Paipel Kak Sewese Ahmw Pwopwoud
ONG ekei aramas, ni ahnsou me irail kin rong lepin lokaia wet: “pwopwoud” e kin wahdo madamadau kaperen ong irail. Ahpw, ong ekei, lepin lokaia wet kin wiahiong irail nsensuwed. Emen lih koasoia: “I kin ahneki pepehm me ngehi oh ahi pwoud mweipesengehr mendahte aht wie pwopwoudte. I kin pehm me ahi pwoud sohte kin nsenohkin ie oh I kin sangat ahnsou koaros.”
Dahme wiahda aramas riemen me nin tepio inoukihda ira en limpoakpene oh perenki emenemen ni ahnsou mwuhr ara lamalam solahr kerenpene? Ehu kahrepe pwehki ira sohte sukuhliki duwen pwukoa kan nan pwopwoud. Ehu pwuhk en palien wini tehkada: “Kitail kin alehda koasoandi en pwopwoud ahpw sohte ale kasukuhlpen duwen pwopwoud.”
Aramas malaulau nan rahnwet ese duwen dahkot pwopwoud oh met sansal sang roporop me wiawi me ede “The National Marriage Project” me Rutgers University nan New Jersey, U.S.A. wiahda. Kaun en roporop wet koasoia: “Me tohto en irail akan me mih nan roporop wet keirada nan peneinei me pwopwoudo kin kalap akamai oh ekei mweipeseng. Irail pwukat inenen dehdehki dahkot pwopwoud soansuwed, oh irail sohte wehwehki dahkot pwopwoud mwahu. Ni ahnsou me se idek rehrail duwen dahkot pwopwoud mwahu, ihte me irail kak nda: ‘soangen mour en pwopwoud me weksang ahn ahi pahpa oh nohno.’ ”
Iaduwen—Kristian akan sohte kin iang ahneki kahpwal en pwopwoud? Soh. Ni mehlel, ekei Kristian akan nan senturi keieu anahne ale kaweid kehlail ren “dehr kesehla” arail pwoud. (1 Korint 7:27) E sansal mwahu me patpenehn aramas soh-unsek riemen en wiahla pwopwoud ieu pahn mie kahpwal akan, ahpw mie mehkot me kak sewese ira. Ohl oh lih pwopwoud kan kak kamwahuwihala arail ehupene sang ni arail pahn doadoahngki kaweid en Paipel.
Mehlel, Paipel kaidehn pwuhk ehu me ntingda ongete kaweid ong pwopwoud. Ahpw, pwehki e pwilidohsang rehn Ih me tepin wiahda koasoandi en pwopwoud, kitail pahn kasik me sapwellime kaweid akan pahn wia sawas laud. Siohwa ketin doadoahngki soukohp Aiseia oh mahsanih: “Ngehi me Kauno [“Siohwa,” NW] omw Koht, me kupwurki padahkihiuk pwe en wia kamwahu ehu ong uhk oh kaweid uhk nan ahl me ke pahn keid ie. Ma ke rongete ei kosonned akan! Eri, kupwurmwahu ahpw pahn pwilipwilwei rehmw rasehng piletik pwoat me sohte kin madada. Powehdi pahn lelohng uhk, rasehng iloak kan me kin pwungupwungdohng ni oaroahr.”—Aiseia 48:17, 18.
Iaduwen—limpoak me mih nanpwungen kowe oh omw werek nin tepio tepidahr tikitikla? Ke pehm me ke lohdiong nan irair me pwopwoud ieu me solahr limpoak loale? Emen lih me pwopwoudkiher sounpahr 26 nda: “Medek me aramas kin alehdi ki soangen ehupene wet sohte mehkot kak kawehwehda. E kin poatopoat oh sohte imwi.” Me mwahusang alehiong uhk soangen pwopwoud me sohte pahn wahdohng uhk nsenamwahu, ke soh pilohng uhk mehkot me mwahusang? Artikel en mwurin met pahn kasalehiong ohl pwopwoud akan oh lih pwopwoud akan iaduwen kaweid en Paipel kak sewese arail pwopwoud nan irair ieu—iei utuhtpene.