Ke Kin Ahneki Koapworopwor En “Kasikasik Rahnen Koht”?

“Amwail mour uhdahn pahn konehng en kin tiahk mwakelekel oh wiewia kan me kin kasalehda lelepek ong Koht, nindokon amwail kasikasik oh tetehk kanahieng sapwellimen Koht Rahno!”​—2 PITER 3:11, 12, NW.

1, 2. Mehnia karasaras kitail kak doadoahngki ong “kasikasik” Rahnen Siohwa?

MEDEMEDEWE duwen peneinei ehu me kasikasik aramas akan me pahn mwemweitala rehrail pwen iang irail mwenge. Ahnsowo me irail inoukihpene rehn tuhpene ong mwenge kin likamwete mwadang kerendo. Lih pwopwoudo kin soupisengki kaunopada mwahu mwenge kan. Ah pwoud ohlo oh neira seri kan kin pil iang sawas. Koaros kin pereperen. Ei, peneinei pwon kin kasikasik aramas me irail luhke en pwarada rehrail oh irail kin kasikasik mwenge iou kan oh werek mwahu kan.

² Kitail Kristian akan kin kasikasik mehkot me kesempwal sang met. Dahme kitail kin kasikasik? Eri, kitail koaros kin kasikasik “Rahnen Siohwa”! Ahpw lao lel e pahn leledo, kitail anahne en kahlemengih soukohp Maika me mahsanih: “Ahpw I pahn sohpeiong Kauno [“Siohwa,” NW]; I pahn koapworopwor awiawih Koht, me pahn ketin komouriehla. Ei Koht pahn ketin karonge ie.” (Maika 7:7) Mahsen pwukat kin wehwehki me kitail sohte pahn wia mehkot? Soh. Mie doadoahk kitail anahne en wia.

3. Nin duwen dahme pwuhken 2 Piter 3:11, 12 mahsanih, lamalam dahieu me irail Kristian akan anahne ahneki?

³ Wahnpoaron Piter kin sewese kitail en ahneki madamadau pwung ni atail kin kasikasik Rahnen Siohwa. E mahsanih: “Soangen mour dah me konehng kumwail en weweidki? Amwail mour uhdahn pahn konehng en kin tiahk mwakelekel oh wiewia kan me kin kasalehda lelepek ong Koht, nin dokon amwail kasikasik sapwellimen Koht Rahno!” (2 Piter 3:11, 12) Tehk mwahu mahsen pwukat, Piter sohte kin peikasalki duwen soangen aramas dah kitail anahne en wiahla. Nan sapwellime kisinlikou riau me Koht ketin kamwekid ih en ntingihdi, e kawehwehda duwen soahngen aramas dah Kristian akan anahne en wiahla. E pil kihong irail kaweid en wiahla aramas me kin “tiahk mwakelekel oh kasarawihong Koht.” Mendahki sounpar 30 dower powe sang ni ahnsou me Sises Krais kihda kilelo en “imwin sampah,” Kristian akan sohte pahn wia memeir ni pali ngehn. (Madiu 24:3) Irail anahne “kasikasik oh tetehk kanahieng” duwen Rahnen Siohwa.

4. Ma kitail men “tetehk kanahieng,” dahme kitail anahne wia?

⁴ Mahsen wet ni lokaian Krihk “tetehk kanahieng” kin wehwehki “kamwadangahdo.” Ni mehlel, kitail sohte kak ‘kamwadangahdo’ Rahnen Siohwa. Pwe kitail pil sehse “rahno oh ahnsowo” me Sises Krais pahn pwurodo oh kadeikada imwintihti kan en Sahmo. (Madiu 24:36; 25:13) Ehu pwuhk kin kawehwehda “kamwadangahdo” nin duwen ‘ngoangki, oh nsenohki.’ Eri, Piter kin kangoange ienge tohn mwomwohdiso kan en “ngoangki” kasikasik Rahnen Siohwa. Irail kak wia met, ma irail pahn ni ahnsou koaros medemedewe duwen rahno. (2 Piter 3:12, footnote) Pwehki “rahn lapalap oh kamasepwehk en Siohwa” kerendohr, kitail pil anahne ngoangki nsenohki rahno.​—Soel 2:31.

