“Wia Ahmw Pwais Nin Duwen Sounkalohk En Rongamwahu”
“Ke uhdahn pahn kakaun pein uhk ahnsou koaros oh wasa koaros, . . . oh wia ahmw pwais nin duwen sounkalohk en Rongamwahu.”—2 TIMOTY 4:5, NW.
1. Pwukoa dahieu me Sises ketikihong sapwellime tohnpadahk kan?
MWAREN Siohwa oh sapwellime kupwur kan kin lohkseli wasa koaros nin sampah. Met kin wiawi pwehki sapwellimen Koht aramas akan me kin inoukihong Ih arail mour kin mehlel ong pwukoa me Sises Krais ketikihong sapwellime tohnpadahk kan ni e mahsanih: “Kumwail eri kohwei . . . oh padahkihong tohn wehi kan koaros; pwe re en wiahla nei tohnpadahk, papidaisihirailla ni mwaren Sahm oh Sapwellime oh ngehn sarawi, oh kehkehlingkihong irail re en peikiong mehkoaros me I koasoanediong kumwail.”—Madiu 28:19, 20.
2. Sounapwalih Timoty kin alehdi mehnia kaweid, oh ia ehu ahl me irail Kristian sounapwalih kan kak kapwaiada arail doadoahk?
2 Sapwellimen Sises tohnpadahk kan nan keieun senturi kin mehlel ong arail pwukoa en kalohk. Karasepe ehu, wahnpoaron Pohl kin kangoange ienge Kristian sounapwalih Timoty: “Wia ahmw pwais nin duwen sounkalohk en Rongamwahu, oh pil kapwaiada ahmw pwukoa koaros nin duwen me konehng ladun Koht men.” (2 Timoty 4:5, NW) Rahnwet, ehu ahl me sounapwalih men kin kapwaiada ah pwukoa en kalohk iei ngoangki wia sounkalohk en Wehio, kaukaule iang doadoahk en kalohk. Karasepe, Sounapwalih en Pwuhk Study en Mwomwohdiso kin ahneki pwais kaselel ieu en tiengala mwowe nan doadoahk en kalohk oh kangoange meteikan en wia doadoahk en kalohk wet. Pohl kin kapwaiada ah pwukoa en kalohki Rongamwahu, oh e pil kin kaiahne meteikan en wia doadoahk en kalohk.—Wiewia 20:20; 1 Korint 9:16, 17.
Sounkalohk Ngoang akan en Mahs
3, 4. Ekspiriens dah kei me Pilip aleier nin duwen sounkalohk men?
3 Aramas akan kin ese me irail tepin Kristian akan kin wia sounkalohk ngoang akan. Medemedewe duwen sounkalohk Pilip. Ih emen sang pwihn en “ohl isimen me koaiehk . . . me [ngenin] oh erpit” oh irail pilipilda en ni sohte lipilipil nehk sawas ni rahn akan ong irail liohdi Kristian akan me kin ese lokaiahn Krihk oh irail liohdi Kristian akan me ese lokaiahn Ipru nan Serusalem. (Wiewia 6:1-6) Mwurin pwukoa tohrohr wet imwisekla, likin wahnpoaron ko, kalokoloko kin kahrehong Kristian akan koaros en kohpeseng nan wasa koaros, ahpw Pilip kohla Sameria. E kalohki Rongamwahu wasao, oh ngehn sarawi kakehlahda ih en kaus sang ngehn saut akan oh kamwahuwiala me mwoator kan. Mehn Sameria tohto kin rong Rongamwahu en Wehio oh papidaisla. Ni ahnsou re kin rong duwen met, irail wahnpoaron kan nan Serusalem kadarala wahnporon Piter oh Sohn en kohla Sameria, pwe irail aramas pwoson akan me ahpwtehn papidaisla kak alehdi ngehn sarawi.—Wiewia 8:4-17.
