“Kolokolete Oh Peikiong Ei Padahk Kan”
“Ma kumwail pahn peikiong ei padahk kan, kumwail uhdahn pahn wiahla nei tohnpadahk mehlel.”—SOHN 8:31.
1. (a) Ni en Sises pwurala nanleng, dahme e ketikihdi nin sampah? (b) Mehnia peidek kan kitail anahne en medemedewe?
NI AHNSOU me Sises Krais, me tepida pelien Kristian, pwurehng ketidala nanleng, e sohte ketikihdi nin sampah pwuhk kan me pein ih ntingihdi, de sansal en kataman me pein ih kauwada, de kepwe tohto me pein ih ketikihpene. Ihme e ketikihdi nin sampah iei tohnpadahk kan oh pil iren kaweid kan ni oaretik me re anahne en idawehn pwe en kak wia emen tohnpadahk. Ni mehlel, nan Rongamwahu en Sohn, kitail kilang me Sises kasalehda ire kesempwal siluh me emen me men wiahla sapwellime tohnpadahk anahne en wia. Ia ire siluh pwukat? Dahme kitail kak wia pwe en kak kapwaiada ire pwukat? Oh iaduwen atail kak ese ni mehlel me pein kitail kak iang wia tohnpadahk kei en Krais rahnwet?a
2. Soangen ire kesempwal dah kan me tohnpadahk kan anahne kapwaiada me kileledi nan pwuhken Rongamwahu en Sohn?
2 Mpen sounpwong weneu mwohn e matala, Sises ketidahla Serusalem oh padahk ong pokon ehu me pokonpene mwo pwe en kawauwih Sarawien Impwal kan erein wihk ehu. Imwilahn met, nan werengen Sarawien Impwal kan, “me tohto sang nan pokono pwosonla ih.” Sises pousehlahte kalkalohk oh ni rahn me kasarawio pahn neko, “me tohto sang nan pokono pwosonla ih.” (Sohn 7:10, 14, 31, 37; 8:30) Ni ahnsowo, Sises kihong ah madamadau ong irail akan me kapw nan pwoson oh kasalehda ehu ire kesempwal pwe en kak iang wia tohnpadahk, nin duwen me wahnpoaron Sohn ntingihdi: “Ma kumwail pahn peikiong ei padahk kan, kumwail uhdahn pahn wiahla nei tohnpadahk mehlel.”—Sohn 8:31.
3. Irair dah me emen anahne en ahneki pwe en “kolokolete mahsen en [Sises]”?
3 Ni en Sises mahsanih met, e sohte wehwehki me irail me kapw nan pwoson kan sohte itar arail pwoson. Ahpw, e kasalehiong irail wasaht me irail kak alehdi kapai en wiahla sapwellime tohnpadahk mehlel kan ma irail pahn kolokolete oh peikiong sapwellime mahsen kan oh ma irail pahn kasalehda kanengamah oh dadaurete. Irail kasalehda me irail pwungkiher oh alehdahr sapwellime mahsen kan, ahpw irail anahne kaukaule kolokolete oh kapwaiada mahsen pwukat. (Sohn 4:34; Ipru 3:14) Ei, Sises kin kilangwohng kanengamah nin duwen irair ehu me inenen kesempwal ong sapwellime tohnpadahk kan en ahneki, ihme kahrehda nan kaimwiseklahn ah mahsen ong sapwellime wahnpoaron ko, sansalda nan Rongamwahu en Sohn, Sises kaweidki pak riau: “Idawehniehte.” (Sohn 21:19, 22) Irail tepin Kristian tohto me wia met. (2 Sohn 4) Dahme sewese irail en dadaurete?
4. Dahme kin kahrehda irail tepin Kristian ako en kak dadaurete?
4 Wahnpoaron Sohn, emen tohnpadahk lelepek en Krais, erein sounpahr isihsek, kin kasalehda ire kesempwal ehu. E kin kapinga irail Kristian lelepek kan oh mahsanih: “Kumwail kehlail oh Mahsen en Koht kin ketiket loalamwail, oh kumwail kalowedier Me Suwedo.” Irail tohnpadahk en Krais kin dadaurete, oh kin mihmihte de kolokolete Mahsen en Koht pwehki Mahsen en Koht kin mihmihte rehrail. Irail inenen kin kalahnganki oh kesempwaliki Mahsen en Koht. (1 Sohn 2:14, 24) Duwehte rahnwet, ma kitail men ‘dadaurete lel ni imwi,’ kitail anahne tehk mwahu ma Mahsen en Koht kin mihmi rehtail. (Madiu 24:13) Iaduwen atail kak wia met? Sises ketikihda karasaras pwehn sapengla peidek wet.