Kasikasik oh “Amwail Mour Uhdahn Pahn Konehng en Kin Tiahk Mwakelekel”

5. Iaduwen kitail kak kasalehda me kitail kin “ngoangki” kilang “Rahnen Siohwa”?

⁵ Ma kitail kin “ngoangki” en pitsang Rahnen Siohwa, atail “mour uhdahn pahn konehng en kin tiahk mwakelekel oh wiewia kan me kin kasalehda lelepek ong Koht.” Mahsen pwukat “mour uhdahn pahn konehng en kin mwakelekel” kin katamankin kitail duwen kaweid en Piter: “Kumwail peikiong Koht; soangen ineng kei mie rehmwail ahnsou me kumwail saikinte marainkihla Koht, eri, kumwail dehr mweidohng soangen ineng ko en kaunda amwail mour ahnsou wet. Ahpw kumwail en sarawihla ni mehkoaros me kumwail kin wia, duwen Koht me ketin malipeikumwaildo, eh ketin sarawi. Pwe Pwuhk Sarawi mahsanih, ‘Kumwail uhdahn pahn sarawihla, pwe ngehi, I me sarawi.’ ”​—1 Piter 1:14-​16.

6. Dahme kitail anahne wia pwen sarawihla?

⁶ Pwehn wiahla aramas sarawi, kitail anahne en kolokolte atail mwakelekel ni paliwar, madamadau, tiahk, oh mwakelekel ni pali ngehn. Kitail kin kaukaunopada ong “Rahnen Siohwa” ni atail kin sarawihla oh kalohki mwaren Siohwa? Rahnwet, e sohte mengei en sarawihla, pwe tiahk en sampah wet kin wie suwedla. (1 Korint 7:31; 2 Timoty 3:13) Mie wekpeseng laud ong atail tiahk kan oh tiahk en tohn sampah wet? Ma soh, kitail anahne en medemedewe laud duwen ire wet. Mendahki pein atail koasondi kan en tiahk kin mwahu sang tiahk kan en tohn sampah wet, mwein atail tiahk kan kin ekis ekis kohkohdi? Ma ih duwen, kitail anahne en kapwungala atail tiahk kan pwen kaperenda Koht.

7, 8. (a) Dahme pahn kak kahrehong kitail en sohlahr kesempwaliki mour “mwakelekel”? (b) Soangen irairen kapwungpwungla dah me anahn?

⁷ Pwehki kilel suwed kan ah miehr nan Internet oh aramas kak kelepw kilikilang kilel suwed, met kin kahrehong irail akan me sohte kin kak diar kilel pwukat mahs ahnsouwet kin diar me re “dirkihla ahnsou iong wiepen ineng suwed wet,” iei me emen toahkte koasoia. Ma kitail pahn kilang nan Internet soahngen kilel suwed pwukat, kitail kin pohnsehsehla dahme Pwuhk Sarawi kaweidki en “dehpa sair mehkot me keinepwi.” (Aiseia 52:11) Ma kitail kin wia met, kitail kin uhdahn “medemedewe Rahnen Siohwa”? De, mwein kitail kin lemeleme me Rahno saikinte leledo, ihme kahrehda mehnda ma kitail pahn kasaminkihla atail madamadau kan kilel suwed pwukat, pahn mie ahnsou laud en pein kamwakelehkitailda? Ma kitail kin ahneki kahpwal wet, e inenen kesempwal kitail en peki sawas sang rehn Siohwa en sewese kitail en ‘dehr kilikilang mehkan me soh katepe, pwen doarehla atail mour’!​—Melkahka 119:37, NW.

