Siohwa Iei Silepatail

“Siohwa iei Silepei. Solahr me I pahn anahne.”—MELKAHKA 23:1.

1-3. Dahme kahrehda e sohte kapwuriamwei me Depit karasahiong Siohwa soun silepen sihpw men?

MA ARAMAS emen idek rehmw ken kawehwehda duwen Siohwa a kin ketin apwalih sapwellime aramas akan, dahme ke pahn nda? Soangen karasaras dah me ke pahn wia pwehn kasalehda duwen epwel keneinei me e kin ketin wiahiong sapwellime ladu lelepek kan? Pohnangin pahr 3,000 samwalahr oko, sounmelkahka soupeidi Depit ntingihdi kawehwe lingan ehu duwen Siohwa, ni ah wia karasaras me pid duwen pwukoah me e kin wia nan ah mour en mahs.

² Ni ahnsou me Depit wia mwahnakapw men, e kin wia silepen sihpw men, kahrehda e wehwehki duwen apwalih sihpw. E inenen ese me sihpw, ma aramas pahn mweidohng ren wiewia pein arail, re pahn kin mengei ong salongala oh kak lohdi pahn soun pirap akan de mahn lawalo kan. (1 Samuel 17:34-36) Ma sohte soun sileparail mwahu, irail pahn kakete sohte diar mohs mwahu oh kanarail mwenge. Ahnsou me Depit laudla, e kin katakataman kaperenpen awa tohto me e kin wie kahkahre, sinsilei oh kamwakamwenge sihpw akan.

³ E sohte kapwuriamwei me doadoahk en silepen sihpw me Depit medewehda ni ahnsou me e mih pahn manaman en ngehn sarawi pwe en kawehwehda duwen epwel mwahu me Siohwa kin ketin wia ong sapwellime aramas akan. Melkahka irelaud 23, me Depit ketin ntingihdi, tepikihda mahsen pwukat: “Siohwa iei Silepei. Solahr me I pahn anahne.” Kitail tehk mahs dahme kahrehda mahsen pwukat me konehng mehlel. Eri, sang ni sawaspen Melkahka 23, kitail pahn kilang ni soangen ahl dah kan me Siohwa kin apwalih sapwellime tohnkaudok kak nin duwen silepen sihpw mwahu men.—1 Piter 2:25.

Irair En Karasaras Konehng Ieu

4, 5. Iaduwen Paipel a kin kawehwehda wiewiahn sihpw akan?

⁴ Siohwa kin sapwellimaniki lengileng oh pwukoa tohto nan iren Pwuhk Sarawi kan, ahpw lengileng wet “Silepen Sihpw” iei ehu me keieu kasalehda sapwellime irair en epwel limpoak. (Melkahka 80:1) Pwe kitail en wehwehkihla mwahu dahme kahrehda e inenen konehng Siohwa en mwarenki Silepen Sihpw men, e pahn sawas laud ohng kitail en ese soahng riau: keieu, mwekid en sihpw kan, oh keriau, duwen pwukoa oh koahiek en silepen sihpw men.

⁵ Paipel kin kalap koasoia duwen wiewiahn sihpw akan, oh kin kawehwehda me re kin kalap peikiong mwekid limpoak en soun silepen sihpw men (2 Samuel 12:3), irail sohte kin men pei (Aiseia 53:7), oh irail sohte kin kak doare pein irail. (Maika 5:8) Aramas emen me kin apwalih sihpw erein sounpahr ngeder kin tehk me: “Sihpw akan ‘sohte kin apwalih pein irail’ nin duwen me ekei aramas kin lemeleme. Arail anahn akan kin laud sang soangen pelin mahn teikan, me pid tetehk kaukaule oh epwel pisetik keneinei kan.” Pwe irail en kak momour, mahn soakoahioak pwukat anahne soun silepe nsenoh men.—Esekiel 34:5.

