Soahng kan me Ke Kin Wiahki Mehkot Kihlenuwo Kin Kaunda Ahmw Mour?
KIHLENUWOHKI MEHKOT kin mie wasa koaros nan sampah. Ekei pak, aramas kin kesempwaliki mehpwukat pwe dene met tiahk me wia sohso kei ong kitail. De mehpwukat kak wia mehkot me ahn ehuehu keinek—oh iei me kin wiahiong mour en kaperen. Nan sapwen wai kan me mihmi pali kapi en sampah, kihlenuwo kin wia mehkot sohte kesempwal oh aramas sohte nohn kamehlele. Ahpw, wasa teikan—duwehte Aperika—kihlenuwo kin kak inenen kaweid oh kamwekid laud duwen momour en aramas akan.
Pali laud en ahn mehn Aperika tiahk kin poahsoankihda dahme re kamehlele me kihlenuwo. Kasdo kan, prokram nan radio kan oh pwuhk kan me wiawihda nan Aperika kin kalap kasalehda kesempwalpen dah kan me aramas en wasao kin wiahki mehkan me kihlenuwo oh soi likamw akan, me duwehte aramas wia manaman, kaudokiong pahpa kahlap akan me mehlahr oh kilel de dikedik sarawi de manaman akan. Dahme kahrehda aramas akan kin mwekidki kihlenuwo, oh kihlenuwo kin kohsang ia?
Dahme Wia Utupen Kihlenuwo?
Mehkan me kihlenuwo kin poahsoanki masak ngehn en me mehlahr akan oh pil ngehn teikan. Dahme kin wiawi aramas kin nda me ngehn pwukat me kin songosong aramas me momour akan pwehn kamasak irail, de en wahdohng irail kamwahu kan.
Mehkan me kihlenuwo pil kin doadoahk nan palien wunahni de pil wie wini. Ong aramas tohto nan sahpw me arail paien wehi ahpwtehn wie kekeirada, wini en wai kin wia mehkot pweilaud oh aramas kalap sohte kak pwainda. Kahrehda, aramas tohto kin rapahki palien wunahni, kosetipw, wie me sarawi oh pil wia mehkan me kihlenuwo pwe arail soumwahu en mwahula. Irail pil mengeiki kasalehong soun wunahni men arail soumwahu pwe dene re ese arail tiahk oh ese arail lokaia sang irail toahktehn wai kan. Dahme irail kamehlele me pil irair en kihlenuwo kin wia mehkot me re kin kamour oh sohte kin mengei en kesehla.
Irair en kihlenuwo kin wekpeseng nan ehuehu wasa nan sampah, oh arail parala rehn aramas teikan kin poahsoankihda soi, poadoapoad oh irair akan me wiawi. Ahpw, dahme poahsoanehda madamadau pwukat iei me aramas kin kamehlele me mie emen me sohte sansal me kitail anahne ale kamwahu reh.
Koht sohte kupwurki kitail en pek sawas ni atail doadoahngki wunahni. (Deuderonomi 18:10-12; 2 Nanmwarki 21:6) Met kin wehwehki ehuong imwintihti, oh uhpaliada irail akan me kin lahlahwe Koht! Rapahki kawehwehn mwekid en usu kan, kosetipw, de iang kasarawihki de peliki wiewia ieu pahn wehwehki me kitail mweidohng ngehn saut akan en kaweid pilipil akan me kitail wiahda nan atail mour. Met duwehte atail iang uhwong Koht.
Kristian mehlel akan uhdahn pahn irehweisang irail wiewiahn kihlenuwo sang nan arail mour oh alehda marain en ngehn me Sounkapikpatail, Siohwa, oh sapwellime ohl, Sises Krais, ketikihda. Irail eri pahn kakehr perenki uhdahn meleilei pwung me kohsang arail ese me re wiewia mehkot pwung mwohn sihleng en Koht.—Sohn 8:32.