4 Mwurin met, Sapwellimen Koht ngehn sarawi kahre Pilip en tuhwong ohlen Idiopia men nan ahl me kolahng Kasa. Mwurin Pilip kawehwe ni sansal duwen kokohp en Aiseia, “ohl lapalap kesempwal menet me kin apwahpwalih wasahn nekinek en lih nanmwarkien Idiopia” kin tepida pwoson Sises Krais oh papidaisla. (Wiewia 8:26-38) Pilip ahpw lel Asodus oh “kalokalohkiseli Rongamwahwo nan kisin kahnimw kan lao lel” Sesaria. (Wiewia 8:39, 40) E kin wia mehn kahlemeng mwahu ni e kin wia doadoahk en sounkalohk men!
5. Dahme nein Pilip serepein pahmen kin ndandkihla?
5 Mendahki sounpar 20 dower powe, Pilip kin kaukaule wia ah doadoahk en kalohk nan Sesaria. Ni ahnsou me Pohl oh Luk kousoan ni imwen Pilip, “mie nah serepein kiripw pahmen, me kin padapadahngkiseli mahsen en Koht.” (Wiewia 21:8-10) Ni sansal irail kin ale kaiahn mwahu ni pali ngehn, oh re kin ngoangki kalohk, oh pil ale pwais en kohpada. Ngoang en pahpa oh nohno kan kak pil kamwekidada pwutak kan oh serepein kan nan rahnwet, pwe met pahn kak kamwekid irail en pilada wia doadoahk en kalohk erein arail mour.
Sounkalohk Ngoang Kei Nan Rahnwet
6. Dahme kin pweida ong irail sounkalohk kan nan keieun senturi?
6 Nan sapwellime kokohp kesempwal ieu me kin pid atail ahnsou ni imwin rahn akan, Sises Krais mahsanih: “Pwe Rongamwahuwo uhdahn pahn lohkseli mahs nan wehi koaros.” (Mark 13:10) Imwio pahn wiawi mwurin rongamwahuwo kin lohkseli mahs “wasa koaros nin sampah.” (Madiu 24:14) Ni ahnsou me Pohl oh sounkalohk teikan nan keieun senturi kin lohkseli Rongamwahuwo, aramas tohto pwosonlahr, oh mwomwohdiso kan kin tepida wiawihda wasa tohto nan wehin Rom. Irail elder kan me idihada en papah nan mwomwohdiso pwukat kin pil iang riarail brother oh sister kan nan doadoahk en kalohk oh irail kin wia doadoahk wet wasa koaros oh pil nan sahpw doh kan. Sapwellimen Siohwa mahsen kin inenen kekeirda kehlail nan rahn pwuko, oh duwehte rahnwet, pwe Sounkadehdehn Siohwa rar kei kin pil wia doadoahk en sounkalohk kan. (Wiewia 19:20) Ke kin iang wiahla soun kaping peren kan en Siohwa?
7. Dahme sounkalohk kan en Wehio kin wiewia rahnwet?
7 Sounkalohk tohto en Wehio nan rahnwet kin isaneki ahnsou mwahu pwen kalaudehla ahr ahnsou ong wia doadoahk en kalohk. Aramas kid kei kin iang wia doadoahk en misineri, oh aramas lop kei kin iang doadoahk en kalohk kaukaule nin duwen Regular oh Auxiliary pioneer kan. Ohl, lih, oh seri kan kin wia doadoahk me inenen kaselel ni ahr kin papah nin duwen sounkalohk ngoang kan en Wehio! Ni mehlel, sapwellimen Siohwa aramas akan koaros kin paiekihda sang sapwellime kapai kan ni ahr kin iang Ih wia doadoahk en sounkalohk en Kristian akan.—Sepanaia 3:9.
8. Doadoahk en kihdiong kilel dah kei me kin wiwiawi ni ahnsou wet, oh ihs me kin wia doadoahk wet?
8 Koht kin ketikihong irail tohnpadahk me keidi kan en Sises pwukoa ieu en kalohkiseli Rongamwahu wasa koaros nin sampah. Sapwellimen Sises “sihpw teikan” me kin wie tohtohla, kin sewese irail nan doadoahk en kalohk wet. (Sohn 10:16) E kohpada me doadoahk en komour wet kin rasehng kihdiong kilel ehu ni temwen aramas koaros me pahtoulahr oh milahr nan apwal pwehki soahng saut akan me wiewiawi. Ni ahnsou keren, aramas suwed akan pahn kamwomwala. Ahpw, ni ahnsou wet, e wia pwais kaselel ieu en kalohkiseli padahk mehlel akan ong tohnsampah kan!—Esekiel 9:4-6, 11.
