Likih Siohwa ni Unsek ni Ahnsou Apwal Akan

“Koht me perehpatail oh atail kehl, me kin sewese kitail ni ahnsou apwal akan.”​—MELKAHKA 46:1.

1, 2. (a) Karasaras dahieu kin kasansalehda me e sohte itar en kose me kitail kin likih Koht? (b) Dahme kahrehda kitail anahne wia laud sang nda me kitail kin likih Siohwa?

KITAIL kak kose me kitail likih Koht. Ahpw, ni mehlel, e apwal en kasalehda me kitail kin likih Koht sang ni arail wiewia kan. Karasepe ieu, lepin lokaia pwukat: “Kitail kin Likih Koht” kin ni ahnsou werei mih nin mwohni doaropwe en U.S. oh pil mwohni takai kan.a Nan 1956, U.S. Congress kamanahla kosonned ehu, me lokaia pwukat pahn wiahla iren mehn kaweid ehu ong Wehin United States. Ahpw, weksang met, aramas tohto​—kaidehn nan sahpwo kelepw, ahpw wasa koaros nan sampah​—kin likih mwohni oh kepwehn sampah laudsang Koht.​—Luk 12:16-​21.

² Nin duwen Kristian mehlel akan, kitail anahne wia laud sang nda me kitail kin likih Siohwa. “Ih pil duwen pwoson, ma sohte wiewia iang, pwoson mehla ehu,” met pahn duwehte kitail aramas akan me kin kose me kitail kin likih Koht ahpw ma sohte wiewia iang, sohte katepen dahme kitail koasoia. (Seims 2:26) Nan artikel en mwowe, kitail sukuhlikier me kitail kin kasalehda atail likih Siohwa sang ni atail kin sohpeiong Ih ki kapakap, rapahki kaweid sang sapwellime Mahsen, oh atail kin sohpeiong sapwellime pwihn ong kaweid. Kitail pahn sukuhliki iaduwen kitail kak kapwaiada kahk siluh pwukat ni ahnsou apwal akan.

Ni Ahnsou Sohlahr Atail Doadoahk Ong Mwohni de Pweinen Atail Doadoahk Me Inenen Pweitikitik

3. Kahpwal en mwohni dah me irail sapwellimen Siohwa ladu kan kin lelohng nan “ahnsou apwal akan,” oh iaduwen kitail kin ese me Koht kin perenki sewese kitail?

³ Ni “ahnsoun apwal akan,” kitail Kristian akan kin duwehte aramas teikan, pwe kitail pil kin lelong kahpwal en mwohni. (2 Timoty 3:1) Eri, mwein kitail sohte kin kaunop ahpw mwadangete kakommoaldihsang doadoahk en mwohni. De mwein kitail anahne doadoahk laud aua tohto ni ehu ehu rahn ahpw pweinen doadoahk me inenen pweitikitik. Ma kitail kin mih pahn soahngen irair pwukat, mwein e kin apwal en ‘apwalih kisehtail kan.’ (1 Timoty 5:8) Iaduwen​—Siohwa Koht, Wasa Lapalapie, pahn kak sewese kitail ni soangen ahnsou pwukat? Uhdahn! Ahpw, Siohwa sohte pahn perehla kitail sang kahpwal akan koaros me kitail kin lelohng nan koasondi wet. Ma kitail kin likih Ih, pwuhken Melkahka 46:1 kak pweida rehtail: “Koht me perehpatail oh atail kehl, me kin ketin sewese kitail ni ahnsou apwal akan.” Iaduwen kitail kak kasalehda atail kin ni unsek likih Siohwa ni ahnsoun kahpwal en mwohni?

4. Ni ahnsou me kitail kin lelong kahpwal en mwohni kan, dahme kitail kak kapakapki, oh iaduwen Siohwa pahn mwekidki soangen kapakap pwukat?

