Siohwa Kin Ketin Kasukuhlihada Silepen Sapwellime Sihpw Akan
“Pwe Kauno iei ih me ketikihdo kupwurokong; iei ih me kin ketikihdo loalokong oh dehdehki.”—LEPIN PADAHK 2:6.
1, 2. Dahme kahrehda ohl papidaislahr akan kin nantihong kalaudehla arail pwukoah nan mwomwohdiso?
NICK me wiahkier sounapwalih en mwomwohdiso erein sounpahr isuh oh e koasoia: “I inenen peren ni ahnsou me I idihdda en wiahla emen elder. I kilangwohng kapai tohrohr wet oh wiahki ahnsou mwahu en katehlapahla ahi papah Siohwa. I pehm me I pweipwandkihong ih sapan ohng duwen mehkan koaros me e ketin wiahiong ie. I pil men sewese tohnmwomwohdiso kan uwen ahi kak koaros, pwehn sewese irail nin soangen ahlohte me elder teikan kin wiaiong ie.” Ahpw, mendahki e kin ahneki peren, ahpw pil kin miehte ekei mehn kapwunod kan. E doula oh koasoia: “Pwehki ahnsou me I idihdahng pwukoah wet, I mahki sounpahr rieisek samwa, eri I perki me sohte ahi koahiek me itar ohng pwukoah wet—soangen koahiek me duwehte dehdehki oh erpit—pwe ien kak apwalih mwomwohdiso ni idipek.”
2 Mie kahrepe tohto me kahrehda irail akan me Siohwa kin ketin idihdda ren ahneki peren. Wahnpoaron Pohl kin katamanki elder kan sang Episos ehu kahrepen ren peren ni ah katamankin irail mahsen en Sises, oh mahsanih: “Kihwei kaperen sang ale.” (Wiewia 20:35) Wia ministerial servant de elder kin kihong irail ohl papidaislahr akan ahl tohrohr akan en toukihda pein irail ohng Siohwa oh ong mwomwohdiso. Karasepe, ministerial servant kan kin wia sawasepen elder kan. Irail ladu pwukat kin pil apwahpwalih pwukoah tohrohr kan me wia pwukoah kesempwal ekei ahpw anahne kihong ahnsou laud ong koadoahkepen pwukoah pwukat. Brother pwukat kin mwekidki limpoak ohng Koht oh mehn mparail pwe ren kak wia pwukoah kesempwal wet.—Mark 12:30, 31.
3. Dahme kahrehda ekei kin perki alehda pwukoah tohrohr kan nan mwomwohdiso?
3 Ahpw, iaduwen ohl Kristian emen me perki alehda kapai tohrohr en wiahla ministerial servant oh mwuhr wiahla elder, pwehki e ahneki pepehm me e sohte itarohng? Duwehte Nick, mwein e perki me sohte itar ah koahiek en wia sounapwalih koahiek men. Nin duwen brother papidaislahr men, ke pil iang kisehn irail ko me ahneki pepehm wet? Soangen kapwunod pwukat kin mie poasoanpe. Siohwa kin kapwukoahki sounapwalih idihdda kan duwen arail kin apwalih sihpw akan. Sises mahsanih: “Pwe aramas me alehier uwe ehu me inenen laud, uhdahn pahn kihda uwe ehu me laud; a me kohwahkier uwe ehu me inenen laud mehlel, uhdahn pahn kapwurehdo uwe ehu me pil inenen laud mehlel.”—Luk 12:48.
