Siohwa Kin Kasalehda Limpoak Mehlel Ni Mwuledek
“Siohwa kin. . . kasalehda ni mwuledek limpoak-kadek.”—MELKAHKA 145:8.
1. Ia uwen deila sapwellimen Koht limpoak?
“KOHT iei limpoak.” (1 Sohn 4:8) Mahsen kadek pwukat kin kasalehda me sapwellimen Siohwa elen kaunda kin poahsonda pohn limpoak. Met sansal pwe pil aramas akan me sohte kin peikiong Ih kin paiekihda ketipin oh keteu me E kin ketikihong irail ni limpoak! (Madiu 5:44, 45) Pwehki sapwellimen Koht limpoak ong tohnsampah pwon, aramas akan me kin uhwong Koht kakete koluhla, sohpeiong Ih, oh ale mour soutuk. (Sohn 3:16) Ni ahnsou keren, Siohwa pahn kasorehla aramas suwed akan me sohte men kawekila arail mour oh Siohwa pahn ketikihong aramas akan me kin poakong Ih mour soutuk nan sampah kapw.—Melkahka 37:9-11, 29; 2 Piter 3:13.
2. Ni ahl dahieu Siohwa kin kasansalehda limpoak ong aramas akan me kin inoukiong ahr mour ong Ih?
2 Siohwa kin kasalehda limpoak ong sapwellime tohnkaudok mehlel akan ni keneinei oh kohkohlahte. Soangen limpoak wet ni lokaiahn Ipru kin kawehwehdi “limpoak-kadek” de “limpoak mehlel.” Nanmwarki Depit en Israel en mahs kin uhdahn kesempwaliki sapwellimen Koht limpoak-kadek. Pwehki sang ni dahme e lelohng nan eh mour oh pil sang ni ah kin doudouloale duwen sapwellimen Koht wiewia kan ong aramas teikan, Depit kin likih Siohwa kahrehda e koulki: “Siohwa kin . . . kasalehda limpoak-kadek [de, “limpoak mehlel,” NW] ni mwuledek.”—Melkahka 145:8.
Mehn Kadehde Duwen Ihs Me Sapwellimen Koht Aramas Loalopwoat akan
3, 4. (a) Iaduwen Melkahka 145 kin sewese kitail en wehwehki ihs irail sapwellimen Siohwa loalopwoat akan? (b) Iaduwen sapwellimen Koht aramas loalopwoat akan kin “kasapahlkalahnganki Koht?
3 Sapwellimen soukohp Samuel nohno Ana, kin mahsanihki duwen Siohwa: “E kin ketin apwalih mouren sapwellime aramas loalopwoat akan.” Ihs irail “aramas loalopwoat akan”? Nanmwarki Depit sapeng peidek wet. Mwurin e kapinga sapwellimen Siohwa irair kaselel kan, e mahsanih: “Sapwellimomwi aramas [‘loalopwoat akan, NW’] pahn kasapahlkalahngan ong komwi.” (Melkahka 145:10) Ele mwein ke kin medemedewe iaduwen aramas akan kak kasapahlkalahngan ong Koht. Irail kin wia met, keieu sang ni ahr kin kapinga Ih.
4 E sansal ihs me wia sapwellimen Siohwa loalopwoat akan: iei irail kin kapinga Siohwa. Dahme irail kin kalapw koasoiapene ni ahnsoun irail kin tuhpene oh ni ahr mihding en Kristian akan? Irail kin kalapw koasoiada duwen Wehin Siohwa! Sapwellimen Koht ladu lelepek kan kin ahneki pepehm kan me Depit kin kasalehda, ni e koulki koul wet: “Re pahn koasoia duwen lingan en sapwellimomwi [Siohwa] Wehi, oh pil duwen sapwellimomwi manaman.”—Melkahka 145:11.