⁴ Ehu ahl me kitail kak kasalehda atail kin likih Siohwa, iei sang ni atail kin sohpeiong Ih ki kapakap. Ahpw, dahme kitail kak kapakapki? Eri, pwehki kitail kin lelong kahpwal en mwohni, kitail mwein anahne erpit ni ahnsouwet laudsang mahs. Eri, kitail anahne kapakapki duwen met! Sapwellimen Siohwa Mahsen kin kamehlelehiong kitail: “Ma emen rehmwail anahne erpit, a en kapakap oh peki rehn Koht, oh Koht ahpw pahn ketikihong, pwe Koht me kupwursapan oh kalahngan ong aramas koaruhsie.” (Seims 1:5) Ei, peki rehn Siohwa en ketikihong uhk erpit​—met kin wehwehki koahiek en doadoahngki atail loalokong oh dehdehki​—pwe ken kak wiahda omw pilipil ni konehng oh pwung. Samatail limpoak me kin ketiket nanleng kin kamehlelehong kitail me E pahn ketin karonge soahngen kapakap pwukat. E kin kupwurki en kasalehiong aramas akan me kin likih Ih sang nan mohngiongirail unsek, duwen ahl me pwung.​—Melkahka 65:2; Lepin Padahk 3:5, 6.

5, 6. (a) Dahme kahrehda kitail kak sohpeiong sapwellimen Koht Mahsen pwen sewese kitail en powehdi atail kahpwal akan en mwohni? (b) Dahme kitail kak wia pwen katikitikiala atail pwunod kan ni ahnsou sohlahr atail doadoahk en mwohni?

⁵ Sohpeiong Sapwellimen Koht Mahsen pwen ale kaweid iei pil ehu ahl me kitail kak kasalehda atail kin likih Siohwa. Sapwellime mehn kataman kan me mih nan Pwuhk Sarawi kin “inenen likilik.” (Melkahka 93:5) Mehndahki Pwuhk Sarawi wiawihda sounpar 1,900 samwalahro, pwuhk wet me kohsang rehn Koht kin audaudki kaweid likilik kan me kak sewese kitail en powehdi kahpwal en mwohni kan. Kitail pahn tehk duwen ekei kaweid erpit kan me kohsang Pwuhk Sarawi.

⁶ Mahs mahsie, Nanmwarki Solomon me loalokong ntingihdi: “Mweinele aramas emen me kin doadoahk sohte pahn itar kene mwenge, ahpw e pahn meirla nsenamwahu. Ahpw me kepwehpwe ahneki soahng tohto me kahrehda e pahn kin pepehd oh wie pwunopwunod.” (Eklesiasdes 5:12) Anahne ahnsou laud oh mwohni tohto ong kamwahuiala, kamwakelehda, oh perehla neitail dipwisou kan. Eri, ma ehu rahn, kitail loi ieng irair en kakommoaldihsang doadoahk en mwohni, kitail kak isanehki soahngen ahnsowo en pwurehng kasawih pein atail mour, en medemedewe mehnia dipwisou kan me kitail anahne oh mehnia dipwisou kan me sohte nohn kesempwal en ahneki. Pwen katikitikiala atail pwunod kan, elen loalokong kitail en kawukihla koasondi kan en atail mour. Karasepe ieu, kitail kak kihsang nan atail mour soahng soh katepe kan, mwein kitail kak keseula nan ihmw ehu me tikitik sang ihmw me kitail kin kousoan loale met, de sohlahr ahneki dipwisou soh katepe kan?​—Madiu 6:22.

7, 8. (a) Iaduwen Sises kasalehda me e ketin mwahngih me aramas soh unsek kan kin nohn daulihlahr pwunodki duwen arail anahn akan en paliwar? (Pil kilang footnote.) (b) Mehnia kaweid me Sises kihda ong sewese kitail en dehr nohn pwunod laud?

⁷ Ni ahnsou me Sises wia Kahpahrek pohn Dohlo, e kihda kaweid wet: “Ihme I ndahkihong kumwail; kumwail dehr kin pwunodki kisin mwenge oh pihl ong mourimwail kan, dahme kumwail pahn kin kang de dahme kumwail pahn kin nim; de amwail likou, dahme kumwail pahn kin likawih.”b (Madiu 6:25) Sises mwahngih me aramas soh unsek kan kin nsenohki duwen iaduwen irail kin kak alehdi arail anahn akan ong ni ehu ehu rahn. Iaduwen kitail en “dehr pwunod”? Sises mahsanih, “Rapahki mahs Wehin Koht.” Sohte lipilipil soangen kahpwal dah kei kitail kin lelohng, kitail anahne pousehla mahs ni atail kin kaudokiong Siohwa. Ma kitail pahn wia met, Samatail nanleng pahn “ketikiong kitail” atail anahn akan en ehu ehu rahn. E pahn rapahki ahl ehu en ketikihong kitail sawas me anahn pwen sewese kitail en papah Ih.​—Madiu 6:33.