“Rong Mahseno”
5. (a) Soangen pwehl dah kan me Sises kasalehda nan ehu sapwellime karasaras ko? (b) Ia wehwehn werentuhkeo oh pwehlo nan sapwellimen Sises karasaras?
5 Sises kasalehda karasaras en sounkamwarak emen me kin kamwerehdi werentuhke, oh met kileledi nan pwuhk kan en Rongamwahu en Madiu, Mark, oh Luk. (Madiu 13:1-9, 18-23; Mark 4:1-9, 14-20; Luk 8:4-8, 11-15) Ni omw pahn wadek ire pwukat, ke pahn diarada me ire kesempwal nan karasaras wet iei me soangen werentuhke teieu me pwupwudi nan soangsoangen pwehl oh wah kan pil wekpeseng. Tepin soangen pwehl me kekeluwak, me keriauo me pedeped, oh me kesiluhwo me diren dihpw tekatek wosada ie. Pwehl kapahieuo weksang pwehl siluh teiko pwe e wia “pwehl mwahu.” Sises pein kawehwehda me werentuhkeo iei Rongamwahu en Wehio me diarekda nan Mahsen en Koht, oh pwehl ko iei aramas me audepen mongiongarail kin wekpeseng. Mendahki irail aramas akan me kin rasehng pwehl wekpeseng kei kin duwepene ni ekei ahl akan, ahpw irail me rasehng pwehl mwahu kin ahneki irair ehu me kahrehong re en weksang meteiko koaros.
6. (a) Iaduwen pwehl kapahieuo eh weksang pwehl siluh teiko, oh ia wehwehn met? (b) Dahme kesempwal pwe emen en kak dadaurete nin duwen sapwellimen Krais tohnpadahk?
6 Nan Luk 8:12-15, e kin kasalehda me nan irair pahieu pwukat koaros, aramas ako ‘rong mahseno.’ Ahpw, irail me ahneki “mohngiong mwahu” kin wia laudsang “rongorong mahseno.” Re kin “koledi oh kasalehda wah kan ni arail kin dadaurete.” Pwehl mwahu wet me mwuterek oh loal oh e kin mweidohng kalowen tuhke pwulopwulo en kihrla oh katengtengdi, oh imwilahn met, tuhkeo pahn masalpeseng oh wah. (Luk 8:8) Pil duwehte met, irail akan me kin ahneki mohngiong mwahu kin wehwehki, kesempwaliki oh alehda Mahsen en Koht. (Rom 10:10; 2 Timoty 2:7) Mahsen en Koht kin mihmihte nan loalerail. Imwilahn met: irail kin kasalehda wah kan ki kanengamah oh dadaurete. En kalahnganki oh kesempwaliki Mahsen en Koht kin kesempwal ni emen eh pahn dadaurete nin duwen tohnpadahk en Krais. (1 Timoty 4:15) Ahpw, iaduwen kitail kak kakairada atail kalahnganki oh kesempwaliki Mahsen en Koht?
Irair en Mohngiong oh Doudouloale Ni Kanahieng
7. Soangen mwekid dah me kin kohsang ahneki mohngiong mwahu?
7 Tehk soangen wiewia dah kan me Paipel kin pwurpwurehng karasaiong mohngiong ehu me mwahu. “Aramas pwung men kin doudouloale nan eh mohngiong pwehn kak sapeng ni ahl me konehng.” (Lepin Padahk 15:28, New World Translation) “Maing Siohwa, komw ketin kupwurehla ei pato oh ei doudouloale nan mohngiongi.” (Melkahka 19:14, NW) “Ei doudouloale nan mohngiongi pahn wia mehkan me wehwe oh loalokong.”—Melkahka 49:3.
8. (a) Ni ahnsou me kitail kin wadek Paipel, dahme kitail anahne liksang oh dahme kitail anahne wia? (b) Soangen kapai dah kan kitail kak alehdi sang atail kin doudouloale ni kapakap Mahsen en Koht? (Pil koasoia duwen koakon me oaralap koasoia “Tengedi Kehlail nan Padahk Mehlel.”)
