Kapatahiong Amwail Lelepek Ong Koht, Dadaur

“Kapatahiong amwail pwoson . . . dadaur, oh kapatahiong amwail dadaur; lelepek ong Koht.”​—2 PITER 1:5, 6.

1, 2. (a) Soangen kekeirada dahieu aramas akan kin kasikasik seri kan en wia? (b) Ia uwen kesempwal kekeirada ni pali ngehn?

ONG seri emen, en kekeirada ni paliwar kin wia mehkot kesempwal ong ih, ahpw mie pil mehkot me kesempwal likin met. Kekeirada ni madamadau oh pepehm akan anahne en wiawi. Ehu rahn, serio pahn solahr ahneki madamadau en seri oh e pahn kekeirada oh wiahla ohl de lih koahiek men. Wahnpoaron Pohl mahsanih duwen met ni e ntingihdi: “Ni ei seri, ei lokaia kan, ei lamalam akan, ei pepehm kan, duwehte en seri. A met, ni ei wialahr ohl mehlel emen, I solahr kin wia mwomwen seri.”​—1 Korint 13:11.

² Mahsen en Pohl pwukat kin kasansalehda ire kesempwal ieu me kin pid kekeirada ni pali ngehn. Kristian akan anahne en kekeirada pwehn solahr mwomwen seri kan ni pali ngehn, ahpw en wiahla “duwehte ohl mehlel koahiek men.” (1 Korint 14:20) Irail anahne nantihong en “wiahla aramas dei mehlel kei, lel ni idin deilahn Krais unsek.” Met pahn sewese irail en dehr “kin mwomwen seri wekiwekin, me kin wekiwekidengkiseli angin padahk en aramas widingan akan me kin pitihediong aramas teikan nan ar padahk likamw akan.”​—Episos 4:13, 14.

3, 4. (a) Dahme kitail anahne wia pwen wiahla aramas mah ni pali ngehn? (b) Mehnia sapwellimen Koht irair akan kitail anahne en pil kasalehda, oh ia uwen kesempwal irair pwukat?

³ Iaduwen kitail kak kekeirada ni pali ngehn? Ahpw ong kekeirada ni paliwar, aramas akan sohte anahne en song wia met, e kin pein wiawi ma mie irair pwung kan, ahpw kekeirada ni pali ngehn, aramas akan anahne en nantihong wia met. E kin tepikihda sukuhliki loalokong pwung en Mahsen en Koht oh kapwaiada dahme kitail kin sukuhliki. (Ipru 5:14; 2 Piter 1:3) Met kin sewese kitail en kasalehda irair akan me Koht kin ketin kupwurki. Duwehte kekeirada ni paliwar, kekeirada ni irair akan me Koht kin kupwurki kin kalapw wiawi ni ahnsou me aramaso kin pil kekeirada. Wahnpoaron Pohl ntingihdi: “Eri, ih kahrepe wet me kumwail pahn nantihkihong en wia uwen me kumwail kak, pwe kumwail en kapatahiong amwail pwoson, wiewia mwahu; oh ong amwail wiewia mwahu, kumwail en kapatahiong dehdehki Koht; oh ong dehdehki Koht, ese kaunda paliwaramwail, oh ong ese kaunda paliwaramwail, kumwail en kapatahiong kanengamah ni ahnsou apwal, oh ong kanengamah ni ahnsou apwal, kumwail kapatahiong lelepek; oh ong amwail lelepek, limpoak ong riamwail [Kristian] kan; oh ong amwail limpoak ong riamwail [Kristian] kan, kumwail kapatahiong amwail limpoak ong aramas koaros.”​—2 Piter 1:5-7.

⁴ Ehu ehu irair me Piter ntingdier me kesempwal, oh ehu irair sang rehrail sohte kak kohsang. E kapatahiong met: “Pwe ma wiewia mwahu pwukat pahn wiahla amwail oh kekeirda nanpwungamwail, kumwail pahn loalokongkihla atail Kaun Sises Krais, pwe loalokong wet pahn kahrehda amwail mour eh pahn wah mwahu oh pweida.” (2 Piter 1:8) Kitail en medemedewe kahrepe kan me kitail anahne kapatahiong atail lelepek ong Koht, dadaur.

