pil ketin tentenihrki mehlahn kompoake Lasarus. (Sohn 11:35, 36) Ni ahnsou me emen kompoakpatail mehla, kitail mwein kin inenen pahtou, ahpw, pwoson inou kan me mih nan sapwellimen Koht Mahsen pahn kak sewese kitail en powehdi atail pahtou.

¹⁴ Pohl mahsanih, ‘I koapworopworki Koht, me aramas koaros, me mwahu oh suwed, pahn iasada sang mehla.’ (Wiewia 24:15) Kitail anahne pwoson sapwellimen Koht koasondi ong kaiasadahn aramas tohto. (Sohn 5:28, 29) Me pahn pil iang iasada, iei Eipraam oh Sera, Aisek oh Repeka, Seikop oh Lia​—me mehla ni ahnsouwet oh awiawih kaiasada nan sapwellimen Koht sampah kapw. (Senesis 49:29-​32) Ia uwen kaperen ni ahnsou kompoakpatail mehlahr akan pahn iasada oh mour nin sampah wet! (Kaudiahl 20:11-​15) Ahpw ni ahnsouwet, pwoson sohte pahn kihsang kansensuwed kan koaros, ahpw e pahn sewese kitail en karanih Koht, me kin sewese kitail en powehdi atail pahtou.​—Melkahka 121:1-3; 2 Korint 1:3.

Pwoson kin Kakehlahda Aramas me Mih Nan Pwunod

15, 16. (a) Dahme kahrehda kitail kak nda me aramas pwoson akan en nan rahnwet, kaidehn irail kelepw te me kin pahtou? (b) Dahme kitail kak wia pwen kak powehdi pahtou kan?

¹⁵ Sapwellimen Koht Mahsen kin pil kasalehda me aramas akan me kin pwoson Koht pil kak ahneki pwunod. Ni ahnsou me Sohp mih nan kasongosong laud, e lemeleme me Koht ketin kesehla ih. (Sohp 29:2-5) Ohlahn Serusalem oh ah kehl kan kahrehong Nehmaia en pahtoula. (Nehmaia 2:1-3) Mwurin Piter kahmahmki Sises e inenen nsensuwed oh e “sengiseng kowahlap.” (Luk 22:62) Oh Pohl kangoange ienge tohnkaudok akan nan mwomwohdiso en Deselonika en “kakehlaka irail kan me mih nan pwunod.” (1 Deselonika 5:14, NW) Eri, e sansal me aramas pwoson akan nan rahnwet kin kak pwunod, oh met kaidehn mehkot kapw. Dahme kitail kak wia pwen powehdi atail pwunod?

¹⁶ Ele mwein kitail kin pwunod pwehki kitail lelohng kahpwal laud kan. Eri, kitail en dehr kilang kahpwal pwukat nin duwen kahpwal laud kan, ahpw mwein kitail pahn kak powehdi atail kahpwal akan ni atail pahn song en ekis ekis powehdi ehu kahpwal ni ahnsou ehu, oh ni ahnsou mwuhr song en powehdi pil ehu kahpwal ni atail kin nantihong en kapwaiada kaweid kan en Paipel. Met ele pahn kak katikitikala atail pwunod akan. Ma kitail pahn katoupahrekih atail wiewia kan iangahki meir mwahu, ele met pil pahn kak wia sawas laud ieu ong kitail. Ahpw met mehlel ieu: Pwoson Koht oh sapwellime Mahsen kin kahrehong kitail en kehlail ni pali ngehn pwehki pwoson wet kin kakehlahda atail kin kamehlele me Koht kin ketin nsenohki kitail.