8 Duwehte irail soun nting en Paipel pwukat, kitail anahne en doudouloale Mahsen en Koht oh sapwellimen Koht doadoahk ni peren oh poaden kapakap. Ni atail pahn kin wadek Paipel de sawaspen Paipel kan, kitail dehr wia met ni mwomwen tourist men me karuwaru oh kin mwadangasang ni ehu wasa kohlang ni pil ehu wasa pwe en kak kilelehdihte soahng koaros oh kilangdihte ekis. Ahpw, ni atail pahn kin onopki Paipel, kitail en kiheng atail ahnsou oh uhdi oh perenki dahme kitail kilikilango.b Ni atail pahn kin, ni meleilei, medewe oh doudouloale dahme kitail wadek, Mahsen en Koht pahn kamwekid atail mohngiong. E kin sair atail pepehm kan oh kamwekid atail madamadau. E pil kin kamwekid kitail en kasalehda atail madamadau loal kan ohng Koht ni kapakap. Imwilahn met, atail ehuong Siohwa pahn kehlailda, oh atail limpoak ong Koht pahn kamwekid kitail en doudoulahte idawehn Sises mendahki irair apwal akan. (Madiu 10:22) E sansal me doudouloale dahme Koht mahsanih inenen kesempwal ma kitail men kolokol atail lelepek lel ni imwi.—Luk 21:19.
9. Iaduwen atail kak ese ni mehlel me atail mohngiong kin mwadang alehdi oh kapwaiada Mahsen en Koht?
9 Sapwellimen Sises karasaras pil kasalehda me e pahn mie kahpwal akan ni kekeirada en werentuhkeo, de mahsen en Koht. Ahpw, pwe en kak wiahte tohnpadahk lelepek emen, kitail anahne: (1) pohnese kahpwal ko me kin pwarada nan pwehl suwed ko me sansalda nan karasaraso oh (2) song en kapwungala de song en kalikitailsang kahpwal pwukat. Ni ahl wet, kitail kak kamehlele me atail mohngiong pahn alialehte werentuhkehn Wehio oh kasalehda wah mwahu.
“Pohn Kisinial kan” —Irail akan me Nohn Kedirepw
10. Kawehwehda soangen pwehl keieuo nan sapwellimen Krais karasaras, oh kawehwehda wehwehn pwehl wet.
10 Tepin pwehl me werentuhkeo pwupwudiong powe iei “pohn kisinial kan,” wasa me aramas “tiakedi werentuhkeo.” (Luk 8:5) Pwehl me mih pohn kisinial akan me kohlahng mweten krein kin dirkihla aramas akan me kin wie alialu powe. (Mark 2:23) Pil duwehte irail akan me kin mweidohng mwekimwekid en sampah en kihsang arail ahnsou oh kehl laud pahn pil diarada me irail kin nohn kedirepwla oh sohte kak en kekeirada arail kalahnganki mahsen en Koht. Irail kin rong mahseno, ahpw irail sohte kin doudouloale. Arail mohngiong sohte kin mwekidki. Mwohn arail kin kekeirada arail limpoak ong mahseno, “Tepilo kin kohdo oh kihsang mahseno nan mohngiongirail kan pwe re en dehr pwoson oh mourkihla.” (Luk 8:12) Iaduwen met kak uhdi?
11. Iaduwen atail pahn kak kanahieng pwe irair en atail mohngiong en dehr duwehte pwehl kekeluwako?
11 Soahng tohto kak wiawi pwe en pere atail mohngiong en dehr duwehla pwehl me mih pohn kisinialo me sohte kak kapwurehda wah. Pwehl kekeluwak wet me aramas kalapw tiakseli kak mwuterekla oh mwahula en poad ma e pahn weiweida oh kauwala kisinialo ekis wasa tohrohr. Pil duwehte met, en wiahda ahnsou mwahu en onop oh doudouloale Mahsen en Koht kak kahrehda mohngiong en duwehla pwehl mwahu. Mehn kapir ong met iei en dehr nohn kedirepwki mehkan en mour wet. (Luk 12:13-15) Ahpw, en tehk kanahieng oh koasoanehdi ahnsou ong medemedewe “soahng kesempwal akan” en mour.—Pilipai 1:9-11.
