“Kasalehda Limpoak Mehlel Ong Meteikan”
“Kumwail kasalehda limpoak mehlel ong mehteikan.” —ROM 12:10.
1, 2. Dahme emen misineri en nan atail ahnsou oh wahnpoaron Pohl paiekihda rehn riarail brother oh sister kan?
NI EREIN sounpar 43 ni e kin wia doadoahk en misineri nan sapwen Asia, aramas tohto kin ese Don nin duwen emen me kin kasalehda limpoak ong aramas akan me e kin papah. Ni ahnsou me e soumwahu oh kereniong pahn mehla, ekei aramas me kin onop Pwuhk Sarawi reh seiloak ki mwail kid kei pwen mihmi limwahn Don oh ndaiong ih, “Kamsahamnida, kamsahamnida!”—“Kalahngan en komwi, kalahngan en komwi!” ni lokaiahn Korea. E sansal me limpoak me Don kasalehong irail sair mohngiongarail.
2 Ahpw, kaidehn Don kelepw kin kasalehda soangen limpoak. Nan keieu senturi, wahnpoaron Pohl kin kasalehda limpoak kehlail ong irail akan me e kin papah. Pohl kin tounmeteiki pein ih. Mendahki ih emen me lamalam kehlail, ahpw e pil kin kadek oh nsenohkin aramas teikan, “duwehte nohno men ni eh kin apwahpwalih nah seri kan.” E ntingwohng mwomwohdiso en Deselonika: “Pwehki at poakohng kumwail, se onopadahr se en kihong kumwail, kaidehn Rongamwahuohte me sang rehn Koht, ahpw pil pein at mour. Pwe kumwail wialahr kompoakepahi mehlel.” (1 Deselonika 2:7, 8) Mwuhr, Pohl padahkiong rie me pwoson kan nan Episos me e sohte pahn pwurehng kilang irail, “irail koaros ahpw pwoalehdi Pohl, sengiseng oh metik.” (Wiewia 20:25, 37) E sansal me Pohl oh rie pwoson kan kin ahneki nanpwung mwahu nanpwungarail pwehki irail kin iang pwoson ehute. Ahpw irail kin uhdahn ahneki limpoakpene.
Kasalehda Limpoak Mehlel ong Mehteikan
3. Iaduwen lepin lokaia pwukat nan Pwuhk Sarawi: “limpoak mehlel” oh “limpoak” kin duwehpenehte?
3 Nan Pwuhk Sarawi, irairen limpoak mehlel, poakohng meteikan, kin duwehte irair ehu me keieu kesempwal en Kristian me iei limpoak. (1 Deselonika 2:8; 2 Piter 1:7) Duwehte wasa medendel oh lingaling nan diamond kaselel ieu, irair pwukat me Koht kin ketin kasalehda kin doadoahkpene oh kin imwila mwahu. Irair pwukat sohte kin ihte kahrehong Kristian akan en miniminpene ahpw irail kin pil sewese Kristian akan en karanih Samarail me kin ketiket nanleng. Ihme kahrehda wahnpoaron Pohl kangoange ienge pwoson akan: “Eri, amwail limpoak en uhdahn mehlel. . . . Kasalehda limpoak mehlel ong meteikan.”—Rom 12:9, 10.
4. Ia wehwehn lepin lokaia wet “limpoak mehlel”?
4 Lepin lokaiahn Krihk me Pohl doadoahngki me iei: “limpoak mehlel,” kin wiawihkihda soangen irair riau, keieu e kin wehwehki kompoakepahnki emen, ah mehteio kin wehwehki pepehm en limpoak me aramas emen kin ipwikihdi. Emen me samanih Pwuhk Sarawi kawehwehda, met kin wehwehki me Kristian akan “anahne en kasalehda soangen irair akan duwehte peneinei ehu me kin limpoakpene, kerenpene, oh sawaspene.” Eri, ih duwen ahmw pepehm ong riomw Kristian brother oh sister kan? Irairen limpoak ehu—pepehm ieu me koaros kisetail kan—anahne en mih nan mwomwohdiso en Kristian. (Kalesia 6:10) Ihme kahrehda, The New Testament in Modern English, J. B. Phillips, kawehwehda Rom 12:10: “Kitail en limpoak mehlel duwehte limpoak nanpwungen pirien kan.” Oh Pwuhk Sarawi en The Jerusalem Bible kawehwehda iren Paipel wet: “Limpoakpene nanpwungamwail pahn anahne duwehte limpoak nanpwungen pirien.” Ei, limpoak nanpwungen Kristian akan kin pid laudsang pwehki e pwung en wia, de kosonned ehu. “Ni amwail kin limpoak mehlel ong riatail kan,” kitail anahne “limpoakpene sang nan kapehdatail unsek.”—1 Piter 1:22.
