Ia Wehwehn Saken Soutik En Kauno Ong Komwi?
“Eri, mehmen me kin tungoale sapwellimen Kaun-o pilawa de iang nim sapwellime dahl en wain ni soangen tiahk ehu me sohte wauneki Kaun-o, e pahn dipada ong kahlep oh ntahn Kaun-o.”—1 KORINT 11:27.
1. Mehnia kasarawi me keieun kesempwal me koasondier en wiawi nan pahr 2003, oh iawasa e tepida sang ie?
KASARAWI keieu en kesempwal me koasondi en wiawi nan pahr 2003 pahn wiawi mwurin kihrlahn ketipin en April 16. Sounakdehdehn Siohwa kan pahn tuhpene oh kasarawih katamanpen kamatalahn Sises Krais. Nin duwen me sansaldahr nan artikel en mwowe, Sises me tepiada kasarawih wet me pil kin adaneki sak en soutik en Kauno, mwurin ih oh sapwellime wahnpoaron ko arail kasarawiPahsohpa nan Nisan 14, 33 C.E. Pilawa soh mwut oh wain weitahta me kin doadoahk nan Katamano kin wehwehkiong weren Krais me sohte dihp oh nta me e kakerehdi—iei meirong wet kelehpw me kak pwainda sapahl aramas sang dihp me irail sohsohki oh mehla.—Rom 5:12; 6:23.
2. Mahsen en kalekehki aramas dah ehu me pwarada nan 1 Korint 11:27?
2 Irail akan me kin iang tungoale pilawa soh mwut oh wain me kin doadoahk ni Katamano kin wia met ni pwung oh wahu. Wahnpoaron Pohl kasalehda met ni sansal ni ahnsou me e ntingwohng irail Kristian en mahs akan nan Korint, wasa me irail sohte kin kasarawih sak en soutik en Kauno ni ahl me konehng. (1 Korint 11:20-22) Pohl ntingihdi: “Eri, mehmen me kin tungoale sapwellimen Kaun-o pilawa de iang nim sapwellime dahl en wain ni soangen tiahk ehu me sohte wauneki Kaun-o, e pahn dipada ong kahlep oh ntahn Kaun-o.” (1 Korint 11:27) Ia kesempwalpen mahsen pwuko?
Ekei kin Kasarawih Kataman Ni Ahl me Sapwung oh Sohte Konehng
3. Ia mwomwen wiewiahn irail Kristian en Korint tohto ni Kasarawi en Saken Soutik en Kauno?
3 Kristian en Korint tohto kin iang tungoal ni Katamano ni ahl me sapwung oh sohte konehng. Mie liaktohrohr nanpwungarail, oh nan ahnsou ehu, ekei kin wahdo kenarail mwengehn soutik kan oh kin tungoale mwohn de erein mihding wet kin wiawi, oh pak tohto irail kin tungoal oh nim daulihala. Irail sohte kin pepehd ni irair en madamadau oh pali ngehn. Met kin kahrehong irail en “dipada ong kahlep oh ntahn Kauno.” Irail akan me sohte mwengehn soutik men mwengehda oh arail madamadau sohla kak iang dahme wiawi. Ei, me tohto iang tungoal ni soh wahu oh irail sohte uhdahn wehwehki duwen kesempwalpen kasarawi wet. E sohte. E sohte wia mehkot kapwuriamwei me pein irail me wahdo pakedeikparail!—1 Korint 11:27-34.
4, 5. Dahme kahrehda irail ako me kin iang tungoal ni Katamano anahne en kasawih pein irail?
4 Nan pahr koaros, ni ahnsou Kataman kin kereniongehr leledo, e kesempwal ong irail akan me kin iang tungoal en kin pein kasawi arail mour. Irail anahne en kehlail ni pali ngehn pwe ren kak iang kisehn kamadipw sarawi ni pwung. Emen me sohte kin kasalehda wahu de pil kin uhwong sapwellimen Sises meirong pahn kak piskensang sapwellimen Koht pwihn, duwehte dahme wiawihong irail mehn Israel ko me iang tungoal ni kamadipw sarawi ni arail mihmi nan irair en samin.—Lipai 7:20; Ipru 10:28-31.
