Apwal en Doadoahk

“En doadoahk​—en doadoahk! E wia kaperen laud ehu en ese me miemiehte doadoahk kaperen me kitail pahn wia.”​—Soun ntingihda pwuhk me adaneki Katherine Mansfield me koasoia (1888-​1923).

KE IANG ahneki madamadau wet me pid duwen doadoahk? Ia ahmw madamadau ong doadoahk? Ke kin wiahki doadoahk mehkot kansensuwed me kin kohdo nanpwungen imwin wihk kaperen akan? De ahmw doadoahk wiahla mehkot me ke sohte men en kin uhdi?

Ong aramas tohto, pali laud en awa kan me irail kin pepehd kin wia ahnsou en doadoahk. Doadoahk kin kak kasalehda iawasa ke kousoan ie oh soangen mour dah me kitail ahneki. Sang ni ahnsoun pwulopwul lao lel irail pahn retire sang doadoahk, irail me tohto kin diarada me doadoahk me keieu lepe arail mour. Ekei kitail kin perenki atail doadoahk. Ekei kin kilang kesempwalpen arail doadoahk sang ni uwen mwohni me re pweipweiki, de pil ndand en arail doadoahk, a pil ekei kin wiahki doadoahk mehkot mehn audehkihte atail ahnsou.

Pil mie irail akan me kin doadoahk pwe en mouriki oh irail oko me kin momour pwe ren doadoahk; oh ekei kin mehla pwehki arail doadoahk. Karasepe, nin duwen ripoht kerendo ieu sang palien United Nations kasalehda, doadoahk kin kahrehda laudlahn medek oh mehla “sang mahwen akan oh doadoahngki sapwung wini oh sakau patpene.” Nuhspepa me ede The Guardian of London ripohtki: “Aramas tohto sang million pak riau kin mehkihla sapwungala kan . . . oh soumwahu kan en nan wasahn doadoahk nan pahr koaros sang ni pwelpar, pwoison, wini kan, katairong oh angin pwoison akan me kin wiahda cancer, soumwahu en mohngiong oh mwoatorala.” Kadoadoahk laudih seri oh idihdiong kalidu iei me irair riau kanamenek me palien doadoahk kin wiewiahiong seri kan.

Patehng met, pil mie mehkot me toahktehn palien madamadau me ede Steven Berglas kahdaneki ni lokaiahn wai “supernova.” E kawehwehda me tohndoadoahk pwerisek emen me lelehr irair me keieu laud nan ah pwukoa doadoahk pahn diar me re ahneki pepehm en saloh, pahtou, pwunodki de pwangahkihda doadoahk ahpw solahr kak pitsang loale.”

Pwerisek Pelian Pweipwei en Doadoahk

Nan sampah me aramas kin kalap doadoahk awa tohto, e mwahu en wehwehki wekpeseng en dahkot pwerisek oh dahkot “pweipwei en doadoahk.” Aramas tohto me kin pweipwei en doadoahk kin wiahkihla arail wasahn doadoahk iei arail wasahn kasaladek arail madamadau, sampah keper oh liseliping wet; oh doadoahk laud wia mehkot kesempwal oh ekei pak wia pwukoa kansenamwahu. Mehn wai kin kahdaneki irair wet “workaholics.” Workaholics kin wiahiong doadoahk en kihsang soahng teikan dewerail nan mour en aramas emen, ahpw aramas pwerisek emen ese iahd me e anahne uhdi oh uhd kihong ah madamadau ong soahng kesempwal teikan me duwehte wia katamanpen rahn en eh kapwopwoud. Aramas me wia workaholic men kin litepwiki pepehm en ah doadoahk, ah aramas pwerisek emen sohte kin ahneki soahngen pepehm wet.

Aramas en mwehi wet sohla kak katohrehpeseng dahkot pwerisek oh dahkot “workaholic” oh kin wiahkihla doadoahk laud mehkot kansenamwahu. Soangen dipwisou duwehte cell phone ape kin kahrehda aramas en sehsehla wekpeseng en mihmi nan ihmw oh mihmi nan wasahn doadoahk. Pwe sohte lipilipil iawasa aramas emen mihmi ie, e kak koasoakoasoia ah doadoahk oh ekei aramas pahn mehla pwehki arail doadoahk.

Iaduwen aramas ah pahn mwekidiki irair suwed wet? Pwihn semen me adaneki Sociologists kin kasawihada aramas akan me kin nohn doadoahk laud oh pwunod laud kin wahdo arail wiewia en pali ngehn akan nan doadoahk oh kapata irapene. Nuhspepa me ede The San Francisco Examiner koasoia me “patpene teng en doadoahk en pali ngehn oh doadoahk wiahlahr me wehi pokon kin doadoahngki.”

Me pid wasakis me ede Silicon Valley nan United States, wasahn wiahda dipwisou me aramas ahpwtehn diarada kan, ripohtki ni ahnsou kerendo ieu me koasoia: “Wasahn peidi en sidohsa kan nan wasahn doadoahk wie malamalaula towe pwehki tohndoadoahk kan kamalaulau. Ahpw, wasahn peidi en sidohsa nan wasahn onop Paipel ni soutik kan kin sohla itar wasa.” Sohte lipilipil dahme aramas diarada me kesempwal duwen Paipel, aramas tohto nan sampah pwon esehda me Paipel kin kihda madamadau pwung duwen doadoahk, oh irail kin ahnekihda madamadau toupahrek nan arail mour, me pid doadoahk.

Iaduwen Paipel ah pahn kak sewese kitail en ahneki madamadau toupahrek ong duwen doadoahk? Mie kaweid sang Pwuhk Sarawi kan me kak sewese kitail en doadoahngki ong irair apwal akan ong nan atail ahnsou, me pid duwen wasahn doadoahk? Artikel en mwurin met pahn koasoia pasapeng en peidek pwukat.