“Sukuhliki Sang Koht me Kitail en Limpoakpene”
5, 6. (a) Iaduwen Siohwa kin doadoahngki Kapokon laud kan (Kapokon en International) en sewese sapwellime aramas akan en kasalehda limpoak en Kristian? (b) Iaduwen miniminpene nanpwungen riatail brother oh sister kan kin kehlailla ni erein ahnsou werei?
5 Edetehn nan sampah wet “limpoak en me tohto kin tikitikla,” Siohwa kin padahkiong sapwellime aramas akan en rahnwet en “limpoakpene.” (Madiu 24:12; 1 Deselonika 4:9) Kapokon laud kan duwehte Kapokon en International en Sounkadehdehn Siohwa kan kin wia ahnsou mwahu kan en kasalehda limpoak. Nan kapokon pwukat, Sounkadehde kan me kin kousoan nan sahpw me kapokon kin wiawi ie kin kasamwo brother oh sister kan me kin kohsang sahpw doh kan, oh tohto rehrail kin kasamwo riarail pwukat en pweidi nan imwarail kan. Nan ehu kapokon me ahpwtehn wiawi, ekei brother oh sister kan kohsang sahpw doh kan me irail sohte kin ahn kasalehda arail pepehm akan ong meteikan. Emen Kristian me sewese brother oh sister pwukat ong arail wasahn pweidi koasoia, “Ni ahnsou me brother oh sister pwukat leledo, irail inenen namenek oh saloh. Ahpw, rahn weneu mwuri, ni ahnsou me re pahn samwalahr, irail oh riarail kan me apwalih irail sengiseng oh pwoaleiraildi. Irail sohte pahn manokehla soangen limpoak en Kristian me re kasalehda.” Kasalehda kadek ong riatail brother oh sister kan, sohte lipilipil wasa kan me re kin kohsang ie, pahn kakete kahrehong irair mwahu kan en sansalda sang rehn irail kan me kin mweimweitla nan ehu sahpw oh pil sang rehn irail me kin kasamwo meteikan.—Rom 12:13.
6 Soangen ekspiriens pwukat me kin wiawi nan kapokon kan kin inenen kaperen, ahpw miniminpene me pahn kehlail sang met kin wiawi ni ahnsou me Kristian akan kin miniminpene papah Siohwa ni ahnsou werei. Ni ahnsou me kitail kin uhdahn esehla riatail brother oh sister kan, kitail pahn kak kalahnganki arail irair mwahu kan—ni ahr kin lokaia mehlel, likilik, lelepek, kadek, medemedewe duwen pepehm en meteikan, limpoak, oh sohte roporop ong pein irail. (Melkahka 15:3-5; Lepin Padahk 19:22) Mark, me wiahla misineri nan East Africa mahs koasoia, “Doadoahkpenehn riatail brother oh sister kan kin kahrehda minimin me sohte kak ohla.”
7. Dahme kitail anahne wia ma kitail men paiekihda limpoak en Kristian nan mwomwohdiso?
7 Pwen alehdi oh kolokolete soangen miniminpene nan mwomwohdiso, tohnmwomwohdiso kan anahne kerenpene. Ni atail kin kaukaule iang towehda mihding en Kristian kan, kitail kin kakehlailihala atail nanpwungmwahu rehn riatail brother oh sister kan. Oh sang ni atail kin iang towehda mihding kan oh koasoakoasoaipene mwohn oh mwurin mihding kan oh pil iang pasapeng kan, kitail kin kangoange oh sewese meteikan ni kasalepen atail “limpoak oh atail wiewia mwahu kan.” (Ipru 10:24, 25) Emen elder nan United States koasoia, “I tamanda ni ahnsou me I pwulopwul, ai peneinei me kin keieu pwand en kohkohla sang Kingdom Hall, pwe se kin perenki koasoiong riat kan oh koasoiapene soahng kan me katapan mehlel.”
