Kamwahu Kan Me Kin Kohsang Poakohng Mahsen En Koht
“Ke dehr kesehla kupwurokong, pwe ih me pahn sinsileiuk . . . . Pwoalehdi teng, e ahpw pahn kawauwihiukala.”—LEPIN PADAHK 4:6, 8.
1. Ia wehwehn poakohng Mahsen en Koht ni mehlel?
WADEWADEK Pwuhk Sarawi kin inenen kesempwal ong Kristian men. Ahpw, edetehn emen pahn wadek Mahsen en Koht, met kelepw sohte kin wehwehki me e kin poakohng Mahsen en Koht. Iaduwen ma emen pahn kin wadek nah Pwuhk Sarawi ahpw, ni ahnsowohte, e kin wia soahng kan me Pwuhk Sarawi kin padahkiong kitail en dehr wia? Ma emen kin wia met, e kin kasalehda me e sohte kin poakohng Mahsen en Koht ni ahl me soun nting en Melkahka 119 kin poakohng Mahseno. Pwehki e kin poakohng Mahsen en Koht, met kamwekid ih en kapwaiada kosonned akan me mihmi loale.—Melkahka 119:97, 101, 105.
2. Kamwahu dah kan kin kohsang erpit me poahsoanehda pohn Mahsen en Koht?
2 Pwehn mourki Mahsen en Koht, emen anahne kapwungala eh madamadau kan oh elen mour ahnsou koaros pwehn pahrekiong Pwuhk Sarawi. Ma emen pahn wia met, e kin kasalehda erpit me kohsang Koht, oh met kin wehwehki me e kin doadoahngki ni ahl me keieu mwahu kupwurokong oh wehwe mwahu sang dahme e kin sukuhliki sang Pwuhk Sarawi. “Ke dehr kesehla kupwurokong, pwe ih me pahn sinsileiuk. Poakohng kupwurokong, e ahpw pahn kahrehiong uhk omw pahn lapalapala. Pwoalehdi teng, e ahpw pahn kawauwihiukala. E pahn wiahla elin kapwat lingan ehu pohn moangomw.” (Lepin Padahk 4:6, 8, 9) Ia uwen kaselel kangoang wet en kakairada atail limpoak ong Mahsen en Koht oh mweidong en kahre atail mour! Ihs me sohte pahn men ale mehn perepe, lapalapala, oh wahula?
Mehn Perepe Sang Kahpwal Suwed akan
3. Dahme kahrehda e kesempwal Kristian akan en ale mehn pereparail, oh perepe wet pahn perehla irail sang ihs?
3 Ni ahl dahieu me kupwurokong pahn kak perehla emen ni ah kin ale kupwurokong wet sang eh onop oh kapwaiada Mahsen en Koht? Ehu, met pahn perehla ih sang Sehdan me Tepil. Sises padahkiong sapwellime tohnpadahk kan en kapakap ong Koht en ketin nekid irail sang soahng suwed kan me kin kohsang Sehdan. (Madiu 6:13) Nan rahn pwukat, e wia anahn kesempwal ehu en wia pekipekohte ni ahnsou me kitail pahn wia atail kapakap kan. Sehdan oh nah ngehn saut kan lekidekla sangehr nanleng nan pahr 1914, oh ih kahrepe Sehdan kin “inenen lingeringer kowahlap pwehki eh ese me eh ahnsou mwotomwotalahr.” (Kaudiahl 12:9, 10, 12) Ni ahnsou wet, eh lingeringer kin inenen laud sang mahs pwehki ah sohte pweida nin doken ah kin mahmahweniong irail akan me kin “kapwaiada kosonned en Koht kan, oh me loaloapwoatohng padahk me Sises ketin kadehdehier.”—Kaudiahl 12:17.
