Inou Kan Me Ke Kak Likih
SAPWELLIMEN Koht soukohp Maika ese me inou kan kakete sohte pweida. Ni mwehin Maika, e sohte kak likih kompoakepah kan en kolokol arail inou. Ihme kahrehda, Maika kaweidki: “Ke dehr kamehlele mehn mpomw de likih kompoakepahmw. Pil kanahieng dahme ke pahn ndaiong omw pwoud.”—Maika 7:5.
Ahpw, iaduwen—Maika mweidohng irair kansensuwed wet en kahrehong ih en sohte likih inou kan koaros? Soh! E kasalehda me e kin likih inou kan me ah Koht, Siohwa, kin wiahda. E ntingihdi: “I pahn sohpeiong Kauno [“Siohwa,” New World Translation]; I pahn koapworopwor awiawih Koht, me pahn ketin komouriehla. Ei Koht pahn ketin karonge ie.”—Maika 7:7.
Dahme kahrehda Maika ahneki likilik laud? Pwehki e ese me Siohwa kin kapwaiada sapwellime inou kan koaros. Soahng koaros me Koht ketin inoukihong pahpa kahlap en Maiko ko pweida. (Maika 7:20) Sapwellimen Siohwa irair en lelepek ong kapwaiada sapwellime inou kan koaros kihong Maika kahrepe mwahu en kak kamehlele me Siohwa pahn kak kapwaiada sapwellime inou kan me e wia ong ahnsou kohkohdo.
“Sohte Inou me Sapwungala”
Maika wehwehki me Siohwa kapitala mehn Israel kan sang wia ladu kan ong mehn Isip. (Maika 7:15) Sosua, me pil iang pitla, kangoange rie mehn Israel kan en ahneki pwoson oh likih sapwellimen Koht inou kan koaros. Pwekihda? Sosua katamankin irail oh mahsanih: “Emenemen kumwail patohwan ese nan mohngiongimwail oh ngenomwail me Kauno [“Siohwa,” NW] amwail Koht ketikihong kumwail soahng mwahu koaros me e ketin inoukidahr. E ketin kapwaiadahr inou koaros me e ketin wiahda, sohte ehu me sapwungala.”—Sosua 23:14.
Mehn Israel wehwehki me Siohwa wia soahng mwahu tohto ong irail. E kapwaiada sapwellime inou me kadaudok en Eipraam kan pahn ngederla duwehte usu en nanleng oh irail pahn sapwenkihla Kenan. Siohwa pil padahkiong Eipraam me kadaudoke kan pahn kalokolok erein sounpahr 400 ahpw pahn pwurala Kenan “ni kapahieu en dih.” Mehpwukat koaros wiawi.—Senesis 15:5-16; Eksodus 3:6-8.
Mehn Isip kan kasamwo mehn Israel ko ni mwein Soses, nein Seikop. Ahpw, mwuhr, mehn Isip kan kaloke irail, kaliduwih irail, ahpw duwehte dahme Koht inoukihong irail, mwurin kapahieu en dih sang ahnsou me re pedolong nan Isip, irail kadaudok en Eipraam kan pitsang pahn kanaudok de sensel pahn mehn Isip kan.a
Erein sounpahr 40 me dower powe, mehn Israel kan kin kadehde duwen Siohwa a kin ketin kapwaiada sapwellime inou kan koaros. Ni ahnsou me mehn Amalek ko mahweniong mehn Israel ko, Koht ketin peiki irail oh doareirailla. E apwalihala arail anahn akan koaros erein sounpahr 40 me re kakahnseli nan sapwtehn lao lel irail lel nan Sapwen Inou. Ni en Sosua kin katamando sapwellimen Siohwa wiewia kan ong kadaudok en Eipraam ko, e kak ni eimah mahsanih: “E ketin kapwaiadahr inou koaros me e ketin wiahda, sohte ehu me sapwungala.”—Sosua 21:45.
