Dahme Siohwa Kupwurki Kitail En Wia?
“Dahme Siohwa kin ketin kupwurki kitail en wia: kitail en wiahda me pwung; kitail en kin kasalehda atail limpoak-kadek oh peikiong atail Koht ni karakarahk.”—MAIKA 6:8, NW.
1, 2. Dahme kahrehda ekei sapwellimen Siohwa ladu kan kin pahtoula, ahpw dahme pahn kak sewese aramas pwukat?
VERA, emen Kristian lelepek me mahki mpen sounpar 75, kin ahneki soumwahu en paliwar. E koasoia, “Ekei ahnsou, I kin kilang sang imwei riei Kristian brother oh sister kan kalakalohk ihmw lel ihmw. I kin sengiseng, pwe I men iang irail ahpw ai soumwahu kin ireiehsang en wia ai doadoahhk ong Siohwa.”
2 Mie pak ke ahneki soangen pepehm wet? Ni mehlel, koaros me kin poakohng Siohwa men kekeid ni mware oh kapwaiada sapwellime koasondi kan. Ahpw, iaduwen ma paliwaratail kan kin wia luluwetala, de kitail kin mahlahr, de mie atail pwukoa en peneinei kan? Mwein kitail kin pahtoukihla mih pahn soangen irair pwukat, pwe irair pwukat kin wia mehn kerempwa ong atail doadoahk en papah Koht. Ma kitail kin mih pahn soahngen irair wet, pwuhken Maika irelaud 6 oh 7 pahn kak kangoange kitail. Irelaud pwukat kin kasansalehda me sapwellimen Siohwa koasondi kan kin pwung oh aramas koaros kak kapwaiada.
Ia Mwomwen Sapwellimen Koht Wiewia Ong Sapwellime kan
3. Ia mwomwen sapwellimen Koht wiewia kan ong mehn Israel me kin uhwong Koht?
3 Kitail kak kilang pwuhken Maika 6:3-5 oh tehk ia mwomwen sapwellimen Siohwa wiewia ong sapwellime aramas akan. Tamanda me ni mwehin Maika, mehn Israel akan kin uhwong Koht. Ahpw, Siohwa kin ni kadek mahsanihong irail mahsen pwukat, “Kumwail nei aramas akan.” E peki rehrail: “Kumwail nei aramas, menlau tamanda.” E sohte ni kehlail kedipahda irail, ahpw e kin song mahs en lel mohngiongirail kan ni e kin wia peidek wet, “Dahme I wiahiong kumwail?” E pil kin kangoange irail en “song en rapahki” ma mie sapwellime irair sapwung kan.
4. Iaduwen sapwellimen Koht mehn kahlemeng mwahu en limpoak anahne kamwekid kitail?
4 Koht kin wia mehn kahlemeng mwahu ong kitail koaros! E pil ni elen limpoak doadoahngki lepin lokaia pwukat: “nei aramas” ong Israel oh Suda ni mwehin Maika edetehn irail kin uhwong Ih, oh E doadoahngki lepin mahsen: “menlau” ong irail. Kitail pil anahne kasalehda limpoak oh kadek ong irail akan me kin iang mwomwohdiso. Ahpw ni mehlel, sohte mengei ong kitail en perenki tohn mwomwohdiso koaros, de mwein ekei irail kin luwet ni pali ngehn. Ahpw, ma irail kin poakohng Siohwa, kitail men sewese irail oh kasalehda limpoak.
5. Ia mouren padahk en pwuhken Maika 6:6, 7?
5 Kitail kak wadek pwuhken Maika 6:6, 7. Maika kin kihda peidek pwukat: “Dahme I pahn patohwanohng Kauno [“Siohwa,” NW] Koht en nanleng, ni ei pahn patohwan kaudokiong? I pahn meirongkihong koupwul me keieu mwahu kan? Ia duwe, Kauno pahn kupwurperenki ei meirongkihong kiden sihpw de lehn olip me pahn kin pwilipwiliwei poatopoat? Ia duwe, I pahn meirongkihong nei mesenih, mehn tomwki dipei kan?” Soh, kitail sohte kak kaperenda Siohwa atail “meirongkihong kiden sihpw de lehn olip me pahn kin pwilipwiliwei poatopoat.” Ahpw, mie mehkot me pahn kaperenda Ih. Dahkot met?