6. Iaduwen dictionary en Paipel ah kin kawehwehda duwen doadoahk en rahn ehu ohng soun silepen sihpw emen kawao?

⁶ Ohng silepen sihpw akan en kawao, ia mwomwen doadoahk en rahn ehu ohng irail? Ehu dictionary en Paipel kawehwehda: “Ni mensehngie e kin kahrehda pelin sihpwo, oh kin tieng mwohrail kolahng wasa me re pahn mwengemwengeseli ie. Ih eri kin kilikilang irail rahno pwon, kanakanahieng pwe edepahno mie me salongala, ahpw ma mie me e sohte tehk oh eri kelehpwla sang meteikan, e pahn kin nsenohki raparapahki lao e diar oh kapwurehdo.  . . Ni soutik, e kin kapwurehdo pelin sihpwo, oh wadek irail ni emenemen ah pahn kin kot pahn tuhkehn wenihmwo pwe en kak kilang me sohte me salongala. . . . Pak tohto, e pahn kin perepere pelin sihpwo ni ahnsou me e rotorotalahr pwe mahn lawalo kan en dehr kang irailla, de soun pirap akan en dehr waido oh pirapa irail sang.”a

7. Dahme kahrehda soun silepen sihpw men, ekei pak, kin anahne kasalehda kanengamah oh kadek?

⁷ Mie pak kan me soun silepen sihpw akan kin anahne kasalehda kanengamah oh kadek ohng sihpw kan, ahpw mehlel sihpw lih liseian akan oh sihmpwul akan. (Senesis 33:13) Ehu pwuhken sawaspen iren Paipel koasoia: “Ipwidi en nahi kan nan pelin sihpw ieu kin kalap wiawi wasa doh nan nahna kan. Silepen sihpw men kin perepere kanahieng nohno nin doken ah sohte kak pein apwalih pein ih oh kin pwekada sihmpwulo oh pwuralahng rehn pelin sihpwo. E kin kak weuwahseli sihmpwulo ki erein rahn ekei nan peh de nan pehn ah likou puhp reireio, lao sihmpwulo pahn kak pein alialu.” (Aiseia 40:10, 11) E sansal mwahu me soun silepen sihpw men anahne pepehm kapatapat en lamalam kehlail oh kadek.

8. Ia kahrepe kan me Depit kasalehda me wia kahrepen ah kin likih Siohwa?

⁸ “Siohwa iei Silepei”—met soh kin kasalehda mwahu duwen Samatail me ketiket nanleng? Ni atail kin tehk kanahieng Melkahka 23, kitail pahn tehkpene duwen Koht ah kin ketin apwalih kitail ki kehl oh kadek en silepen sihpw men. Nan iretikitik 1, Depit kawehwehda ah ketin koapworopworki me Koht pahn ketikihda mehkoaros me anahn ohng sapwellime sihpw akan pwe en “sohte mehkot me sohte itar.” Nan iretikitik kan mwurin mwo, Depit kasalehda kahrepe siluh me kahrehda ah ahneki likilik wet: Siohwa kin ketin kahluwa, pere, oh kamwenge sapwellime sihpw akan. Kitail koasoiapene ehuehu ire pwukat.

“E Kin Ketin Kahluwa Ie”

9. Soangen wasa kansenamwahu dah me Depit kawehwehda, oh iaduwen sihpw akan ar kak lelahng nan soangen wasa duwehte met?

⁹ Keieu, Siohwa kin ketin kahluwa sapwellime aramas akan. Depit ntingihdi: “E ketin kommoaleiehdi nan mohs en dihpw kaselel kei, oh kin ketin kahluwaielahng ni pihl mwakelekel. E kin ketin kakehleiehda. E kin ketin kahluwa ie nan ahl me pwung, nin duwen eh ketin inoukihdahr.” (Melkahka 23:2, 3) Pelin sihpw ieu me komkommoal nsenamwahu nan wasa me diren mwenge—wasaht Depit kin kasalehda irair en me pid itarki, nsenamwahu oh saledek sang keper. Lepin lokaiahn Ipru me kin kawehwe “nan mohs” kak wehwehki “wasa kansenamwahu.” Ele pein sihpw akan sohte kak pein diarada wasakis me re pahn wendi oh komkommoal ni meleilei. Sileparailo me pahn kahre irail lahng soangen “wasa kansenamwahu” duwe met.