Ke Anahne “Langahda Douluhl Mohngiong”?
8. (a) Ia wehwehn ahn Pohl koasoia ni ahnsou me e kangoange mehn Korint kan en “langahda douluhl mohngiongimwail kan”? (b) Dahme kitail kak wia pwen kalaudehla limpoak mehlel nan mwomwohdiso?
8 Pwen kasalehda soangen limpoak ni unsek, kitail anahne “langahda douluhl mohngiongitail kan.” Wahnpoaron Pohl ntingwong mwomwohdiso nan Korint: “Se wewehkadahng kumwail audepen nan kapehdit. Se sohte ekihsang kumwail mehkot, kumwail me kin ekihsang kiht audepen nan kapehdamwail kan.” Pohl kangoange irail en “langahda douluhl mohngiongarail kan.” (2 Korint 6:11-13) Ke pil kak “langahda douluhl mohngiongomw” me pid ahmw pepehm kan? Ke sohte anahne awih mehteikan en tepin koasoiong uhk. Nan sapwellime kisinlikou ong mehn Rom kan, Pohl kawehwehda duwen anahn kesempwal ong irail en ahneki limpoak mehlel oh kapwaiada kaweid wet: “Tiengala mwowe en kasalehda wahu ong mehteikan.” (Rom 12:10, NW) Pwehn kasalehda wahu ong mehteikan, ke kak tiengala mwowe ni ahmw pahn kasamwo mehteikan nan mihding kan. Ke pil kak luhke irail en iang uhk kalohk de kaunopada ong mihding kan. Met pahn sewese limpoak mehlel en kehlailla nanpwungamwail.
9. Dahme ekei kin wia pwen karanihla iengarail Kristian akan? (Kak koasoia duwen karasepe kan nan pein sapwomw.)
9 Peneinei kan oh emen emen aramas akan nan mwomwohdiso kak “langahda douluhl mohngiongirail kan” ni ahr pahn mweimweitla rehn riarail brother oh sister kan, mwein irail kak mwemweitpene oh ehukihpene kisin mwenge, oh iang mehteikan wia mehn kamweit me konehng kan. (Luk 10:42; 14:12-14) Hakop kin ekei ahnsou koasoanehdi pwihn tikitik kan en kohla piknik. E kawehwehda, “me pwulopwul oh me mah kan kin iang, oh pil pahpa oh nohno kiripw kan. Ni ahnsou me koaros kin kohpeseng oh pwurala imwarail kan, re kin nsenamwahu oh tamataman ahnsou pwukat nin duwen ahnsou kaperen kan, oh irail kin ahneki pepehm me irail kin kerenpene.” Nin duwen Kristian kan, kitail men ihte wia tohnkaudok mehlel kan ahpw pil kompoakepah mehlel akan.—3 Sohn 14.
10. Dahme kitail kak wia ni ahnsou me kitail kin ahneki kahpwal akan rehn riatail brother oh sister kan?
10 Ekei ahnsou, atail soh unsek kan mwein pahn wia mehn kerempwa ieu ong kitail oh kak kahrehong kitail en apwaliki kasalehda limpoak mehlel ong meteikan oh kompoakepahnki meteikan. Dahme kitail kak wia? Keieu, kitail kak kapakapki kitail en ahneki nanpwungmwahu rehn riatail brother oh sister kan. Kupwuren Koht sapwellime ladu kan en miniminpene, oh e pahn ketin sapengki atail kapakap mehlel kan. (1 Sohn 4:20, 21; 5:14, 15) Kitail pil anahne wia mwekid kan me pwung ong atail kapakap akan. Ric, emen Sounapwalih en mwomwohdiso nan East Africa, tamanda duwen emen brother me kin ahneki irair kan me kin kahrehong aramas teikan kin apwaliki kompoakepahki ih. Rick kawehwehda, “I sohte soikeweisang brother menet, I kin nantiong en esehla ih. Mwuhr, I diarada me ahn brother menet ah pahpa kin wia aramas lemei men. Ni ahnsou me I wehwehki uwen apwal brother menet kin nanti pwehn powehdi irairo me e kin tikida loale oh pil ia uwen laud e kekeirada ni pali ngehn, I kin poakpoake ih. Se wiahla kompoakepah keren kan.”—1 Piter 4:8.