“Pohn Wasa Takain” —Irail me Masepwehk
12. Ia uhdahn kahrepen tuhkeo eh kin mengila nan pwehl keriauwo nan sapwellimen Sises karasaras?
12 Ni ahnsou me werentuhkeo pwupwudiong pohn pwehl keriauo, e sohte ihte mihmihte powe duwehte dahme wiawi ong mehn tepio. E miehda kalowe oh wosada. Ahpw, ni ketipin e dakeda oh dakerada kisin werentuhke me ahpwtehn wos, karakar en ketipino kamwoatoredi oh kamengila tuhkeo. Ahpw, tehk mwahu oaretik kesempwal wasaht. Uhdahn kahrepen kisin tuhkeo eh mengila, kaidehn pwehki karakar en ketipin. Tamataman me werentuhke me wosada nan pwehl mwahuwo pil saradahng ketipino, ahpw e sohte mengila—ahpw e masalpeseng. Dahme kahrehda re wekpeseng? Sises kasalehda me kisin tuhke mengila pwehki “kalowe kan sohte lel wasa loal” oh e “sohte ale lemwulemwur en pwehlo.” (Madiu 13:5, 6; Luk 8:6) “Wasa takain” kin mihmi pahnanginte kisin pwehl me kin mih powe, oh e kin perehsang kalowen werentuhkeo en kak kohdihla lel wasa me loal pwe en kak ale lemwulemwur oh kehl me itar. Kisin tuhkeo kin mengila pwehki pwehlo me nohn pedeped.
13. Soangen aramas dah me duwehte pwehl pedepedo, oh ia uhdahn kahrepe arail kin masak?
13 Nan karasaraso, wasaht kin karasaiong irail akan “me kin peren ni arail kin ale mahseno” oh kin idawehn Sises ni ngoang; “erein ahnsou tehkis.” (Luk 8:13) Ni ahnsou me ketipin kehlailo kin dakerirailda me iei “kasongosong oh kalokolok kan,” irail kin masepwehkada oh kesehla arail peren oh kehl oh uhdisang idawehn Krais. (Madiu 13:21) Ahpw, uhdahn kahrepen arail masak—kaidehn pwehki uhwong kan. Ni mehlel, aramas rar kei en sapwellimen Krais tohnpadahk kan kin lelohng uhwong oh dadaurete pahn kalokolok kan ahpw irail kin tengedihongete arail pwoson. (2 Korint 2:4; 7:5) Eri, uhdahn kahrepen arail kin masepwehkada oh pwupwuweisang nan padahk mehlel iei pwehki irair kekeluwak en arail mohngiong kin irehdi irail sang doudouloale itar duwen soangen mehn kangoang kan oh mehkan en pali ngehn. Imwilahn met, arail perenki oh kalahnganki Siohwa oh sapwellime mahsen kan kin nohn pedeped oh nohn luwet oh sohte kak en powehdi uhwong kan. Dahme emen anahne wia ma e sohte men imwila duwehte met?
14. Soangen ewen kahk dah kan emen anahne en wia pwe en pere irair en eh mohngiong eh dehr duwehla pwehl pedepedo?
14 Emen emen anahne en tehk kanahieng pwe en dehr mie mehn kerempwa kehlail kan nan mohngiongatail me duwehte loal suwed kehlail, roporop kan me mieier ahpw saikinte sansalda de pil pepehm loal kan me sohte sansal. Ma miehier soangen mehn kerempwa pwukat, manaman me kohsang Mahsen en Koht kak kihsang mepwukat. (Seremaia 23:29; Episos 4:22; Ipru 4:12) Ni emen emen pahn doudouloale ni kapakap mepwukat, met kak kamwekid “Mahsen en Koht en poadidihla” loal nan mohngiong en mehmeno. (Seims 1:21) Met pahn sewese kitail en dadaurete oh powehdi ahnsou kan en kasongosong oh e pahn kihong kitail kangoang pwe kitail en tengetenge nan pwoson mendahki kalokolok kan.
“Pwehl me Mie Tekatek” —Mohngiongarail ni Karasaras me Pwalpeseng
15. (a) Dahme kahrehda kitail anahne en tehk kanahieng pwehl kesiluho me sansalda nan sapwellimen Sises karasaras? (b) Dahme kin wiawi ong pwehl kesiluhwo, oh dahme kahrehda?