5 Pohl kin karasaiong Katamano, kamadipw sarawi en irail mehn Israel en mahs. E koasoia duwen irail ako me iang tungoal arail ehukihpene rehn Krais oh mwuhri nda: “Kumwail sohte kak nimpil sang nan sapwellimen Kauno dahl oh pil nimpil sang nan nein tepil kan dahl; kumwail sohte kak mwohdehng sapwellimen Kauno tehpel oh pil ni tehpel en tepil kan.” (1 Korint 10:16-21) Ma aramas emen me kin kalapw iang tungoal ni Kataman kan pahn wiahda dihp laud ehu, e anahne wehkada dipe ong Siohwa oh pil rapahki sawas sang rehn ohl mah kan nan mwomwohdiso. (Lepin Padahk 28:13; Seims 5:13-16) Ma e koluhla mehlel oh kasalehda wahn koluhla me konehng eri met sohte wehwehki me e tungoal ni soh konehng de soh wahu.—Luk 3:8.
Iang Towehda Nin Duwen Sounkasawih Wahu kei
6. Ong ihs me Koht koasonehdier de ketikihong kapai en iang tungoal ni Sak en Soutik en Kauno?
6 Irail akan me kin mwahu ong rien Krais pwihn en 144,000 pil anahne iang tungoal ni Saken Soutik en Kauno? (Madiu 25:31-40; Kaudiahl 14:1) Soh. Koht ketikihong kapai tohrohr wet ongete irail kan me e keiekihdi ngehn sarawi pwen “iang Krais paiekihda dahme Koht ketin nekinekidohng.” (Rom 8:14-18; 1 Sohn 2:20) Eri ia dewen irail akan me kin ahneki koapworopwor en mour nan paradais sampah pahnangin kaunda en Wehio? (Luk 23:43; Kaudiahl 21:3, 4) Pwehki irail sohte iang Krais ale sohso me e paiekihda oh ale koapworopwor en mour nanleng, irail pwukat kin iang towehda Kataman wet nin duwen soun kasarawi wahu kei.—Rom 6:3-5.
7. Dahme kahrehda irail Kristian kan en senturi keieu esehki me irail pahn iang tungoale pilawa oh wain en Katamano?
7 Kristian mehlel kan en nan senturi keieu keikihdier ngehn sarawi. Me tohto nanpwungarail kin kak doadoahngki kisakis manaman kan kan me kohsang ngehn sarawi me duwehte lokaiahki lokaia tohrohr kan. Ihme kahrehda e sohte kin apwal ohng irail en wehwehki me irail keikihdi ngehn sarawi oh irail anahne iang tungoale wain oh pilawa en Katamano. Ahpw nan atail ahnsou, mahsen pwukat me kin kasalehda ma iei emen me iang keikihdi ngehn sarawi: “Irail akan me kin idawehnla ngehnen Koht, iei irail me sapwellimen Koht. Pwe ngehno me Koht ketikihong kumwail sohte kin wiahkin kumwail lidu oh kahrehiong kumwail masak; ahpw ngehno kin wiahkin kumwail sapwellimen Koht. Oh sang ni manaman en ngehno emenemen kitail kin likweriong Koht, “Abba, Semei!’ ”—Rom 8:14, 15.
8. Ihs me “wihd de war mwahu” oh “dihpw” kin wehwehki, me ntingdier nan Madiu irelaud 13?
8 Sounpar epwiki kei dower, irail me keidi mehlel kan kin kekeirada nin duwen “wihd kei” de war mwahu kei nan mwaht ehu me dirkihla “dihpw suwed kan” de Kristian likamw akan. (Madiu 13:24-30, 36-43) Sangehr nan pahr 1870, “wihd” de war mwahu wet kin inenen sansalda mehlel, oh sounpar kan mwuhri, irail Kristian sounapwalih keidi kan ale kehkehlik wet: “Elder kan . . . anahne en kasalehiong de kihong mwohn irail akan me iang tuhpene ong Katamano irair pwukat,—(1) pwoson ntahn Krais; oh (2) kihong ahmw mour ong Kauno oh sapwellime doadoahk lao lel mehla. Irail anahne en pil luke irail kan me pil ahneki soahngen madamadau de ineng en iang kasarawih matalahn Krais.”—Studies in the Scriptures, Series VI, The New Creation, pali 473.a
Raparapahki “Sihpw Teikan”
9. Iaduwen mwomwen “pokon kalaimwun” eh pwungila nan 1935, oh iaduwen met kin kamwekid ekei irail akan me kin iang tungoale wain oh pilawa en Katamano?