Anahnepen Ahneki Irairen Dadaur

5. Dahme kahrehda kitail anahne dadaur?

⁵ Piter oh Pohl kin kawehwehda me lelepek ong Koht oh irair en dadaur kin doadoahkpene. (1 Timoty 6:11) Aramas emen me kin dadaur, sohte pahn ihte kasalehda ah kehl ni ahnsoun kahpwal akan oh tengedi. E pil anahne kanengamah, eimah, oh lelepek, oh sohte kesehla eh koapworopwor ni ahnsou e pahn lelong kahpwal akan, kasongosong kan, de kalokolok kan. Pwehki kitail kin momourki “lelepek ong Koht ni [atail] pahn miniminiong Krais Sises,” kitail wehwehki me kitail pahn lelong kalokolok kan. (2 Timoty 3:12) Kitail anahne dadaurete ma kitail men kasalehda atail limpoak ong Siohwa oh pil kakairada irair akan me kesempwal ong komourala. (Rom 5:3-5; 2 Timoty 4:7, 8; Seims 1:3, 4, 12) Ma kitail sohte pahn dadaur, kitail sohte pahn kak ale mour soutuk.​—Rom 2:6, 7; Ipru 10:36.

6. Ma kitail pahn dadaurete lao lel ni imwi, dahme kitail anahne wia?

⁶ Kitail kak tepida ni kehlail, ahpw keieu kesempwal kitail en dadaurete. Sises mahsanih: “Ahpw me pahn dadaurete lel ni imwi, ih me pahn mourla.” (Madiu 24:13) Ei, kitail anahne dadaurete lao lel ni imwi, oh ni imwi kak wehwehki ni ahnsou me kitail pahn mehla de imwin koasoandi suwed wet. Ahpw, sohte lipilipil mehnia rehra kitail pahn lelong mahs, kitail anahne kolokolete atail lelepek ong Koht. Oh pil, ma kitail sohte pahn kapatahiong atail lelepek ong Siohwa, dadaur, kitail sohte kak kaperenda Siohwa, oh kitail pil sohte pahn kak alehdi mour soutuk. Ahpw, ia wehwehn lelepek ong Koht?

Ia Wehwehn Lelepek ong Koht

7. Ia wehwehn lelepek ong Koht, oh dahme irair wet kin kamwekidada kitail en wia?

⁷ Lelepek ong Koht kin wehwehki me pein emen me e kin kasalehda wahu ong Koht, kaudok, oh papah Siohwa Koht pwehki lelepek ong sapwellime kaunda unsek. Pwen kolokol lelepek ong Koht, kitail anahne ahneki loalokong pwung me kin pid Siohwa oh sapwellime kupwur kan. Kitail men esehla Koht oh pil karanih Ih. Met pahn kak kamwekid kitail en kekeirada atail limpoak ong Ih sang mohngiongatail, oh met pahn sansalda sang atail wiewia kan oh atail mour. Kitail anahne ahneki ineng en wia uwen me kitail kak en kahlemengih Siohwa​—kahlemengih sapwellime wiewia kan oh sapwellime irair akan. (Episos 5:1) Ni mehlel, lelepek ong Koht kin kamwekid kitail en kaperenda Koht ni atail wiawia kan koaros.​—1 Korint 10:31.

8. Iaduwen lelepek ong Koht oh lelepek unsek kin doadoahkpene?

⁸ Pwen kolokolete atail lelepek ong Koht ni ahl me mehlel oh pwung, kitail anahne kaudokiong Siohwa kelepw, oh sohte mweidong mehkot en kauwehla atail lelepek unsek ong Ih. Nin duwen Sounkapikpatail, e kin sapwellimaniki pwung en kupwurki aramas koaros en lelepek ong Ih kelepw. (Deuderonomi 4:24; Aiseia 42:8) Ahpw, Siohwa sohte kin idingki kitail en kaudokiong Ih. E ketin kupwurki kitail en pahpa Ih sang mohngiongatail. Atail limpoak ong Koht kin poahsoankihda loalokong pwung duwen Ih, oh met kin kamwekid kitail en kamwakelehda atail mour oh wiahda atail inou ong Koht oh kapwaiada.

Kakehlahda Ahmw Nanpwung Mwahu Rehn Koht

9, 10. Iaduwen kitail kak kakehlahda oh kolokolte atail kin karanih Koht?