9. Iaduwen kitail kak sewese irail aramas kapw kan nan doadoahk en kalohk?
9 Ma kitail kin wereilahr nan doadoahk en kalohk wet, eri, kitail kak wia mehkot pwen sewese aramas kapw kan nan mwomwohdiso. Mwein ekei ahnsou, kitail kak luhke irail en iang kitail nan doadoahk wet. Irail elder kan anahne en wia uwen me irail kak en kakehlailihala pali ngehn en iengarail kan. Doadoahk kan en sounapwalih irail me opampap kan pahn kak sewese meteikan en wiahla sounkalohk ngoang kei me kin pweida mwahu.—2 Piter 1:5-8.
Wia Kadehde Sang Ihmw Lel Ihmw
10. Krais oh sapwellime tohnpadahk kan kin wia mehn kahlemeng mwahu dahieu me kin pid doadoahk en kalohk?
10 Sises Krais kin wia mehn kalemeng mwahu nin duwen sounkalohk men. Mahsen en Koht mahsanih duwen doadoahk en kalohk me Krais oh sapwellime wahnpoaron kan kin wia: “Kedekedeo, Sises ahpw ketin kakahnseli nan kahnimw oh nan kousapw akan, ketin kapakapahrengki rongamwahu duwen Wehin Koht. Me ehk riemeno ieiangseli.” (Luk 8:1) Iaduwen wahnpoaron ako? Mwurin kamwerehdi ngehn sarawi pohrail nan Pendekos 33 C.E., “rahn koaros, nan Tehnpas Sarawio oh nan imwen aramas akan irail kin wonoweite ni padahk oh kawehwe Rongamwahu duwen Sises me iei Mesaia.”—Wiewia 5:42.
11. Nin duwen pwuhken Wiewia 20:20, 21, dahme wahnpoaron Pohl wia me pid ong eh doadoahk en kalohk?
11 Pwehki wahnpoaron Pohl kin ni ngoang wia doadoahk en kalohk, e kak padahkiong irail Kristian elder kan nan Episos: “Kumwail ese me I sohte kin ekihsang kumwail mehkot me I dehdehki me pahn sewesei kumwail ni ei padahk oh panawih kumwail nan wasahn kapokon kan oh nan ihmw lel ihmw.” Nien Pohl kin ‘padahk ihmw lel ihmw,’ met kin wehwehki me e kin wie mwemweit nan imwen ienge tohnkaudok akan en Siohwa, kangoange me pwoson akan? Soh, pwe e pousehla kawehwehda: “I panawih mehn Suhs kan oh pil mehn Krihk kan, pwe irail en weksang diparail kan, oh wekidekiong Koht oh pil pwoson mwaren Kaun Sises.” (Wiewia 20:20, 21) Irail akan me inoukihong Siohwa arail mour sohte anahne kaweid duwen “weksang diparail kan, oh wekidekiong Koht oh pil pwoson mwaren Kaun Sises.” Pohl kin kaiahne irail Kristian elder kan en Episos nan doadoahk en kalohk ni ihmw lel ihmw oh ni ahnsowohte e kin padahkiong aramas soh-pwoson akan duwen koluhla oh pwosono. Ni ah kin wia met, Pohl kin kahlemengih koasondi me Sises ketin wiahda.
12, 13. Pwen kapwaiada Pilipai 1:7, dahme sapwellimen Siohwa aramas akan kin wia nin duwen ahr pwung en kalohk?