Kekeirada Ahmw Likih Sapwellimen Koht Inou kan
Iaduwen ahmw pahn kak kekeirada pwoson oh likih sapwellimen Siohwa inou kan duwehte Maika oh Sosua wia? Eri, iaduwen ahmw kin kak kekeirada ahmw likih meteikan? Ke anahne wia uwen me ke kak en esehla aramaso. Karasepe, ke kak ese ma ke kak likih aramaso ni ahmw pahn kasawih ih mwahu oh kilang ia uwen laud e kin kapwaiada ah inou kan. Ni e kin lalaudla ahmw wehwehkihla aramas akan, ahmw likih irail kak kekeirada. Ke kak pil wia met me pid ahmw kekeirada ahmw pwoson oh likih sapwellimen Koht inou kan.
Ehu ahl ke kak wia met iei sang ni ahmw pahn doudouloale duwen kapikipikda kan oh arail koasoandi kan. Saindis kan kin likih koasoandi pwukat, duwehte koasoandi en wiawidahn kisin cell ah kin nenepeseng oh tohtohla pwehn wiahda paliwar. Ni mehlel, koasoandi en mwekid en irair kan oh angin kehl nan lahng oh sampah kohsang Sounkoasoandi men me keieu likilik. Ke kak likih sapwellime inou kan, duwehte ahmw kak likih koasoandi en wiepen kapikipikda kan.—Melkahka 139:14-16; Aiseia 40:26; Ipru 3:4.
Siohwa doadoahngki soukohp Aiseia, iengen Maika, pwehn kasalehda me atail kak likih mwekid en nan wehwe oh mwekimwekid en pihl akan kin duwehte atail kak likih sapwellime inou kan. Ehuehu pahr, keteu kin mweredi. Keteu kin kalamwurih sampah oh kahrehda aramas kak poad wahn sahpw kan oh dolung wahrail. Pwehki kitail kak likih koasoandi wet, Siohwa mahsanih: “Ei mahsen kin rasehng sinoh oh keteu me kin mweredi sang pahnlahng pwe en kalamwurih sampah. E kin kawosehda oh kakairada wahnsahpw, oh pil kin kihong aramas werentuhke mehn poad oh kisin tungoal akan mehn tungoal. Ih pil duwen mahsen me I kin kapwilewei—e pahn kin kapwaiada audepen kupwurei koaros; e pahn kin kapwaiada mehkoaros me I anahne en pweida.”—Aiseia 55:10, 11.
Inou kan me Pid Duwen Paradais Pahn Pweida
Kasawih kapikipikda kan kin sewese iuk en likih Sounwiepen mehkoaros, ahpw, mie mehkot me ke anahne pil wia ma ke men sukuhliki duwen inou kan me kisehn “mahsen en Koht.” Pwehn sukuhliki duwen inou pwukat pwe ken kak likih irail, ke anahne kasawih Mahsen en Koht oh sukuhliki duwen kupwuren Koht ong sampah oh sapwellime wiewia kan ong aramas akan.—2 Timoty 3:14-17.
Soukohp Maika kin likih sapwellimen Siohwa inou kan. Rahnwet, kitail naineki Mahsen en Koht oh met kin laudsang dahme mie ni mwehin Maika. Sang ni ahmw pahn wadek Pwuhk Sarawi oh doudouloale duwen audepe, ke kak pil kekeirada ahmw likih me sapwellimen Koht inou kan koaros pahn kak pweida. Inou pwukat sohte dokedokehte kadaudok en Eipraam, ahpw aramas koaros. Siohwa inoukihong Eipraam, me kin lemmwiki Ih met: “Wehi koaros pahn peki I en kapaiairailda nin duwen ei kapaiadahr kadaudokomw kan—pwehki omw kapwaiadahr ei mahseno.” (Senesis 22:18) Keieun “kadaudok” en Eipraam iei Sises Krais, Mesaia.—Kalesia 3:16.