⁹ Mwurin kitail kasalehda me kitail wiahdahr atail inou ong Koht oh papidaislahr, kitail pil anahne en kaukaule kakehlahda atail nanpwung mwahu rehn Siohwa. Atail inengieng en wiahda met oh papah Siohwa ni lelepek kin kamwekidada kitail en pousehla kaukaule onop sapwellime Mahsen oh pil doudouloale audepe kan. Ni ahnsou me kitail kin mweidong sapwellimen Koht ngehn sarawi en kamwekidada atail madamadau kan oh mohngiongitail kan, met pahn kalaudehla atail limpoak ong Siohwa. Atail nanpwung mwahu rehn Koht pahn wia mehkot me keieu kesempwal nan atail mour. Ong kitail, Siohwa iei Kompoakpatail me keieu keren, oh kitail men kaperenda Ih ahnsou koaros. (1 Sohn 5:3) Atail perenki karanih Koht pahn lalaudla oh kitail kin kalahnganki me E kin kaweid kitail ni limpoak oh kapwungala kitail ni ahnsou konehng.​—Deuderonomi 8:5.

¹⁰ Ma kitail sohte pahn nantiong kakehlahda atail nanpwung mwahu rehn Siohwa, e pahn kakete tepida ekis ekis luwetala. Ma met pahn wiawi, kaidehn Koht me sapwung, pwe “Koht sohte dohsang emen emen kitail.” (Wiewia 17:27) Kitail kak peren pwe Siohwa sohte kin ketikihong kitail kahpwal me pahn kahrehong aramas akan en apwalki tuhwong Ih! (1 Sohn 5:14, 15) Ahpw, mehlel, kitail anahne nantihong kolokolete atail nanpwung mwahu rehn Siohwa oh karanih Ih. Ahpw, e kin ketin sewese kitail en karanih Ih, ni E kin ketikihong kitail sawas kesempwal kan me kitail anahne ong kakehlahda oh kolokol atail lelepek ong Koht. (Seims 4:8) Iaduwen kitail kak doadoahngki sapwellime sawas limpoak pwukat koaros?

Kolokolete Atail Kehl en Pali Ngehn

11. Ia ekei wiawia kan me pahn kasansalehda atail kin lelepek ong Koht?

¹¹ Atail limpoak kehlail ong Koht pahn kamwekid kitail en kasalehda atail lelepek unsek ong Ih, me kin pahrekiong kaweid me Pohl kihda: “Wia uwen omw kak mwohn silangin Koht, pwe en ketin pwungkin uhk, nin duwen soundoadoahk men me sohte kin namenengki eh doadoahk, me kin padahkihong aramas akan mahsen en Koht ni mehlel.” (2 Timoty 2:15) Pwen kapwaiada met, kitail anahne kolokolete koasoandi mwahu ieu en kaukaule wia atail onop en Paipel, iang towehda mihding kan, oh iang doadoahk en kalohk. Kitail pil kak kolokolete atail kin karanih Siohwa ki ‘poadidiong kapakap pil ahnsou koaros.’ (1 Deselonika 5:17) Mehpwukat koaros kin kasalehda atail lelepek unsek ong Koht. Ma kitail pahn wia ekei wiewia pwukat, eri, met pahn kak kahrehong kitail en luwetala ni pali ngehn oh mengei en lohdi pahn lidip kan en Sehdan.​—1 Piter 5:8.