4. Iaduwen Kristian akan kak perehla irail sang kasongosong oh lidip kan en Sehdan?
4 Sehdan, nan ah lingeringer, kin uselahte oh wiewia kahpwal akan ong Kristian sounkalohk akan, oh kin kahrehdo kalokolok lemei kan oh mehn kerempwa teikan pwehn kauhdi doadoahk en kalohk. E pil kin men pitihalahng sounkalohk en Wehio kan pwe ren kin mwohnikihla en wiahla aramas lapalap nan sampah wet, oh perenki mour en dangahnga, oh ahneki kepwehn sampah tohto, oh rapahki ineng en uduk oh mehn kamweit kan laudsang arail kesempwaliki ahnsou ong doadoahk en kalohki Wehio. Dahme kin perehla sapwellimen Koht ladu lelepek kan en dehr lohdi pahn kasongosong pwukat oh lidip kan en Sehdan? Ni mehlel, e kesempwal kitail en kapakap, karanih Siohwa, oh pwoson sapwellime inou kan. Ahpw mehpwukat koaros kak pweida ma kitail kin ngoangkihla oh loalokongkihla mehn kataman kan en Mahsen en Koht. Kitail pahn tamanda mehn kataman pwukat ma kitail pahn wadek Pwuhk Sarawi oh sawaspen Pwuhk Sarawi kan, iang towehda mihding kan en Kristian, kapwaiada kaweid en Paipel kan me kohsang iengatail me pwoson akan, oh doudouloale oh kapakap pwehn doadoahngki nan atail mour kaweid me kin kohsang Pwuhk Sarawi me sapwellimen Koht Ngehn Sarawi kin katamankin kitail.—Aiseia 30:21; Sohn 14:26; 1 Sohn 2:15-17.
5. Ni ahl dah kei irairen erpit me kin poahsoanda pohn Mahsen en Koht kin perehla kitail?
5 Irail akan me kin poakohng Mahsen en Koht kin ale mehn perepe sang wiewia teikan. Karasepe ieu, re sohte kin ahneki pwunod laud oh soumwahu kan me kin kohsang wiewia suwed kan duwehte doadoahngki wini suwed, doadoahngki tipaker, oh wia dipen nenek. (1 Korint 5:11; 2 Korint 7:1) Re sohte kin kahrehda nanpwung suwed nanpwungen aramas akan pwehki lipaned oh lokaia soh-kadek kan. (Episos 4:31) Re pil sohte kin ahneki madamadau en peikasal me kin kohsang onopki loalokong widing kan en sampah wet. (1 Korint 3:19) Sang ni ahr kin poakohng Mahsen en Koht, re kin ale mehn perepe pwehn perehla irail sang mehkan me pahn kakete kauwehla ahr nanpwungmwahu rehn Koht oh arail koapworopwor en mour soutuk. Re kin soupisengki sewese mehn mparail kan en pwoson inou kaselel kan me mih nan Paipel, pwe irail ese me met ‘pahn doarehla pein irail oh pil irail kan me kin rong irail.’—1 Timoty 4:16.
6. Iaduwen erpit me kin poahsonehda pohn Mahsen en Koht perehla kitail pahn ahnsou apwal akan?
6 Ni mehlel, aramas koaros—iangahki irail akan me kin poakohng Mahsen en Koht—pahn kak lelohng “paisuwed.” (Eklesiasdes 9:11) Ekei rehtail uhdahn pahn lelohng kahpwal kan duwehte melimel, lapake, oh pil soumwahu laud kan, aksident kan, oh mehla. Ahpw, kitail pil kin ale mehn perepatail. Oh pil, kahpwal pwukat sohte kak kasorehla mehmen me uhdahn poakohng Mahsen en Koht. Ihme kahrehda, kitail en dehr nohn daulihla pwunodki dahme pahn wiawi ni ahnsou kohkohdo. Mwurin kitail pahn wia mehkan me pahn perehla pein kitail, e pahn mwahu en mweidong Siohwa atail pwunod kan oh sohte pahn mweidong kahpwal akan en mour en nan rahnpwukat en kihsang atail popohl. (Madiu 6:33, 34; Pilipai 4:6, 7) Medemedewe duwen koapworopwor en kaiasada oh mour mwahu ehu ni ahnsou me Koht pahn ‘onehda sapahl mehkoaros.’—Kaudiahl 21:5; Sohn 11:25.
