Pahpa Oh Nohno Kan—Soangen Mour Dah Me Kumwail Mwahuki Ohng Noumwail Seri Kan?

“Mwahnakapw oh peinakapw akan . . . Kapinga mwaren Siohwa.”—MELKAHKA 148:12, 13.

1. Mehn kapwunod dah kan pahpa oh nohno kan kin ahneki me pid neira seri kan?

IHS pahpa oh nohno me sohte kin katapanki en neira seri kan mour ohng ahnsou kohkohdo? Sangete ahnsou me seri pwelelo ipwidi—de pil mwowe—pahpa oh nohno kan kin tepida medemedewe nsenamwahu en serio. E pahn wia seri roson emen? E pahn kekeirada mwahu? Ni en serio pahn wie kekeirada, pil mie ekei soahng teikan me ira pahn pil anahne medewe. Ni mehlel, pahpa oh nohno kan kin mwahuki dahme pahn mwahu ong neira serio.—1 Samuel 1:11, 27, 28; Melkahka 127:3-5.

2. Dahme kahrehda pahpa oh nohno tohto rahnwet kin pehm me irail anahne wia uwen arail kak en kihong neirail seri kan mour pweida ni ahnsou me irail laudla?

² Ahpw, nan sampah rahnwet, e kin apwal ohng pahpa oh nohno kan en kihong neira seri kan dahme keieu konehng. Pahpa oh nohno tohto kan kin lelohng soangen apwal tohtohie—mahwen, wekidekla kan nan palien politiks, kahpwal en mwohni, apwal en war oh pepehm kan, oh pil soahng tohto teikan. Pahpa oh nohno kan sohte mwahuki neira seri kan en pil lelohng soangen kahpwal kan me irail lelohng nan arail mour. Nan sahpw laud akan, ele pahpa oh nohno kan kin kilang nein kompoakparail de arail peneinei kan neirail seri kan kin mwomwen pweida mwahu oh ahneki doadoahk laud kan oh kin mwomwen ahneki mour pweida kan. Met kin kahrehiong ira en pehm me ira anahne wia uwen ara kak en pil kihong neira seri kan mour nsenamwahu oh pweida ni arail pahn laudla.—Eklesiasdes 3:13.

Pilada Mour Mwahu

3. Soangen pilipil dah Kristian akan wiahda?

³ Nin duwen tohnpadahk en Sises Krais kan, Kristian akan piladahr en inoukihong Siohwa arail mour. Irail kihong nan arail mohngiong mahsen en Sises me mahsanih: “Ma mehmen men idawehniehdo e uhdahn pahn tounmeteikihla pein ih, kapaikada eh tuhkehn lokolok rahn koaros oh idawehn ie.” (Luk 9:23 14:27) Ei, en Kristian men mour kin pidada tohnmetei. Ahpw, ah mour sohte wia mour apwal ehu de diren nsensuwed. E kin peren oh e kin itarki dahme ahnekiher oh nainekiher—mour mwahu ehu—pwehki ah mour kin pid kihkihwei oh nin duwen me Sises mahsanih, “kihwei kaperen sang ale.”—Wiewia 20:35.

4. Dahme Sises kin kangoangehki sapwellime werek kan en rapahki mahs?

⁴ Aramas akan nan mwehin Sises kin lelohng soangen irair me inenen apwal kan. Patehng arail kin songosong en wiahda arail mour, irail pil anahne kanengamahiong kaunda lemei en mehn Rom kan oh arail kin liksansalamwahuki sarawi. (Madiu 23:2-4) Mendahki met, aramas tohto me rong duwen Sises perenki kihdi mehkan me irail kin rapahki nan mour—pil arail doadoahk kan—oh wiahla tohnpadahk en Krais kan. (Madiu 4:18-22, 9:9, Kolose 4:14) Iaduwen—irail tohnpadahk kan kin kihong arail mour en ahnsouo oh ahnsou kohkohdo nan keper? Tehk mahsen en Sises wasaht: “Irail koaros me tounmeteikilahr imwarail kan, riarail kan, samarail de inarail kan, de neirail seri kan, de sapwarail kan, pwehki ngehi, re pahn ale pak tohtohie oh iangahki mour soutuk.” (Madiu 19:29) Sises kamehlelehiong sapwellime werek kan me Sahmo nanleng kin mahsanih arail anahn akan. Ihme kahrehda, Sises kangoange irail: “Eri, kumwail rapahki mahs Wehin Koht oh dahme e kin ketin kupwurki, a soahng teikan koaros e ahpw pahn ketikihong kumwail.”—Madiu 6:31-33.