5. Iaduwen kitail ese me Siohwa kin rong kanahieng ni ahnsou me sapwellime aramas loalopwoat kan kin kapinga Ih?
5 Siohwa kin rong kanahieng ni ahnsou me sapwellime aramas loalopwoat kan kin kapinga Ih? Ei, e kin rong kanahieng duwen dahme irail kin ndinda. Nan ehu kokohp me kin pid kaudok mehlel nan atail ahnsou, Malakai ntingihdi: “Eri, aramas akan me kin lemmwiki Koht ahpw koasoakoasoiapene nanpwungarail, oh Kauno [“Siohwa,” NW] ketin karonge oh kupwure duwen me re koasoia. Mwohn silangi, e ntingdier nan pwuhk ehu duwen irail kan me lemmwiki oh wauneki Kauno [“Siohwa,” NW].” (Malakai 3:16) E kin kaperenda Siohwa ni ahnsou me sapwellime aramas loalopwoat kan kin kapinga Ih, oh E kin tamataman irail.
6. Mehnia doadoahk kin sewese kitail en wehwehki ihs me wia sapwellimen Koht aramas loalopwoat akan?
6 E pil kin sansal ihs me sapwellimen Siohwa aramas loalopwoat kan, pwe irail kin ni eimah oh nantiong en rapahki ahnsou kan en koasoiong aramas teikan me sohte kin kaudokiong Koht mehlelo. Ni mehlel, sapwellimen Koht aramas loalopwoat akan kin “padahkiong aramas akan duwen sapwellimen Koht manaman oh roson lingan en sapwellime wehi.” (Melkahka 145:12, NW) Ke kin rapahki ahl akan oh isaneki ahnsou mwahu kan koaros en koasoiong aramas akan duwen sapwellimen Siohwa kaunda? Weksang koperment en aramas akan me pahn kereniong sohrala, sapwellime kaunda pahn kohkohlahte. (1 Timoty 1:17) E kesempwal aramas akan en sukuhliki duwen sapwellimen Siohwa kaunda soutuk oh kesihnenda teng ni ahr kin utungada sapwellime kaunda. Depit koulki, “Sapwelimomwi wehi, ie wehi soutuk ehu, komwi me nanmwarki kohkohlahte.”—Melkahka 145:13.
7, 8. Dahme wiawi nan pahr 1914, oh mehn kadehde dahieu mie me Koht kin ketin kakaun ki wehin sapwellime Ohl?
7 Sang ni pahr 1914, mie pil ehu kahrepe en koasoiahki duwen sapwellimen Siohwa kaunda. Nan pahro, Koht ketin wiahda Wehin Mesaia nanleng oh Sises Krais, Nein Depit, me wiahla Nanmwarki. Eri, Siohwa kapwaiada sapwellime inou me kaundahn Depit sohte pahn imwisekla.—2 Samuel 7:12, 13; Luk 1:32, 33.
8 Dahme kin kadehde me ni ahnsou wet Siohwa kin kaunda ki Wehin sapwellime Ohl, Sises Krais, iei pweipweidahn kilelo me Sises ketiketier nan mwoale nanleng. Mehn kadehde ieu me keieu sansal sang kilelo iei doadoahk me Sises kohpadahr me sapwellimen Koht loalopwoat kan koaros pahn wia ni eh mahsanih: “Rongamwahu en Wehin Koht pahn lohkseli wasa koaros nin sampah, pwe kadehde en mie ong aramas koaros—a mwuri, imwin sampah ahpw pahn kohdo.” (Madiu 24:3-14) Pwehki sapwellimen Koht loaloapwoat kan kin ngoangki kapwaiada kokohp wet, tohto sang aramas wene rar, ohl, lih, oh seri kan kin iang wia doadoahk wet me sohlahr pahn pwurehng wiawi. Ni ahnsou keren imwin irail kan koaros me kin uhwong Wehin Siohwa pahn sohrala.—Kaudiahl 11:15, 18.
Paiekihda Sapwellimen Siohwa Kaunda
9, 10. Ia wekpeseng Siohwa oh kaunen aramas akan?