Kasalehda Ahmw Pepehm kan ong Mehteikan!
11. (a) Dahme anahn ma limpoak en tohnmwomwohdiso kan pahn kak kekeirada? (b) Dahme kahrehda ma kitail sohte pahn kasalehda atail pepehm kan ong mehteikan, met pahn kakete kawehla atail kekeirada ni pali ngehn?
11 Rahnwet, aramas tohto sohte kin uhdahn ahneki kompoakepah keren men. Ia uwen kansensuwed! Ahpw met sohte anahne wiawi nan mwomwohdiso en Kristian. Limpoak mehlel ong riatail brother oh sister kan kaidehn ihte en koasoi mwahu oh tiahk mwahu ong irail; de e sohte kin wehwehki nohn daulihla kokouruhr rehn mehteikan. Ahpw kitail anahne perenki kasalehda atail pepehm kan ong meteikan, nin duwen me Pohl kin wia ong mehn Korint kan, oh kitail pil anahne kasalehiong iengetail pwoson akan me kitail kin ni mehlel nsenohki irail. Ni mehlel, kaidehn aramas koaros kin perenki koasoi, ahpw ma emen kin nohn daulihla namenek en koasoi de kelekelepw ahnsou koaros, e kakete lelong kahpwal. Pwuhk Sarawi mahsanih, “Aramas me sohte kin men patehng meteikan kin nsenohkihte pein irail. Irail pahn kak uhwong kaweid erpit kan koaros.”—Lepin Padahk 18:1, NW.
12. Dahme kahrehda koasoakoasoipene mwahu me kesempwal ma tohnmwomwohdiso kan pahn kak kerenpene?
12 Koasoipene ni mehlel iei poahsoanpen wia kompoakepah mehlel. (Sohn 15:15) Kitail koaros anahne kompoakepah kan me kitail kak kasalehiong irail atail madamadau loal kan oh pepehm akan. Oh pil, ma kitail pahn uhdahn esehla mehteikan oh arail anahn akan, e pahn mengei ong kitail en sewese irail. Ni ahnsou me kitail kin kasalehda me kitail kin nsenohki anahn en mehteikan, kitail kin kasalehda limpoak mehlel ong irail, oh kitail pahn kilang mehlelpen mahsen en Sises: “Kihwei kaperen sang ale.”—Wiewia 20:35; Pilipai 2:1-4.
13. Dahme kitail kak wia pwen kasalehda atail limpoak mehlel ong riatail brother oh sister kan?
13 Ma atail limpoak mehlel en kak pweida mwahu, kitail anahne en kasalehda met. (Lepin Padahk 27:5) Ni ahnsou me atail limpoak kin mehlel, e pahn sansal pohn masatail, oh e pil pahn kamwekid meteikan en pil kasalehda limpoak mehlel. Ohl loalokong men ntingihdi met: “Mesen kouruhr kin kaperenda nan kapehdomw.” (Lepin Padahk 15:30) Wiewia kadek kan pil kak kakairada limpoak mehlel. Edetehn sohte me pahn kak pwainda limpoak mehlel, kisakis ehu me kohsang nan mohngiong en emen pahn wia mehkot laud. Kisinlikou ehu, oh “lokaia ehu me kohda ni ahnsou me konehng”—soahng pwukat kak kasalehda atail pepehm loal kan. (Lepin Padahk 25:11; 27:9) Ni ahnsou me kitail kompoakepahnki meteikan, kitail anahne en kolokolte atail nanpwungmwahu sang ni atail kin pousehla kasalehda limpoak ni soh roporop. Keieu nan ahnsou apwal akan, kitail men sewese kompoakpatail kan. Pwuhk Sarawi mahsanih: “Kompoakepah mehlel men kin kasalehda ah limpoak ahnsou koaros, oh e kin sewese iuk ni ahnsou apwal.”—Lepin Padahk 17:17, NW.
14. Dahme kitail kak wia ma emen sohte kin mwomwen mwekidki atail limpoak?
14 Ni mehlel, kitail sohte kak kasik en karanih tohnmwomwohdiso kan koaros. Mie ekei me pahn mengei ong kitail en karanihla sang meteikan. Eri, ma emen sohte men karanih iuk uwen me ke mwahuki, menlau dehr mwadang en ahneki madamadau ieu me mwein mie mehkot sapwung rehmw de reh. Oh dehr song en idingkihong ih en karanih iuk. Ma ke pahn kasalehiong ih kadek uwen me e pahn mweidong uhk, mwein ehu rahn, ke pahn kak karanih ih.