4. Iaduwen Siohwa ah kin ketin sewese irail ako me e ketin idihada pwehn apwalih sapwellime sihpw akan?
4 Iaduwen, Siohwa kin kasik me irail oko me e ketin idihada pwehn wia elder kan oh ministerial servant kan en pein wia pwukoah pwukat? Weksang met, Siohwa kin ketikihda sawas konehng me kin kahrehiong irail en dehr tihwo ahpw irail en kak kekeirada. Duwen me kitail tehkpenehr nan artikel en mwoweo, Siohwa kin ketikihong irail sapwellime ngehn sarawi, oh wahn ngehn sarawi kin sewese irail en apwalih mwahu sihpw akan. (Wiewia 20:28; Kalesia 5:22, 23) Patehng met, Siohwa kin ketikihong irail erpit, loalokong, oh dehdehki. (Lepin Padahk 2:6) Iaduwen ah kin ketin wia met? Kitail en koasoiapene ahl siluh me Siohwa kin ketikihda pwehn sukuhlih emen emen aramas akan me e ketin idihada pwehn apwalih sapwellime sihpw akan.
Ale Kasukuhl Sang Rehn Sounapwalih Koahieklahr akan
5. Dahme kahrehda Piter oh Sohn wiahki sounsilepe koahiek kei?
5 Ni ahnsou me wahnpoaron Piter oh Sohn uh mwohn Tohn Mwoalen Kopwung Lapalap, irail sounkopwung kan me loalokongki mehkan en sampah me iang uh nan mwoalen kopwungo kin wiahki ohl riemen pwukat aramas “sohte wad oh pil sohte sukuhl kei.” Ira kak wadawad oh nting, ahpw ira sohte iang sukuhliki Pwuhk Sarawi nan wasahn sukuhl en sounpadahk en sarawi ko. Mendahki met, Piter oh Sohn oh pil iangara teikan inenen sansal me irail wia tohn padahk kaselel kei oh kin kamwekid kapehden aramas tohto me kin rong arail padahk kan en pwosonla. Iaduwen aramas sohte wad pwukat arail wiahla sounpadahk tohrohr ekei? Mwurin mwoalen kopwung wet arail rongorong Piter oh Sohn, “irail eri esehda me ira kin ieiang Sises mahso.” (Wiewia 4:1-4, 13) Ehi, irail alehier ngehn sarawi. (Wiewia 1:8) Ahpw, e sansal—pil ohng irail sounkopwung maskun ni pali ngehn ako—me Sises kasukuhlihada ohl oko. Nin duwen ah kin ieiang irail nin sampah, Sises padahkihong wahnpoaron ako kaidehn ihte duwen kihpene aramas akan me rasehng sihpw akan, ahpw en pil iaduwen arail pahn apwalih sihpw akan ni ahnsou me irail iangalahr sapwellime pelin sihpwo.—Madiu 11:29; 20:24-28; 1 Piter 5:4.
6. Mehn kahlemeng dah me Sises oh Pohl kihdi ong meteikan en sukuhliki?
6 Pil mwurin Sises ah ketin iasadahro, e pil wiewiahte sapwellime kasukuhl ohng irail ako me wia sounapwalih kan. (Kaudiahl 1:1; 2:1–3:22) Karasepe, Sises pein pilada Pohl oh kasukuhlihada ih. (Wiewia 22:6-10) Pohl kalahnganki kasukuhl me e alehdier oh pil kin ehukihong elder teikan dahme e sukuhlikihier. (Wiewia 20:17-35) Karasepe, e kihong ahnsou laud oh ah kehl laud ohng kaiahne Timoty en wia “tohndoadoahk men” nan doadoahk en Koht, “me sohte kin namenengki eh doadoahk.” (2 Timoty 2:15) Ahn ohl pwukat ara madamadau kin kerenpene. Mwohn met, Pohl ntingihdi duwen Timoty: “Pwe se kin doadoahkpene pwehki rongamwahu, rasehng pahpa men oh nah pwutak.” (Pilipai 2:22) Pohl sohte nantihong wiakihla Timoty de pil aramas teikan en wiahla pein sapwellime tohnpadahk. Weksang met, e kin kangoangehki ienge me pwoson akan ‘en kahlemengih ih, duwehte ah kin kahlemengih Krais.’—1 Korint 11:1.
7, 8. (a) Mehnia ekspiriens me kasalehda kamwahu me kohsang ahn elder kan kahlemengih Sises oh Pohl? (b) Iahd me elder kan en tepida kaiahnehda irail akan me pahn kakete wiahla ministerial servant oh elder kan?