15 Soangen pwehl kesiluwo iei pwehl me mie tekatek kan oh kitail anahne tehk kanahieng duwen pwehl wet pwe e kin kereniong duwehte pwehl mwahuo. Duwehte pwehl mwahu, pwehl tekatek wet kin mweidohng werentuhkeo en wosada oh miehla kalowe. Nin tepio, e pahn sohte wekpeseng ni kekeirada en tuhke tikitik wet nan pwehl riauwo. Ahpw, mwurin ahnsou ieu, irair ehu kin pwarada me pahn kamwopwiala tuhkeo. Weksang pwehl mwahu, pwehl wet kin dirkihla tekatek kan. Ni tuhke pwulopwul wet eh kin pwaradahsang nan pwehlo, e pahn anahne siaiong ‘tekatek kan me pil wosada limwa kan.’ Ni ahnsou me tuhke kan koaros pahn kin nantihong uwen arail kak en ale mehn karoson kan, marain oh wasa nan pwehl, a ni imwilao, tekatek kan pahn kipehdi tuhkeo oh ‘kasokehla.’—Luk 8:7.
16. (a) Soangen aramas dah me duwehte pwehl tekateko? (b) Nin duwen dahme pwuhk en Rongamwahu siluh ko kin kasalehda, dahme tekatek ko kin wehwehki?—Kilang footnote.
16 Soangen aramas dah me rasehng pwehl tekatek wet? Sises kawehwehda: “Me mweredi nan dihpw tekatek ko wehwehki irail kan me kin rong mahseno, ahpw anahn akan oh kepwe kan oh peren kan en sampah wet kin koaitenla oh kasokehla mahseno nan kapehdirail kan, iei me e sohte kin wahki.” (Luk 8:14) Duwehte werentuhkeo oh tekatek kan nan pwehlo eh kin wiahkinteieu wos ahnsou tehieu, ekei aramas kin song en wiahda wasa ong mahsen en Koht oh “peren en sampah kan” ni ahnsou tehieu. Padahk mehlelo en sapwellimen Koht mahsen kan kin mwerediong nan arail mohngiong ahpw e kin anahne siaiong soahng teikan me e kin raparapahki me pil anahne en tehk. Mohngiongarail ni karasaras kin pwalpeseng. (Luk 9:57-62) Met kin kahrehong irail en sohte kak kihong ahnsou itar ong kapakap oh doudouloale ni katapan Mahsen en Koht. Irail sohte kin alehda Mahsen en Koht pwon oh arail kalahnganki Mahsen en Koht sohte itar en sewese irail en dadaurete. Ekis ekis, mehkan me irail kin raparapahki me sohte pid pali ngehn pahn powehdi arail perenki soahng ngenin kan lao lel e “kasokihala.”c Ia uwen met eh wia imwila kansensuwed ehu ong irail ako me sohte poakohng Koht ni mohngiong unsek!—Madiu 6:24; 22:37.
17. Soangen pilipil dah me kitail anahne en wia nan atail mour pwe tekatek kan ni karasaras en dehr kasokekitailla?
17 Apwal oh peren en sampah sohte pahn kasokeikitailla ma kitail pahn kin mwohneki mehkan me ngenin sang kepwe kan. (Madiu 6:31-33; Luk 21:34-36) En dehr soikala atail kin wadek Paipel oh doudouloale soahng kan me kitail kin wadek. Kitail pahn kak diarada ahnsou laud en kiheng atail madamadau oh doudouloale ni kapakap ma kitail pahn kihsang nan atail mour soahng soh katepe kan. (1 Timoty 6:6-8) Ladu en Koht kan me wia met—me kin usadasang tekatek kan nan pwehlo oh ale mehn karoson, marain oh wasa itar ong en kak wa mwahu—oh irail kin pehm kapai kan sang Siohwa. Sandra, me mahki sounpahr 26, koasoia: “Ni ahi kin doudouloale kapai kan me I alehdi sang padahk mehlel, I kin diarada me sampah wet sohte kak en kihong ie mehkot me pahn rasehng met!”—Melkahka 84:11.