9 Ma kitail wiahla Kristian akan me inoukihong Siohwa atail mour, atail nanpwungmwahu rehn Siohwa kin wahdohng kitail kapai tohto. (Melkahka 71:5; 116:12) Pwehki kitail kin lemmwiki Koht oh wia dahme pwung, kitail kin paiekihda sapwellime kupwur kan oh karanih Ih ni pali ngehn. (Wiewia 10:34, 35; Seims 4:8) Weksang met, kitail kin kalapw kilang kaun akan en sampah wet werekiong aramas lapalap akan, duwehte irail kaun en sounpei kan, sounpisnes kepwehpwe kan, de sounmwadong oh sounkamweit ndand akan. Nan nuhspapa en Africa, Sowetan, emen kaun en koperment ndand koasoiada duwen wasa kan me aramas semwehmwe kan kin kousoan nan ah wehi: “I wehwehki kahrepen pali laud en kiht sohte men kohla kilang wasa kan me aramas semwehmwe kan kin kousoan. Pwe se men manokehla me mie soahngen irair apwal wet nan sapwatail. Met kin doahke kadeikpen loalaht kan oh se kin namanek pwe se kin doadoahngki sidohsa pweilaud kan.”
10 Ni mehlel, ekei kaun akan kin mehlel ni arail nsenohki neirail aramas akan. Ahpw, mendahki met, irail kaun akan me keieu kadek pil sohte kin wehwehki neirail aramas akan. Ele mwein kitail pahn wia peidek wet: Mie emen kaun me kin nsenohki sapwellime aramas akan koaros oh met kin kahrehong ih en mwadangete sewesehda emen emen irail koaros ni ahnsou me irail kin lelohng kahpwal? Ei, mie emen me kin wia met. Depit kin ntingihdi: “Siohwa kin ketin sewese irail kan me kin mihla nan apwal, e kin ketin pwekada irail kan me kin pahtoula.”—Melkahka 145:14, NW.
11. Soangen kasongosong dah kei sapwellimen Koht aramas loalopwoat akan kin lelohng, oh sawas dahieu me irail kin alehdi?
11 Sapwellimen Siohwa Koht aramas loalopowat akan kin lelohng kasongosong oh kahpwal tohto, pwehki irail soh unsek oh mih nin sampah wet me kin mih pahn manaman en Sehdan, “Me Suwedo.” (1 Sohn 5:19; Melkahka 34:19) Kristian akan kin lelohng kalokolok. Ekei kin lokolongki soumwahu laud de pahtoukihla kompoakparail mehla akan. Ekei ahnsou, sapwung kan en sapwellimen Siohwa aramas loalopwoat akan mwein kin kak kahrehong irail en ‘pahtoula.’ Ahpw, sohte lipilipil soangen kasongosong akan me irail kin lelohng, Siohwa kin ni ahnsou koaros kaunopada en kihda kamweit oh kehl ni pali ngehn ong emen emen irail koaros. Nanmwarki Sises Krais kin pil sapwellimaniki soangen limpoak ohte ong nah aramas lelepek akan.—Melkahka 72:12-14.
Mwenge Ni Ahnsou Me Konehng
12, 13. Iaduwen Siohwa kin apwahpwalih “momour kan koaros” oh ia uwen mwahu E kin ketikihong irail arail anahn akan?
12 Pwehki sapwellime limpoak-kadek, Siohwa kin ketikihong sapwellime ladu kan koaros arail anahn akan. Met kin pidada kaitarala sapwellime aramas akan ki mwenge mwahu kan. Nanmwarki Depit ntingihdi: “Me momour kan koaros kin sohpeiong oh koapworopworkin komwi, oh komwi kin ketin katungoale irail nin duwen ar anahn akan. Komwi kin ketikihong irail uwen me itar oh kin ketin kaitarala ar anahn akan koaros.” (Melkahka 145:15, 16) Oh pil, ni ahnsoun kahpwal akan, Siohwa kak koasoanehdi pwe sapwellime loalopwoat akan kak alehdi “rahn koaros kisin tungoal.”—Luk 11:3; 12:29, 30.