En Kasalehda me Pein Komwi Kin Wia “Pwelmwahu”
7. Karasaras dahieu me Sises padahkiong pokono me kohdohng reh pwehn rong sapwellime padahk?
7 Sises, nan sapwellime karasaras, kasansalehda kesempwalpen en ahneki madamadau pwung ong Mahsen en Koht. Nin doken en Sises kalohki Rongamwahu nan Palestine, pokon kan kin kohpene oh rong eh padahk kan. (Luk 8:1, 4) Ahpw kaidehn aramas koaros uhdahn poakohng Mahsen en Koht. Ni sansal, aramas tohto kin kohla rehn Sises pwe re men kilang manaman kan de re kin perenki rong sapwellime padahk kaselel kan. Ihme kahrehda, Sises padahkiong pokono karasaras wet: “Aramas emen kohieilahng kamwarak eh kisin werentuhke kei. Ni eh kamwakamwarak kisin werentuhke ko nan sapwe, ekei mweredi ong pohnial, ahpw aramas tiakedi oh menpihr kan kangasang. Ekei mweredi ong wasa takain, re ahpw wosadahte mengila; pwehki eh sohte lemwulemwur nan pwehlo. Ekei mweredi ong nanpwungen dihpw tekatek me iang kisin werentuhke ko wosada oh keirda; re ahpw mehla pwehki dihpw tekatek ko eh kasokirailla. A ekei mweredi ong nan pwelmwahu, re ahpw keirda oh wa—weren kaparapar epwiki sang ni tahpwteieu.”—Luk 8:5-8.
8. Nan sapwellimen Sises karasaras, ia wehwehn werentuhke?
8 Sapwellimen Sises karasaras kasalehda me mwekid en aramas akan pahn wekpeseng ni arail pahn rong Rongamwahuwo, oh met pahn poahsoanehda pohn irairen mongiong en aramaso. Werentuhke iei “mahsen en Koht.” (Luk 8:11) De, nin duwen pil ehu kawehwe en karasaras kasalehda, werentuhke iei “mahsen duwen Wehin Koht.” (Madiu 13:19) Sises kak doadoahngki lokaia riau pwukat koaros, pwe oaralap en Mahsen en Koht iei Wehin nanleng me Sises Krais pahn kaunda nin duwen nanmwarki oh Siohwa pahn doadoahngki Wehi wet en kalinganahda mware oh sapwellime kaunda. (Madiu 6:9, 10) Ihme kahrehda, werentuhke kin karasaiong Rongamwahu me mih nan Mahsen en Koht. Sounkadehdehn Siohwa kan kin kawehwehda Rongamwahu en Wehi wet ni arail kin, ni karasaras, kamwarak werentuhke ko ni ahr kin kahlemengih tepin Sounkamwarak, iei Sises Krais. Ni soangen ahl dah kei aramas akan kin mwekidki rongamwahu?
9. Ia wehwehn weren tuhke kan me pwupwudiong (a) pohnialo? (b) nan wasa takain? (c) nan dihpw tekatek ko?
9 Sises kasalehda me ekei werentuhke kan pahn pwupwudiong pohnialo oh aramas pahn tiakidi. Met kin karasaiong aramas akan me kin nohn kedirepw, oh werentuhkehn Wehio sohte kak tengehdi nan mohngiongirail kan. Mwohn irail kak kakairada limpoak ong Mahsen en Koht, “Tepil ahpw kin kohdo oh kihsang mahseno nan mohngiongirail kan pwe re en dehr kin pwoson oh mourkihla.” (Luk 8:12) Ekei war ako me pwupwudiong nan wasa takain. Met kin wehwehki me irail kan me kin rong mahsen en Paipel oh kin alehte oh perenkihda, ahpw e sohte kin lel nan kapehdirail kan. Ni ahnsoun kasongosong de ni ahnsou irail kin apwaleki kapwaiada kaweid en Paipel, “re kin mwadang pwupwuweisang” padahk mehlel pwe re sohte kehlail ni pali ngehn. (Luk 8:13) Oh pil, ekei aramas kin rong mahseno, ahpw re kin mweidong “anahn akan oh kepwe kan oh peren kan en sampah wet kin koaitenla oh kasokehla mahseno nan kapehdirail kan.” Ihme kahrehda, re kin duwehte kisin tuhke kan me kin mehla pwehki “dihpw tekatek ko eh kasokirailla.”—Luk 8:14.
10, 11. (a) Ihs me kin rasehng waro me pwupwudiong nan pwelmwahwo? (b) Dahme kitail anahne wia pwehn “katengehdi” ong nan kapehdatail Mahsen en Koht?