⁸ Sises pil kihda kaweid wet: “Eri, kumwail dehr kin pwunodki dahme [mwein, NW] pahn wiawi lakapw; pwe lakapw pahn pwukoahki pein eh pwunod.” (Madiu 6:34) E sohte loalokong ma kitail pahn nohn pwunodki dahme mwein pahn wiawi lakapw. Emen semen en Paipel koasoia: “Dahme kin uhdahn wiawi ni ahnsou kohkohdo sohte kin pahrekiong atail kin masak de pwunodki dahme pahn wiawi ni ahnsou kohkohdo.” Sang ni atail kin ni lamalam aktikitik kapwaiada kaweid en Pwuhk Sarawi, met kin kak sewese kitail en kesempwaliki mehkan me kesempwal nan atail mour oh dehr pwunodki dahme pahn wiawi lakapw.​—1 Piter 5:6, 7.

9. Ni ahnsou kitail kin lelong kahpwal en mwohni, sawas dah kei kitail kak diarada nan pwuhk me “ladu lelepek oh loalokong” wiahda?

⁹ Ni ahnsou me kitail kin lelohng kahpwal en mwohni, kitail pil kak kasalehda me kitail kin likih Siohwa sang ni atail kin ale sawas sang pwuhk kan me pwihn en “ladu lelepek oh loalokong” kin wiahda. (Madiu 24:45) Ekei ahnsou, mie artikel kan nan Awake! makasihn me kin kihda sawas laud ong powehdi kahpwal en mwohni kan. Artikel ehu me oaralap koasoia “Sohlahr Doadoahk​—Sawas Dah Kei Mie?” nan Awake! en August 8, 1991, kawehwehda duwen sawas waluh me kin sewese aramas tohto en powehdi arail kahpwal en mwohni ni erein ahnsou ehu me sohte arail doadoahk en mwohni.c Ni mehlel, kitail anahne doadoahngki kaweid pwukat oh pil ahneki madamadau toupahrek me kin pid kesempwalpen mwohni. Artikelo nan makisihn wet kin kawehwehda duwen met, me oaralap koasoia, “Mehkot me Kesempwal Sang Mwohni.”​—Eklesiasdes 7:12.

Ni Ahnsou Me Kitail kin Pwunodki Soumwahu kan

10. Iaduwen kahlemeng mwahu en Nanmwarki Depit kin kasalehong kitail me e konehng kitail en likih Siohwa ni ahnsou me kitail kin lelong soumwahu laud ehu?

¹⁰ E konehng en likih Siohwa ni ahnsou me kitail kin ahneki soumwahu laud ehu? Uhdahn konehng! Siohwa kin ketin poakpoake sapwellime aramas kan me kin soumwahu. Oh E pil kin perenki sewese irail. Karasepe ehu, ni ahnsou me Nanmwarki Depit ntingihdi duwen iaduwen Koht kin wia ong aramas pwung kan me kin soumwahu, mwein Depit pil ahneki soumwahu laud ni ahnsowo. E koasoia: “Kauno [“Siohwa,” NW] pahn ketin sewese irail ni ar pahn soumwahu oh E pahn ketin kakehlairailda.” (Melkahka 41:1, 3, 7, 8) Ahn Depit kin likih Koht sohte kin luwetala, oh mwurin mwo, nanmwarkio kehlailda sang eh soumwahu. Iaduwen​—kitail kak likih Koht ni ahnsou me kitail kin pwunodki atail soumwahu kan?

11. Ni ahnsou me kitail kin soumwahuda, dahme kitail kak peki rehn Samatail nanleng?

¹¹ Ni ahnsou me kitail kin soumwahu, ehu ahl en kasalehda me kitail kin likih Siohwa iei sang atail kapakap oh peki rehn Siohwa en sewese kitail en dadaurete. Kitail kak peki reh en sewese kitail en doadoahngki “loalokong oh erpit” pwen sewese kitail en ahneki roson en paliwar me pahn konehng ong pein atail. (Lepin Padahk 3:21) Kitail kak pil peki reh en sewese kitail en kanengamah oh dadaur mendahki atail soumwahu kan. Ahpw, keieu kesempwal, kitail men peki rehn Siohwa en kakehlailiala kitail pwen sewese kitail en lelepek oh toupahrek, sohte lipilipil dahme pahn wiawi. (Pilipi 4:13) Kolokol atail lelepek ong Koht kin wia mehkot kesempwal sang doarehla pein atail mour en ahnsouwet. Ma kitail pahn kolokol atail lelepek, Soun Kating Lapalap pahn ketikihong kitail mour oh roson unsek ni ahnsou kohkohlahte.​—Ipru 11:6.