10. Iaduwen Koht ah kin ketin kasalehda me e ketin koapworopworkin kitail?

¹⁰ Iaduwen Siohwa ah kin ketin kahluwa kitail rahnwet? Ehu ahl me e kin ketin wia met iei sang ni sapwellime mehn kahlemeng. Sapwellime Mahseno kangoangehkin kitail en “song en kahlemengih ih.” (Episos 5:1) Mour en mahsen pwukat kasalehda kadek, mahk oh limpoak. (Episos 4:32; 5:2) Ni mehlel, Siohwa ketikihda mehn kahlemeng mwahu duwen kasalehda soangen irair kan me kansenamwahu. Iaduwen, e ketin sapwung ni ah ketin kaweidki me kitail en kahlemengih ih? Soh. Kaweid en ngehn sarawi wet ni mehlel wia kasalepe mwahu ieu ohng kitail me e ketin koapworopworkin kitail. Ni ahl dah? Kitail wiawihda ni mwomwen Koht, me wehwehki me kitail alehier irair akan me wia tiahk mwakelekel oh kak audehda irair en atail pali ngehn. (Senesis 1:26) Kahrehda, Siohwa mwahngih me edetehn kitail ahneki irair en soh unsek, mie nan loaletail kehl en kakairada irair akan me e ketin kasalehiong kitail. Nna medewehla—pein atail Koht ketin koapworopworki me kitail kak duwehte Ih. Ma kitail kin idawehn sapwellime mehn kahlemeng, e pahn duwehte ah ketin kahluwa kitail ohng ‘wasahn kommoal’ me kansenamwahu. Nan pwungen wasa keper kan nan sampah wet, kitail pahn “kousoan nan irair me sohte keper,” oh ahneki popohl me kin kohsang ni atail wehwehki me Koht kin ketin kupwurkin kitail.—Melkahka 4:8; 29:11.

11. Nin doken Siohwa ah kin ketin kahluwa sapwellime sihpw akan, dahme e kin ketin kupwukupwure, oh iaduwen met ah kin sansal sang ni dahme e kin kupwurki kitail en wia?

¹¹ Nin doken Siohwa ah kin ketin kahluwa kitail, e ketin kadek oh kanengamah. Soun silepen sihpw emen kin ese luwet en nah sihpw akan, ih eri kin kahluwa irail “en pahrekiong uwen mwadang me pwihn en sihpwo kak wia.” (Senesis 33:14) Pil ni mwohmwohte, Siohwa kin kahluwa sapwellime sihpw akan “nin duwen mwadang me re kakohng.” E kin ketin kupwukupwure uwen atail koahiek kan oh irair akan me kitail kin mihmi loale. Ni irair wet, e kin ketin koasoanehdi sapahl uwen mwadang en mwekid me konehng emenemen kitail, e sohte kin idingki kitail en wia mehkan daulih uwen dahme kitail kak wia. Dahme e kupwurki iei kitail en wia mehkan ni mour atail ngehn unsek. (Kolose 3:23) Ahpw, iaduwen ma ke mahlahr oh solahr kak wia dahme ke kin kak wia mahso? De iaduwen ma mie kohwa soumwahu laud ieu me kahrehiong ahmw solahr kak wia soahng kei? Iei soangen ahnsou wet me kitail kin diar kamwahupen koasoandi me kitail en wia mehkan ni ngehn unsek kin mie. Sohte mour riau kin uhdahn duwepenehte. Papah ki mour unsek kin wehwehki ken doadoahngki omw kehl koaros oh angin paliweremw koaros uwen me ke kak wia nan sapwellimen doadoahk. Sohte lipilipil soangen luwet dah kan me kak kataur kitaildi, Siohwa kin ketin kupwurki atail kin kaudok ohng ih ki mohngiong unsek.—Mark 12:29, 30.

12. Mehn karasepe dah sang nan Kosonned en Moses kin kasalehda me Siohwa kin ketin kahluwa sapwellime sihpw akan “nin duwen me re kak ohng”?

¹² Pwe en kasalehda me Siohwa kin ketin kahluwa “nin duwen dahme sapwellime sihpw akan kak wia,’ kitail tehkpene dahme pwarada nan Kosonned en Moses me koasoia duwen meirong en kapwungala. Siohwa kin kupwurki meirong kan me kin mwahu me kin kohsang nan mohngiong peren. Ni ahnsowohte, meirong kan kin sansal nin duwen uwen ahn emenemen soun meirong ah kak. Kosonnedo mahsanih: “Ma aramas emen sohte kak meirong ki sihpw de kuht, e pahn patohwandohng Kauno mwuroi riemen de pitsin riemen.” Oh iaduwen ma e pil sohte kak kihda mwuroi riemen? Eri e kak wahdo “wahdo paun riau en pilawa.” (Lipai 5:7, 11) Met kin kasalehda me Koht sohte kin idingki soun meirong men en kihda daulih dahme e kak ohng. Pwehki Koht sohte kin wekiwekidek, kitail kak ahneki nan kapehd saledek ni atail wehwehki me e sohte kin iding kitail en wia laudsang dahme kitail kak kihong ih, ahpw me e kin ketin wia, e kin kupwurperenki en limehda dahme kitail kakohng wia. (Malakai 3:6) E inenen kansenamwahu en mih pahn kahluwepen Soun silepe me wehwe duwe met.