Kitail Anahne en Wiahda me Pwung
6. Ia kosonned silu me kin kohsang rehn Koht me kileledi nan pwuhken Maika 6:8?
6 Nan pwuhken Maika 6:8, kitail sukuhliki dahme Siohwa kin kupwurki kitail en wia. Maika wia peidek wet: “Eri, iet me Kauno kin ketin kupwurki kitail en wia: kitail en wiahda me pwung; kitail en kin kasalehda atail limpoak kadek, oh peikiong atail Koht ni karakarahk.” Kosonned silu pwukat kin pid atail pepehm, madamadau, oh wiewia kan. Kitail anahne en nseneki kasalehda irair pwukat, medemedewe iaduwen kitail kak kasalehda irair pwukat, oh pil kasalehda irair pwukat sang ni atail wiewia kan. Kitail tehkpene ehu ehu irair silu pwukat.
7, 8. (a) Ia wehwehn “en wiahda me pwung”? (b) Sapwung dah kei kin kalapw wiawi ni mwehin Maika?
7 “En wiahda me pwung” kin wehwehki en kasalehda kopwungpwung. Koht kin ketin utungada kopwungpwung. Aramas akan me kin mih ni mwehin Maika, sohte kin kasalehda kopwungpwung ahpw irail kin wia kopwung sapwung. Ni ahl dah kei? Wadek pwuhken Maika 6:10. Ni imwilahn iretikitiko, sounnet kan kin doadoahngki “mehn sohng sapwung,” met kin wehwehki mehn sohng me nohn tikitik. Iretikitik 11 kin mahsanih me irail kin pil doadoahngki “mehn tenek sapwung.” Oh iretikitik 12 pil mahsanih, “irail me inenen widing.” Eri, ni mwehin Maika, soun pisnes tohto kin doadoahngki mehn sohng sapwung, mehn tenek sapwung, oh lokaia likamw akan.
8 Wiewia sapwung pwukat sohte kin wiawi nan wasahn netinet kan te. Re pil kin kalapw wiawi nan mwoalen kopwung. Maika 7:3 kin kawehwehda me “lapalap akan oh sounkopwung kan kin peki re en ale pweinen ar pahn wia doadoahk ni ahl sapwung.” Aramas kin natih sounkopwung kan pwen kadeikada aramas pwung kan. Aramas “lapalap akan,” de tohn wehi kan me kin ahneki manaman kin pil iang wiewia sapwung pwukat. Pwe, Maika kin kawehwehda me lapalap akan oh sounkopwung kan, kin “ehukihpene,” koasoandio en wiahda sapwung kan.
9. Iaduwen aramas suwed akan ahr kin wia kopwung sapwung kan kin kaluwetala Suda oh Israel?
9 Kopwung sapwung pwukat me kaun suwed akan kin wia, kin pil kaluwetala Suda oh Israel. Maika 7:5 kin kawehwehda duwen sohlahr kopwungpwung kin kahrehong sohlahr likilik nanpwungen aramas akan, oh kompoakepah keren kan, oh pil pwopwoud kan. Iretikitik 6 kin kawehwehda me kopwung sapwung wet kin kahrehong peneinei keren kan duwehte pwutak kan oh arail pahpa kan, serepein kan oh arail nohno kan en imwintihtihpene.