10 Ni kaimwisekla, ekei werentuhke kan me pwupwudiong nan pwelmwahuwo. Met kin wehwehki aramas akan me kin rong mahseno ki “mohngiong mwahu.” Kitail koaros men kamehlele me pein kitail kin iang pwihn wet. Ahpw, ni kaimwisekla, dahme Koht kupwurki me kin keieu kesempwal. (Lepin Padahk 17:3; 1 Korint 4:4, 5) Mahsen en Koht kin kasalehda me kitail kak kasalehda me kitail ahneki “mohngiong mwahu” de soh sang atail wiewia kan ni ahnsouwet lao lel ni ahnsou kitail pahn mehla de Koht pahn kasorehla koasoandi suwed wet. Ma kitail mwadang mwekidki Rongamwahu nin tepio, e mwahu. Ahpw, irail akan me kin ahneki mohngiong mwahu, kin alehda Mahsen en Koht oh “katengehdi ong nan kapehdirail oh dadaurete wa mwahu.”—Luk 8:15.
11 Ieite ahl me kak uhdahn katengehdi nan mohngiongatail Mahsen en Koht iei sang ni pein atail kin kelepw wadek oh onop oh pil ni atail kin iang iengetail kan me kitail mihpene nan pwoson oh wia met. Met pil kin pidada atail pahn nantihong kang mwenge en ngehn koaros me kin kohsang pwihno me idihda en apwaliala mehkan ni pali ngehn en sapwellimen Sises tohnpadahk mehlel akan. (Madiu 24:45-47) Ni ahl wet, irail akan me kin katengehdi ong nan kapehdarail kan Mahsen en Koht kin mwekidki limpoak en “dadaurete wa mwahu.”
12. Soangen wa dah kitail anahne kapwarehda ni atail kin dadaur?
12 Soangen wah dah me kin pwarila nan pwel mwahu? Me uhdahn kin wiawi, wahro kin wosada wiahla tuhke laud oh kin weuwa soangen weren tuhke ohte, me kak kamwarekseli pwehn pil uhd wa. Ni ahlohte, irail akan me nan kapehdirail kan me mwahu, werentuhke en mahseno kin kekeirada loalarail, oh met kin kahrehda irail en kekeirada ni pali ngehn lao lel pein irail pil pahn kak kamwareki werentuhke kan nan mohngiong en aramas teikan. (Madiu 28:19, 20) Oh irail kin dadaurete nan arail doadoahk en kamwarak. Sises kasansalehda kesempwalpen irairen dadaur ni ahnsoun kamwarak ni eh mahsanih met: “Ahpw me pahn dadaurete lel ni imwi, ih me pahn mourla. Oh Rongamwahu en Wehin Koht pahn lohkseli wasa koaros nin sampah, pwe kadehde en mie ong aramas koaros—a mwuri, imwin sampah ahpw pahn kohdo.”—Madiu 24:13, 14.
“Wa Mwahu ni Soangen Doadoahk Mwahu Koaros”
13. Mehnia kapakap me Pohl wia me kin kadokepene kapwarehda wa mwahu oh Mahsen en Koht?
13 Wahnpoaron Pohl pil koasoia duwen kesempwalpen kitail en kapwarehda wa mwahu, oh e kin kadokepene kapwarehda wa mwahu oh Mahsen en Koht. E kapakapki ienge tounkaudok akan en mweidong “Koht en ketin audehkinkumwailda kupwure iangahki erpit koaros oh marain sang rehn Ngehno. Eri, kumwail ahpw pahn kak momour nin duwen me Kauno [“Siohwa,” New World Translation] kin ketin kupwurki, oh pil wiewia dahme e kin ketin kupwurperenki. Amwail mour pahn kasalehda wa mwahu ni soangen doadoahk mwahu koaros.”—Kolose 1:9, 10; Pilipai 1:9-11.
14-16. Me pahrekiong ahn Pohl kapakap, soangen wa dah me irail akan me kin poakohng Mahsen en Koht kin kapwarehda?