⁸ Pali moron en Sounkadehdehn Siohwa kan, me pwulopwul oh pil me laud, kin kapwaiada sapwellimen Koht koasoandi ileile en tiahk mwakelelel kan oh irail kin liksang kasongosong kan en sampah wet. Irail kin wehwehki duwen kaweid en Piter me “Rahnen [“Siohwa,” NW] pahn leledo duwehte lipirap emen,” oh irail kin nantiong en “mwakelekel.” (2 Piter 3:10) Arail wiewia kan kin kadehde me irail kin “kasikasik oh medemedewe Rahnen Siohwa.”a

Kasikasik oh “Kin Kasalehda Wiewia Lelepek kan ong Koht”

9. Dahme lelepek ong Koht pahn anahne kamwekid kitail en wia?

⁹ “Kin kasalehda wiewia lelepek kan ong Koht” kin kesempwal ong kitail en kapwaiada ma kitail men tetehk kanahieng Rahnen Siohwa. “Lelepek ong Koht” kin pidada atail kin kasalehda wahu ong Koht me kin kamwekid kitail en kaperenda Ih. Loalopwoat ong Koht kin kamwekid kitail en wia mehkan me kin kasalehda atail lelepek ong Koht. Kupwuren Koht “aramas koaros en ale komourparail oh marainkihla me mehlel.” (1 Timoty 2:4) Koht “sohte ketin kupwurki emen en lekdekla, pwe e ketin kupwurki koaros en wiliakapwala oh sohpeisang nan diparail kan.” (2 Piter 3:9) Eri, atail lelepek ong Koht soh pahn kamwekid kitail en kalaudehla atail ngoang en sewese aramas teikan sukuhliki duwen Siohwa oh kahlemengih Ih?​—Episos 5:1.

10. Dahme kahrehda kitail anahne keleke sang “poakepen dipwisou kan”?

¹⁰ Ma kitail pahn rapahki mahs Wehin Koht, atail mour pahn direki wiewia kan me kin kasalehda atail lelepek ong Koht. (Madiu 6:33) Met kin pidada atail kin toupahrek kilangwong dipwisou kan en sampah. Sises kihda kaweid wet: “Kumwail kalekeikumwailsang noahrok suwed koaros, pwe mour mehlel en aramas sohte kin mi ni kepwe kan me e ahneki, mehnda ma e kepwehpwe mehlel.” (Luk 12:15) Edetehn e pahn apwal en medemedewe me pein kitail pahn pil kak poakong mwohni, kitail anahne wehwehki me “anahn en sampah kan oh poakepen dipwisou kan kin “kasokehla mahseno rehrail.” (Madiu 13:22) Mwein kitail kin apwaliki en apwaliahda atail anahn akan en peneinei. Nan ekei wasa nin sampah, aramas tohto kin lemeleme me​—⁠ma irail men ahneki mour nsenamwahu, re anahne keseulahng sahpw ieu me diren mwohni, oh mwein irail kak kohsang arail peneinei sounpar tohto. Ekei sapwellimen Koht aramas akan pil kin ahneki soangen madamadau wet. Ni mehlel, ma irail pahn kohla nan sahpw me diren mwohni, irail pahn kak kaitarala ahn arail peneinei anahn ong dipwisou kapw akan en nan ahnsou wet. Ahpw, ni irair en pali ngehn, dahme pahn kak wiawiong arail peneinei? Ma kaun en peneinei sohte wia ah pwukoa, peneineio pahn kak kehlail ni pali ngehn pwehn pitsang mehla ni Rahnen Siohwa?

11. Iaduwen emen tohndoadoahk me kohla doadoahk nan ehu sahpw kasalehda me wiewia kan me kin kasalehda lelepek ong Koht kin kesempwal sang naineki mwohni tohto?