7 Sounsilepe kan kin kahlemengih Sises oh Pohl oh pein kaiahnehda brother papidaislahr akan oh met kin imwila mwahu. Kitail kilang ahn Chad ah ekspiriens. E keirda nan peneinei me towe kan sohte kin ehukihpene arail sarawi, ahpw ahnsou keren wiahla elder men. E koasoia: “Nan erein pahr akan, elder koahiek tohto sewese ie en kekeirada ni pali ngehn. Pwehki ahi pahpa sohte iang padahk mehlel, elder ko kin inenen tehk ie oh irail kin wia pahpa ni pali ngehn kei ohng ie. Irail kin kihong ie arail ahnsou en kaiahneiehda nan doadoahk en kalohk, oh mwuri, emen elder kin kalap padahkihong ie iaduwen ahi pahn apwahpwalih pwukoahn mwomwohdiso kan me I alehier.”
8 Nin duwen ahn Chad ekspiriens, sounapwalih kan kin tapihada kihda kaiahnepen irail akan me kak wiahla elder kan oh ministerial servant kan mwohn ahnsou me re ahneki koahiek me itar en alehdi pwukoah tohrohr kan. Pwekida? Pwehki Paipel mahsanih me ministerial servant kan oh elder kan en lel irair ileile mahs ni palien tiahk mwakelekel oh ong pali ngehn mwohn arail pahn idihdda en wia pwukoah pwukat. Irail pahn “ale keseu mahs; ma re pweida, eri, mweidohng re en papah.”—1 Timoty 3:1-10.
9. Soangen pwukoah dah me sounapwalih koahiek kin ahneki, oh pwekida?
9 Ma keseupen koahiek pahn wiawihong brother papidaislahr akan, e pahn mwahu irail en kasukuhl mahs. Karasepe: Ma tohnsukuhl emen pahn ale test laud ehu me sounpadahk kan sohte kihong kasukuhlpe, tohnsukuhlo pahn pweida nan test wet? Pali laud en ahnsou, ele e pahn sohte pweida. Kahrehda, kasukuhl inenen anahn. Ahpw, sounpadahk nsenoh kan kin kasukuhlih seri kan kaidehn ihte en wiahda mwahu nan test ahpw en pil kak doadoahngki loalokong me e alehiero. Ni ahlohte, elder kautih kan kin sewese brother papidaislahr akan en kekeirada sang ni arail kin kihong irail mehn kasukuhl mengihtik kan me irail ohl idihdda kan kin anahne. Irail sohte kin kaiahne irailte pwe irail pwukat en alehdi pwukoah, ahpw re pil kin sewesehiong irail en kak apwalih mwahu pwihn en sihpw akan. (2 Timoty 2:2) Ahpw mehlel, brother papidaislahr akan anahne wia arail pwukoah oh doadoahk kehlail pwe ren kak alehdi koahiek kan me anahn pwe ren kak wiahla ministerial servant oh elder kei. (Taitus 1:5-9) Kahrehda sang ni elder koahiek kan ahr kin sapankihda kasukuhl ohng irail akan me kin nannantihong en alehdi pwukoah nan mwomwohdiso, met pahn kin kamwadangihala arail kekeirada.
10, 11. Iaduwen sounapwalih kan kin kaiahnehda meteikan ohng pwukoah tohrohr kan?
10 Iaduwen sounapwalih koahiek kan arail kak kaiahnehda meteikan en kak apwahpwalih pwukoah en mwomwohdiso kan? Keieu, irail en nsenohki brother oh sister kan nan mwomwohdiso—kaukaule iang irail kalohk oh sewese irail en kakairada arail koahiek en doadoahngki “mahsen en Koht ni ahl pwung.” (2 Timoty 2:15) Sounapwalih mah kan en kin koasoiaiong brother pwukat duwen kaperen me kin kohsang arail sewese meteikan oh pil peren me irail pil kin alehsang arail kin koasoanehdi oh pil pweida nan arail mehn akadei kan. Ni kadek irail en pil kihda mehn kaweid akan ni mengihtik ohng iaduwen brother men ah pahn kak kekeirada oh ‘wia mehn kahlemeng mwahu ong pwihn sihpw.’—1 Piter 5:3, 5.