5. Ia pepehm en pahpa oh nohno kan ohng mahsen en Sises me Koht pahn apwalih sapwellime ladu kan?

⁵ E pil duduwehte rahnwet. Siohwa kin mwahngih atail anahn akan, oh pil irail akan me kin mwohnki mahs Wehio nan arail mour, eri mehlel irail akan me kin wia doadoahk en kalohk kaukaule, kin kak pil ahneki soangen koapworopworohte me Siohwa pahn apwalih irail. (Malakai 3:6, 16; 1 Piter 5:7) Ekei pahpa oh nohno kan sohte kin nohn likih met. Weksang met, irail kin mwahuki kilang neirail seri kan en kekeirada nan doadoahk en Siohwa oh mwein ehu rahn iang wia doadoahk en kalohk kaukaule. Ahpw, ni arail kin kilang duwen irair en pelien mwohni oh doadoahk nan sampah rahnwet, irail kin pehm me e kesempwal neirail me pwulopwul kan en iang mahs sukuhl mwahu pwe irail en ale soangen koahiek teikan pwe ren kak iang ale doadoahk mwahu ehu de ale doadoahk ehu me kak kamourirailla. Ohng soangen pahpa oh nohno pwukat, sukuhl mwahu kin wehwehki sukuhl laud.

Kaunopada ong Ahnsou Kohkohdo

6 Ni ahl dahieu me lepin lokaia sukuhl laud kin wehwehki nan artikel wet?

⁶ Sukuhl kin wekpeseng nan sahpw akan. Karasepe, nan United States, tepin kasukuhl kan kin lel pwihn kaeisek riau. Mwuri, ahn emen pilipil ma e men kohla sukuhl laud ki ele sounpahr pahieu de pil tohtohsang de pil sukuhl me uhdahn laud duwehte wiahla toahkte de wiahla lawyer. Soangen sukuhl pwukat me kin wehwehki sukuhl laud nan artikel wet. Weksang met, mie ekei sukuhl me kin kasukuhlih aramas akan nan palien doadoahngki peh de ni lokaiahn wai “technical/vocational school” oh soangen kasukuhl pwukat kin mwotomwot oh ke kin ale noumw diploma nan soangen kasukuhl pwukat.

7. Soangen pepehm dah irail tohnsukuhl kan en high school kin lelohng?

⁷ Rahnwet, high school kin wia ahl ehu en kak kaunopada tohnsukuhl kan ohng sukuhl laud. Pwe en kak lel arail mehn akadei kan, irail tohnsukuhl tohto kin ale soangen mehn kasukuhl apwal kan pwe en kak mengeiong irail en ale deng mwahu nan test en pidelong nan sukuhl laud ahpw kaidehn en ale soangen mehn kasukuhl me pahn sewese irail en kak ale doadoahk kan. Serihn sukuhl en high school kan kin ale pepehm en idihd laud sang rehn sounpadahk kan, sounkaweid kan nan sukuhl oh pil iengerail tohnsukuhl kan en nantihong pidelong nan sukuhl laud kan me keieu mwahu pwe en kak ale neirail kisinlikou kan me ele kak kihong irail arail doadoahk pweimwahu ehu rahn.

8. Soangen pilipil dah kan me irail pahpa oh nohno kan anahne wiahda rahnwet?

⁸ Eri, dahme irail pahpa oh nohno Kristian kan anahne wia? Ei, irail pil mwahuki neirail seri kan en pweida nan arail sukuhl oh koledi soahng kan me irail anahne esehla pwe irail en kak doadoahngki pwe irail en kak apwalih pein irail nan ahnsou kohkohdo. (Lepin Padahk 22:29) Ahpw, met wehwehki me irail en ihte mweidala neirail seri kan en iang mihla nan mour en siaiki kepwehpwe oh pweida en sampah kan? Soangen mehn akadei dah kan irail kin wiahda ong neirail seri kan, sohte lipilipil ma sang ni lokaia de arail mehn kahlemeng kan? Ekei pahpa oh nohno kan kin doadoahk laud oh nekidala sent laud pwe en kak kadarala neirail seri kan nan sukuhl laud. Ekei kin itarki ma irail pweipwandla pwe en kak wia met. Pweinen met sohte kak ihte wadawadi ni tala de sent. Ia uwen pweinen nantihong kalaudehla ahmw sukuhl rahnwet?—Luk 14:28-33.