12. Iaduwen kitail pahn kak pweida ni atail pahn kin powehdi atail kapwal akan?

¹² Kolokol atail kehl en pali ngehn oh ahnsou koaros soupisengki wia doadoahk ong Koht kin pil kak sewese kitail en powehdi kahpwal akan. Kahpwal akan mwein pahn kak kohsang rehn aramas akan me pahn kak wia kasongosong laud ong kitail. Ni ahnsou me aramas akan kin pohnsehsehla kitail, de uhwong kitail, oh kaloke kitail, met pahn kak wia mehkot apwal ong kitail, ahpw mehlel ma uhwong kin kohsang rehn tohn atail peneinei kan de mehn mpatail kan. Ele mwein nan atail wasahn doadoahk kan oh wasahn sukuhl, uhwong kan kin kak wiawiong kitail oh e kak kahrehong kitail en luwetala oh kauwehla atail peikiong kaweid me kin kohwong Kristian akan. Nsensuwed, soumwahu, oh soumwahu en pahtou pahn kak kaluwetala paliwaratail, oh kalaudehla atail kahpwal akan ni atail kin dadaurete pahn kasongosong kan. Ahpw, kitail kak pweida ni atail pahn powehdi atail kahpwal akan koaros ma kitail pahn nantiong en “wiewia min akan oh wiawia kan en lelepek ong Koht, nin dokon atail kin kasikasik ketier en sapwellimen Siohwa rahno.” (2 Piter 3:11, 12, New World Translation) Kitail pil kak kolokolte atail peren ni atail pahn wia met oh likih me Koht pahn ketin kapaiada kitail.​—Lepin Padahk 10:22.

13. Dahme kitail anahne wia ma kitail men kaukaule lelepek ong Koht?

¹³ Edetehn Sehdan kin song en kalowehdi irail akan me kin kapwaiada irairen lelepek ong Koht, kitail sohte anahne masak. Dahme kahrehda? Pwehki “Eri, Kauno ketin mwahngih kapitasang me poadidi kan nan ar apwal akan.” (2 Piter 2:9) Ma kitail men dadaurete pahn kahpwal akan oh kilang iaduwen Koht kin sewese kitail en powehdi kahpwal akan, kitail anahne “kesehla mouren seupwoson Koht oh ineng suwed en sampah, oh . . . ese kaunda [nsenatail], oh momourki mour pwung oh [lelepek ong Koht] nan koasondi en ni ahnsou wet.” (Taitus 2:12) Nin duwen Kristian akan, kitail anahne en mwasamwasahn pwe atail luwet akan me kin pid ineng suwed en uduk oh atail wiewia kan sohte pahn kaluwetala oh kawehla atail lelepek ong Koht. Eri, ni ahnsouwet kitail pahn koasoiada duwen ekei madamadau de wiewia kan me kin kaluwetala atail lelepek ong Koht.

Kanahieng en Dehr Lohdi Pahn Kasongosong kan me Kin Kauwehla Atail Lelepek ong Koht

14. Dahme kitail en tamanda ni ahnsou kitail kin lelong kasongosong en noarokehda mwohni oh dipwisou kan?

¹⁴ Noahrok mwohni kin wia lidip ong aramas tohto. Kitail mwein pil pahn kak pitih pein kitail oh “medemedewe me lelepek ong Koht iei ehu ahl en alehdi [mwohni] tohto.” Met pahn pil kak kahrehong kitail en sohte namenengki isanekihla iengatail pwoson akan. (1 Timoty 6:5) Ele mwein kitail pil kak ahneki madamadau sapwung me kitail kak pweipwand rehn emen Kristian kepwehpwe oh kitail sohte anahne kapwungala. (Melkahka 37:21) Ahpw, kitail anahne tamataman me lelepek unsek ong Koht, kaidehn naineki mwohni de dipwisou kan kin “kahrehong kitail mour ahnsou wet, oh pil ahnsou kohkohdo.” (1 Timoty 4:8) ‘Dahme kitail wahdohng nin sampah wet? Sohte! A dahme kitail pahn wahsang nin sampah wet? Pil sohte!’ eri, kitail en nantiong “lelepek ong Koht oh itarki soahng kan me [kitail] ahnekier” oh kitail en ‘itarki kisin tungoal akan oh likou me mie.’​—1 Timoty 6:6-​11.

15. Dahme kitail kak wia ma kitail kin mwohneki mwadong kan oh met kin tepida kihsang atail ahnsou en kasalehda atail lelepek ong Koht?

¹⁵ Mwohnki mwadong kan pil kakete kihsang atail ahnsoun kasalehda atail lelepek unsek ong Koht. Iaduwen​—⁠kitail anahne kawekihla atail koasoandi ahnsou wet? Ni mehlel, kaiahn en paliwar oh mwadong kin ekis katapan. Ahpw, kapai kan me kin kohsang soahng pwukat kin tikitik sang pai en mour kohkohlahte. (1 Sohn 2:25) Rahnwet, aramas tohto kin “inengieng pein arail peren laudsang kupwuren Koht, re pahn kin liksansalamwahuki mwomwen atail pelien lamalam, ahpw re kin kahmahmki katepe,” kaleke kitailsang aramas pwukat. (2 Timoty 3:4, 5) Ahpw, irail me kin nantiong kolokolete lelepek unsek ong Koht kin “kaunopada pai kesempwal ong pein irail, me pahn wia ehu poahsoan kehlail ong ni ahnsou kohkohdo. Eri, irail ahpw pahn kak lelohng ni mouro me uhdahn mour mehlel.”​—1 Timoty 6:19.