“I Sohte Masak Mehkot Suwed, pwe Komwi Kin Ketiket Rehi”

13. Nan Melkahka 23:4, iaduwen Depit ah kin kasalehda me e inenen karanih Siohwa, oh dahme kahrehda met sohte kapwuriamwei?

¹³ Depit kin kasalehda kahrepe keriau ohng sapwellime irair en likilik: Siohwa kin ketin pere sapwellime sihpw akan. Kitail wadek: “Mehnda ma I weweidwei nan wahu en rotorot mosul, a I sohte pahn masak mehkot, pwe komw ketin ieiang ie. Sapwellimomwi irar oh sokon en sile sihpw iei me kin ketin kamweitiehla.” (Melkahka 23:4) Nan iretikitik 4, Depit kin wia koasoi me kasalehda me e inenen karanih Siohwa oh solahr kin koasoia “e” ahpw kin likwerihki ih “komwi.” Met sohte kin wia mehkot kapwuriamwei, pwehki Depit kin koasoakoasoia duwen Koht ah kin ketin sewese ih pwe en kak powehdi kasongosong kan. Depit kin keidwei nan wahu rotorot akan pak tohto—ahnsou kan me ah mour kin mih nan irair keper. Ahpw, e sohte kin mweidong masak en powehdi ih, pwe e kin ahneki pepehm me Koht—ki sapwellime “irar” oh “sokon en sile sihpw” me kin onopadahng sawas—Koht kin ieiang ih. Pwehki Depit ah kin wehwehki me Siohwa kin ketin pere ih, met kin kansenamwahu ong ah lamalam oh kin kakaranihala ih ohng Siohwa.b

14. Soangen mehn kamehlel dah me Paipel ketikihong kitail me kasalehda me Siohwa kin ketin pere kitail, oh dahme met sohte kin wehwehki?

¹⁴ Iaduwen Siohwa ah kin ketin pere sapwellime sihpw nan rahnwet? Paipel kamehlelehiong kitail me irail me kin uhwong kan—mehnda ma ngehn saut de aramas—sohte kak kamwomwala sapwellimen Siohwa sihpw kan koaros sang nin sampah. Siohwa sohte pahn ketin mweidohng met en wiawi. (Aiseia 54:17; 2 Piter 2:9) Ahpw, met sohte wehwehki me Silepetailo pahn pere kitail sang soangen kahpwal koaros en dehr lelohng kitail. Kitail kin iang pehm soangen mehn songosong kan me kin kalap wiawihiong tohnsampah kan, oh kitail kin iang lelohng uhwong me kin wiawihiong Kristian mehlel akan koaros. (2  Timoty 3:12; Seims 1:2) Mie ekei pak me kitail kak nda, ni karasaras, me kitail “kin keid nan wahu en rotorot mosul.” Karasepe, mwein ele kitail kak kereniong mehla pwehki kalokolok ieu me wiawi ong kitail, de pwehki soumwahu laud ehu. De mwein aramas men me kitail kin poakpoake laud kereniong mehla de pil mehla. Ni soangen irair akan me kin rasehng rotorot mosul, Silepatailo kin ketiket rehtail, oh e pahn kin ketin pere kitail. Iaduwen?

15, 16. (a) Ni soangen ahl dah kei me Siohwa kin ketin sewese kitail en powehdi kahpwal akan me kitail kak loiheng? (b) Kasalehda ekspiriens ehu pwehn kasalehda iaduwen Siohwa a kin ketin sewese kitail nan ahnsou en apwal akan.