Pweinen Rapahki Sukuhl Laud

9. Dahme kitail kak ndahki duwen pweinen sukuhl laud?

⁹ Ni atail kin medewe duwen pweinen mehkot, kitail kin kalap medewe mwohni. Nan ekei sahpw, koperment me kin pwain pweinen sukuhl kan kahrehda tohnsukuhl kan sohte anahne pwain arail sukuhl. Ahpw, nan pali laud en sahpw akan, sukuhl laud kin pweilaud oh pweine pil kin wie lalaudalahte. Nan ehu artikel nan New York Times Op-Ed ntingihdi: “Sukuhl laud mahs kin wia elen ale paiamwahu. Met e kin wia mehn kasalehda duwen dohpeseng en me kepwehpwe kan oh me paisuwed kan.” Met wehwehki me sukuhl laud me mwahu kan kin wia wasa me irail me kepwehpwe oh wadawad kan kin kadarala neirail seri kan ie pwe irail en pil kak kepwehpwehla oh wadawadla. Iaduwen—e konehng irail pahpa oh nohno Kristian kan en iang kihong neirail seri kan soangen mehn akadei wet?—Pilipai 3:7, 8; Seims 4:4.

10. Iaduwen sukuhl laud kin duwehte kalaudehla koasoandi en rahnwet?

¹⁰ Pil nan wasa kan me sukuhl sohte pweipwei, pil mie soahng kan me kin iangala. Karasepe, The Wall Street Journal kin ripohtki me nan ehu wehi nan Southeast Asia, “arail koperment kin doadoahngki soangen mwomwen koasoandi en sukuhl me ni lokaiahn wai adaneki ‘pyramid.’ Kopermento kin kihla irail me keieu pweida kan nan wasa keieu mih powe.” “Wasa keieu mih powe” wasaht kin wehwehki nan sukuhl keieun wadawad akan duwehte—Oxford oh Cambridge me mih nan England de sukuhl keieu laud kan nan United States oh pil sahpw teikan. Dahme kahrehda koperment kan kin wiahda soangen prokram laud duwehte met? Ehu ripoht kasalehda me met kin wiawi pwe en kak “kamwekid pelien sent nan arail wasa.” Sukuhlo mwein mwomwen sohte pweipwei ahpw pweine pahn pidada ah mour en kak kalaudehla koasoandi suwed wet en rahnwet. Mendahki soangen mour wet me aramas tohto kin rapahki rahnwet, iaduwen—ihme irail pahpa oh nohno Kristian kan mwahuki neirail seri kan en ahneki?—Sohn 15:19; 1 Sohn 2:15-17.

11. Dahme ripoht kan kin kasalehda duwen kamamsakau oh dipen nenek nanpwungen serihn sukuhl laud akan?

¹¹ Medewehla pil duwen dahme kin wiawi nan wasahn sukuhl laud akan. Irail seri en sukuhl laud kan kin wadawad arail tiahk suwed kan—kamamsakau oh wini suwed kan, mour suwed, mwersuwed, kahrehiong emen en wia soahng suwed oh kanamenek kan pwe en kak iangala ehu pwihn oh pil soahng suwed tohto teikan. Tehk duwen kamamsakau wasaht. New Scientist Magazine kasalehda met duwen irail me kin nim sakau ihte en sakaula: “Ele persent 44 en tohnsukuhl laud kan nan United States kin wia met keieu malaulaula pak ehu nan wihk riau koaros.” Met pil kin wiawi nan Australia, Britain, Russia oh pil sahpw teikan. Me pid tiahk en nenek, koasoi nanpwungen tohnsukuhl kan rahnwet iei en “iangada emen,” me nan ripoht en nan Newsweek kin kawehwehda me iei en kiskihte de wendi reh ahpw sohte pil pilahn en pwurehng tuhwong mwuri.” Roporop kasalehda me persent 60 lel 80 en tohnsukuhl kan iangehr wia met. Emen soun roporop kasalehda me “ma kowe emen tohnsukuhl me kin duwehte koaros, ke pahn wia met.”—1 Korint 5:11; 6:9, 10.

