Ahn Ihs Inou Kan Me Ke Kak Likih?
“AH inou kan me kehlail duwehte pein ih me kehlail; ahpw ah wiewia kan me sohte katepe duwehte pein ih ahnsou wet me sohte katepe.”—King Henry the Eighth, by William Shakespeare.
Inou kehlail pwukat me Shakespeare koasoia wasaht kin pidada inou kan me English cardinal Thomas Wolsey wiahda, oh ohlo kin doadoahngki ah kehl laud ong palien politik nan England erein senturi kaeisek weneu. Ekei aramas kin nda me dahme Shakespeare koasoia pwungiong inou kan me tohto kin wiahda nan atail ahnsou. Ahnsou koaros, inou tohto kin kohwong aramas akan ahpw ekeite inou pwukat me kin pweida. Ihme kahrehda, e sohte kapwuriamwei me pali laud en aramas akan kin apwaliki kamehlele inou koaros me irail kin rong.
Nsensuwed Pwehki Inou kan Sohte kin Pweida
Karasepe, ni ahnsou me pingiping laud wiawi nan wehin Balkan nan 1990 samwa, pwihn en United Nations Security Council pakairki me nan kahnimw en Srebrenica nan wehin Bosnia, aramas akan “kak rukala wasao pwe pwihnen United Nations (peacekeeping troops) pahn perehla tohn kahnimwo.” Inou wet mwomwen mwahu pwehki pwihn en United Nations wiahda inowo. Mehn Muslim tohto me kalipiliplahng Srebrenica kamehlele inowo. Ahpw, ni imwila, inowo sohte pweida. (Melkahka 146:3) Nan July en pahr 1995, pwihn en sounpei kan me mahweniong pwihn en United Nations pwahki irail sang wasao oh kaloweiraildi. Mehn Muslim tohto sang 6,000 salongala, oh pil mehn Muslim tohto sang 1,200 kamakamala.
Nan irair en mour koaros, e kin dirkihla inou kan me sohte kin pweida. Rahnwet, aramas kin pehm me “arail mour kin pitida pahn soangen inou kan me kin likamw oh advertising (commercials) me kin likamw oh sohte pweida.” Irail pil kin nsensuwedki “inou likamw tohto me politician kan kin wiahda.” (The New Encyclopædia Britannica, Volume 15, pali 37) Kaunen pelien lamalam, me aramas tohto kin likih, kin mwamwahleki tohn arail mwomwohdiso kan oh kin pil isaneki irail ni ahl sapwung. Pil lel irail akan me kin doadoahk nan palien kasukuhl oh wini—me aramas kin likih me irail kin kasalehda limpoak ong aramas teikan oh sewese irail—irail sohte kin kapwaiada arail inou kan, kahrehda irail kin mwersuwedih aramas de pil kemehla aramas me mihmi pahn epwelparail. Ihme kahrehda, Pwuhk Sarawi kin kaweidih kitail en dehr kamehlele oh likih dahme aramas kin koasoia!—Lepin Padahk 14:15.
Inou kan me Kin Pweida
Mehlel, aramas tohto kin nantihong kolokol arail inou kan, mendahki ma irail anahne tohnmetei laud. (Melkahka 15:4) Ekei aramas kin inenen kesempwaliki dahme irail kin inoukihong meteikan oh irail kin wia uwen arail kak en kolokol arail inou kan. Oh pil ekei aramas kin men kolokol arail inou pwe irail kin ese me met kin kasalehda me irail aramas mwahu kei. Irail pwukat me kin nantihong kolokol arail inou, ahpw arail inou sohte kin pweida. Soangsoangen irair kan kin pwarada me kin kahrehda arail inou kan sohte kin pweida.—Eklesiasdes 9:11.
Eri, e sansal me pwehki soangsoangen kahrepe kan, pali laud en aramas diarada me e kin apwal en kamehlele inou kan en aramas teikan. Ihme kahrehda, peidek wet kin kak pwarada: Mie inou kan me kitail kak likih? Ei. Kitail kak likih inou kan me kileledi nan Mahsen en Koht, Pwuhk Sarawi. Ke soh kasawihada dahme artikel en mwurin met kin kasalehda duwen ire wet? Ke pahn diarada, me duwehte aramas tohto pil diarada, me ke kak likih sapwellimen Koht inou kan.
[Kilel Credit nan Pali 3]
AP Photo/Amel Emric