12 Doadoahk en kalohk ni ihmw lel ihmw ekei ahnsou kin apwal. Karasepe ieu, ekei aramas kin nsensuwedkihla atail kin kalohk ong irail duwen Rongamwahu en Pwuhk Sarawi. Ni mehlel, kitail sohte men kansensuwediahla aramas akan. Ahpw, doadoahk en kalohk ni ihmw lel ihmw kin poahsonda pohn Pwuhk Sarawi, oh limpoak ong Koht oh mehn mpatail kan kin kamwekid kitail en wia kadehde ong aramas teikan ni ahl wet. (Mark 12:28-31) Pwen ‘ale utuht en palien kosonned’ ong atail pwung en kalohk ni ihmw lel ihmw, kitail kin doadoahngki mwoalen kopwung akan, oh pil Mwoalen Kopwung Lapalap en Wehin United States. (Pilipai 1:7) Pali laud en ahnsou, mwoalen kopwung wet kin pwungkin kitail. Mwoalen kopwung wet kin kalapw wiahda arail pilipil duwehte me ntingihdi wasaht:
13 “Kiseli doaroapwe kan me kin pid pelien lamalam kin wiawier sangete mahs nin duwen doadoahk en kalohk me misineri kan kin wia oh doadoahk wet kin wiawier sangehte ni ahnsou me aramas tepida wiahda misihn en wiahda pwuhk kan. Ni erein sounpar tohto, doadoahk wet kin wia utuht kehlail ehu ong pelien lamalam kan. Wiepen doadoahk en kalohk wet kin wiawi lel atail ahnsou, oh ekei pelien lamalam kan kin wia doadoahk wet nan wasa koaros, oh arail sounkalohk kan kin kalohkiseli Rongamwahu lel ni imwen aramas kid kid kei oh irail kin nantihong en pein tuhwong aramas akan pwen kahre irail en iangala arail pwoson. . . . Wiepen doadoahk wet en pelien lamalam akan me inenen kesempwal oh e kin pahrekiong kaudok nan ihmw sarawi kan oh kahparek kan me kin wiawi nan ihmw sarawi kan nin duwen me kileldier nan First Amendment ong [Kosonned akan en United States].”—Murdock v. Pennsylvania, 1943.
Ia Kahrepe Kitail en Kaukaule Wia Doadoahk en Kalohk?
14. Oh soangsoangen wiepen doadoahk dahieu pahn kakete kahrehong atail kalohk en pweida?
14 Mie kahrepe tohto kitail en kalohk ni ihmw lel ihmw. Ahnsou koaros kitail kin koasoiong tohnihmw kan, kitail kin song en padokedi war en padahk mehlel en Pwuhk Sarawi. Ni atail kin pwurala rehrail, kitail kin kalamwuri. Oh soangsoangen wiepen doadoahk wet me kin kak imwikihla mwahu, pwe Pohl ntingihdi: “Ngehi kin kamwarak kisin werentuhke, a Apolos kin kalamwurehki pihl; ahpw Koht me kin ketin kakairada tuhkeo.” (1 Korint 3:6) Eri, kitail en kaukaule ‘kamwarak kisin werentuhke oh kalamwurehki pihl,’ pwe kitail kin liki me Siohwa pahn ‘ketin kakairada tuhkeo.’
15, 16. Dahme kahrehda kitail kin kalapw pwurpwurala rehn aramas akan ni imwarail kan?
15 Kitail kin wia doadoahk en sounkalohk kan pwehki mour en aramas akan kin kesempwal. Doadoahk en kalohk pahn kak doarehla pein kitail oh pil irail kan me kin rong kitail. (1 Timoty 4:16) Ma kitail ese me aramas emen kin lelong kahpwal ehu, kitail pahn ni soukautih pak ehu en sewese ih? Soh! Pwehki met kin pid mour en aramas akan, kitail kin nantiong en pwurpwurala rehn aramas ni imwarail kan. Irairen aramas akan kin kalapw wekila. Mwein emen me inenen kedirepw rahnwet pahn perenki rong duwen Rongamwahu en Pwuhk Sarawi pil ehu rahn. De mwein kitail pahn tuhwong emen tohnpeneinei nan ihmw ehu me kitail saikinte koasoiong oh mwein e pahn perenki rong oh koasoi duwen Pwuhk Sarawi.
16 Kaidehn ihte irairen aramas akan kin wekila ahpw madamadau en tohnihmw akan pil kak wekila. Karasepe, aramas emen pahn pahtoukihla mehlahn ah peneinei de kompoakepah, oh mwein met pahn kakete kamwekid ih en rong Rongamwahu en Wehio. Kitail kin kasik en sewese aramaso, pwe e pahn kak nsenohki mehkan ni pali ngehn, oh pil kasalehong ih en kaitarala ah anahn ni pali ngehn.—Madiu 5:3, 4.