12. Dahme irail tohnsukuhl kan kin lelohng nan wasahn sukuhl?

¹² Patehng wasa diren suwed wet, pil kin mie soangen pepehm en idihd kan sang sukuhlo oh test kan? Ni mehlel, seri kan anahne en onop oh wiahda arail mehn sukuhl kan pwe irail en kak pweida nan test kan. Ekei mwein anahne doadoahk part-time ahpw ni ahnsowohte kohla sukuhl. Mepwukat koaros kin doadoahk laud oh kihsang ahnsou laud. Eri, dahme pahn uhd luwehdi ohng pali ngehn? Ma e kin apwalla en wia koaros, dahme kitail pahn uhd kesehla? Kitail pahn kin mwohnkihte Wehio de kitail pahn pwilikihdi? (Madiu 6:33) Paipel kin kaweidih Kristian akan: “Eri, kumwail kanahieng duwen amwail mour me kumwail weweidki. Kumwail dehr duwehte aramas me loalopwon kan, ahpw kumwail duwehte me loalokong kan. Kumwail isaneki ahnsou mwahu koaros, pwe ahnsou pwukat ahnsou suwed kei.” (Episos 5:15, 16) Ia uwen kansensuwed ekei arail kin pwupwuweisang nan pwoson pwehki arail kin song en lel anahn akan en nan sukuhl laud me kin kihsang ahnsou oh kehl laud!

13. Soangen peidek dah kan pahpa oh nohno kan anahne en medewe?

¹³ Mehlel, mour en nenek, tiahk suwed, oh kasongosong laud kan sohte kin wiawi nan wasahn sukuhl laud kante. Ahpw, me pwulopwul en sampah tohto kin kilangwohng mepwukat nin duwen kisehn sukuhl laud oh irail sohte kin wiahki met mehkot laud. Ahpw, iaduwen—e konehng irail pahpa oh nohno Kristian kan me esehier mepwukat en kihong neirail seri kan nan soangen wasa pwukat erein sounpahr pahieu de wereisang? (Lepin Padahk 22:3; 2 Timoty 2:22) Kapai me irail pahn ale uhdahn kesempwal me irail anahne en pil lelohng nan keper pwukat? Oh keieu kesempwal, dahme irail me pwulopwul kan kin sukuhliki duwen dahme keieu kesempwal nan arail mour?a (Pilipai 1:10; 1 Deselonika 5:21) Pahpa oh nohno kan anahne irail en medewe mwahu met oh kapakapki soangen peidek pwukat oh duwen soangen keper kan ni irail pahn kadaralahng neirail seri kan nan ehu sahpw tohrohr.

Pilipil Dah kan Me Mie

14, 15. (a) Mendahki soangen lamalam ndand kan, mehnia kaweid en Paipel me konehng atail ahnsou?(b) Peidek dah kan me irail me pwulopwul kan anahne en pein idek rehrail?

¹⁴ Rahnwet, pali laud en aramas kin kamehlele me ihete elen pweida mwahu nan mour iei en ale sukuhl laud. Ahpw, mendahki aramas tohto kin kamehlele met, irail Kristian kan kin idawehn dahme Paipel kaweidki: “Kumwail dehr kahlemengih wiewia kan en sampah wet, ahpw mweidohng Koht en ketin kawiliakapwala loalamwail kan unsek. Eri, kumwail ahpw pahn esehda dahme kupwuren Koht—dahme mwahu, oh dahme e kin ketin kupwurperenki, oh dahme unsek.” (Rom 12:2) Eri, ia kupwuren Koht ohng irail me mah oh pwulopwul kan nan imwilahn koasoandi wet? Pohl kehkehlikihong Timoty: “Ahpw kowe, ke uhdahn pahn kanahieng pein uhk ahnsou koaros oh wasa koaros; kanengamahiong kamakam, oh wia omw pwais en sounkadehde en Rongamwahu, oh pil kapwaiada omw pwukoa nin duwen me konehng ladun Koht men.” Kaweid pwukat uhdahn kin konehng kitail koaros rahnwet.—2 Timoty 4:5.

¹⁵ Kitail en dehr iang pidada nan mour en noahrok kepwe en sampah en Sehdan wet, ahpw kitail en anahne en ‘kanakanahieng’—tetehkte atail mehn akadei ngenin kan. Ma ke pwulopwul a ken pein idek rehmw: ‘I kin song uwen ahi kak en “kapwaiada ahi pwukoa” pwe ih en kak wiahla emen me pwung ohng kalohki Mahsen en Koht? Ia ahi koasoandi ong en mwohnki ahi doadoahk en kalohk ni “unsek”? I kin medewe ien wiahla emen me kin wia doadoahk en kalohk kaukaule ehu rahn?’ Peidek pwukat apwal ahpw mehlel ma ke kin kilang me pwulopwul teikan kin rapahkihla soangen mehn akadei roporop kan, “rapahki soahng kan me mwahu” me irail leme me pahn wahdo pweida mwahu ahnsou kohkohdo. (Seremaia 45:5) Eri, pahpa oh nohno Kristian kan en, ni erpit, kihong neirail seri kan sangete ni arail tikitik soangen wasa oh kasukuhl me kin kangoange soahng ngenin kan.—Lepin Padahk 22:6; Eklesiasdes 12:1; 2 Timoty 3:14, 15.