10. Ia wiewian Kristian akan mehndahki irairen sampah wet kin dirkihla kopwung sapwung kan?
10 Iaduwen rahnwet? Irair en ni ansouwet soh kin duwehte mahs? Duwehte Maika, kopwung sapwung kin kapilpene kitail, irair en soh likilik kin mi wasa koaros, oh mouren aramas akan oh peneinei kan kin suwedlahr. Ahpw, nin duwen sapwellimen Koht aramas akan me kin mih nan sampah suwed wet, kitail sohte kin mweidong ngehnen kopwung sapwung en sampah wet en pedolong nan mwomwohdiso en Kristian. Ahpw, rahn koaros kitail kin nantiong en mehlel ni atail wiewia kan koaros. Ni mehlel, kitail “kin men wia dahme pwung ahnsou koaros.” (Ipru 13:18) Ke soh pil kin kamehlele me ma kitail kin kasalehda kopwungpwung, kitail pahn ale kapai tohto sang nan pwihn en pirien ehu me kin likilikpene ni mehlel?
Iaduwen Aramas Akan kin Rong “Kapitien Siohwa”?
11. Iaduwen Maika 7:12 kin pweida?
11 Maika kohpada me aramas tohto pahn paiekihda kopwungpwung mehndahki kopwung sapwung kan kin wiawi rahnwet. Soukohpo kohpada me aramas akan pahn kohsang “wasa koaros, sang palio madau kan oh sang nin nahna doh kan” pwen kaudokiong Siohwa. (Maika 7:12) Rahnwet, kaimwiseklahn pweidahn kokohp wet kin wiawi, kaidehn ehu wehi pahn paiekihda sang sapwellimen Koht kopwungpwung, ahpw emen emen aramas akan me kin kohsang wehi koaros. (Aiseia 42:1) Iaduwen met kin pweida?
12. Iaduwen aramas akan kin kak “rong ngilen Siohwa” rahnwet?
12 Pasapeng ong peidek wet kin pwarada ni mahsen en Maika kan mwowe. Maika 6:9 mahsanih: “Kapitien Siohwa kin ketin malipe kahnimwo mahsanih, oh aramas kupwurokong pahn lemmwiki mwaromwi.” Iaduwen aramas akan me kohsang wehi koaros kin rong “kapitien Siohwa,” oh dahme met kin pid pein atail kin kapwaiada kopwungpwung? Ni mehlel, rahnwet aramas sohte kak rong kapitien Koht. Ahpw sang atail doadoahk en kalohk me kin wiawi nin sampah pwon, aramas akan me kin kohsang wehi koaros oh soahngen aramas koaros kin rong kapitien Siohwa. Oh aramas akan me kin rong kin ‘lemmwiki mwaren Koht.’ Ni atail kin ngoangki wiahla sounkalohk kan en Wehio, kitail kin kasalehda pwung oh limpoak. Kitail pil kin kasalehda “kopwungpwung” ni atail kin kalohk ong aramas koaros sohte lipilipil ihs duwen mwaren Koht.
Kitail Anahne Kasalehda Limpoak Kadek
13. Ia wekpeseng limpoak-kadek oh limpoak?
13 Sapwellimen Koht kariau en kosonned ong kitail kin kohda nan pwuhken Maika 6:8. Siohwa kin kupwurki kitail en kasalehda “limpoak kadek.” Lepin lokaia wet, “kadek” kin pil wehwehki “limpoak-kadek,” de “limpoak poatopoat.” Limpoak-kadek kin wehwehki me emen pahn nsenohki aramas teikan. Limpoak-kadek kin weksang limpoak. Iaduwen ira wekpeseng? Pwe limpoak kin wehwe tehlap sang limpoak-kadek, pwe limpoak kak pid dipwisou kan oh irair akan. Karasepe ieu, Pwuhk Sarawi mahsanih duwen aramas me kin “poakohng sampah, de dipwisou me mihmi nin sampah.” (1 Sohn 2:15) Ahpw, limpoak-kadek kin ahnsou koaros pid aramas akan, keieu ong irail akan me kin papah Koht. Maika 7:20 mahsanih duwen “limpoak-kadek me Koht ketin kasalehiong Eipraam”—emen ohl me kin papah Siohwa Koht.
14, 15. Iaduwen aramas kin kasalehda limpoak-kadek, oh ekspiriens dahieu kin kohda nan parakrap?