¹¹ Emen tohndoadoahk sang Philippines kohla doadoahk nan Sapahn oh sukuhliki duwen padahk mehlel en Paipel sang rehn Sounkadehdehn Siohwa kan. Ni ahnsou me e sukuhliki sang Pwuhk Sarawi duwen pwukoa en ohl pwopwoud kan, e tepida wehwehki me e anahne sewese ah peneinei en wiahla tohnkaudok kan en Siohwa. (1 Korint 11:3) Ahpw ah pwoud me kin koasoan nan Philippines kin uhwong dahme e ahpwtehn sukuhliki, oh liho mwahuki ih en kaukaule kadarala mwohni rehrail oh e sohte mwahuki ohlo en pwurala rehrail oh padahkiong irail duwen Pwuhk Sarawi. Ahpw, karuwaru en imwin ahnsou wia kerendohr patehng ah kin nsenohki ah peneinei kamwekid ih en pwurala rehn ah peneinei. Pwehki e kin kanengamah oh ni limpoak sewese ah peneinei, e alehdi kating laud ehu. Ni ahnsou mwuhri, ah peneinei pil kin minimin utungada kaudok mehlel, oh ah pwoud iang wia doadoahk en kalohk kaukaule.

12. Dahme kahrehda kitail anahne mwohnki mehkan me kin pid pali ngehn?

¹² Irair wet me kitail kin mihla loale kin duwehte aramas akan me kin mih nan ihmw ehu me kin lulda. Elen loalokong en tangseli nan ihmwo pwen kihsang dipwisou kan sang nan ihmwo me lulda oh kereniong pahn pwupwudi? E soh pahn mwahu en doarehla mour akan​—pein mouritail kan oh pil mour en atail peneinei oh mehteikan me mih nan ihmwo? Eri, koasondi suwed wet pahn kereniong ohla, oh imwilahn koasondi wet pahn pid mour en aramas akan. Pwehki kitail kin ese duwen met, kitail anahne mwohnki mehkan me kin pid pali ngehn oh ngoangki iang doadoahk en Wehio me kin komourala aramas akan.​—1 Timoty 4:16.

Kitail en kin “Mwakelekel”

13. Soangen aramas dah kitail anahne wia ni ahnsou me Rahnen Siohwa leledo?

¹³ Piter kawehwehda duwen kesempwalpen atail kasikasik Rahno: “Eri, kompoakepahi ko, nindokon amwail kasikasik Rahno, kumwail wia uwen me kumwail kak pwe kumwail en kin mwakelekel oh pwung mwohn silangin Koht ni kapehd popohl.” (2 Piter 3:14, NW) Pwen kapataiong ah kaweid en tiahk mwakelekel oh wiewia kan me kin kasalehda lelepek ong Koht, Piter kawehwehda kesempwalpen Siohwa en mahsanih kitail me kitail aramas mwakelekelkihdahr ntahn Sises. (Kaudiahl 7:9, 14) Met kin wehwehki me aramas emen anahne pwoson meirong en Sises oh wiahla sapwellimen Siohwa ladu inouda oh papidaislahr men.

14. Ia wehwehn kitail en “mwakelekel”?

¹⁴ Piter kangoangehkin kitail en wia uwen me kitail kak pwe kitail en “mwakelekel.” Kitail kin kolokol atail likou en wiewiahn Kristian oh atail tiahk en mwakelekel en sohte saminkihla sampah wet? Ma kitail kin kilangada pwehl ni atail likou kan, kitail kin mwadangete wuden sang. Ma pwehl kin kasaminehla atail likou me kitail kin keieu kesempwaliki, kitail kin nantiong en kamwakelehda mwahu. Kitail kin ahneki pepehmohte ma atail likou en Kristian ni karasaras kin pwehlla pwehki sapwung ehu me pwarada sang ni mwomwatail de atail wiewia?

15. (a) Dahme kahrehda mehn Israel akan anahne wiahda pengkir ni pwungipen arail likou kan? (b) Dahme kahrehda sapwellimen Siohwa ladu kan en rahnwet kin weksang sampah wet?

¹⁵ Mehn Israel akan anahne wiahda “pengkir mehn kataman ni pwungipen arail likou kan oh kihong kisin sahl poh mei ni ehuehu mehn kataman kan.” Dahme kahrehda? Pwe met pahn sewese irail en tamanda sapwellimen Siohwa kosonned akan, peikiong, oh re pahn “wiahla aramas sarawi” ong arail Koht. (Nempe 15:38-​40) Nin duwen sapwellimen Siohwa ladu kan en nan rahnwet, kitail weksang sampah wet pwehki kitail kin kapwaiada sapwellimen Koht kosonned akan oh mouren kaweid kan. Karasepe ieu, kitail kin kolokol tiahk mwakelekel, kitail kin pil wauneki nta, oh liksang soangen kaudok ong dikedik en eni kan koaros. (Wiewia 15:28, 29) Pwehki kitail kin nantihong en mwakelekel, aramas tohto kin wauneki kitail.​—Seims 1:27.