¹⁵ Siohwa sohte ketin inoukihda me e pahn ketin wiahda manaman pwe en irehweisang kahpwal akan.c Ahpw, kitail kak kamehlele me Siohwa pahn ketin sewese kitail en pitsang soangen kahpwal sohte lipilipil kan me kitail kak lelohng oh e pahn kak ketikihong kitail erpit en kak powehdi “soangen apwal koaros.” (Seims 1:2-5) Silepen sihpw men kin doadoahngki nah irar de pil sokon en sile sihpw kaidehn en karawan kihsangte mahn lawalo kan, ahpw, ni kadek, e pil kin doadoahngki nah sokon en siken nah sihpw kan pwehn kainene irail. Siohwa kak ketin, “ni kadek, siken” kitail, ni e kin ketin doadoahngki iengetail tohnkaudok men, me kin kihda kaweid me poahsoankihda iren Paipel kan me kak wekidala laud atail irair me kitail mih loale. Patehng met, Siohwa kak ketikihong kitail kehl en kak dadaurete. (Pilipai 4:13) Sang ni sapwellime ngehn sarawi, e kak ketikihong kitail “kehl me laud sang dahme uhdahn kin mie.” (2 Korint 4:7) Sapwellimen Koht ngehn sarawi kak kakehle kitail en powehdi songosong sohte lipilipil me Sehdan pahn kasongekin kitail. (1 Korint 10:13) E sohte kin kansenamwahu en ese me Siohwa kin ketin kak ketin sewese kitail ahnsou koaros?

¹⁶ Ei, sohte lipilipil soangen irair dah me kitail mihla loale, kitail sohte anahne kekeidwei kelehpw loale. Silepatailo kin ieiang kitail, ketin sewese kitail nan ahl akan me nin tepio kitail kakete sohte uhdahn wehwehki. Kitail tehkpene ekspiriens en Kristian elder emen me imwen wini kasawih ong me e ahneki cancer en nan mwahliel me doar mehlel. E koasoia: “I pahn wehkada me nin tepio, I tepiada wahponkihda ma Siohwa soh ketin engieng pahi de ma mehlel e ketin poakohng ie. Ahpw, I koasoanehdi kehlail nan ei lamalam me I sohte pahn kesehla Siohwa. Ahpw me I wia, I kasalehiong ei katoutou kan ohng ih. Oh Siohwa ketin sewese ie, e kin kalap kamweit ie ki sister oh brother kan. Irail me tohto kin ehukihong ie kamarain kan sang ni pein arail ekspiriens me pid arail kin songosong en powehdi kahpwal en soumwahu laud akan. Arail iren kaweid toupahrek kan kin kataman kin ie me dahme I ahneki sohte weksang ahn aramas teikan. Sawas katapan sang brother oh sister kan, iangahki ekei sawas kan me kin kamwekid loalei: soangen sawas pwukat kin kamehlelehiong ie me Siohwa sohte engieng pahi. Ahpw ni mehlel, I anahne nannantihte pepeiong ei soumwahu wet, oh I sohte ese dahme pahn wiawi. Ahpw, I kamehlelehier me Siohwa kin ieiang ie oh e pahn ketin seweseweseiehte nan kahpwal wet.”

“Komw Ketin Kaunopadahng Ie Tehpel Ieu”

17. Iaduwen Depit ah kawehwehda duwen Siohwa nan Melkahka 23:5 oh dahme kahrehda met oh karasaras en silepen sihpw sohte wiahki koasoi liseliping kei?

¹⁷ Met Depit pil kasalehda kesiluh en kahrepen ah koapworopwor ki ah Soun Silepe: Siohwa kin ketin kamwenge sapwellime sihpw akan oh e sohte kin ketin keseirailla. Depit ntingihdi: “Komw ketin kaunopadahng ie kamadipw ehu, wasa me ei imwintihti kan koaros kak kilang ie; komw ketin kasamwo ie oh kielediong leh pohn moangei oh kadikadirehdohte ei tungoal kep.” (Melkahka 23:5) Nan iretikitik wet, Depit kawehwe me Soun Silepe kin wia soun luhk mwahu men me kin kitkihda mwenge oh mehn nim tohto. Karasaras rioapwoat pwukat—soun silepe epwel mwahu oh soun luhk kadek—sohte kin wia koasoi liseliping kei. Ni mehlel, soun silepen sihpw mwahu men pahn uhdahn ese iawasa e pahn kin diar mohs kaselel akan me diren dihpw oh itar pilen nim pil pwe sihpw akan en dehr “apwaliki mehkot.”—Melkahka 23:1, 2.