12. Mehnia mouren kaweid kan me kohsang Pwuhk Sarawi pahn kak sewese kitail en wiahda atail pilipil kan ni elen erpit me kin pid wini kan?

¹² Atail kin likih Siohwa kin kamwekid kitail en sohpeiong sapwellime Mahsen, iei Pwuhk Sarawi pwen ale sawas pwung kan. Mour en kaweid kan me mih nan Pwuhk Sarawi pahn kak sewese kitail en wiahda atail pilipil pwung kan me kin pid sawasepen soumwahu nan imwen wini. Karasepe ieu, ma kitail kin ese me Pwuhk Sarawi kin sohte pwungki aramas akan en ale sawas en “wunani,” eri, kitail pahn liksang soangen sawas koaros me kin pid wunani. (Kalesia 5:19-​21; Deuderonomi 18:10-​12) Iet pil iren sawas ehu me kin kadehdehda duwen kaweid erpit me kohsang nan Pwuhk Sarawi: “Aramas pweipwei kin kamehlele mehkoaros; aramas loalokong kin kanahieng arail kahk koaros.” (Lepin Padahk 14:15) Ihme, ni ahnsou me kitail pahn medemedewe mehnia sawas pahn mwahu ong atail soumwahu, elen loalokong en rapahki ire mehlel kan mahs, dehr “kamehlele mehkoaros.” Doadoahngki “loalokong” pahn kak sewese kitail en medemedewe mwahu oh wiahda pilipil mwahu ehu.​—Taitus 2:12.

13, 14. (a) Mehnia artikel mwahu kan me kin pid pali roson en aramas akan me makisihn en Watchtower oh Awake! wiahda? (b) Kaweid dah kei me kin pid soumwahu laud kan me Awake! makisihn en January 22, 2001 kihda?

¹³ Kitail kak pil kasalehda atail kin likih Siohwa sang ni atail kin wadek pwuhk kan me pwihn en ladu lelepek oh loalokong wiahda. Ekei pak, nan Watchtower oh Awake! makisihn kan, mie artikel kan me kin koasoia duwen soangsoangen soumwahu kan.d Ekei ahnsou, makisihn pwukat kin koasoia duwen aramas akan me kin nantiong en powehdi arail soumwahu kan. Oh pil, ekei artikel kin kihda kaweid kan me kohsang Pwuhk Sarawi ong iaduwen aramas akan kak dadaur mendahki arail soumwahu laud kan.

¹⁴ Karasepe ehu, nan Awake! makisihn en January 22, 2001, oaralap en makisihn wet “Kamweit ong Aramas Soumwahu kan.” Artikel kan me mih nan makisihn wet kin kihda mouren kaweid kan en Pwuhk Sarawi me kin sawas laud, oh koasoia en aramas akan me kin lelong soahngen soumwahu kan ni erein sounpar tohto. Artikel me oaralap koasoia “Momour oh Pweida Mwahu Mehndahki Soumwahu​—Iaduwe?” kin kihda kaweid pwukat: Sukuhliki ni uwen me ke kak duwen ahmw soumwahu. (Lepin Padahk 24:5) Wiahda mehn akadei konehng kan, iangahki mehn akadei kan en sewese aramas teikan, ahpw pohnese me ele mwein ke sohte pahn kak lel mehn akadei kan me aramas teikan kak wia. (Wiewia 20:35; Kalesia 6:4) Dehr kelepwla. (Lepin Padahk 18:1) Ni ahnsou aramas teikan pahn mwemweitla rehmw, ken pereperen. (Lepin Padahk 17:22) Keieu, karanih Siohwa oh tohnmwomwohdiso kan. (Nahum 1:7; Rom 1:11, 12) Kitail soh kin kalahnganki kaweid likilik kan me Siohwa ketikihong kitail sang sapwellime pwihn?

