Ia Wasa Ke Kak Diar Nsenamwahu?

MIE pak me ke kin nsensuwed de pil loaleid?— Ke kin medemedewe ma mie me poakepoake iuk?— Ekei seri kin wia met. Ahpw Koht ketin inoukihdi: “I sohte kak manokeiukala.” (Aiseia 49:15) Met sou wia mehkot kansenamwahu?— Ei, Siohwa Koht uhdahn poakohng kitail!

Emen sounnting en Paipel koasoia: ‘Semei oh inei pil kak keseiehla, ahpw Siohwa pahn ketin apwahpwalih ie.’ (Melkahka 27:10) Met sou kin kansenamwahwih kitail?— Ei, Siohwa mahsanihong kitail: “Kumwail dehr masak, pwe I kin ieiang kumwail.— I pahn kin kakehlakei kumwail oh sewesei kumwail.”​—Aiseia 41:10.

Ahpw ekei pak, Siohwa kin ketin mweidala Sehdan en kin kihong kitail nan kahpwal. Siohwa pil kin ketin mweidohng Sehdan en kasonge sapwellime ladu kan. Ehu ahnsowo, Tepil kahrehiong Sises en lokolok laud me kahrehda Sises patohwanohng Siohwa: “Ei Koht, Ei Koht, dahme komw likidmeliekiniehla?” (Madiu 27:46) Mendahki Sises eh ketin lokolok, ahpw e mwahngih me Siohwa ketin poakohng ih. (Sohn 10:17) Sises pil ketin mwahngih me Koht kin ketin mweidohng Sehdan en kasonge sapwellime ladu kan oh mweidohng Sehdan en pil kahrehiong irail en lokolok. Ehu irelaud pahn kawehwe ia kahrepen Koht eh ketin mweidohng Sehdan en wia met.

Seri kin kalapw masepwehkada. Karasepe, mie pak me ke salongala?— Ke kin masepwehkada?— Seri tohto kin wia met. Ehu ahnsowo Sounpadahk Lapalapo ketin kasalehda karasaras ehu me pid emen me salongala. Kaidehn seri men me salongala ahpw sihpw men.

Ke duwehte sihpwo. Dahme kahrehda? Pwehki sihpw kan kaidehn mahn kehlail kei. Re kin anahne emen en apwalih oh sile irail. Aramas me kin apwalih sihpw kan kin adaneki silepen sihpw.

Nan sapwellime karasaraso, e mahsanih me silepen sihpwo naineki sihpw epwiki. Ahpw emen irail salongala. Mwein sihpwo men kilang dahme mi apali dohlo. Eri mwurin ahnsoukis, sihpwo uhdahn dohlahsang meteiko. Ke kak medewehla pepehm en sihpwo ni eh diarada me e kelekelehpw?—

Dahme silepen sihpwo pahn wia ni eh diarada me emen irail sohte mie? E pahn nda me e itar oh e sohte pahn pwunodki pwe ahn sihpwo sapwung? De e pahn pwilikihdi me duwehk duwemeno ehu wasa me mwahu oh rapahki mehmeno? Ia duwe, mie katepen eh pahn wia met pwehki sihpw tehmeno?—

Silepen sihpwo kin poakohng nah sihpw ko koaros iangahki mehmeno me salongala. Kahrehda e rapahki mehmeno. Medewehla ia uwen sihpw me salongalao eh perenda ni eh kilangada silepen sihpwo eh kohkohdo! Sises mahsanih me silepen sihpwo perenkihda eh diarada nah sihpwo. E perenkihda mehmeno laudsang meh 99 me sohte salongala. Eri, ihs me rasehng silepen sihpwo nan sapwellimen Sises karasaraso? Ihs me kin nsenohkin kitail duwehte silepen sihpwo?— Sises mahsanih me Semeo nanleng. Semeo iei Siohwa.

Siohwa Koht iei Silepen Sihpw Lapalapo ong sapwellime aramas akan. E ketin poakohng irail koaros me kin papah ih iangahki me pwulopwul kan me duwehte kowe. E sohte kupwurki emen kitail en medekla de kasohrala. E uhdahn kaperen en ese me iei duwen Koht eh ketin nsenohkin kitail!​—Madiu 18:12-14.

Ke kamehlele me Siohwa Koht ketin mie?— Ke kin wiahki ih duwehte ahmw pahpa de emen me kin nsenohkin uhk?— Mehlel me kitail sohte kak kilang Siohwa pwehki ih ngehn ehu. E sapwellimanki paliwar ehu me sohte sansal. Ahpw e uhdahn ketin mie oh e kak ketin kilang kitail. E mwahngih ahnsou me kitail kin anahne sawas. Oh kitail kak koasoiong ih ni kapakap duwehte atail kin koasoiong aramas emen. Siohwa kupwurki kitail en wia met.

Eri ma ke nsensuwed de loaleid, dahme ke pahn wia?— Koasoiong Siohwa. Nantihong karanihala ih oh e pahn ketin sewese iuk oh kansenamwahwihiuk. Tamataman me Siohwa kin ketin poakohng uhk mendahte ma ke kin pehm me ke kin kelehpw. Kita kak ale neita Paipel oh wadek Melkahka 23. Tepin iretikitik 1 mahsanih: “KAUN-O [“Siohwa,” NW], iei silepei; solahr me I pahn anahne. E ketin kommoaleiehdi nan mohsen dihpw kaselel kei, oh kin ketin kahluwaielahng ni pihl mwakelekel.”

Tehk dahme sounntingo pil mahsanih nan iretikitik 4: “Mehnda ma I weweidwei nan rotorot mosul, a I sohte pahn masak mehkot, pwe komw ketin ieiang ie! Sapwellimomwi irar oh lepin seipali pahn kin sinsile ie.” Ih pahn pepehm en aramas met ma arail Koht Siohwa. Re kin diar nsenamwahu ahnsou me irail kin lelohng apwal. Ia duwe, ih ahmw pepehm en met?—

Duwehte silepe limpoak men eh kin apwalih nah sihpw kan, Siohwa pil kin ketin apwalih mwahu sapwellime aramas akan. E kin ketin kasalehiong irail ahl me pwung oh irail kin perenki idawehn ih. Mehnda ma irail kin mihla nan kahpwal kan, irail sohte kin masak. Silepen sihpw men kin doadoahngki nah seipali de sokon pwehn pere nah sihpw kan sang mahn lawalo kan. Paipel padahkihong kitail ia duwen silepen sihpw pwulopwul Depit eh kin pere nah sihpw kan sang laion oh pehr. (1 Samuel 17:34-36) Oh sapwellimen Koht aramas akan kin ese me Siohwa pahn pil ketin pere irail. Irail kin nsenamwahu pwehki Siohwa kin ketin ieiang irail.

Siohwa ketin poakohng sapwellime sihpw kan oh e kin ketin kanai irail. Paipel mahsanih: “Duwehte silepen sihpw men; e pahn ketikipene sihmpwul kan, e pahn ketin apwalihekin irail nin lime.”​—Aiseia 40:11.

Ke sou kin nsenamwahu ni ahmw kin ese me ih pil duwen Siohwa? Ke men wia sapwellime sihpw?— Sihpw kan kin rong ngilen sileparailo oh kin mihmi reh. Ke kin rong Siohwa?— Ke kin karanih ih? . . . Eri, ke sohte anahne masak. Siohwa pahn ketin ieiang uhk.