16. Iaduwen pahpa oh nohno Kristian akan kak, ni erpit, pilada soangen wasa me pahn mwahu ohng neirail seri kan pali ngehn?

¹⁶ Emen pwutak me keieun laud nan pirien en pwutak silimen ehu oh kin wia doadoahk en kalohk kaukaule koasoia, “Aht nohno kin tetehk kanahieng aht werek. Se sohte kin werekiong iengat tohnsukuhl kan ahpw se kin werekiongete irail akan nan mwomwohdiso me kin tiahk mwahu. E pil kin kalap luhke irail me kin wia doadoahk kaukaule kan duwehte misineri, soundoulik, irail me kin mih nan Bethel kan oh pioneer kan ohng nan imwato pwe se en kin kak werekiong. Ni aht kin rong arail ekspiriens kan oh kilang duwen arail peren kin sewese kiht en kihong nan aht mohngiong ineng en men iang wia doadoahk pwukat.” Ia uwen kaperen en kilang irail pirien silimen pwukat kin wia soangen doadoahk kaukaule pwukat. Emen kin mihmi nan Bethel, emen iang sukuhl en Ministerial Training, ah emen kin pioneer.

17. Soangen kaweid dah me pahpa oh nohno kan kak kihda ohng neirail pwulopwul kan me pid mehn kasukuhl kan?

¹⁷ Likin ihte song en wiahda wasa mwahu ong pali ngehn en seri kan, pahpa oh nohno kan anahne en mwadang kihong neirail seri kan soangen kasukuhl me irail pahn ale oh mehn akadei en doadoahk. Pil emen pwulopwul me kin papah nan Bethel met nda: “Ahi pahpa oh nohno koaros kin pioneer mwohn ara pwopwoudla kahrehiong ira kin song en kihong tohn aht peneinei pwon ineng en pioneer. Ma se kin wia aht pilipil en dahme se pahn sukuhliki nan sukuhl, ira kin kangoange kiht en pilada mehkan me pahn sewese kiht en diarada doadoahk part time pwe se en kak pioneer.” Pahpa, nohno oh pil seri kan anahne en pilada soangen mehn kasukuhl kan me pahn sewese seri kan en rapahki kasukuhl kan me kak sewese irail nan doadoahk en Siohwa ahpw kaidehn soangen kasukuhl laud kan en sampah.b

18. Soangen doadoahk dah kan me pwulopwul kan kak medemedewe en wia?

¹⁸ Roporop nan wehi tohto kasalehda me mie anahn laud ohng aramas akan me kin ale sukuhl en doadoahk kan ahpw kaidehn me sukuhl laud kan. USA Today ripohtki me “nan sounpar eisek kohkohdo, persent 70 en irail tohn doadoahk kan sohte pahn anahne degree en sukuhl laud sounpar pahieu ahpw ihte degree en sukuhl sounpar riaute de sukuhl ahnsou mwotomwotte. Kasukuhl tohto kin kihda sukuhl en doadoahk nan ohpis, kamwahuwihala sidohsa, wiahda computer, paip oh soahng pwukat, seisei pitenmoang de pil doadoahk en trade teikan. Iaduwen mepwukat doadoahk kei me aramas kin men wia? Ehi! Mwein kaidehn doadoahk lingan de ndand kei ni ekei kin medewe ahpw e itar en apwalih emen oh mengei ohng irail akan me kin ni mehlel mwahuki papah Siohwa.—2 Deselonika 3:8.

19. Ia ahl me keieu kak en kihong emen mour en peren oh nsenamwahu?

¹⁹ Paipel kin kangoange oh mahsanih: “Mwahnakapw oh peinakapw akan, me mah oh pil seri kan. Irail koaruhsie en kapinga mwaren Kauno! Mware me lapalap sang mwar teikan koaros; sapwellime lingan kin ketiket pohnangin lahng oh sampah.” (Melkahka 148:12, 13) Doadoahk kaukaule en papah Siohwa kin kihda peren oh nsenamwahu laudsang soangen daidel laud de kisakis kan me sampah pahn kihong kitail. Tamataman dahme Paipel kamehlelehiong kitail: “Iei kupwuramwahu en Kauno me kahrehda omw kepwehpwe oh e sohte kin ketin kapatahieng medek en iang.”—Lepin Padahk 10:22.