Kitail Anahne “Pwungla”

16. Dahme kitail anahne wia pwen “pwungla”?

¹⁶ Piter pil mahsanih me kitail anahne “pwungla.” Iaduwen kitail kak wia met? Kitail kak kamwakelehsang pwehl ahpw kitail sohte kak wudensang sapwung ehu. Pwe met kin wehwehki me sapwungo laud mih nan loalatail. Wahnpoaron Pohl kangoange ienge Kristian akan nan Pilipai: “Kumwail dehr lipahned de akamai ni amwail kin wia soahng koaros, pwe kumwail en kak pwung oh mwakelekel nin duwen sapwellimen Koht seri dei kei me kin koukousoan nanpwungen aramas suwed oh dipan akan. Kumwail en lingalingki marain nanpwungarail, rasehng usu kan me kin dakedaker nanleng.” (Pilipai 2:14, 15) Ma kitail kin idawehn kaweid wet, kitail pahn liksang lipahned oh akamai oh kitail pahn papah Koht ni mohngiong mwakelekel. Kitail pahn mwekidkihda limpoak ong Siohwa oh mehn mpatail kan ni atail kin kalohkiseli “Rongamwahu en Wehio.” (Madiu 22:35-​40; 24:14) Oh pil, kitail pahn kaukaule kalohkiseli Rongamwahu mendahki pali laud en aramas akan sohte kin wehwehki kahrepen kitail kin tohnmeteikihla pein atail ahnsou pwen sewese aramas teikan en sukuhliki duwen Koht oh sapwellime Mahsen, iei Pwuhk Sarawi.

17. Ia kahrepen kitail kin nantiong en alehdi pwais kan nan mwomwohdiso en Kristian?

¹⁷ Pwehki kitail mwahuki Koht en mahsanih kitail nin duwen aramas “pwungla kei,” kitail anahne kasawih kahrepen atail wiewia kan koaros. Kitail sohlahr kin ahneki roporop me tohnsampah kin kaselehda, duwehte ahr kin nantiong en kepwehpwehla de ale manaman. Ma kitail kin nantiong en alehdi pwais kan en papah nan mwomwohdiso en Kristian, kahrepen kitail kin wia met pahn anahne mwakelekel oh mwekidki limpoak ong Siohwa oh aramas teikan. Kaperen en kilang ohl ngenen kan “men wiahla sounapwalih en mwomwohdiso” oh irail kin wia met ni peren oh lamalam aktikitik en inengieng papah Siohwa oh iengerail tohnkaudok akan. (1 Timoty 3:1; 2 Korint 1:24) Ni mehlel, irail akan me kin warohng papah oh wia elder kan kin “wia doadoahk en silepen sihpw me Koht ketikihong irail . . . kaidehk ni mehnseiren ahpw ni kupwur mwahu duwen kupwuren Koht. Irail kin wia arail doadoahk, kaidehk pwehki arail pahn ale pweipwei, a pwehki arail kin uhdahn ngoangki papah. Irail sohte kin aksoupeidi ong irail kan me mih pahn epwelparail, ahpw irail kin wia kahlemengihpen pwihn sihpw.”​—1 Piter 5:1-4.