14 Nin duwen Maika 7:18, soukohpo mahsanih me Koht “kin perenki kasalehda limpoak-kadek.” Pwuhken Maika 6:8, padahkiong kitail me e sohte itar ong kitail en kasalehda limpoak-kadek, ahpw kitail anahne uhdahn poakohng irair wet. Dahme kitail sukuhliki sang iren Paipel pwukat? Limpoak-kadek kin wiawi pwehki aramas akan kin nseneki oh perenki kasalehda irair wet. Duwehte Siohwa, kitail kin perenki kasalehda limpoak-kadek ong aramas akan me anahne sawas.
15 Rahnwet, limpoak-kadek kin wia kilelepen sapwellimen Koht aramas. Medemedewe duwen ekspiriens wet. Nan June 2001, melimel ehu wiahda lapalahn lapake nan Texas, U.S.A., oh e kawehla ihmw kid kid kei, iangahki imwen Sounkadehdehn Siohwa epwiki kei. Pwen sewese riarail Kristian akan me anahne sawas, Sounkadehde 10,000 samwa perenki tohnmeteikihla ahr ahnsou oh kehl. Erein sounpar ehu elep, aramas akan kin pein tohnmeteikihla arail ahnsou en doadoahk kehlail ni rahn, ni pwong, oh imwin wihk kan en kauwada Kingdom Hall waluh oh kauwada imwen riarail Kristian akan 700 samwa. Irail akan me sohte kak iang pwaralahng wia doadoahk wet, kin sawaski mwenge kan, dipwisou kan en ihmw, oh pil neirail mwohni kan. Dahme kahrehda Sounkadehde kid kid kei pwukat kin sewese riarail kan? Pwehki irail kin kasalehda “limpoak-kadek.” E inenen kansenamwahu en ese me riatail brother oh sister kan nin sampah pwon me kin pil kasalehda soangen wiewia kan en limpoak kadek! Ei, en kasalehda “limpoak-kadek” sohte kin wia mehkot katoutou ehu, ahpw e kin inenen kaperen!
Peikiong Atail Koht ni Karakarahk
16. Mehnia karasaras kin sewese kitail en wehwehki duwen uwen kesempwal kitail en peikiong atail Koht ni karakarahk?
16 Kosonned kesiluh dierekda nan pwuhken Maika 6:8 “peikiong atail Koht ni karakarahk.” Met kin wehwehki me kitail pahn pohnese duwen pein atail soh-itar kan oh likih Koht. Karasepe ieu: Medemedewe duwen emen serepein tikitik me kin koledi teng pehn ah pahpa ni ara kin alu pahn melimel ehu. Serepeino ese me e luwet, ahpw e kin liki ah pahpa. Kitail pil anahne ese pein atail soh-itar kan oh liki Samatail me kin ketiket nanleng. Iaduwen kitail kak kolokolte atail kin likih Koht? Ehu ahl kitail kak wia met, ma kitail pahn medemedewe dahme kahrehda e pahn wiahki elen loalokong ieu ma kitail pahn karanih Koht. Maika kin katamankin kitail duwen kahrepe silu: Siohwa iei atail Sounkomour, atail Sounkaweid, oh pil Soun Perepatail.
17. Iaduwen Siohwa me doarehla, kahre, oh perehla sapwellime aramas akan ni ahnsou mahs?
17 Nan pwuhken Maika 6:4, 5, Koht mahsanih: “Pwe ngehi me kahreikumwaildo sang Isip.” Ei, Siohwa kin wiahla Sounkomour en Israel. Siohwa pil mahsanih: “I kadaralahng kumwail Moses, Aaron, oh Miriam.” Moses oh Aaron kin wiahla sounkaweid kan ong wehio, oh Miriam kin kahre lih en Israel akan en wia kahlek ehu ong arail kapinga Kauno. (Eksodus 7:1, 2; 15:1, 19-21; Deuderonomi 34:10) Siohwa doadoahngki sapwellime ladu kan en kihda sapwellime kaweid kan ong mehn Israel. Nan iretikitik 5, Siohwa kin katamankin wehin Israel me e ketin perehla irail sang Palak oh Palaam oh perehla irail ni ahnsou me re wia ahr seiloak sang Shittim nan wehin Moap kolahng Kilkal nan Sapwen Inou.