“I kin Kupwurperenkin Uhk”
15. Ia imwilahn kaping, de sohte itar kaping ong mehteikan?
15 Ia uwen laud ahn Sises peren ni ahnsou e papidaisla, e ahpw pil rong kapitie me peidihdo sang nanleng me mahsanih: “I kin kupwurperenkin uhk”! (Mark 1:11) Mahsen pwukat mwein kin kaloalehla ahn Sises kin kamehlele me Seme kin ketin poakong ih. (Sohn 5:20) Ahpw inenen kapwuriamwei pwe ekei aramas sohte kin rong soangen kaping sang rehn aramas akan me re kin wauneki oh poakohng. Ann kawehwehda, “Pwulopwul tohto duwehte ngehi sohte kin ahneki tohnpeneinei kan me kin pwungki arail padahk kan en Kristian. Nan imwat kan, se kin ihte rong kauwe kan. Met kin kansensuwedihala kiht.” Ni ahnsou me irail kin wiahla kisehn mwomwohdiso, irail kin pehm limpoak oh sawas nin duwen peneinei ni pali ngehn—duwehte sahm akan, oh ihn akan, riatail brother oh sister kan nan pwoson.—Mark 10:29, 30; Kalesia 6:10.
16. Dahme kahrehda kasalehda madamadau en kawei mehteikan sohte pahn mwahu ong mehteikan?
16 Nan ekei tiahk kan, pahpa oh nohno kan, me mah kan, oh sounpadahk kan sohte kin kalapw kasalehda arail kaping ong me pwulopwul kan, pwe irail lemeleme soangen kaping pahn kahrehong irail en sohte nantiong wia dahme mwahu, de kahrehong irail en aklapalap. Soangen madamadau wet pahn kak kaluwetala peneinei en Kristian akan oh mwomwohdiso. Aramas mah kan mwein pahn ndaiong me pwulopwul kan mwurin arail padahk: “Mwahu, mwahu ahmw padahk, ahpw ke kak wia mwahu sang met!” De ni ahl teikan, irail pil kin kasalehda me irail sohte kin perenki emen pwulopwul. Ni ahl wet, tohto me kin kamehlele me irail kin kamwekid me pwulopwul kan en wia dahme irail pahn kakete wia. Ahpw, pali laud en ahnsou, madamadau wet kin imwikihla sapwung, pwe irail me pwulopwul kan mwein kin pweiek de ahneki madamadau me irail sohte kak wia.
17. Dahme kahrehda kitail anahne rapahki ahl akan en kapinga mehteikan?
17 Ahpw, e sohte konehng en kapinga mehteikan pwehki kitail pahn kihong irail kaweid. Kaping mehlel kin kakairada limpoak mehlel nanpwungen tohnpeneinei kan oh tohnmwomwohdiso kan, oh met kin kangoange irail me pwulopwul kan en rapahki kaweid sang rehn brother oh sister koahiek kan. Eri, kitail sohte pahn mweidong tiahk en kaweid kitail ong iaduwen kitail pahn wia ong mehteikan, ahpw kitail pahn “onehda sapahl pein kitail ong ni aramas kapw me wiawihda rasehng Koht, oh me kin kasalehda pein ih ni mour mehlel en pwung oh sarawi.” Kapinga meteikan duwehte Siohwa kin ketin wia.—Episos 4:24.
18. (a) Kumwail pwulopwul kan, iaduwen ke anahne kilangwong kaweid kan me kohsang me mah kan? (b) Dahme kahrehda irail me mah kan kin medemedewe mwahu mwohn irail pahn kihda kaweid?
18 Ni pali teio, kumwail me pwulopwul kan, menlau dehr ahneki madamadau ieu me irail me mah kan kin sohte perenkin kumwail ma irail pahn kihong kumwail kaweid. (Eklesiasdes 7:9) Weksang met! Irail kin kihda kaweid pwehki ahr kin nsenohkin kumwail oh limpoak loal ong kumwail. Pwe, ia kahrepe irail pahn nantiong en koasoiong kumwail? Oh irail me mah kan kin pil wehwehki duwen uwen kehlail lokaia kan—keieu irail elder kan nan mwomwohdiso—kin kalapw doadoahngki ahnsou laud en medemedewe oh kapakap mwohn irail pahn kihda kaweid, pwe irail men wia dahme pwung.—1 Piter 5:5.