9 Ni ahnsou konehng, sapwellimen Siohwa pwihn tepida medemedewe duwen aramas teikan likin sapwellimen Krais me keidi kan. Ehu kekeirada tohrohr me pid irair wet wiawiher nan pahr 1930 samwa. Mwohn met, sapwellimen Koht aramas akan kin kilangwohng “pokon kalaimwun wet” me sansalda nan pwuhken Kaudiahl 7:9 nin duwen pwihn ngehnin ehu me sohte nohn kesempwal ahpw kin patpatehng irail 144,000 me pahn kaiasada nin duwen keidi kan nanleng—duwehte sounkapar en lih kamwohdo de iengen en Krais werek. (Melkahka 45:14, 15; Kaudiahl 7:4; 21:2, 9) Ahpw nan May 31, 1935, nan ehu kapahrek me wiawi nan kapokon en Sounkadehdehn Siohwa kan nan Washington, D.C., U.S.A., kawehwe sang nan Pwuhk Sarawi kasalehda me “pokon kalaimwun wet” kin wehwehkiong “sihpw teikan” me mour ni imwin rahn akan. (Sohn 10:16) Mwurin kapokon wet, ekei me mahs kin iang tungoale pilawa oh wain en Kataman kan uhdihsang arail kin iang tungoal pwehki irail wehwehkier me arail koapworopwoar iei sampah a kaidehn nanleng.
10. Iaduwen ahmw pahn kawehwehda duwen koapworopwor oh pwukoa en irail “sihpw teikan” en rahnwet”?
10 Mehlel nan pahr 1935 me repen laud wiawi ong irail akan me kin ketido nin duwen “sihpw teikan,” me kin pwoson tomwo, inoukihong Koht arail mour oh utung irail “pwihn tikitik” me keidi kan oh wia doadoahk en kalohki Weio. (Luk 12:32) Irail sihpw teikan kin ahneki koapworopwor en mour nin sampah kohkohlahte, ahpw ni ahl koaros, irail pwukat kin wia kasalepen irail luwen me keidi kan rahnwet me pahn iang sohoshki Wehio. Duwehte irail sounkeiru kan me mihla nan Israel mahs, me kin kaudokiong Siohwa oh peikiong Kosonnedo, irail sihpw teikan nan rahnwet pil kin pwungki en alehda pwukoan Kristian kan, me duwehte en iang irail Israel en ngehn oh kalohki Rongamwahuo. (Kalesia 6:16) Pil duwehte irail sounkeiru pwukat arail sohte kak wiahla nanmwarki kei de samworo kei nan Israel, sohte emen irail kisehn sihpw teikan pahn pil iang kaunda nan wehin nanleng de wia samworo kei.—Deuderonomi 17:15.
11. Dahme kahrehda ahnsou me aramas emen papidaisla pil kesempwal ong me pid ah koapworopwor?
11 Nan pahr 1930 samwa, ekis ekis sansalda me pwihn en nanleng pilipildahr. Sounpar isihsekehr met, me doadoahk en rapahki sihpw teikan me arail koapworopwor iei sampah wiewiawih. Ma emen me keidi kasalehda me e salelepek, eri emen me kin papah Koht ni lelepek ahnsou reirei nin duwen emen sihpw teikan pahn uhd wiliandi ih nin duwen emen 144,000.
Dahme Kahrehda Ekei kin Sapwungala oh Lemeleme me Irail Iang Ahneki Koapworopwor en Nanleng
12. Nan irair dah kei me aramas emen pahn uhdisang eh iang tungoale wain oh pilawa en Katamano oh pwekihda?
12 Irail Kristian keidi kan kin ese ni mehlel oh sohte kin peikasalki me irail iang luhklahng nanleng. Ahpw iaduwen ma ekei me sohte iang ale luhk wet kin iang tungoale wain oh pilawa en Kataman? Eri met ni arail wehwehkier me irail sohte iang ahneki koapworopwor en nanleng, arail nsen mwakelekel uhdahn pahn idingkihong irail en uhdisang iang tungoal. Koht sohte pahn kupwurki emen me kin welwilian ih nin duwen aramas emen me pahn iang wia nanmwarki oh samworo men nanleng ni ah wehwehkier me e sohte iang ale luhk wet. (Rom 9:16; Kaudiahl 20:6) Siohwa ketin kasohrala mehn Lipai menet Kora me kin nantihong rapahki en ale dewen Aaron nin duwen samworo men ni ah sohte ale mwemwei. (Eksodus 28:1; Nempe 16:4-11, 31-35) Ma emen Kristian diarada me e sapwung ni eh kin iang tungoale wain oh pilawa en Katamano, eri e anahne uhdisang e iang tungoal oh ni karakarahk peki sapwellimen Koht mahk.—Melkahka 19:13.