16. Ineng suwed dah kei kin kahrehong ekei aramas en sohte kapwaiada sapwellimen Koht koasondi pwung kan, oh iaduwen kitail pahn kak powehdi ineng pwukat?

¹⁶ Sakau oh doadoahngki wini kasaliel, dipen nenek oh kamwahl, oh ineng suwed akan pahn kak kauwehla atail lelepek ong Koht. Lohdi pahn dihp pwukat pahn kakete irehdi kitail sang atail kin kapwaiada sapwellimen Koht koasoandi pwung kan. (1 Korint 6:9, 10; 2 Korint 7:1) Pohl pil anahne dadaurete pwehki ineng suwed akan me e kin kaukaule pei ong. (Rom 7:21-​25) Kitail anahne wiahda koasondi kehlail kan pwen kak kihsang ineng suwed akan. Ehu, kitail anahne en nantiong kolokolete tiahk mwakelekel. Pohl padahkiong kitail: “Eri, kumwail uhdahn pahn kemehla ineng kan en sampah me kin wie doadoahk loalamwail, eri, iet akan; kamwahl, sarsuwed, ineng suwed, oh noahrok kepwe (pwe noahrok kepwe iei ehu soangen kaudok ong dikedik en eni kan).” (Kolose 3:5) Kemehla atail ineng suwed akan kin wehwehki me kitail pahn nantiong en kihsang rehtail ineng suwed pwukat. Ma ke pahn poadidiong kapakap oh peki sapwellimen Koht sawas, mehpwukat pahn kak sewese kitail en pelianda ineng suwed akan oh nantiong wia dahme pwung oh lelepek ong Koht edetehn kitail kin mih nan koasoandi suwed wet.

17. Iaduwen kitail pahn anahne kilangwong kaiahn?

¹⁷ Nsensuwed pil kak kaluwetala atail ineng en dadaur oh e pil pahn kak kauwehla atail lelepek ong Koht. Sapwellimen Siohwa ladu tohto kin nsensuwed ekei ahnsou nan arail mour. (Nempe 11:11-​15; Esra 4:4; Sona 4:3) Nsensuwed pahn kak keieu kaluwetala kitail ma kitail kin kolokol atail lingeringer pwehki emen kansensuwedihala kitail de kihong kitail kaweid kehlail de song en kapwungala kitail. Ahpw, kaweid oh kaiahn kin wia mehn kadehde me Koht kin nsenohki kitail oh poakohng kitail. (Ipru 12:5-7, 10, 11) Kitail anahne kilangwong kaiahn, kaidehn ihte elen kaloke kitail ahpw elen kaweidih kitail en kekeid ni ahl me pwung. Ma kitail ahneki lamalam aktikitik, kitail pahn kesempwaliki kaweid oh pil alehdi, pwe kitail wehwehki me “kaiahn akan iei elen mour.” (Lepin Padahk 6:23) Met pahn kak sewese kitail en kekeirada ni pali ngehn ni atail pahn nantiong kasalehda atail lelepek ong Koht.

