Peidek kan Sang Sounwadawad kan
E sapwung en kemehla mahn soumwahu doar emen de mahn me mahlahr?
Aramas tohto kin wiahki soangsoangen mahn akan en wia mehkot kesempwal oh kin poakpoake irail. Ekei mahn mand akan kin wia kompoakepahn aramas mwahu kan. Karasepe, kidi kin peik oh limpoak arail kaun akan inenen laud. Kahrehda, limpoak me aramas akan kin kasapahl ohng mahn pwukat kin inenen laud, ahpw mehlel ma re naineki mahn pwukat erein ahnsou reirei.
Ahpw, uwen reirei en mour en mahn pwukat sohte nohn werei. Kidi kin mourki pahr 10 lel 15 de ekis werei sang, oh pil ekei kaht pil kak lel soangen sounpahr duwehte kidi. Ni neitail mahn akan ahr pahn mahla, re kin soumwahula oh pil kin luwetala de pil mwoatorala ekei wasa nan paliwararail akan oh met kin kapahtou ohng irail me kin nainekin irail akan, pwe re kin tamanda ahnsou me mahn pwukat pwulopwul oh kehlail. Eri, e pahn sapwung en kemehla soangen mahn pwukat me kin weiweirek?
Kristian emen pahn kin men wia mehkan me kin pahrekiong kupwuren Koht ni arail pahn kin apwalih mwahu neirail mahn akan. Lemei ong mahn akan inenen sansal mwahu me e uhwong kupwuren Koht, pwe sapwellimen Koht Mahsen kin kasalehda met: “Aramas pwung emen kin apwalih mwahu nah mahn akan.” (Lepin Padahk 12:10, NW) Ahpw, met sohte wehwehki me kupwuren Koht ong mahn akan pahrekiong kupwure ong aramas akan. Ni ahnsou me Koht kapikada aramas akan, E ketin kasalehda me mie wekpeseng en aramas oh mahn akan. Karasepe ieu, E ketikihong aramas akan koapworopwor en mour soutuk, ahpw E sohte ketikihong mahn akan soangen koapworopwor wet. (Rom 6:23; 2 Piter 2:12) Pwehki Ih me Sounkapikada, E sapwellimaniki pwung en ketin pilada soangen irair en ehupene me konehng nanpwungen aramas akan oh mahn akan.
Senesis 1:28 kasalehiong kitail ia mwomwen ehupene wet. Koht mahsanihong tepin pwopwoud: “I kihong kumwa manaman en kaunda mwahmw akan, menpihr kan oh mahn lawalo kan koaros.” Pil duwehte nan Melkahka 8:6-8, mahsanih: “Komwi [Koht] me ketin koasoanehdi pwe [aramas] en kaunda wiepen nin limomwi koaros, komwi me pil kasapwiladahng pohnangin mehkoaruhsie: sihpw oh kou koaros, oh pil mahn lawalo kan; menpihr kan oh mwahmw akan, oh mehkoaros me kin aude nan madau.”
Koht ketin kasalehda ni sansal me mahn akan aramas kak doadoahngki ni ahl pwung oh pil kemeirailla. Karasepe, kilirail akan kak wia likou. Koht pil ketin mweidada aramas en kang uduk en mahn akan, sangehr mwurin Nohlik me wiawi ni mwehin Noha kohdo, pwe ren kak kang uduk likin wahntuhke kan me ira kileledi en kang sangete nin tepio.—Senesis 3:21; 4:4; 9:3.
Koht sohte kihong aramas manaman en kemehla mwahl mahn akan, wiahki mehn mwadong. Nan Senesis 10:9 (NW), Pwuhk Sarawi mahsanih me Nimrod iei “soun pwek kommwad men.” Ahpw, nan iretikitikohte mahsanih me met wiahiong ih en “pelianda Siohwa.”
Kahrehda, nin doken aramas ahneki manaman en kaunda mahn akan, e sohte pahn wiekauwe manaman wet, ahpw e pahn doadoahngki nin duwen kaweid en Mahsen en Koht. Met pil kak wehwehki en dehr mweidohng nah mahn en weirek mwahl, pwehki ah mahla de ohla laud, soumwahu doar, de soumwahu me sohte kak mwahula. Nan irair akan duwehte mehpwukat, e wia pwukoahn Kristian emen en pilada dahme e pahn wia. Ma e pilada me e pahn wia elen limpoak ieu en dehr mweidong mahno en lokolok pwe e pahn pil solahr kak mwahula, eri e kak pilada en kemehla mahno.