14 Pohl kin kasalehda me loalokongkihla Paipel, kaidehn met me keieu kesempwal. Ahpw limpoak ong Mahsen en Koht kin kamwekid kitail en “momour nin duwen me Siohwa kin ketin kupwurki” nin duwen kitail ‘pahn kasalehda wa mwahu ni soangen doadoahk mwahu koaros.’ Dahkot doadoahk mwahu wet? Doadoahk en kalohki Rongamwahu en Wehio kin wia pwukoah kesempwal ong Kristian koaros nan imwin rahn akan. (Mark 13:10) Oh pil, irail akan me kin poakong Mahsen en Koht kin wia uwen me re kak ni ahr kin kihda ahr sawas en mwohni me kin utungada doadoahk wet. Re kin perenki en wia pwais kaselel wet, pwe irail ese me “Koht kin ketin poakohng me kin perenki kihwei mehkot.” (2 Korint 9:7) Arail sawas en mwohni kan kin sewese Bethel epwiki samwa oh iei wasa me doadoahk en kalohki Wehio kin koasoansoandi oh nan ekei Bethel kan, Paipel kan oh sawaspen Paipel kan kin wiawihda. Arail sawas kan kin pil sewese anahn akan en kapokon laud en Kristian akan, oh pil pwainen mehn peidaid kan ong soundoulik kan, misineri kan, oh ekei sounkalohk kaukaule kan.
15 Doadoahk mwahu teikan kin pidada kauwada oh apwaliala wasahn kaudok mehlel akan. Limpoak ong Mahsen en Koht kin kamwekid sapwellime Siohwa tohnkaudok akan en tehk me epwelpe mwahu en kohieng wasahn Kapokon kan oh Kingdom Hall kan ahnsou koaros. (Pil kilang Nehmaia 10:39.) Pwehki mwaren Koht kin kileledi ni diden wasahn kaudok pwukat, e inenen kesempwal loale oh likin ihmw pwukat en mwakelekel oh pil irail akan me kin wia kaudok nan Kingdom Hall pwukat en tiahk mwahu. (2 Korint 6:3) Ekei Kristian akan kin kak pil wia laudsang met. Limpoak ong Mahsen en Koht kin kamwekid irail en kohla wasa doh kan pwehn iang doadoahk en kauwada imwen kaudok kapw kan, wasa me anahn laud mie pwehki semwehmwe de soakoahiek.—2 Korint 8:14.
16 “Kasalehda wa mwahu ni soangen doadoahk koaros” pil kin wehwehki apwaliahda mwahu atail pwukoah en peneinei oh kasalehda me kitail kin nsenohki iengatail Kristian akan. Limpoak ong Mahsen en Koht kin kamwekid kitail en nsenohki anahn akan en irail akan “me kisehn atail pwoson” oh “kapwaiada lelepek ong Koht nan arail peneinei.” (Kalesia 6:10; 1 Timoty 5:4, 8) Ni ahnsou me kitail kin mwemweitla rehn me soumwahu kan oh kamweitala irail me mwahiei kan, mehpwukat kisehn doadoahk mwahu kan. Oh doadoahk kaselel ehu me pwihn en elder kan nan mwomwohdiso kan oh pwihn en Hospital Liaison Committee kan kin sewese irail akan me kin lelohng kahpwal akan me kin pid epwelen wini kan! (Wiewia 15:29) Kahpwal akan kin tohtohla—ekei me kin pid melimel kan, lapake, rerrer en sahpw oh ekei pwehki aramas akan me wiahda kahpwalo. Ki sawas en sapwellimen Koht Ngehn Sarawi, Sounkadehdehn Siohwa kan me wia mehn kahlemeng mwahu nan wasa tohto nin sampah ni ahr kin mwadangete kihda sawas ong iengarail pwoson akan oh pil meteikan me kin lelohng kahpwal pwukat oh aksident teikan. Wiewia pwukat koaros iei wah mwahu kan en irail me kin poakohng Mahsen en Koht.
Kapai Lingan kan Ong Ni Ahnsou Kohkohdo
17, 18. (a) Dahme kin pweida pwehki kamakamwarak en weren Wehio? (b) Wiewia kapwuriamwei dah kei irail me kin poakohng Mahsen en Koht pahn kereniong kadehde?
17 Kamwarekseli weren tuhke kan en Wehio kin wiwiawi oh wahdohng aramas akan kapai laud kan. Nan pahr kan me ahpwtehn nekier, aramas 300,000 samwa ni ehu ehu pahr kin mweidong rongamwahu en Paipel en tengehdi nan kapehdirail kan oh irail kin uhd inoukihong Siohwa arail mour oh papidaiskihla pihl. Kapai lingan kan awiawih irail ni ahnsou kohkohdo!