18. Rahnwet, iaduwen Koht kin wiahla atail Sounkomour, Sounkaweid, oh Soun Perepatail?
18 Ni atail kin iang Koht kekeid, e kin ketin doarehla kitail sang sampah en Sehdan wet, doadoahngki sapwellime Mahsen oh pwihn en kaweidih kitail, oh perehla kitail nin duwen pwihn ehu sang rehn aramas akan me kin uwhong kitail. Kitail kin ahneki kahrepe mwahu kan en kolehdi teng pehn en Samatail me kin ketiket nanleng ni atail kin iang ih kekeid nan kaimweseklahn seikloak apwal wet me pahn kolahng wasa me mwahu sang Sapwen Inou en mahs—iei sapwellimen Koht sampah kapw pwung ieu.
19. Ni ahl dahieu me irairen aktikitik kin pid atail kin pohnese atail soh-itar kan?
19 Ahneki lamalam aktikitik ni atail kin peikiong Koht kin sewese kitail en kilang ong pein atail mour oh irair akan ni ahl me mehlel oh pwung. Met kin wiawi pwe irairen aktikitik kin pid atail kin pohnese pein atail soh-itar kan. Ni ahnsou me kitail kin mahla de paliwaratail kan kin luwetala, irair pwukat pahn kak katikitikihala dahme kitail men wia ong atail kin papah Siohwa. Ahpw, kitail en dehr mweidong kahpwal pwukat en kamworusekitailla, pwe kitail en tamanda me Koht kin kupwurperenki ‘uwen me kitail pahn kak kihwei, ahpw e sohte pahn kupwurperenki atail kihwei mehkot me kitail sohte kakohng.’ (2 Korint 8:12) Ni mehlel Siohwa kin ketin kasik kitail en papah Ih ni ahl ehu me kin kasalehda ngehn unsek, ahpw kitail pahn wia met sang ni wekpeseng en atail irair akan. (Kolose 3:23) Ni ahnsou me kitail kin ngoangki wia uwen me kitail kak en papah Koht, E pahn ketin kapaiada kitail.—Lepin Padahk 10:22.
Awiawih Koht Pahn Wahdohng Kitail Kapai Tohto
20. Dahme pahn kak sewese kitail en duwehte Maika, awiawih oh kanengamah?
20 Alehdi sapwellimen Siohwa kapai kan kin kamwekid kitail en kahlemengih Maika. Maika mahsanih: “I pahn koapworopwor awiawih Koht me pah ketinkomouriehla.” (Maika 7:7) Iaduwen mahsen pwukat kin pid atail kin peikiong Koht ni karakarahk? Awiawih oh kanengamah, kin sewese kitail en dehr nsensuwedki Rahnen Siohwa eh saikinte leledohr. (Lepin Padahk 13:12) Ni mehlel, kitail koaros kin kasikasik imwin sampah suwed wet. Ahpw, ni ehu ehu wihk, aramas kid kid kei kin tepida iang Koht kekeid. Atail kin ese duwen met kin kihong kitail kahrepe ehu en awiawih oh kanengamah. Emen me wereilahr wiahla Sounkadehde koasoia met: “Ni ahnsou me I kin katamando erein sounpar 55 me I kin iang wia doadoahk en kalohk, I kamehleleiong pein ngehi me sohte mehkot I katiasang ni ai kin awiawih Siohwa. Weksang met dahme I diar iei me I kin pitsang soangen kansensuwed tohto.” Ke pil kin iang ahneki soahngen irair duwehte met?
21, 22. Iaduwen Maika 7:14 kin pweida nan atail ahnsou?