13, 14. Dahme kahrehda ekei kin sapwungala oh lemeleme me irail iang ale luhk ong kohdahla nanleng?
13 Dahme kahrehda ekei kin sapwungala oh lemeleme me irail iang ale luhk ong nanleng? Mehla en emen ienge de kahpwal teikan ele kak pil kahrehda irail en sohla inengih mour pohn sampah. De ele irail men iang ahneki soangen koapworopworohte me kompoakpahrail keren men kose me dene e iang wia me keidi men oh ahneki koapworopwor en mih nanleng. Ni mehlel, Koht sohte kileleiong emen en kin kangoange mehteikan en iang ale kapai wet. Oh Koht sohte pil kin keiedi irail me pahn sohsohki Wehio sang ni ah kin kahrehiong irail en rong ngihl me kin wah kair kan pwe en kak wia mehn kamehlel ehu ong irail me irail iang keidi.
14 Padahk likamw akan me dene aramas mwahu koaros pahn kohdahla nanleng me ele kin kahrehiong ekei en lemeleme me irail pil iang ale luhk ong nanleng. Kitail anahne kanahieng pwe kitail de ahnekihda madamadau en mahs sapwung kan de pil soangen irair teikan. Karasepe ehu, ekei mwein kin pein idek rehrail: ‘I kin doadoahngki soahngen wini kan me kin kamwekid ai pepehm kan? I kin mengeiong ie I en ahneki pepehm loal akan me kin kahrehiong ie en kin wiahda kapwung sapwung kan?’
15, 16. Dahme kahrehda irail me malaulau kei kin sapwungala oh lemeleme me irail iang keidi?
15 Ekei ele kak pein idek rehrail: ‘Iaduwen, I kin men lapalapla? I kin nantiong rapahki en ale manaman en kaunda met de pil ni ahnsou kohkohdo ni ai pahn iang ale sohso me Krais paiekihda?’ Ni ahnsou me irail me sohsohki Wehio ale luhk nan keieun senturi, kaidehn irail pwukat koaros ahneki pwukoa nan mwomwohdiso oh emenemen irail pwukat me ale luhk ong nanleng sohte kin nantiong irail en lapalapla de kin kalahki arail wia keidi kan. Irail kin kasalehda soangen lamalam en aktikitik me irail me kin “ahneki lamalam en Krais” kin kasik en ahneki.”—1 Korint 2:16.
16 Ekei mwein kin lemeleme me irail iang ale luhk en kohla nanleng pwehki arail loalokongkihla laud Pwuhk Sarawi. Ahpw ngehn en keidi wet sohte kin wahdo loalokong tohrohr ehu, ihme kahrehda Pohl anahne kasukuhlih de kihong kaweid ong ekei irail me keidi ko. (1 Korint 3:1-3; Ipru 5:11-14) Mie sapwellimen Koht koasondi ong me pid kohpeseng en mwengehn ngehn me kin kohwong sapwellime aramas akan koaros. (Madiu 24:45-47) Eri sohte emen kak leme me pwehki e wia Kristian keidi men, eri met kihong ih erpit tohrohr ehu me laudsang dahme irail me koapworopworki sampah kan ahneki. Keidi en ngehn sarawi sohte kin sansalkihda en emen ah koahiek en sapengala peidek en Pwuhk Sarawi kan, koahiek en kadehde de koahiek en wia kapahrek kan sang Pwuhk Sarawi. Ekei irail Kristian kan me arail koapworopwor iei sampah pil ahneki soahngen koahiek pwukat.
