Sukuhl Laud oh Mwohni Kak Kihong Uhk Mour Mwahu?

Me tohto medewe me irail me iang sukuhl laud oh kepwehpwe pahn ahneki mour mwahu ni ahnsou kohkohdo. Re kamehlele me ma aramas emen alehdi sukuhl laud, kompani kan, tohnpeneinei kan oh tohn kousapw kan pahn paiekihda. Re pil medewe me sukuhl laud pahn kahrehiong emen en ahneki doadoahk pweimwahu oh me irail me kin wiahda mwohni laud pahn nsenamwahu.

PILIPIL ME ARAMAS TOHTO KIN WIAHDA

Tehk dahme Zhang Chen me kohsang China koasoia. E koasoia, “I kamehlele me I anahne naineki degree en sukuhl laud pwe I en pitsang semwehmwe oh me doadoahk pweimwahu uhdahn pahn kihong ie mour peren oh nsenamwahu.”

Aramas tohto kin men kohla sukuhl nan sukuhl laud kan pwe ren ahneki mour mwahu. Met kin kalapw wiawi lao lel ahnsou me COVID-19 kahrehiong aramas akan ren apwal en seiloakseli. Mpen sounpar eisek samwalahro pwihn ehu wia roporop oh ripohtki me tohtohsang elep en tohnsukuhl koaros me kin kohla sukuhl nan sahpw teikan iei mehn Eisia.

Pahpa nohno kan kin kalapw doadoahk laud pwe neirail seri kan en kohla ni sukuhl laud kan nan ehu sahpw tohrohr. Qixiang sang Taiwan, tamanda: “Ei pahpa nohno sohte kepwehpwe, ahpw ira kadarala kiht seri pahmen nan sukuhl laud nan United States.” Pwehn pwain soangen sukuhl pwukat, eh peneineio oh duwehte meteikan kin mihla nan pweipwand laud.

IA IMWILAHN SUKUHL LAUD?

Emen peinakapw ko mesen pwang oh pwunod ni eh mwomwohd mwohn computer ehu nipwong. — Aramas tohto me kin nantihong alehdi sukuhl laud oh men kepwehpwehla kin pwunod

Sukuhl kak kamwahwihala atail mour ni soangen ahl kei. Ahpw, met sohte kin ahnsou koaros wadohng tohnsukuhl kan dahme re kasikasik. Karasepe, mwurin sounpar kei ar kin wie doadoahk laud oh wiahda pweipwand laud, me tohto sohte kin kak diar doadoahk me re mwahuki. Ehu ripoht sang Rachel Mui en Singapore Business Times, koasoia: “E tohtohla irail kan me kin neksang sukuhl laud oh sohte kak diar doadoahk.” Jianjie me alehdi degree en sukuhl laud kei oh kin mi nan Taiwan, koasoia, “Me tohto sohte kin diar doadoahk me pid dahme re kin sukusukuhlki.”

Irail akan me kak diar doadoahk sang dahme re kin sukuhlki mwein pil kin diarada me ar mour sohte wiawi nin duwen me re kasik. Niran sang Thailand, koasoia me mwurin eh pwurasang sukuhl laud nan United Kingdom e diarada doadoahk ehu me pid dahme e kin sukuhlkio. “Duwehte dahme I kasik, nei degreeo sewese ie I en diarada doadoahk me pweilaud. Ahpw I kin anahne doadoahk laud oh wiahda awa tohto pwe pweinei en kak laudla. Kedekedeo kompanio kakommoalehdi pali laud en tohndoadoahk kan, iangahki ngehi. I esehda me sohte doadoahk ehu kak uhdahn kihong aramas emen mour nsenamwahu.”