18. Dahme kasalehda me Siohwa iei soun luhk kadek emen?

¹⁸ Iaduwen atail Soun Silepe pil kin wia soun luhk kadek emen? Met me inenen dehde mwahu! Nna medewehla mwengehn ngehn kan me kitail kin paiekihda nan ahnsou wet duwen mwahu, laud, oh soangsoangen. Ni ah kin ketin doadoahngki irail pwihn en “ladu lelepek oh loalokong,” Siohwa kin ketikihda ong kitail pwuhk katapan akan oh prokram audapan akan nan mihding kan, nan kapokon akan, oh kapokon laud akan—oh mepwukat koaros kin audehda atail anahn akan en pali ngehn. (Madiu 24:45-47) Ni mehlel, sohte duhpek en pali ngehn me mie. “Ladu lelepek oh loalokong” wiadahr Paipel rar kei oh mehn sawaspen onop Paipel kan, oh soangen pwuhk pwukat ni ahnsou wet mihier ni soangen lokaia 413. Siohwa kin ketikihdahr mwengehn ngehn pwukat ni soangsoangen mwohmw—sang “milik,” padahk en Paipel mengei kan, lel “mwenge kekeluwak,” padahk en ngehn loal akan. (Ipru 5:11-14) Kahrehda, ni atail pahn lelohng kahpwal akan de pahn wia pilipil kan, kitail pahn kin kalap mengei en diar dahme kitail anahne. Dahme kitail pahn wia ma sohte soangen mwengehn ngehn pwukat? Atail Soun Silepen Sihpwo ni mehlel wia soun ketikihda kisakis me keieu sapan!—Aiseia 25:6; 65:13.

“I Pahn Kousoan nan Tehnpas en Siohwa”

19, 20. (a) Nan Melkahka 23:6, soangen mahsen en likilik dah me Depit kin kasalehda, oh iaduwen atail pahn kak iang ahneki soangen koapworopwor wet? (b) Dahme kitail pahn koasoia nan artikel me pahn kohdo mwurin met?

¹⁹ Mwurin Depit ah medemedewehier duwen ahl akan en Soun Silepe oh Soun Ketikihda Kisakiso, e mahsanih:“I ese me sapwellimomwi kalahngan oh limpoak pahn ieiang iehte erein ei mour; oh I pahn patopatohte nan tehnpasomwi kohkohlahte.” (Melkahka 23:6) Depit kin koasoakoasoi sang nan mohngiong me diren kalahngan oh pwoson—kalahngan ni ah kin tamanda duwen mehkan en mahs oh pwoson dahme pahn leledo ni ahnsou kohkohdo. Soun silepen sihpw en kawa menet kin sohte masepwehk, pwe e ese me erein ah pahn kin karakaranih Soun Silepe me ketiket nanleng, me likamwete e kin koukousoan nan Sapwellime Tehnpas, e pahn kin ale sapwellimen Siohwa epwel limpoak.

²⁰ Ia uwen atail kin kapingki duwen mahsen lingan pwukat me ntingdi nan Melkahka 23! Depit sohte kak diarada ehu ahl tohrohr me kak kawehwehda duwen Siohwa ah kin ketin kahluwa, pere, oh kamwenge sapwellime sihpw akan. Mahsen kaselel en Depit pwukat kin wie nekinek pwehn ketikihong kitail koapworopwor me pil kitail kak likih Siohwa en wia atail Soun Silepe. Ei, erein atail pahn karakaranih Siohwa, e pahn ketin apwalih kitail nin duwen Soun Silepe limpoak emen “kohkohlahte,” oh pil ahnsou soutuk. Ahpw, nin duwen atail wia sapwellime sihpw akan, kitail ahneki pwukoa en iang Soun Silepatail lapalapo, Siohwa, kekeidwei. Dahme met kin pidada iei me koasoiepe pahn pwarada nan artikel en mwurin met.

[Nting tikitik me mi pahs]

Ke Kak Pwurehng Katamanda?

• Dahme kahrehda e konehng ahn Depit karasahiong Siohwa duwehte silepen sihpw emen?

• Iaduwen Siohwa ah kin ketin kahluwa kitail ni wehwe?

• Ni ahl dah kan me Siohwa ki ketin sewese kitail en powehdi kasongosong kan?

• Dahme kasalehda me Siohwa iei soun luhk kadek emen?