17. Ia kahrepe me keieu kesempwal kitail kin iang doadoahk en kalohk?
17 Keieu sang atail kahrepe kan ong kalohk sang ni ihmw lel ihmw oh atail kin iang wiewia teikan en doadoahk en kalohk en Kristian iei pwehki kitail kin inengieng en lohkiseli mwaren Siohwa. (Eksodus 9:16; Melkahka 83:18) Ia uwen kansenamwahu en kilang atail doadoahk en kalohk kin sewese aramas akan me kin poakohng padahk mehlel oh pwung en wiahla sounkalohk kan en Siohwa! Sounmelkahkao koulki: “Mwahnakapw oh peinakapw akan, me mah oh pil seri kan, sapwellime aramas akan koaros en kapinga mwaren Siohwa, pwe mware kelepw me keieu ileile. Sapwellime wahu kin ileile sang sampah oh nanleng.”—Melkahka 148:12, 13.
Doadoahk en Kalohk kin Sewese Pein Emenemen Kitail
18. Iaduwen kitail kak paiekihda sang atail kin iang doadoahk en kalohk?
18 Wia doadoahk en sounkalohk men kin sewese pein emenemen kitail ni ahl tohto. Sang ni atail kin kalohki Rongamwahu ni ihmw lel ihmw, met kin sewese kitail en kakairada nan loalatail lamalam aktikitik, keieu ni ahnsou me tohnihmw akan kin lemei ong kitail. Pwen wiahla sounkalohk koahiek akan, kitail anahne en kahlemengih Pohl me kin ‘wialahr soahng koaros rehn aramas koaros, pwe I en komourala ekei irail nin duwen eh kak pahi.’ (1 Korint 9:19-23) Ekspiriens nan doadoahk en kalohk kin sewese kitail en kadek. Ki atail kin likih Siohwa oh pilada lepin lokaia konehng kan, kitail kak kapwaiada kaweid en Pohl: “Amwail koasoi mwohn aramas en katapan oh kansenamwahu; oh kumwail uhdahn pahn ese duwen amwail pahn sapeng koaros ni pwung.”—Kolose 4:6.
19. Ia duwen sounkalohk kan kin ale sawas sang rehn ngehn sarawi?
19 Doadoahk en kalohk kin pil kamwekid kitail en likih sapwellimen Koht ngehn sarawi. (Sekaraia 4:6) Oh met kin kapwarehda nan loalatail—“limpoak, peren, popohl, kanengamah, kadek, kamwahu, pwoson, opampap, oh liksang me suwed”—oh e kin sansalda ni ahnsou me kitail kin wia atail doadoahk en kalohk. (Kalesia 5:22, 23) Irair pwukat kin sewese kitail en koasoi mwahu ong aramas teikan, pwe ngehno kin sewese kitail en doadoahngki limpoak, de peren oh popohl, kanengamah oh kadek de kasalehda kamwahu oh pwoson, oh kasalehda opampap oh liksang me suwed ni atail kin lohkiseli Rongamwahu.
20, 21. Ia ekei kapai kan me kin kohsang atail kin soupisengki wia doadoahk en sounkalohk?
20 Pil ehu kapai me kitail sounkalohk kan kin alehdi iei me kitail kin kalaudehla atail limpoak ong aramas teikan. Ni ahnsou me aramas akan kin koasoiada duwen arail kahpwal akan—soumwahu kan, sohte arail doadoahk, kahpwal en peneinei—kitail sohte kin wiahla sounkaweid kan, ahpw kitail kin kangoange irail ki Pwuhk Sarawi. Kitail kin nsenohki aramas akan me kin maskunla ni pali ngehn ahpw re kin poakohng dahme pwung. (2 Korint 4:4) Oh ia uwen kaperen en sewese aramas akan duwen ar anahn akan ni pali ngehn iei ‘irail kan me konehng ale mour soutuk”!—Wiewia 13:48.