“Siohwa me Diren Kadek oh Limpoak Mehlel”
19. Dahme kahrehda irail akan me kin lelong kansensuwed kan kin kak sohpeiwong Siohwa ong sawas?
19 Ekei aramas mwein kin lelong irair kansensuwed kan ni ahnsou me irail kasalehda limpoak mehlel ong mehteikan, oh ihme kahrehda irail kin ahneki pepehm wet, me kasalehda limpoak mehlel ong meteikan kin ihte imwikihla kansensuwed kan. Irail kin anahne eimah oh ahneki pwoson kehlail pwen sewese irail en pwurehng langahda mohngiongarail kan ong mehteikan. Ahpw, e pahn mwahu irail en dehr manokehla me Siohwa “sohte dohsang emenemen kitail.” E kin luhke kitail en keido mpen Koht. (Wiewia 17:27; Seims 4:8) E pil kin wehwehki duwen atail kin masak aramas teikan en kansensuwedihala kitail, oh e kin ketin inoukihda me e pahn sewese kitail. Sounmelkahka Depit kamehlelehiong kitail: “Kauno kin ketiket mpen irail me nan kapehd tikitiklahr; oh e kin ketin doarehla irail kan me kin sohla ar koapworopwor.”—Melkahka 34:18.
20, 21. (a) Iaduwen kitail ese me kitail kak karanih Siohwa? (b) Ma kitail men karanih Siohwa, dahme kitail anahne wia?
20 Kompoakepahnki Siohwa iei emen me keieu kesempwal kitail men karanih. Ahpw, met pahn kak wiawi? Ei. Pwuhk Sarawi kin kawehwehda duwen ohl oh lih pwung kan me kin inenen karanih Samatail nanleng. Arail koasoi kan kin nekidala lao lel atail ahnsou pwe kitail pahn kak ahneki likilik me kitail pil kak karanih Siohwa.—Melkahka 23, 34, 139; Sohn 16:27; Rom 15:4.
21 Aramas koaros kak kapwaiada sapwellimen Siohwa koasoandi kan ong iaduwen irail kak karanih Koht. Depit mahsanih: “Maing Siohwa, ihs me kak patohlong nan Tehnpasomwi? Aramas me kin peikiong Koht ni mehkoaros oh kin wia me pwung ahnsou koaros, me kin lokaia pwung oh mehlel.” (Melkahka 15:1, 2; 25:14) Ni atail kin kilang me atail papah Koht kin kapwarehda wah mwahu kan oh kahrehong Koht en ketin kahre oh perehla kitail, kitail pahn esehla me “Siohwa diren kadek oh limpoak mehlel.”—Seims 5:11.
22. Soangen irair dahieu me Siohwa kin kupwurki sapwellime aramas akan en paiekihda?
22 Ia uwen laud atail kapai kan pwehki Siohwa kin ketin kupwurki en karanih aramas soh unsek kan! Eri, e soh konehng kitail en kasalehda limpoak mehlel nanpwungatail? Ki sapwellimen Siohwa sawas, emenemen kitail kak kihwei oh paiekihda limpoak mehlel me kin wia irair ehu kilelepen atail pirien en Kristian. Pahn sapwellimen Koht Wehi, aramas koaros nin sampah pahn kasalehda limpoak mehlel wet kohkohlahte.
Ke Kak Kawehwe?
• Soangen irair dahieu anahne en wiawi nan mwomwohdiso en Kristian?
• Iaduwen pein emenemen kitail pahn kak kakairada limpoak mehlel nan mwomwohdiso?
• Iaduwen kaping mehlel kin kakairada limpoak mehlel en Kristian?
• Iaduwen sapwellimen Siohwa limpoak mehlel kin sewese kitail?
[Kilel nan Pali 23]
Limpoak nanpwungen Kristian akan kaidehn ihte pwukoa ehu
[Kilel nan Pali 25]
Ke kak “langahda douluhl mohngiong” pwehn kasalehda limpoak ong meteikan?
[Kilel nan Pali 26]
Ke kin rapahki sapwung kan en meteikan de ke kin kangoange irail?