Ni Ahnsou me Atail Luwet en Pali Uduk kin Kaukaule

15. Dahme kahrehda wahnpoaron Pohl kak powehdi ah luwet kan en paliware soh unsek, oh dahme kitail pil kak likih?

¹⁵ Wahnpoaron Pohl ntingihdi, “I ese me mwahu sohte mi loalei.” (Rom 7:18) Pohl kin wehwehki sang pein ah ekspiriens duwen uwen apwal en pei ong ah ineng suwed kan oh luwet en pali uduke me soh unsek. Ahpw Pohl kin likih me e pahn kak pweida. (1 Korint 9:26, 27) Iaduwen? Sang ni ah kin likih Siohwa ni unsek. Ih kahrepe Pohl kak nda met: “Uhdahn aramas paisuwed men ngehi! Ihs me pahn kapitiehla sang nan paliwar wet me kin kahluwalahng ie mehla? Kalahngan ong Koht, me kin ketin kapwaiada met rehn atail Kaun Sises Krais!” (Rom 7:24, 25) Iaduwen kitail? Kitail pil kin anahne pei ong atail luwet en pali uduk kan. Ni atail kin pei ong atail luwet akan, e pahn mengei kitail en ahneki madamadau ehu me kitail sohte kak powehdi atail luwet akan. Ahpw, Siohwa pahn sewese kitail ma kitail kin kahlemengih Pohl ni atail pahn likih Siohwa ni unsek kaidehn pein atail kehl.

16. Ni ahnsou me luwet ehu en paliwaritail sohte pahn uhdi, dahme kitail anahne kapakapki, oh dahme kitail anahne wia ma kitail sohte mehn pwurehng pwupwudi?

¹⁶ Ni ahnsou me luwet ehu en paliwar sohte pahn mwahula, kitail kak kasalehda me kitail kin likih Siohwa sang ni atail kin kapakap ngidingid. Kitail anahne peki rehn Siohwa en ketikihong kitail sapwellime ngehn sarawi. (Luk 11:9-​13) Kitail kak ni oaretik peki rehn Siohwa en ketikihong kitail liksang me suwed, me iei kisehn sapwellimen Koht wahn ngehn. (Kalesia 5:22, 23) Dahme kitail kak wia ma kitail pahn pwurehng pwupwudi? Kitail en dehr mworusala. Kitail en dehr pwangada kapakap ni lamalam aktikitik ong Koht me kin kasalehda mahk kalahngan, oh pehk mahk oh peki sapwellime sawas. Siohwa sohte pahn soikala aramas me “nsensuwedkihla” dihp me irail wiahda. (Melkahka 51:17) Ma kitail pahn peki rehn Siohwa ni mehlel, Siohwa pahn sewese kitail en powehdi atail kasongosong kan.​—Pilipai 4:6, 7.

17. (a) Dahme kahrehda e pahn kihong kitail sawas laud ma kitail pahn medemedewe pepehm en Siohwa ong luwet ehu me kitail kin nantiong en powehdi? (b) Mehnia Iren Pwuhk Sarawi kan kitail kak wadlikihla ma kitail kin mwadang lingeringerda? dehr doadoahngki lokaia kamedek kan? liksang atail kin perenki kilang mehn kamweit soh konehng kan?

¹⁷ Kitail pil kak kasalehda me kitail kin likih Siohwa sang ni atail kin onop sapwellime Mahsen pwen ale sawas. Kitail kak doadoahngki pwuhko me adaneki Concordance en Pwuhk Sarawi de Watch Tower Publications Index, oh rapahki pasepeng en peidek wet, ‘Ia pepehm en Siohwa duwen luwet ehu me I kin nantiong en powehdi?’ Ma kitail pahn medemedewe duwen pepehm en Siohwa, met pahn kak kakehlailihala atail ineng en kaperenda Ih. Oh pil, kitail pahn kak nantihong kahlemengih Ih, tateki wiewia kan me Koht kin kalahdeki. (Melkahka 97:10) Ekei aramas kin wadlikihla Iren Pwuhk Sarawi kan me kin pid arail luwet akan, oh met kin sewese irail. Kitail kin mwadang en lingeringerda oh apwaliki en powehdi? Eri, kitail kak wadlikila Lepin Padahk 14:17 oh Episos 4:31. Kitail kin apwaliki en dehr doadoahngki lokaia kamedek kan? Kitail kak wadlikihla pwuhken Lepin Padahk 12:18 oh Episos 4:29. Kitail kin perenki mehn kamweit akan me sohte konehng? Kitail kak song en tamanda Episos 5:3 oh Kolose 3:5.