18. Pwukoa dahieu kitail kin ahneki me kin pid atail kin nanpwungsuwed ong emen?

¹⁸ Sohte wehwehpene nanpwungen aramas oh nanpwungsuwed rehn aramas teikan kak kahrehong kitail en apwaliki lelepek ong Koht. Mehpwukat pahn kak kahrehong kitail en pwunod de kahrehong ekei en wia mehkot sapwung, duwehte irail men kelepw ahnsou koaros oh sohte men patehng riarail brother oh sister kan ni pali ngehn. (Lepin Padahk 18:1) Ahpw, kitail anahne tamataman me: ma kitail pahn kolokolte atail lingeringer de kouimwintihti, met pahn kak kaluwetala pein atail nanpwungmwahu rehn Siohwa. (Lipai 19:18) Ni mehlel, “ma mehmen kin nda, “I poakohng Koht,” ahpw kin kailongki rie, ih aramas likamw men; pwe e sohte kak poakohng Koht me e sohte kilang, ma e sohte poakohng rie me pein ih kilikilang.” (1 Sohn 4:20) Nan sapwellimen Sises Kapahrek en Pohn Dohl, e kasansalehda duwen kesempwalpen mwadang kapwungala nanpwungsuwed akan. E padahkiong irail me rong ih: “Eri, ni omw pahn wiahiong Koht omw meirong pohn pei sarawi ehu, ke ahpw tamanda me riomw mehn Suhs men nsensuwed pahmw, pwilikihdi mahs omw meirongo mwohn pei sarawio, ke ahpw kohwei oh kapwungala nanpwungamwa; mwuri, ke ahpw pwurodo wia omw meirong ong Koht.” (Madiu 5:23, 24) Ma ke pahn pekmahk rehn emen me ke kansensuwedih ki lokaia de wiewia soh-kadek kan, ele mwein met pahn kak sewese aramaso en ekis nsenamwahula. Nanpwungsuwed nanpwungen aramas akan kak mwahula oh kitail pahn kak pwurehng ahneki popohl rehrail ma kitail pahn pekmahk oh wehkada me pein kitail me sapwung. Sises pil kin kihda kaweid me pid kamwahuwihala kahpwal akan. (Madiu 18:15-​17) Kitail kak ahneki peren mehlel ahnsou me atail nantihong kamwahuwihala kahpwal akan oh met kin pweida mwahu!​—Rom 12:18; Episos 4:26, 27.

Idawehnla Mehn Kahlemeng Mwahu en Sises

19. Dahme kahrehda inenen kesempwal en kahlemengih Sises?

¹⁹ Kitail pahn uhdahn lelohng kapwal akan, ahpw dehr mweidohng kahpwal pwukat en kahrehong kitail en sohlahr keid nan ahl me kin kahluwalahng mour soutuk. Tamanda me Siohwa kak doarehla kitail sang kahpwal akan. Nin duwen kitail “kesehsang kitail mehkoaros me kerempwai kitail,” oh “kitail en nantihong nan atail mour me kitail tapihadahr, rasehng atail kin tang kehlail ni atail kin weiren tang,” kitail en “kainenehiongete kapehditail kan ong Sises, me tepin atail pwoson oh me kaunsekala atail pwoson.” (Ipru 12:1-3) Ni atail pahn kin kasawiahda mwahu mehn kahlemeng mwahu en Sises oh nantiong en alasang ih ni atail lokaia oh wiewia kan pahn kak sewese kitail en kalaudehla atail lelepek ong Koht.

20. Kapai dah kei kin kohsang atail kin nantiong en dadaur oh lelepek ong Koht?

²⁰ Irair en dadaur oh lelepek ong Koht kin doadoahkpene oh kin sewese kitail en komourala. Ni atail pahn kasalehda irair kesempwal pwukat, kitail pahn kak pousehla papah Koht ni lelepek. Mendahki kitail kin lelong kahpwal akan, kitail pahn ahneki peren ni atail kin pein kilang sapwellimen Siohwa limpoak oh kapai kan pwehki kitail kin dadaurete oh kasalehda atail kin lelepek ong Koht. (Seims 5:11) Pein Sises kamehlelehiong kitail: “Kumwail nantiong oh [dadaur], pwe ih duwen amwail pahn komourala.”​—Luk 21:19.

Iaduwen Ke Pahn Sapeng?

• Dahme kahrehda irairen dadaur me kesempwal?

• Ia wehwehn lelepek ong Koht, oh iaduwen irair wet kin sansalda?

• Iaduwen kitail kak wiahda oh kolokolte atail kin karanih Koht?

• Ia ekei kasongosong kan me pahn kak kawehla atail lelepek ong Koht, oh iaduwen kitail kak liksang kasongosong pwukat?

[Kilels nan Pali 6, 7]

Lelepek ong Koht kin sansalda ni ahl tohto

[Kilels nan Pali 8]

Kanahieng en dehr lohdi pahn kasongosong kan en atail lelepek ong Koht