18. Iaduwen atail kak kolokolete sapwellimen Koht mahsen kan oh dadaurete nin duwen Kristian kei?
18 E sansal me kitail koaros, me pwulopwul oh mah, anahne kolokolete sapwellimen Koht mahsen oh dadaurete nin duwen sapwellimen Krais tohnpadahk kan erein atail mour me sapwellimen Koht mahsen mihmi rehtail. Ihme kahrehda, kitail en tehk kanahieng me pwehl en atail mohngiong ni karasaras en dehr kekeluwak, pedepedla, de dirkihla tekatek kan ahpw en mwuterekete oh loal. Ni ahl wet, kitail pahn kak en alehda mahsen en Koht ni unsek oh “wa mwahu ni atail pahn dadaurete.”—Luk 8:15.
[Nting tikitik me mi pahs]
a Nan artikel wet, kitail pahn koasoiapene duwen keieun ire sang ire siluh me kesempwal. Kitail pahn koasoiapene ire riau teikan nan artikel kan en mwurin met.
b Ni omw pahn doudouloale ni kapakap ire ehu nan Paipel me ke wadek, ke kak pein idek rehmw peidek pwukat: ‘Met kin kasalehda ekei irair akan en Siohwa? Iaduwen met eh pwungiong oaralap en Pwuhk Sarawi? Iaduwen ai pahn doadoahngki met nan ai mour oh pil sewese meteikan?’
c Nan pwuhk en Rongamwahu siluh ko me pid karasaras en Sises, apwal oh peren kan en sampah me kin kasokehla werentuhkeo: “Pwunod en mouren sampah,” “noahrok en dipwisou kan,” “soangen ineng teikan,” oh “peren en sampah.”—Mark 4:19; Madiu 13:22; Luk 8:14; Seremaia 4:3, 4.
Ia Ahmw Pasapeng kan?
• Dahme kahrehda kitail anahne ‘kolokolete oh peikiong sapwellimen Sises mahsen’?
• Iaduwen atail kak mweidohng sapwellimen Koht mahsen kan en mihmihte nan mohngiongatail oh kamwekid atail mour?
• Soangen aramas dah me kin karasaiong soangen pwehl pahieu nin duwen me Sises mahsanih?
• Iaduwen atail kak koasoanehdi ahnsou pwehn doudouloale Mahsen en Koht?
[Box/Picture on Page 8]
“Tengedi Kehlail Nan Padahk Mehlel”
TOHNPADAHK werei tohto en Krais kin kasalehda ni pahr tohtohie me irail uhdahn kin “tengedi kehlail nan padahk mehlel.” (2 Piter 1:12) Dahme kin sewese irail en dadaurete? Tehk duwen arail pasapeng kan.
“Ni imwin rahn koaros, I kin wadekala ekis wasa nan Pwuhk Sarawi oh kapakap. Mwuri, I kin medewe duwen dahme I wadek.”—Jean, papidais nan pahr 1939.
“Doudouloale duwen iaduwen Siohwa me nohn lapalap, ahpw kin poakohng kitail mehlel kin kihong ie pepehm en sohte perki mehkot oh kehlail en kak dadaurete ni lelepek.”—Patricia, papidais nan pahr 1946.
“Ni ahi kin kolokolete ahi koasoandi en onop Paipel mwahu oh sukuhliki oh alehda ‘soahng loal kan me pid Koht,’ met kin kahrehong ie en kak doulahte oh papah Siohwa.”—1 Korint 2:10; Anna, papidais nan pahr 1939.
“I kin wadek Paipel oh sawaspen Paipel kan ni ahl ehu me I en kak kasawih ahi mohngiong oh wiewia kan.”—Zelda, papidais nan pahr 1943.
“Ahnsou me ien kin keieu perenki iei ahnsou me I kin alialu oh kapakap ong Siohwa oh ndaiong Ih ahi pepehm mehlel kan.”—Ralph, papidais nan pahr 1947.
“I kin tepikihda rahn koaros ni ahi kin wadek Iren Rahn oh ekis wasa nan Paipel. Met kin kihong ie mehkot kapw en doudouloale erein rahno.”—Marie, papidais nan pahr 1935.
“Ong ngehi, koasoakoasoia ehuehu ire me kohsang sawaspen Paipel kin inenen kamwekid ie.”—Daniel, papidais nan pahr 1946.
Iahd me ke kin koasoanehdi ahmw ahnsou pwehn doudouloale Mahsen en Koht oh kapakap?—Daniel 6:10b; Mark 1:35; Wiewia 10:9.
[Kilel nan Pali 11]
Ni atail pahn kin mwohneki mehkan me ngenin, kitail pahn kak “kasalehda wah kan ni atail kin dadaurete”