13 Depit mahsanih me Koht kin ketin kaitarala “momour kan koaros” ahr anahn akan koaros. Met kin pil pidada mahn akan. Ma sohte tuhke kan nan sahpw oh tuhke kan nansed: eri mwahmw akan, menpihr kan, oh mahn akan me kin mih nan sahpw sohte pahn itar ahng en esingengki de sohte pahn itar mwenge ong koaros. (Melkahka 104:14) Ahpw, Siohwa kin ketin apwalih irail koaros ni E kin kaitarala arail anahn akan koaros.
14, 15. Iaduwen mwengehn ngehn kin kohwong aramas akan nan rahnwet?
14 Weksang mahn akan, aramas akan kin ahneki anahn en pali ngehn. (Madiu 5:3) Siohwa kin ketin kaitarala anahn en pali ngehn akan en sapwellime aramas loalopwoat kan ni ahl kaselel ieu! Mwohn Sises pwoula, e inoukihda me pwihn en “ladu lelepek oh loalokong” pahn kihong sapwellimen Sises tohnpadahk kan “mwengen ngehn ni ahnsou me konehng.” (Madiu 24:45) Irail luhwen me keidi kan en 144,000 kin wia pwihn en laduo nan rahnwet. Siohwa kin doadoahngki irail en ketikihda mwengehn ngehn ni mwuledek.
15 Karasepe ieu, pali laud en sapwellimen Siohwa aramas akan rahnwet kin paiekihda naineki kawehwehn Pwuhk Sarawi pwung ieu me wiawihda ni pein arail lokaia kan. New World Translation of the Holy Scriptures kin wia kapai laud ieu ong kitail koaros! Oh pil, sawaspen Pwuhk Sarawi kan kin wiawihda ni lokaia 300 samwa. Mwengehn ngehn pwukat koaros kin wiahkihla kapai ieu ong irail tohn kaudok mehlel akan nin sampah pwon. Ihs me kin warohng en alehdi kaping, pwehki E kin ketikihda kapai pwukat koaros? Siohwa Koht. Ki sapwellime limpoak-kadek, e kin koasonehdi pwihn en laduo en ketikihda “mwenge ni ahnsou me konehng.” Rahnwet, sawas pwukat kin kaitarala “anahn en momour akan koaros” me kin mih nan paradais en ngehn. Sapwellimen Siohwa ladu kan kin perenkihda koapworopworo en kilang sampah wet wekidekla oh wiahla paradais ehu!—Luk 23:42, 43.
16, 17. (a) Karasepe dah kei mie ong duwen mwengehn ngehn me kin kohwong aramas akan ni ahnsou me konehng? (b) Iaduwen Melkahka 145 kin kasansalehda duwen pepehm kan en sapwellimen Koht loalopwoat akan me kin pid peidek me Sehdan kihda?
16 Medemedewe duwen karasepe mwahu ehu duwen mwengehn ngehn me kin kohda ni ahnsou me konehng. Nan pahr 1939, Mahwen en Sampah II tepida nan sapwen Iurop. Nan pahrohte, nan Watchtower makisihn en November 1, mie artikel me oaralap koasoia “Sohpoupali.” Pwehki dahme audepen artikel wet kin kawehwehda ni sansal, Sounkadehdehn Siohwa kan nin sampah pwon tepida wehwehkihla duwen kesempwalpen ahr kin sohpoupali wiewia kan en wehi kan me kin mahwenpene. Kahrehda, koperment kan ni pali koaros kin lingeringer pahrail ni erein mahwen wiawi ni sounpar weneu. Ahpw edetehn koperment kan keinapwidi arail doadoahk en kalohk oh irail lelohng kalokolok, sapwellimen Koht loalopwoat kan kin pousehlahte kalohkiseli Rongamwahu en Wehio. Sang nan pahr 1939 lel 1946, irail kin paiekihda sounkalohk kan me kin wia tohtohla ni persent 157. Oh pil, arail kin wia mehn kahlemeng mwahu nin duwen aramas akan me kin kolokolte arail lelepek erein mahweno kin sewese aramas akan en wehwehki duwen mehnia kaudok me mehlel.—Aiseia 2:2-4.