21 Kaukaule iang doadoahk en sounkalohk kin sewese kitail en loalenohng mehkan ni pali ngehn. (Luk 11:34) Met inenen katapan mehlel, pwe ma kitail sohte kin loalenohng mehkan ni pali ngehn, kitail pahn lohdi pahn kasongosong kan en sampah wet. Wahnpoaron Sohn kin kangoange Kristian akan: “Kumwail dehr poakohng sampah, de dipwisou me mihmi nin sampah. Pwe ma kumwail kin poakohng sampah, poakepen Sahmo sohte mi loalamwail. Pwe mepwukat koaros kisehn sampah; dipen ineng en uduk, oh mehkan me aramas kin kilang oh ahnehda, oh mehkoaros me mi nin sampah me aramas kin pohnmwahsohkihda—mepwukat koaros sohte kohsang rehn Sahm, re kohsang nin sampah. Sampah wet oh mehkoaros nin sampah me aramas kin inengieng kin sosohrala; ahpw me kin kapwaiada kupwur en Koht pahn momour kohkohlahte.” (1 Sohn 2:15-17) Soupisengki wia doadoahk en sounkalohk kan ong sapwellimen Kauno doadoahk kin sewese kitail en dehr poakohng sampah.—1 Korint 15:58.
Nekidala Paien Nanleng kan
22, 23. (a) Mehnia kapai kan me irail Kristian sounkalohk kan kin nekinekidla? (b) Iaduwen artikel en mwurin met pahn kak sewese kitail?
22 Sounkalohk ngoang kan en Wehio kin imwikihla kapai laud kan. Sises kin kasansalehda met ni e mahsanih: “Kumwail dehr kin ngoangki kepwehpwehkihla kepwehn sampah, me mer oh loangenmwet kin kauwehla, oh wasa me aramas lipirap akan kin dapengpeseng ihmw kan oh pirap ie. A kumwail ngoangki kepwehpwehkihla paien nanleng, me mer oh loangenmwet sohte kin kauwehla, oh wasa me aramas lipirap akan sohte kak dapengpeseng ihmw akan oh pirap ie. Pwe ahnsou koaros kapehdamwail kin uhlahng wasa me amwail dipwisou kesempwal kan kin mi ie.”—Madiu 6:19-21.
23 Eri, kitail ngoangki kepwehpwehkihla paien nanleng, pwe kitail ese me met iei pwais me keieu kaselel, en papah Kaun Lapalap Siohwa nin duwen sapwellime Sounkadehde kan. (Aiseia 43:10-12) Ni atail kin kapwaiada atail pwukoa nin duwen sapwellimen Koht sounpapah kan, mwein kitail pahn duwehte Kristian lih emen me mahki sounpar 90 samwa me koasoiaki duwen ah kin papah Koht ni sounpar tohto: “I kalahnganki Siohwa pwe mendahki ai sapwung kan e kin kanengamahiong ni sounpar tohto, oh I kapakapki me e pahn wia Seme kohkohlahte.” Ma kitail pil kin kesempwaliki atail nanpwungmwahu rehn Koht, kitail pahn perenki wia doadoahk en sounkalohk oh kapwaiada atail pwukoa kan koaros. Nan artikel en mwurin met pahn sewese kitail en wehwehkihla iaduwen kitail kak kapwaiada atail pwukoa koaros ni atail kin wia doadoahk en kalohk.
Iaduwen Ke Pahn Sapeng?
• Dahme kahrehda kitail anahne wia doadoahk en sounkalohk men?
• Dahme ke kak ndahki duwen doadoahk en sounkalohk kan en mahs oh nan atail ahnsou?
• Dahme kahrehda kitail kin kadehde ong aramas teikan duwen Rongamwahu ni ihmw lel ihmw?
• Iaduwen ke kin pein paiekihda sang ni ahmw kin wia doadoahk en sounkalohk men?
[Kilel nan Pali 18]
Rahnwet, irail sounkalohk peren kan kin duwehte nein Pilip serepein kan en mahs
[Kilel nan Pali 22]
Iaduwen ke kin paiekihda sang ni ahmw kin ehukihong aramas teikan Rongamwahu?