Kitail Anahne en Kasalehda “Popohl”

18. Soangen irair dah kei me aramas tohto kin ese me irail Sounkadehdehn Siohwa kan kin kasalehda?

¹⁸ Ni kaimwesekla, Piter padahkiong kitail en kasalehda “popohl.” Pwen kapwaiada kaweid wet, kitail anahne en popohl rehn Siohwa oh mehn mpatail kan. Piter kin kasansalehda uwen kesempwal kitail en “nantihong en limpoakpene” oh nantiong en kolokolte popohl rehn iengitail Kristian akan. (1 Piter 2:17; 3:10, 11; 4:8; 2 Piter 1:5-7) Pwen kolokolte atail popohl rehn mehteikan, kitail anahne en limpoakpene. (Sohn 13:34, 35; Episos 4:1, 2) Atail limpoak oh popohl kin keieu sansal nan atail wasahn kapokon kan en International. Nan pahr 1999 mie kapokon ehu me wiawi nan Costa Rica, oh emen sounnet nan wasahn sompihr nsensuwedla pahn Sounkadehde kan, pwehki irail kin kasamwo Sounkadehde teikan, ahpw irail sohte tehk me irail kin kedirepwahla limwahn ah wasahn netinet, kahrehda aramas teikan sohte kak kilang ah wasahn pisnes. Ahpw, ni keriau en rahn, e tepida kilangada limpoak oh popohl sang rehn Sounkadehde kan en sahpwo ni arail kin kasamwo Sounkadehde teikan me leledo sapwarail, mendahki irail ahpwtehn tuhpene. Ni kaimweseklahn rahn en kapokono, sounnet menet pil iang irail kasamwo oh peki en onop Pwuhk Sarawi.

19. Dahme kahrehda e kesempwal kitail en nantiong ahneki popohl rehn iengetail tohnkaudok akan?

¹⁹ Atail kin nantiong en kasalehda popohl rehn riatail brother oh sister kan ni pali ngehn pahn kak kamwekidada kitail en nantiong kasikasik Rahnen Siohwa oh sampah kapw me E kin ketin inoukihda. (Melkahka 37:11; 2 Piter 3:13) Ahpw, iaduwen ma kitail kin apwalki en ahneki popohl rehn emen iengitail nan ahnsouwet. Kitail kak medemedewe me kitail kak en ahneki popohliong ih nan Paradais? Ma emen brother kin nsensuwed pahtail, kitail anahne mwadang ‘kapwungala pwen ahneki popohl.’ (Madiu 5:23, 24) Wiewia wet me inenen kesempwal ma kitail men ahneki popohl rehn Siohwa.​—Melkahka 35:27; 1 Sohn 4:20.

20. Ni ahl dah kei kitail kak kasalehda me kitail kin “kasikasik” Rahnen Siohwa?

²⁰ Pein kitail kin “kasikasik oh medemedewe Rahnen Siohwa”? Atail kin kasikasik en kilang suwed akan en sohrala pahn sansalda sang ni atail kin kolokol tiahk mwakelekel nan sampah suwed wet. Oh pil, atail kin inengieng ketido en sapwellimen Siohwa rahn oh mour pahn kaundahn Wehio, pahn sansalda sang atail wiewia kan me kin kasalehda lelepek ong Koht. Oh atail kin kasik mih nan sampah kapw popohl ehu kin sansalda sang ni atail kin nantiong en popohlpene rehn iengitail tohnkaudok akan rahnwet. Sang ni wiewia pwukat, kitail kin kasalehda me kitail kin “kasikasik” oh “medemedewe Rahnen Siohwa.”

[Nting tikitik me mi pah]

Ke Tamanda?

• Ia wehwehn “medemedewe Rahnen Siohwa”?

• Iaduwen atail kin “kasikasik” Rahnen Siohwa kin kamwekidada atail tiahk kan?

• Dahme kahrehda “wiewia kan me kin kasalehda lelepek ong Koht” kesempwal kitail en kasalehda?

• Dahme kitail anahne wia pwen “mwakelekel oh pwung mwohn silangin Koht ni kapehd popohl”?

[Kilel nan Pali 7]

“Kasikasik” kin sansalki tiahk mwakeleklel

[Kilel nan Pali 8]

Doadoahk en kalohki Wehio kin komourala aramas akan

[Kilel nan Pali 10]

Ni atail kin kasikasik Rahnen Siohwa, kitail en nantihong ahneki popohl rehn meteikan