17. Keikihdi ngehn sarawi kin poasonkihda dah oh poasonda pohn ihs?
17 Ma iengtail sounkadehdeh men pahn peidengki duwen luhk ong nanleng, emen elder de emen Kristian mah kak ehukihong oh koasoiaiong ih duwen met. Ahpw sohte aramas emen kak wiahda pilipil ohng emen aramas tohrohr. Aramas emen me uhdahn iang de ale luhk wet en kohdala nanleng sohte anahne peidekiong mehteikan ma iei e iang ahneki koapworopwor wet. Irail me keidi kan “alehier irair en ipwidi kapw, kaidehn ong mehkan me kin ohla ahpw soahng kan me sohte kin ohla, ki mahsen en mahsen en Koht emen me memour oh kanengamah.” (1 Piter 1:23) Ki sapwellime kehl oh mahsen, Koht ketin padokedi “war” ehu me kahrehiong emen en wiahla “kapikipik kapw ehu,’ oh ahneki koapworopwor nanleng. (2 Korint 5:17) Oh Siohwa me pahn wiahda pilipilo. Keidi “met kaidehkin doadoahk en anahn de wiewiahn aramas, pwe doadoahk en sapwellimen Koht kalahngan.” (Rom 9:16) Eri, iaduwen aramas emen ah kak ese ni mehlel ma e iang ahneki luhk en mih nanleng?
Dahme Irail Esehki ni Mehlel me Irail Iang Ahneki Koapworopwor en Mih Nanleng
18. Iaduwen ngehn en Koht eh kin kamwekid ngehn en irail me keidi kan?
18 Sounkadehde en sapwellimen Koht ngehn kin kamehleleiong irail Kristian keidi kan me irail iang ahneki koapworopwor en nanleng. Pohl ntingihdi, “Ngehno kin wiahkin kumwail sapwellimen Koht. Oh sang ni manaman en ngehno emenemen kitail kin likweriong Koht, ‘Abba, Semei!’ Ngehnen Koht kin ketin ehuong ngenitail oh kadehdehda me kitail sapwellimen Koht seri. Pwehki atail wialahr sapwellime, kitail pahn pil paieki pai kan me e ketin nekinekidohng sapwellime seri kan, oh kitail pil pahn iang Krais paieki dahme Koht ketin nekinekidohng; pwe ma kitail iang Krais ni sapwellime lokolok, eri, kitail pil pahn iang ni sapwellime lingan.” (Rom 8:15-17) Pahn kaweid en ngehn sarawi, ngenin eimah oh ngoang en me keidi kan kin siken irail en kapwaiada dahme audepen Pwuhk Sarawi kin masahnihki duwen sapwellimen Koht seri kan en pali ngehn. (1 Sohn 3:2) Sapwellimen Koht ngehn sarawi kin kihong irail pepehm me irail iee sapwellime oh kihong irail en ahneki koapworopwor tohrohr ehu. (Kalesia 4:6, 7) Ei, mour kohkohlahte nan sampah nin duwen aramas unsek akan oh mih rehn peneinei oh kompoakpatail kan pahn mwahu mehlel ahpw kaidehn koapworopwor wet me Koht ketkihong irail. Ki sapwellime ngehn, Koht ketikihong irail koapworopwor kehlail en mih nanleng oh irail kin nsenkihda en meirongkihla soang kan koaros me irail kin perenki oh kasikasik sampah.—2 Korint 5:1-5, 8; 2 Piter 1:13, 14.
19. Pwukoa dah me inou kapw wet ahneki nan mour en me keidi men?
19 Kristian keidi kan kin ese ni mehlel me irail iang ahneki koapworopwor nanleng oh irail iang kisehn inou kapwo. Sises mahsanih met ni ahnsou me e tepiada kasarawi en Katamano oh mahsanih: “Dahl wet iei delen sapwellimen Koht inou kapw me wiawihkidahr ntahi, me kepwilipwildier pwehki kumwail.” (Luk 22:20) Irail me iang wia kisehn inou kapw wet iei Koht oh irail me keidi ko. (Seremaia 31:31-34; Ipru 12:22-24) Sises me kin wia sounkadokepen kitail oh Koht. Pwehki inou kapwo eh kak pweida pwehki sapwellimen Sises meirongo, inou kapwo sohte pilada sangete mehn Suhs akan ahpw pil sang nan wehi teikan aramas ekei pwe en wa mwaren Siohwa oh wiahkinirailla “kadaudok” en Eipraam. (Kalesia 3:26-29; Wiewia 15:14) Inou soh imwi wet kin kahrehiong irail Israel en ngehn kan koaros en kaiasada oh uhd ale mour soh imwi ehu nanleng.—Ipru 13:20.