17 Mwengehn ngehn me Siohwa kin ketikihda kin kohda kaidehn ni ahnsou me konehngte ahpw pil kin kaitarala anahn en aramas akan. Ni ahnsou me wehi kan kin mahwenpene nan Mahwen en Sampah II, sapwellimen Siohwa aramas akan kin alehdi sawas en medemedewe duwen mehkot me kesempwal sang doare pein arail mour. Siohwa kin ketin sewese irail en wehwehki duwen irair ieu me kin pidada audepen lahng oh sampah unsek, me sapwellimen Siohwa kaunda me pwung. Ia uwen kansenamwahu en wehwehki me sang ni emen emen Sounkadehde en Siohwa ahr kin kasalehda lelepek, irail koaros kin ahneki kisehn pwais ieu en kalinganahda sapwellimen Siohwa kaunda, oh kasalehda me Tepil iei sounlikamw emen! (Lepin Padahk 27:11) Weksang Sehdan, me kin lahlahwe Siohwa oh sapwellime kaunda, sapwellimen Siohwa loalopwoat akan kin pousehla kalohkiseli: “Siohwa me ketin pwung ni mehkoaros me E kin ketin wia.”—Melkahka 145:17.
18. Kihda karasepe me ahpwtehn wiawi me kin pid mwengehn ngehn me kohda ni ahnsou me konehng oh kin kaitarala anahn en aramas akan?
18 Pil ehu karasepe duwen mwengehn ngehn me kin kohda ni ahnsou me konehng iei pwuhk me oaralap koasoia Draw Close to Jehovah, me kohwong aramas tohto ni ahnsou me “Sounkalohk Ngoang kan en Wehio” Kapokon en District wiawi nin sampah pwon nan pahr 2002/03. Pwuhk wet me kohsang rehn pwihn en “ladu lelepek oh loalokong” oh Sounkadehdehn Siohwa kan me wiahda pwuhk wet, kin koasoiada duwen sapwellimen Siohwa Koht irair kaselel akan, iangahki irair akan me kileledi nan Melkahka 145. Pwuhk kaselel wet kin sewese sapwellimen Koht loalopwoat kan en karanih Ih.
Ahnsoun Karanih Siohwa
19. Dahme pahn wiawi ni ahnsou keren, oh dahme kitail kak wia?
19 Wiewia kesempwal ieu ong kapwungala irairo me kin pid sapwellimen Siohwa kaunda kereniong pahn wiawi. Nin duwen me kohpada nan Esekiel irelaud 38, Sehdan pahn kereniong wiahla “Kok en sapwen Makok.” Met kin wehwehki me e pahn mahweniong sapwellimen Siohwa aramas akan nin sampah pwon. Sehdan pahn wia uwen me e kak en kaluwetala sapwellimen Koht aramas loalopwoat akan. Sapwellimen Siohwa tohnkaudok akan pahn anahne ngidingidki likweriong Koht, pekipeki sapwellime sawas. Ahpw, ahr kin lemmwiki Koht oh limpoak ong Ih pahn wia mehkot soh katepe? Soh, pwe Melkahka 145 mahsanih: “E kin ketiket limwahn irail kan me kin likweriong, irail akan me kin likweriong ni mehlel. E kin ketikiong anahn en irail me kin wauneki; e kin ketin karonge ar likwer, oh kin ketin komourirailla. E kin ketin sinsile irail kan me kin poakohng, a e pahn ketin kamwomwala aramas suwed akan.”—Melkahka 145:18-20.