Siohwa pahn doadoahngki pwehn kapaiada irail aramas peik kan. Oh dahme Koht ketin inoukihda me E pahn wia nan atail ahnsou? Maika 4:1, 2 kin sapeng peidek wet ni lokaiahn kokohp wet: “Ni rahn akan me pahn kohdo, dohl me Tehnpas Sarawien Kauno [“Siohwa,” NW] uhda powe pahn wiahla dohl me keieu ile nanpwungen dohl kan; e pahn sikdahsang dohl koaros. Wehi tohto pahn pokondohng ie, oh towe kan pahn nda, ‘Nna, kitail kohdahla nin nahnahn Kauno [“Siohwa,” NW], ni Tehnpas Sarawien Koht en Israel. Pwe e pahn ketin padahkiong kitail dahme e kupwurki kitail en wia; kitail pahn weid nan ahl akan me e ketin pilada.’ ”
Irail me sukuhliki duwen sapwellimen Siohwa elen mour kan pahn “wekidohng neirail kedlahs akan ni mehn deipwel oh neirail ketieu kan ni naip en pal tuhke.” Aramas solahr pahn ahneki madamadau en “men pei nan mahwen.” Ni ahnsou keren, sampah pahn direkihla aramas pwung kan, oh sohte me pahn kamasapwehkih irail oh mwersuwedih irail. (Maika 4:3, 4) Ei, Mahsen en Koht inoukihda me pahnangin kaundahn Wehin Koht, Siohwa pahn doadoahngki Sises Krais en kasohrala irail akan me kin kaloke aramas teikan.—Aiseia 11:6-9; Daniel 2:44; Kaudiahl 11:18.
Pil irail koaros me lokolok oh mehla pwehki sohsohki dihp me kohsang Adam oh Ihp pelianda Koht—irail pahn iasada oh irail kak mour kohkohlahte nin sampah. (Sohn 5:28, 29) Sehdan oh nah ngehn saut akan, sounwiahda suwed kan, pahn kohkohsang sampah, oh pwehki sapwellimen Sises meirong tomw lipwen dihp pahn solahr mie. (Madiu 20:28; Rom 3:23, 24; 5:12; 6:23; Kaudiahl 20:1-3) Eri, dahme pahn wiawiong irail aramas peik kan? Irail pahn ale kapai en mour soutuk nan paradais nin sampah oh pahn nsenamwahuki roson unsek!—Melkahka 37:10, 11; Luk 23:43; Kaudiahl 21:3-5.
Ia uwen kaselel inou pwukat! Ahpw, iaduwen—ke kak kamehlele inou pwukat? Ehi, ke kak. Inou pwukat kaidehn ahn aramas me kin men kapwaiada ahpw sohte kak pwe sohte itar arail kehl. Inou pwukat kohsang Koht Wasa Lapalahpie, me sohte kak likamw oh me “sohte kin pwapwand ni wiepen sapwellime inou.” (2 Piter 3:9; Ipru 6:13-18) Ke kak likih unsek inou kan koaros me mihmi nan Pwuhk Sarawi, pwe re kohsang Utupen dahme mehlel iei “Siohwa, Koht en me mehlel.”—Melkahka 31:5, NW.
[Nting tikitik me mi pahs]
a Kilang pwuhken Insight on the Scriptures, Volume 1, pali 911-912, me Sounkadehdehn Siohwa wiahda.
[Blurb nan Pali 6]
“Siohwa Koht ketin kapwaiadahr inou koaros me e ketin wiahda, sohte ehu me sapwungala.”—SOSUA 23:14, NW
[Kilel nan Pali 4]
Siohwa ketin kapwaiadahr sapwellime inou kan koaros ong mehn Israel ni Sehd Weitahta oh nan sapwtehn
[Kilel nan Pali 7]
Siohwa kapwaiadahr sapwellime inou ong Eipraam. Kadaudoke, Sises Krais, pahn kahrehong aramas akan en ale kapai tohto