20. Irail me keidi kan alehier inou kapw dahieu rehn Krais?
20 Irail me keidi kan kin uhdahn ese ni soh peikasalki arail koapworopwor. Irail pidelongehr nan pil ehu inou tohrohr me iei inou en Wehio. Me pid arail pahn ehukihong Krais inouo, Sises mahsanih: “Kumwail kin mihmihte rehi ahnsou koaros nan ei apwal akan; oh nin duwen Semei eh ketikihongieier manaman en kaunda wasa, I pil pahn kihong kumwail soangen manamanohte. Kumwail pahn iang ie konot de sak ni ei tehpel nan ei Wehi, oh kumwail pahn iang mwohd nan mwoalomwail mwoalen kopwung pwe en wia kapwungpen kadaudok eisek riaun Israel.” (Luk 22:28-30) Inou wet nanpwungen Krais oh ienge nanmwarki kan pahn mihmi kohkohlahte.—Kaudiahl 22:5.
Ahnsoun Katamano—Ahnsou Kaperen Ieu
21. Kapai dah kei kitail kak ale ni eh kin kerenlahng Katamano?
21 Soangen kapai tohto mie ni ah kin kerenlahng ahnsoun Kataman. Kitail kak paiekihda koasondi en wadawad Paipel erein ahnsowo. Met pahn pil wia ahnsou keieu konehng en kapakap, doudouloale duwen en Sises mour oh mihla pohn sampah wet, oh pil ahnsou mwahu en iang wia doadoahk en kalohki duwen Wehio. (Melkahka 77:12; Pilipai 4:6, 7) Pein kasarawio kin katamanohng kitail duwen limpoak en Koht oh Krais me sansalkihda meirong tomw en Sises. (Madiu 20:28; Sohn 3:16) Koasondi wet kin kihong kitail koapworopwor oh kamweit oh kin kakehlailla atail madamadau me pid en rapahki de kalemengih elen mour me Krais ahneki. (Eksodus 34:6; Ipru 12:3) Katamano pil pahn kakelekitailda pwe kitail en kak kapwaiada atail inou nin duwen sapwellimen Koht lidu kei oh wia soun kahlemengih mehlel kei en sapwellime pwutak kompoake.
22. WIa en Koht kisakis me keieu laud ong aramas oh ia ehu ahl me kitail kak kasalehda atail kin kalahnganki met?
22 Ia uwen mwahu en kisakis kan me Koht kin ketin ketikihong kitail! (Seims 1:17) Kitail kin ale kaweid sang sapwellime Mahsen, sawas sang sapwellime ngehn, oh koapworopwor en mour soutuk. Sapwellimen Koht kisakis me keieu laud iei en Sises meirongkihla dipen irail me keidi kan oh pil koaros me kin pwoson ih. (1 Sohn 2:1, 2) Eri, ia uwen laud en omw kin katapanki meirong en Sises? Iaduwen—ke pahn iang irail ko me pahn tuhpene mwurin kihrlahn ketipin en April 16, 2003, pwe en kasarawih sak en soutik en Kauno?
[Nting tikitik me mi pahs]
a Wiawihda sang rehn Sounkadehdehn Siohwa kan, ahpw sohlahr ni ahnsouwet.
Ia Ahmw Pasapeng kan?
• Ihs me konehng en tungoale wain oh pilawa en Katamano?
• Dahme kahrehda irail “sihpw teikan” kin iang towehda Saken Soutik en Kauno ihte nin duwen pwihn ehu me kin kasakasawih ni wahu?
• Iaduwen irail Kristian keidi kan kin ese me e konehng irail en iang tungoale pilawa oh wain kan en Kataman en Matalahn Krais?
• Rahn kan me kerenlahng ahnsoun Katamano kin wia ahnsou mwahu ong dah?
[Graph/Pictures nan Pali 28]
(For fully formatted text, see publication)
Irail Me Kin Iang Towehda Kataman
[Kilel nan Pali 28]
Ke pahn iang towehda Kataman en Saken Soutik en Kauno nan pahr wet?
[Kilels nan Pali 30]
Ni ah kin kerenlahng Katamano, e wia ahnsou konehng en kalaudehla atail ahnsou en wadek Paipel oh iang wia doadoahk en kalohki Wehio