17. Iaduwen kitail ese me Siohwa kin ketin poakpoake kitail?

¹⁷ Piter kin kamehlelehong kitail mehn kamweit wet: “Eri, kumwail pein karakarahkala . . . pahn nin limen Koht manaman, pwe en ketin kasapwilkumwailda ni ahnsou me konehng. Kumwail mweidohng ih amwail pwunod koaros, pwehki eh kin ketin apwahpwalih kumwail.” (1 Piter 5:6, 7) Sounmelkahkao kouliki: “E kin ketin sewese irail kan me kin mihla nan apwal; e kin ketin pwekada irail kan me kin pwupwudi.” (Melkahka 145:14) Kitail anahne kamehlele mehn kamehlele pwukat, pwe e dierekda nan sapwellimen Koht Mahsen. Edetehn atail kin pahtouki mehkot sohte pahn mwadang kohsang rehtail, atail kin wehwehki me kitail kak mweidohng Samatail limpoak me kin ketiket nanleng atail pwunod kan koaros kin kakehlahda atail pwoson!

Pwoson oh Kasongosong Teikan

18, 19. Iaduwen pwoson kin sewese kitail en dadaurete mendahki soumwahu ieu oh kamweitiala iengatail pwoson akan me kin soumwahu?

¹⁸ Kitail ele mwein pahn kak mihla pahn kasongosong laud en atail pwoson ni ahnsou me kitail de emen me kitail poakohng kin iang soumwahu laud ieu. Edetehn Paipel sohte kasalehda me Kristian akan me duwehte Epaprodaitus, Timoty, oh Tropimus ahneki manaman en kihsang pein irail arail soumwahu kan, e sansal me Siohwa kin ketin sewese irail en dadaurete pahn arail soumwahu kan. (Pilipai 2:25-​30; 1 Timoty 5:23; 2 Timoty 4:20) Oh pil, “irail kan me kin nsenohki apwalih me semwehmwe kan,” sounmelkahkao koulki: “Kauno pahn ketin sewese irail ni ar pahn soumwahu oh e pahn ketin kakehlairailda.” (Melkahka 41:1-3) Iaduwen mahsen kan en sounmelkahka menet kin sewese kitail en kamweitiala iengatail pwoson akan me kin soumwahu?

¹⁹ Ehu ahl en kihda sawas ni pali ngehn iei en kapakap rehn irail me soumwahu kan oh pil kapakapkin irail. Rahnwet, mendahki kitail sohte pahn peki rehn Koht en wiahda manaman en kamwahuihala me soumwahu kan, kitail kak peki rehn Koht en kakehlahda atail madamadau kan oh kihong kitail kehl ni pali ngehn pwen sewese kitail en dadaurete ni ahnsou kitail kin luwet. Siohwa pahn kakehleirailda, oh arail pwoson pahn kehlailkihda ahr kin kasik ahnsou me “sohte emen me kin kousoan nan sahpwo pahn kaulimkihla eh soumwahu.” (Aiseia 33:24) Ia uwen kansenamwahu en wehwehki me Sises Krais oh Wehin Koht, pahn kamaiouda aramas peik kan sang dihp, soumwahu, oh mehla! Pwehki koapworopwor kaselel pwukat, kitail kin kalahnganki Siohwa, ‘me kin ketin kamwahwihala atail soumwahu kan koaros.’​—Melkahka 103:1-3; Kaudiahl 21:1-5.

20. Dahme kahrehda kitail kak nda me pwoson pahn kak sewese kitail en dadaur pahn “rahn akan oh sounpar kansensuwed akan” en mahlahr?

²⁰ Pwoson pil kak sewese kitail en dadaur pahn “rahn akan oh sounpar kansensuwed kan” en mahla, ni ahnsou kitail kin luwetala oh kohkohdi. (Eklesiasdes 12:1-7) Irail likeilapalahr akan nanpwungatail pil kak wia kapakap duwehte sounmelkahkao likeilapalahr kin koulki: “Maing Kaun, Wasa Lapalap, komwihte me ei koapworopwor . . . Komw dehr ketin likidmelieiehla ni ei likeilapalahr, komw pil dehr ketin keseiehla ni ei luwetalahr.” (Melkahka 71:5, 9) Sounmelkahkao pehmada me e anahne sapwellimen Siohwa sawas, oh pil duwehte iengetail Kristian tohto me papah Koht erein sounpar tohto ahpw ni ahnsouwet irail mahlahr. Pwehki arail pwoson, irail kak kamehlele me limen Siohwa pahn sewese irail ahnsou kohkohlahte.​—Deuderonomi 33:27.