20. Iaduwen mahsen kan en Melkahka 145:18-20 pahn pweida ni ahnsou keren?
20 Ia uwen kaperen en karanih Siohwa oh kilang sapwellime manaman ni ahnsou me E pahn ketin doarehla kitail oh kasorehla aramas suwed akan koaros! Pwe ahnsowo kereniong pahn wiawi, Siohwa pahn karonge aramas kante me kin “likweriong ni mehlel.” E sohte pahn karonge aramas mwalaun akan. Sapwellimen Koht Mahsen kin ni sansal kasalehda me Koht sohte kin karonge aramas suwed akan me kin pwand en likweriong Ih.—Lepin Padahk 1:28, 29; Maika 3:4; Luk 13:24, 25.
21. Iaduwen sapwellimen Siohwa loalopwoat akan kin kasalehda me re kin perenki doadoahngki mwar sarawio?
21 E kesempwal aramas akan me kin lemmwiki Siohwa en “likweriong Ih ni mehlel” ahnsou wet. Sapwellime aramas loalopwoat akan kin perenki doadoangki mware nan arail kapakap kan oh nan arail pasapeng kan ni ahnsou mihding kan. Irail kin doadoahngki mwar sarawio ni ahnsou ahr kin koasoakoasoiapene nanpwungarail. Oh irail kin ni eimah lohkiseli mwaren Siohwa nan arail doadoahk en kalohk ong wehi pokon.—Rom 10:10, 13-15.
22. Dahme kahrehda e kesempwal en liksang lamalam en sampah oh ineng suwed kan en sampah wet?
22 Pwen pousehla paiekihda atail nanpwung mwahu rehn Siohwa Koht, e pil kesempwal kitail en pousehla soikala mehkan me pahn kakete kauwehla atail pali ngehn, duwehte noarok mwohni, kamweit soh konehng kan, sohte men mahkong mehteikan, de soukautih sewese aramas semwehmwe kan. (1 Sohn 2:15-17; 3:15-17) Ma kitail sohte kin kapwungala wiewia pwukat, irair pwukat pahn kakete imwikihla dihp laud akan oh sohlahr kenikenla rehn Siohwa. (1 Sohn 2:1, 2; 3:6) E kin wia elen loalokong en tamataman me Siohwa pahn kasalehda limpoak-kadek, de limpoak mehlel, ong kitail, ma kitail pahn lelepek ong Ih.—2 Samuel 22:26.
23. Koapworoapwor kaselel dahieu kin awiawih sapwellimen Koht aramas loalopwoat kan koaros?
23 Eri, kitail en medemedewe duwen ahnsou kohkohdo me Siohwa kaunopada ong sapwellimen Siohwa loalopwoat kan koaros. Sang ni atail kin medemedewe met, kitail kin ahneki koapworoapwoar en iang pwihn wet me pahn kapinga Siohwa “rahn koaros” oh “kohkohlahte.” (Melkahka 145:1, 2) Eri, kitail en ‘dadaurete ni limpoak en Koht, kasikasik mour soutuk.’ (Sud 20, 21) Ni atail kin nantihong paiekihda sapwellimen Samatail nanleng irair kaselel kan, iangahki limpoak-kadek me E kin ketin kasalehong aramas akan me kin poakohng Ih, atail pepehm kan en duwehte Depit ni kaimwiseklahn mahsen kan en Melkahka 145: “I pahn kin patohwan kapinga Siohwa ahnsou koaros; wiepen nin lime kan koaros en kin kapinga mware sarawi ahnsou koaros kohkohlahte.”
Iaduwen Ke Pahn Sapeng?
• Iaduwen Melkahka 145 kin sewese kitail en wehwehki ihs me wia sapwellimen Koht aramas loalopwoat akan?
• Iaduwen Siohwa kin ‘kaitarala anahn akan en momour akan koaros’?
• Dahme kahrehda kitail anahne karanih Siohwa?
[Kilel nan Pali 15]
Sapwellimen Siohwa ladu kan kin ni eimah sewese aramas akan en sukuhliki duwen lingan en sapwellime Wehio
[Kilel nan Pali 16]
Siohwa kin ketikihda kehl oh kaweid ong sapwellime loalopwoat akan me kin kapakapki sapwellime sawas