Pil aramas akan me naineki mwohni tohto de pil mwomwen ahneki mour mwahu kin ahnekihte kahpwal en peneinei, soumwahu oh pil kin pwunodkihte duwen mwohni. Katsutoshi, sang Sapan koasoia, “Dir nei mwohni ahpw I sohte kin nsenamwahu pwehki aramas teikan kin peirinkin ie oh kin wiakauwe ie.” Lam, lih emen me kin mi nan Vietnam, koasoia, “Aramas tohto kin song wiahda mwohni tohto, pwehki re medewe me met pahn kihong irail mour mwahu, ahpw ar pwunod kin laudla, re pil kin soumwahuda oh nsensuwed laud.”

DAHME KAHREHDA SUKUHL OH MWOHNI SOHTE ITAR

E mehlel aramas anahne sukuhl oh mwohni pwehn apwalih pein irail oh arail peneinei. Ahpw, mepwukat sohte kak kihong irail mour nsenamwahu ni ahnsou kohkohdo. Dahme kahrehda? Tehk dahme Paipel mahsanih.

SUKUHL LAUD SOHTE KIN KAHREHDA PWEIDA AHNSOU KOAROS.

“Kaidehkin me marahrahn tang kan me kin kalap kana ni weirin tang; . . . kaidehkin me neksang sukuhl kan me kin kalap kepwehpwehla; kaidehkin me koahiek kan me kin kalap lapalapala mwohn aramas; pwe paisuwed kin lelohng aramas koaruhsie.”—EKLESIASDES 9:11.

Pil ma aramas emen alehdi kasukuhl ehu me uhdahn mwahu e sohte pahn kak pweida nan mour pwehki mie soahng tohto me e sohte kak wia. Sohte lipilipil uwen sukuhl laud me aramas emen alehdi, ma mie kahpwal en mwohni de kahpwal en politik nan eh sahpwo de ma aramas kin lipilipilki ih mweinele e sohte pahn kak pweida.

KEPWEHPWE SOHTE PAHN POATOPOAT.

“Ke en loalokongla, oh dehr mweidohng paliweromwen en pwangada ni omw songosong en kepwehpwehla. Noumw mwohni kak sohrala ni marepteieu, rasehng ikel emen me wunen peh osohsehng e ahpw pipihrla.”—LEPIN PADAHK 23:4, 5.

Mour mwahu me mwohni kak kihda sohte pahn poatopoat. Ke kak wiahkintehieu luhssang noumw mwohni koaros. Kahpwal akan me duwehte rerrer en sahpw, luldahn nanwel kan oh melimel laud kak kahrehiong aramas emen en sohla nah mwohni oh imwe.

MWOHNI KIN KALAPW KAHREHDA KAHPWAL.

“Me kepwehpwe ahneki soahng tohto me kahrehda eh pahn kin pepehd oh wie pwunopwunod.”—EKLESIASDES 5:12.

Ih met me wiawihong Franklin me kin mi nan Hong Kong. E alehdi sukuhl laud oh e ahneki doadoahk pweimwahu ehu. Mwuri e kesepwilda wiahla emen kaunen doadoahko. E nda, “Pwunod tepida kauwehla ei roson. I kin pwunod laud kahrehda I sohte kak meir.” Kedekedeo e sohla kak pousehlahte. E pil koasoia, “I tepida medewe kahrepen ei wiewia met. Oh met kahrehiong ie I en medewe laud duwen kahrepen mour.”

“Dehr mweidohng paliweromwen en pwangada ni omw songosong en kepwehpwehla.”—LEPIN PADAHK 23:4

Duwehte Franklin, me tohto kin medewe me mie soahng kan me kesempwalsang alehdi sukuhl laud oh kepwehpwehla. Ekei aramas pwukat kin rapahki elen ahneki mour mwahu ni ahnsou kohkohdo sang ni ar kin nantihong wiahla aramas mwahu oh kin mwahuong meteikan oh re sohte kin medemedewehte kepwe kan. Ia duwe, met uhdahn kak kahrehiong aramas emen en ahneki mour mwahu ni ahnsou kohkohdo? Iren mwurin met pahn sapengala.