Pere Omw Mouren Pwopwoud

Siohwa kin ketin kilengwohng inou me pwopwoud kan wiahda nin duwen mehkot keieu kesempwal. E ketin mahsanih me ohl oh lih pwopwoud kan anahne kin mihpene. (Md 19:5, 6) Mie pwopwoud peren tohto nanpwungen sapwellimen Koht aramas akan. Ahpw, sohte pwopwoud ehu me unsek. Kahpwal kan kin pwarada. Kitail dehr iang ahneki soangen madamadau me aramas tohto kin ahneki me tohrohrpeseng oh mweipeseng iei me mwahu en wiawi ni ahnsou me pwopwoud ehu ahneki kahpwal kan. Ia duwen pwopwoud Kristian kan ar kak pere arail mouren pwopwoud?

Tehk kahk kesempwal limau kan.

1. Pere omw mohngiong ni omw soikala kalahiong emen oh mehn kamweit me pidada tiahk samin, me kin ihte kaluwetehla mouren pwopwoud.​—Md 5:28; 2Pi 2:14.

2. Kakehlaka omw nanpwungmwahu rehn Koht, oh kalaudehla omw ineng en men kaperenda ih nan omw mouren pwopwoud.​—Me 97:10.

3. Pousehlahte pwuhriong nan mour kapw, oh pil wia soahng tikitik kan me kadek oh me pahn kahrehiong omw werek eh mour en nsenamwahu.​—Kol 3:8-10, 12-14.

4. Kin koasoipene ni wahu oh katapan.​—Kol 4:6.

5. Kasalepene anahn akan nanpwungen pwopwoud ni limpoak.​—1Ko 7:3, 4; 10:24.

Ni ahnsou me Kristian kan kin wauneki mouren pwopwoud, re kin kasalehda ar wauneki Ih me ketin koasoanehdi mouren pwopwoud, iei Siohwa.

KILANG KISIN KASDO WE MUST “RUN WITH ENDURANCE”​—OBEY THE RULES OF THE CONTEST, OH MWURI SAPENGALA PEIDEK PWUKAT:

• 

  Mendahki mouren pwopwoud ehu kak tepidahte mwahu, soangen kahpwal dah kan me kakete pwarada?

• 

  Ia duwen kaweid oh ire mehlel en Paipel kan eh kak sewese irail me pehm me re ahneki mouren pwopwoud me sohte nohn mie limpoak?

• 

  Soangen kosonned dah kan me Siohwa ketikihda ong mouren pwopwoud?

• Pwe pwopwoud ehu en kak pweida, dahme emenemen ira anahne wia?