666 Kaidehn Ihte Mehkot Kapwonopwon Ieu

“Sohte me kak pwainda mehkot de netikihla mehkot, ma kilel wet sohte mie reh, de ma e sohte kilelkihdi mwaren mahno de nempehn mwareo. Eri, wasa kiset me uhdahn anahne kupwurokong. Eri, mehmen me loalokong, a en rapahkihda wehwehn nempehn mahno, pwe nempe wet wehwehki eden aramas emen. Eri, iei wenepwiki weneisek weneu.”​—Kaudiahl 13:17, 18.

IRE malaulau nan Paipel me duwehte kokohp en nempe 666 en “mahn lawalo” me kin kahrehiong aramas en men ese ia wehwe oh kin sansalohki wehwehpe. E wia iren koasoakoasoi ieu en nan TV oh Internet nan computer, nan kasdo kan, pwuhk kan oh makisihn kan, me pid nempehn mahn lawalo oh aramas akan sohte kin uhdi wie kasakasawih ia wehwe.

Ekei kin kamehlele me 666 iei kilel en irail me uhwong Krais (antichrist) nan Paipel. Pil ekei kin koasoia me met pahn wia kilel ehu me pahn pelipeldiong ni kilin aramas de pil kak wia “microchip” pahn kohwong nan paliweren aramas me pahn wia kilelepen me aramaso wia ladu en mahn lawalo. A pil ekei kin kamehlele me 666 wia kilel en Pahpa Sarawi en Kadolik. Ni arail kin wekidehng mesen nting kan en mwaren Pahpa Sarawi, Vicarius Filii Dei (Vicar of the Son of God) ni nempe en Rom oh ekis koasoanehdi wasa kei, nempehn 666 kin pwarada. Ekei pil dene nempe 666 pil kin kak kohsang ni lokaiahn Latin oh wia mwaren Emperor Diocletian en Rom oh ni lokaiahn Ipru eden Nero Caesar.a

Ahpw, iren madamadau pwukat oh kawehwehn aramas pwukat kin inenen weksang dahme pein Paipel kin mahsanihki duwen kilel en mahn lawalo, nin duwen atail pahn tehkpene nan artikel en mwurin met. Paipel pil kin kasalehda me irail oko me ahneki kilelo pahn ale engieng en Koht ni ahnsou me imwin koasoandi wet pahn lel. (Kaudiahl 14:9-​11; 19:20) Kahrehda, esehla wehwehpen 666 kin wia mehkot tehlap sang en ihte wehwehki dahkot 666. Kitail kak peren pwehki Siohwa Koht, me iei mehn kahlemeng me keieu mwahu ong kasalepen limpoak oh pil kin wia utupen marain en pali ngehn, sohte kin kaririasang sapwellime ladu kan duwen ire kesempwal wet.​—2 Timoty 3:16; 1 Sohn 1:5; 4:⁠8.

[Nting tikitik me mi pah]