18 Ni ahnsou keren, irail akan me kin poakohng Mahsen en Koht ese me Siohwa Koht pahn kalinganada mware. “Papilon Lapalap,” iei pwihn en kaudok likamw akan nin sampah pwon, pahn kamakamala. (Kaudiahl 18:2, 8) Eri, Nanmwarki Sises Krais pahn kemehla irail akan me kahng kapwaiada Mahsen en Koht. (Melkahka 2:9-11; Daniel 2:44) Mwuri, Wehin Koht pahn kihsang douluhl mwersuwed, mahwen, oh kahpwal teikan. Sohlahr anahne en kamweitala aramas akan pwehki medek, soumwahu, oh mehla.—Kaudiahl 21:3, 4.
19, 20. Koapworopwor kaselel dahieu pahn pweida ni ahnsou keren ong irail akan me kin uhdahn poakohng Mahsen en Koht?
19 Ia uwen doadoahk mwahu kan pahn tepida wiawi sang rehn irail akan me kin poakohng Mahsen en Koht! Aramas akan me pahn pitsang Armakedon pahn tepida wia doadoahk kaperen ehu en kaparadaisla sampah wet. Irail pahn ahneki pwais kaselel ehu en kaunopada anahn akan ong irail me ahneki koapworopwor me Koht pahn ketin kaiasada irail. (Sohn 5:28, 29) Ni ahnsowo, kaweid unsek me kohsang Kaunepen lahng oh sampah, Siohwa, ki sapwellime Ohl linganla, Sises Krais pahn kohwong irail tohnsampah kan. ‘Pwuhk ko pahn papahkpeseng,’ kasansalehda sapwellimen Siohwa kaweid kan ong koasoandi en mour nan sampah kapwo.—Kaudiahl 20:12.
20 Ni sapwellimen Siohwa ahnsou, pwihn unsek en Kristian mekeidi lelepek kan pahn alehdi ahr kating en iasadahlahng nanleng nin duwen “iengen Krais tohnsohso kan.” (Rom 8:17) Erein kaundahn Krais nan Pahr Kid, aramas koaros nin sampah me kin poakohng Mahsen en Koht pahn unsekla ni ahr madamadau oh paliwar. Mwurin arail kasalehda ahr lelepek ni ahnsou kaimwiseklahn kasongosong pahn wiawi, re pahn ale kating en mour soutuk oh paiekihda en wiahla “sapwellimen Koht seri kan nan arail saledek lingan.” (Rom 8:21; Kaudiahl 20:1-3, 7-10) Ahnsowo pahn wia ahnsou kaperen ehu! Ni mehlel, mendahki Siohwa kin ketikihong kitail koapworopwor en mih nanleng de sampah, ma kitail pahn dadaurete limpoak ong sapwellime Mahsen oh nantihong kasalehda erpit me kohsang powe, mehpwukat pahn sinsile kitailla. Oh ni ahnsou kohkohdo pwehki kitail kin ‘pwoalehdi teng, e ahpw pahn kawauwihiukala.’—Lepin Padahk 4:6, 8.
Komw Kak Kawehwehda Peidek Pwukat?
◻ Iaduwen omwi poakohng Mahsen en Koht pahn kak sinsileiuk?
◻ Ia wehwehn weren tuhke nan sapwellimen Sises karasaras, oh iaduwen e kin kamwarekpeseng?
◻ Iaduwen kitail kak kasalehda me kitail kin wia “pwelmwahu”?
◻ Irail akan me kin poakohng Mahsen en Koht pahn kak kasikasik ale kamwahu dah kan?
[Kilel nan Pali 26]
Werentuhke nan karasaras en Sises kin karasaiong Rongamwahu me mih nan Mahsen en Koht
[Credit Line]
Garo Nalbandian
[Kilel nan Pali 27]
Sounkadehdehn Siohwa kan kin kahlemengih Sounkamwarak Lapalap
[Kilel kan nan Pali 28]
Aramas akan me pahn pitsang Armakedon pahn pereperenki wahn tuhke kan nan sampah