21 Ni mehlel, kitail pahn paiekihda sang ni atail kin iang Siohwa kekeid. Kitail wadek nan pwuhken Maika 7:14, me Maika kin karasaiong sapwellimen Koht aramas akan duwehte sihpw kan me kin ni meleilei mih rehn sileparail. Pweidahn kokohp wet nan atail ahnsou, kin pid luwen Israel ni pali ngehn oh “sihpw teikan” me kin nsenamwahu rehn Sileparail, Siohwa. Re kin “kelepw nan wel—nanpwungen tuhkehn nan mwetuwel,” oh irail kin ni pali ngehn dohsang sampah keper suwed wet.—Sohn 10:16; Deuderonomi 33:28; Seremaia 49:31; Kalesia 6:16.
22 Sapwellimen Siohwa aramas akan kin paiamwahu, nin duwen me Maika 7:14 kohpadahr. Maika kin koasoia duwen sapwellimen Koht sihpw de aramas: “Re en kohwei oh mwengemwengeseli nan sahpw kaselel en Pasan oh Kilead.” Duwehte sihpw kan nan Pasan oh Kilead kin mwengemwengeseli nan sahpw kaselel kan oh pweida mwahu, sapwellimen Koht aramas akan nan rahnwet pil kin paiekihda mwengehn pali ngehn—met kin wia pil ehu kapai me kin kohwong aramas akan me kin peikiong Koht ni karakarahk.—Nempe 32:1; Deuderonomi 32:14.
23. Mehn kasukuhl dahieu kitail kak sukuhliki sang pwuhken Maika 7:18, 19?
23 Nan Maika 7:18, 19, soukohpo kin kasansalehda me Siohwa kin ketin kupwurki en kasalehda mahk ong aramas akan me kin koluhla. Iretikitik 18 mahsanih me Siohwa kin “mahkikiong dipen aramas akan.” Iretikitik 19 mahsanih me e pahn “ketin tiakedi dipat oh kakihrala nan kepin madau.” Ia ehu mehn kasukuhl kitail kak sukuhliki sang iren Pwuhk Sarawi wet? Kitail kak idek rehtail ma kitail kin kahlemengih Siohwa. Kitail kin mahkong aramas teikan me kin wia dihp ong kitail? Ni ahnsou me aramas pwukat kin koluhla oh inengkihda kapwungala arail sapwung ong kitail, kitail kin men kahlemengih Siohwa me kin ketin kupwurperenki kasalehda mahk poatoapoat.
24. Kapai dah kei ke alehdi sang kokohp en Maika?
24 Kapai dah kei kitail alehdi sang kokohp en Maika? E kin katamankin kitail me Siohwa kin ketkihong koapworopwor mehlel ong aramas akan me kin karanih Ih. (Maika 2:1-13) Kitail alehdi kangoang en wia uwen me kitail kak en utungada kaudok mehlel pwe met pahn sewese kitail en kekeid ni mwaren Koht kohkohlahte. (Maika 4:1-5) Koht kin kamehleleiong kitail me sohte lipilipil soangen irair dah kei kitail kin mih pah, kitail kak kapwaiada sapwellimen Siohwa koasondi kan. Ei, kokohp en Maika kin ni mehlel kakehle kitail en kekeid ni mwaren Siohwa.
Iaduwen Ke Pahn Sapeng?
• Nin duwen Maika 6:8, dahme Siohwa kin kupwurki kitail en wia?
• Dahme kesempwal kitail en wia ma kitail pahn “wiahda me pwung”?
• Iaduwen kitail kak kasalehda “limpoak-kadek”?
• Ni ahl dah kei kitail kak kasalehda me kitail kin ‘peikiong Koht ni karakarahk’?
[Kilels nan Pali 17]
Mendahki irair suwed kin wiawi ni mwehin Maika, e kin kapwaiada sapwellimen Siohwa koasondi kan. Ke pil kak wia met
[Kilel nan Pali 19]
Kasalehda kopwungpwung sang ni omw kin kalohk ong soangsoangen aramas koaros
[Kilels nan Pali 19]
Kasalehda me ke kin limpoak-kadek sang ni ahmw kin sewese aramas teikan me anahne sawas
[Kilel nan Pali 19]
Wia uwen me ke kak ahpw ni aktikitik pohnese duwen pein omw soh-itar kan