PALI EHU
“I Pahn Kin Rapahki me Salongalahr”
Sihpwo mwengemwengeseli nan mohso ahpw saliohkihda e salongasangehr sihpw teikan. Eri, met e solahr kak kilang pelin sihpw teiko oh silepeo. Wasa tepida rotorotpene. E salongalahr nan wahu ehu me mahn lawalo kakete kemehla ih oh solahr sawasepe. Mwuhr e rongada ngihl ehu me e ahn rong, me iei ngilen silepeo me tangatang kohdohng ih, pwekada ih oh pwoalehkipene eh likowo oh wahla ih ni imweo.
SIOHWA kin ketin kapwukapwurehiong me e ketin duwehte soangen silepen sihpwo. Nan sapwellime Mahsen, e ketin kamehlelehiong kitail: “Pein ngehi pahn rapahki nei sihpw kan oh apwalih irail.”—Esekiel 34:11, 12.
“Pelin Sihpw me I Kin Kamwenge”
Ihs irail sapwellimen Siohwa pelin sihpw? Ni kawehwe mengei, sapwellimen Siohwa pelin sihpw iei aramas akan me kin poakohng oh kaudokiong ih. Paipel mahsanih: “Kitail kelehpwikihdi mwohn KAUN-O, me ketin wieikitailda! Pwe ih me atail Koht; kitail sapwellime aramas me e kin ketin apwahpwalih, sapwellime pelin sihpw me e kin ketin katungoale.” (Melkahka 95:6, 7) Duwehte sihpw kan ar kin ideidawehn silepen sihpw men, sapwellimen Siohwa tohnkaudok kan kin ngoangki idawehn Sileparail. Re kin mwahu ahnsou koaros? Soh. Sapwellimen Koht ladu kan kin ekei pak, ‘salongpeseng’ ‘salongala,’oh “rasehng sihpw me salongalahr.” (Esekiel 34:12; Madiu 15:24; 1 Piter 2:25) Mehnda ma met wiawi, ni ahnsou me aramas emen salongala, Siohwa sohte kin ketin likidmeliehla ahpw e ketin koapworopworki me e pahn pwurodohng ih.
Ke kin pehm me Siohwa kin ketin wiewiahte Silepomw? Ia duwen Siohwa eh kin ketin kasalehda me e ketin wia Sounsilepe men rahnwet? Tehk ahl siluh pwukat:
E kin ketin ketihnainihkin kitail padahk mehlel. Siohwa mahsanih: “I pahn kin mweidohng pwe re en kin mwengemwengeseli nan mohsen nahna kan oh nan wahu kan, oh pil nan dihpw kapw.” (Esekiel 34:14) Siohwa kin ketin ahnsou koaros ketikihong kitail soangsoangen padahk kan me rasehng mehn ketihnain me kin kakehlailih kitail ni ahnsou me konehng. Ke kak medewehda iren onop ehu, padahk ehu, de kasdo ieu me sapengala omw peki sawas ni kapakap? Mepwukat sou kamehlelehiong uhk me Siohwa kin ketin nsenohkin uhk ni mehlel?
E kin ketin pere oh sewese kitail. Siohwa ketin inoukihda: “I pahn kin rapahki me salongalahr akan, kapwurehdo me kin kohkohseli mwahl akan, kidimpene ohlahn me lipwalipwada kan, kamwahwihala me soumwahu kan.” (Esekiel 34:16) Siohwa kin ketin kakehlaka me toutoukihla de luwetkihla ar pwunod kan. E kin ketin kidimpene ar ohla kan, sewese irail en mwahula ma re medekla, ele ar medek kohsang rehn iengerail me pwoson kan. Oh e kin ketin kapwurehdo irail akan me salongala oh ele me kin pepeiongete ar pepehm sapwung kan.
E kin ketin kupwurki sewese kitail. Siohwa mahsanih: “I pahn pwurehng kasapahliraildo sang wasa koaros me re mwarahkpeseng. . . . I pahn kin rapahki me salongalahr.” (Esekiel 34:12, 16) Ong Siohwa, miehte koapworopwor ong sihpw men me salongala. E ketin mwahngih me sihpw men salongala oh kin ketin raparapahki sihpwo oh e kin ketin perenkihda ni eh ketin diarada sihpwo. (Madiu 18:12-14) Ni mehlel, e kin ketin kahdaneki sapwellime tohnkaudok mehlel kan “nei pelin sihpw me I kin kamwenge.” (Esekiel 34:31) Iei komwi emen sihpw ko.
Ong Siohwa, miehte koapworopwor ong sihpw men me salongala. E kin ketin perenkihda ni eh diarada sihpwo
“Kasapahldohng Kiht At Lingan en Mahs”
Dahme kahrehda Siohwa kin ketin raparapahkin uhk oh lukluke iuk en pwurodo reh? Pwehki e ketin kupwurki ken nsenamwahu. E ketin inoukihda me e ‘pahn kamwerehdiong kapai pohn’ sapwellime sihpw kan. (Aiseia 44:3) Kaidehn inou mwahl ehu met, pwe ke pein kilangehr mehn kadehde wet.
Tamanda soahng mwahu kan ni ahnsou me ke tepin esehla Siohwa. Karasepe, ia omw pepehm ni ahnsou me ke tepin esehla padahk mehlel kaselel me pid mwaren Koht oh sapwellime koasoandi ong aramas akan? Ke tamanda uwen kaperen en kin ehuiong riomw Kristian kan nan mihting tohrohr kan? Mwurin omw kin ehukihong emen me kasalehda eh perenki rong rongamwahwo, ke sou kin pwurala ni imwomwo peren oh nsenamwahu?
Ke kak pwurehng alehdi soangen perenohte. Sapwellimen Koht ladu kan mahso kin kapakapki, “Maing KAUN, komwi kasapahlkitewei pahn kupwuromwi! Komwi kasapahlkitewei! Komwi kasapahldohng kiht at lingan en mahs.” (Koulen Kedepwidepw kan 5:21) Siohwa ketin sapengala kapakap wet, oh sapwellime ladu kan pwurala reh oh kalaudehla ar perenki papah ih. (Nehmaia 8:17) Siohwa pahn ketin kapwaiada soahngohte rehmw.
Ahpw, e mengei emen en ndahte en pwurodo rehn Siohwa sang eh pahn kapwaiada met. Tehk ekei kahpwal kan en pwurehng pwurodo oh ia duwen omw kak powehdi mepwukat.