Kolokol Pwoson Mahsen en Koht

21, 22. Imwihla mwahu dah me kak pweida nanpwungen kitail oh Koht, ma kitail pahn ahneki pwoson?

²¹ Pwoson Rongamwahu oh Mahsen en Koht unsek kin sewese kitail en karanih Siohwa. (Seims 4:8) Ni mehlel, Siohwa kin wia atail Kaun oh pil Sounkapikpatail oh Samatail. (Aiseia 64:8; Madiu 6:9; Wiewia 4:24) Sounmelkahkao koulki, “Komwi me semei oh ei Koht; komwi me silepei oh sounkomourpei.” (Melkahka 89:26) Ma kitail kin pwoson Siohwa oh sapwellime Mahsen, kitail pil kak kilangwong ih nin duwen ‘Sounkomourpatail.’ Ia uwen met ah nohn wia pwais kesempwal ieu!

²² Siohwa iei Sahm en Kristian me keidi kan oh e pil kin wiahla Semen iengarail kan me kin ahneki koapworopwor en mih nin sampah. (Rom 8:15) Oh pwoson Samatail nanleng sohte kin imwikihla kansensuwed. Depit mahsanih: “Semei oh inei pil kak keseiehla, ahpw Kauno pahn ketin apwahpwalih ie.” (Melkahka 27:10) Likin met, kitail kak kamehlele met: “A Koht ketin kahukhila me e sohte pahn ketin keseikumwailla, pwe e ketin kupwuredahr en wiahkinkumwailla, sapwellime aramas.”​—1 Samuel 12:22.

23. Dahme kitail anahne wia ma kitail men paiekihda nanpwungmwahu rehn Siohwa ni ahnsou kohkohlahte?

²³ Pwen ahneki nanpwungmwahu rehn Siohwa ni ahnsou werei, kitail anahne pwoson Rongamwahu oh kamehlele Pwuhk Sarawi​—me iei Mahsen en Koht. (1 Deselonika 2:13) Kitail anahne pwoson Siohwa oh mweidong sapwellime Mahsen en kamarainih atail wasahn keid kan. (Melkahka 119:105; Lepin Padahk 3:5, 6) Atail pwoson pahn kehlailda ni atail kin kapakap oh likih sapwellime kadek, mahk-kalahngan, oh sawas.

24. Koapworopwoar kansenamwahu dahieu me mih nan pwuhken Rom 14:8?

²⁴ Pwoson kin kamwekid kitail en wiahda atail inou en papah Koht kohkohlahte. Pwehki atail pwoson kehlail, edetehn kitail pahn mehla, nin duwen sapwellime ladu inouda kan, kitail kin ahneki koapworopwor en mour soutuk. Ei, “ni atail kin momour, eri, kitail kin momour pwehki Kauno; oh ni atail kin mehla, eri, kitail kin mehla pwehki Kauno.” (Rom 14:8) Eri, kitail en kolokolete nan mohngiongatail koapworopwoar wet nin duwen kitail kin likih Mahsen en Koht oh pousehla pwoson Rongamwahu.

Iaduwen Ke Pahn Sapeng?

• Ia wehwehn pwoson, oh dahme kahrehda kitail anahne irair wet?

• Dahme kahrehda e kesempwal kitail en pwoson Rongamwahu oh sapwellimen Koht Mahsen unsek?

• Iaduwen pwoson kin sewese kitail en dadaurete pahn soangsoangen kasongosong kan?

• Dahme pahn sewese kitail en kolokolete atail pwoson?

[Kilels nan Pali 10]

Siohwa ketin kakehlahda Seremaia oh Elaisa pwehki ara pwoson

[Kilels nan Pali 11]

Sohp, Piter, oh Nehmaia kin ahneki pwoson kehlail

[Kilels nan Pali 13]

Pwen ahneki nanpwungmwahu rehn Siohwa kohkohlahte, kitail anahne pwoson Rongamwahu