[Nting tikitik me mi pahs]

Ke Kak Kawehwe?

• Dahme Kristian kan kin likih me pahn kihong irail mour mwahu ni ahnsou kohkohdo?

• Soangen apwal dah kan me pahpa oh nohno Kristian kan kin lelohng me pid mour en neirail seri kan ni ahnsou kohkohdo?

• Dahme kitail anahne en medemedewe me pid duwen pweinen iang sukuhl laud?

• Iaduwen pahpa oh nohno kan kak sewese neirail seri kan en rapahki en iang doadoahk kan en Siohwa?

[Kaokon nan Pali 15]

Ia Kesempwalpen Sukuhl Laud?

Pali laud en aramas me kin iang sukuhl laud kin kilangwohng ale degree laud me kak kahrehiong irail en ale doadoahk pweilaud ehu rahn. Ripoht en koperment kan kasalehda me ihte persent 25 en tohnsukuhl kan me kin iang sukuhl laud kan me kin kak pweida, me wehwehki me pali malaulaute me kin kak pweida. Ahpw, iaduwen, mehlel degree laud kin wehwehki doadoahk mwahu? Met sohte kin pwung ohng dahme roporop kan kin kasalehda.

“En kohla iang sukuhl laud kan duwehte Harvard de Duke University sohte kin wehwehki me ke uhdahn pahn ale doadoahk mwahu de pweimwahu kan. Kompani kan sohte nohn wehwehki duwen me pwulopwul kan me rapahki arail doadoahk. Degree laud sang nan sukuhl pwukat mwein pahn mwomwen lingaling, ahpw, dahme emen kak oh sohte kak wia me kesempwal.”—Newsweek, November 1, 1999.

“Mendahki nan rahnwet, doadoahk kin anahne soangen koahiek laud kan laudsang mahs, ni mehlel, koahiek kan me keieun kesempwal nan doadoahk pwukat iei me kitail kin sukuhliki nan high school me duwehte wahntuhke, wadawad, nting en irail pwihn keduwau kan. . . , ahpw kaidehn ahn me sukuhl laud kan. . . . Tohnsukuhl kan sohte anahne en kohla iang sukuhl laud pwe en kak ale doadoahk kan, ahpw irail anahne en sukuhliki mwahu dahme irail kin ale nan high school.” American Educator, Spring 2004.

“Pali laud en sukuhl laud kan sohte kin uhdahn kaunopada mwahu irail tohnsukuhl kan en wiahla tohndoadoahk kei. Sukuhl en Vocational kan . . . kin wie tohtohla towe kan. Uwen tohto en me kin iang towehda kin tohtohkihla 48% sang 1996 lel 2000. . . . Ahpw, sukuhl pweilaud oh kangala ahnsou laud kan kin sohsohla katepe ahnsou koaros.”—Time, January 24, 2005.

“Kapat me Department of Labor en US kin wiahda kihda kilel kapwuriamwei ehu me erein pahr 2005 pwon, silikis ehu en irail koaros me kin kesepwilsang sukuhl laud sounpahr pahieu kan sohte pahn diar doadoahk me kak pwung ohng neirail degree kan.”—The Futurist, July/August 2000.

Pwehki mepwukat, tohtohlahr me kin peikasalki duwen kesempwal en sukuhl laud rahnwet. Futurist ripohtki me “Kitail kasukuhli aramas akan ohng mehn akadei sapwung kan.” Weksang met, tehk dahme Paipel mahsanih duwen Koht: “Ngehi me Kauno omw Koht, me kupwurki padahkihiuk pwe en wia kamwahu ehu ong uhk oh kaweid uhk nan ahl me ke pahn keid ie. Ma ke rongete ei kosonned akan! Eri, kupwuramwahu ahpw pahn pwilipwilwei rehmw rasehng piletik pwoat me sohte kin madada. Powehdi pahn lelohng uhk, rasehng iloak kan me kin pwungupwungdong ni oaroahr.”—Aiseia 48:17, 18.

[Kawehweh pen kilel kan nan ehu ehu pali 12]

Irail kin mendahki dahme pein irail mwahuki oh idawehnla Sises

[Kawehweh pen kilel kan nan ehu ehu pali 17]

Pahpa oh nohno Kristian kan kin, ni erpit, kihong neirail seri kan wasa me kakehlailih arail pali ngehn