18. Dahme kahrehda kitail en dehr namenek en tuhwong elder kan, pwen sewese kitail en powehdi atail luwet akan?

¹⁸ Peki sawas sang rehn elder kan me ngehn sarawi idiahda kin kasalehda me kitail kin likih Siohwa. (Wiewia 20:28) Pwe, “kisakis kan me mih rehn ohl akan” iei sawas me kin kohsang rehn Siohwa oh e kin doadoahngki Krais en perehla oh apwalih sapwellime sihpw. (Episos 4:7, 8, 11-​14) Ahpw ni mehlel, mwein e sohte mengei en peki sawas, pwehki luwet ehu me ke kin ahneki. Kitail mwein kin namenekda, pwe kitail lemeleme me elder kan sohlahr pahn wauneki kitail. Ahpw, ohl mah ni pali ngehn pwukat pahn wauneki kitail pwehki kitail kin kasalehda eimah ni atail kin peki sawas rehrail. Oh pil, elder kan kin nantihong en kahlemengih sapwellimen Siohwa irair akan ni ahr kin apwalih tohnmwomwohdiso kan. Arail kaweid pwung kan oh kansenamwahu me kohsang Mahsen en Koht pahn kakete kakehlailiala kitail en powehdi atail luwet akan.​—Seims 5:14-​16.

19. (a) Iaduwen Sehdan kin doadoahngki pwunod kan nan koasoandi wet? (b) Likilik kin pid dah, oh dahme kitail anahne koasonehdi nan kapehdetail kan en wia?

¹⁹ Dehr manokehla me Sehdan kin ese me ah ahnsou kin mwotomwotlahr. (Kaudiahl 12:12) E men doadoahngki pwunod akan en sampah wet en kaluwetala kitail oh kahrehong kitail en mworusala. Kitail en likih ni unsek dahme pwuhken Rom 8:35-​39 mahsanih: “Eri, ihs me kak irehdihsang kitail ni limpoak en Krais? Ia duwe, lokolok, de apwal, de kamakam, de duhpek, de semwehmwe, de keper, de mehla? . . . Soh, pwe ni soahng pwukat koaros kitail powehdier unsek sang ni manaman en ih me ketin loalloaleikitailehr! Pwe I kin ese ni mehlel me sohte mehkot kak irehdihsang kitail ni sapwellime kupwur limpoak; pil sohte mehla de mour, de tohnleng kan de manaman en nanleng teikan de kaunen nanleng kan, pil sohte mehkot me wiewiawi met de me pahn wiawi mwuhr, pil sohte mehkot pohnangin sampah de pahnangi-mehlel sohte mwahn mehkot nan audepen lahng oh sampah koaros kak irehdihsang kitail ni limpoak en Koht me kitail ahneki rehn Krais Sises atail Kaun.” Ia uwen kaselel mahsen pwukat me pid likih Siohwa! Soahngen likilik wet kin pid laud sang pepehm akan. Ahpw e kin pid atail kin medemedewe irair kan oh wiahda atail pilipil mwahu ni ehu ehu rahn. Eri, kitail en koasonehdi nan kapehdetail kan en likih Siohwa ni unsek ni ahnsou kahpwal akan.

[Nting tikitik kan me mi pah]

Ke Tamataman?

• Ni ahnsou me kitail kin mihla pahn kahpwal en mwohni kan, ni ahl dah kei kitail kak kasalehda me kitail kin likih Siohwa?

• Iaduwen kitail kak kasalehda me kitail kin likih Koht ni ahnsou me kitail kin pwunodki atail soumwahu?

• Ni ahnsou me kitail sohte kak powehdi ehu luwet, iaduwen kitail kak kasalehda me kitail kin likih Siohwa ni mehlel?

[Kilel nan pali 27]

Ma sohlahr atail doadoahk ong mwohni, elen erpit kitail en pwurehng kasawihada atail mour

[Kilel nan pali 28]

Poadoapoad en Loida kin kasansalehda iaduwen likih Siohwa pahn kak sewese emen en dadaur.

[Kilel nan pali 30]

Kitail en dehr namenekda peki sawas ong powehdi atail luwet akan