11 Ni ahnsou me brother men wiahlahr emen ministerial servant, sounapwalih erpit akan kin doudoulahte mwowe ohng kasukuhlih ih. Bruce, me wia elder men erein sounpar tohto, koasoia: “I kin men mwohd mpen me ahpwtehn kohwong ah pwukoah oh kousapahlih reh kaweid akan me ladu lelepek oh loalokong kin ntingihda kan. Se pil kin wadekpene kaweid sohte lipilipil kan me pid oaritikpen ah pwukoah, oh eri mwuri I kin men iang ih doadoahk lao e esehla ah pwais akan.” Ni brother men ah koahiekla, e kak uhd kaiahnehng doadoahk en mwemweitla rehn tohnmwomwohdiso kan pwehn kangoange irail. Bruce, pil nda, me: “Ni ahi kin kahre ministerial servant men nan ahi mwemweitla rehn tohnmwomwohdiso kan, I kin sewese ih en kin pilada ekei iren Pwuhk Sarawi kan me pahn wia kangoang oh kamwekid madamadau en emenemen de peneineio pwon wasa me se kin pwarek ie. Ni ah kin sukuhliki doadoahngki iren Pwuhk Sarawi ni ahl ehu me pahn sair mohngiong, met mehkot kesempwal ma brothero pahn wiahla sounapwalih idipek emen.”—Ipru 4:12; 5:14.
12. Iaduwen sounapwalih koahiek kan ahr pahn kasukuhlih elder kan me idihdda kapw?
12 Sounapwalih me ahpwtehn idihdda kan pil kin ale kapai laud sang kalaudepen kaiahn akan. Nick, me koasoiepe wiawiher mwowe, koasoia: “Kaiahn me I alehdi sang elder mah riemen sewese ie laud. Ira kin ahnsou koaros kanengamah rongorong ie oh kin tehk kanahieng dahme I kin nda—mehnda ma re sohte pwungki ahi madamadau. I sukuhliki soahng tohto sang ni ahi kin kilang duwen elen karakarahk oh wahu me ira kin kasalehong brother oh sister kan nan mwomwohdiso. Elder pwukat kin kasalehiong ie kesempwal en doadoahngki Paipel ni koahiek ni ahnsou en kapwungala kahpwal akan de ahnsou en kihda mehn kangoang.”
Kasukuhl Sang ni Mahsen en Koht
13. (a) Dahme brother men anahne pwe en kak wia sounapwalih koahiek men? (b) Dahme kahrehda Sises mahsanih: “Dahme I padahki kaidehn pein ahi?”
13 Ni mehlel, Mahsen en Koht me iei Paipel, kin audaudki kosonned akan, kaweid kan oh mehn kahlemeng mwahu kan me sounsilepe men kin anahne pwe en “koahiekla ni soangen wiewia mwahu koaros.” (2 Timoty 3:16, 17) Brother men mwein ahneki loalokong pwehki eh iang sukuhl laud, ahpw ah loalokongki iren Pwuhk Sarawi kan oh iaduwen ah pahn doadoahngki ire ko me pahn sewese ih en wia sounsilepe koahiek men. Tehk mehn kahlemeng mwahu en Sises. Ih me wia sounsilepen sihpw en pali ngehn me ketiket sampah me keieu sapwellimaniki kupwurokong, keieu sapwellimanki irair en dehdehki mehkan, oh keieu erpit nanpwungen sounsilepen sihpw akan me kin mihmi nan sampah, ahpw pil pein ih sohte kin kehliki pein ah erpit ni ah kin padahki sapwellimen Siohwa sihpw akan. E mahsanih: “Aramas emen me koasoakoasoia duwen pein ih kin songosong en ale wauwi.”—Sohn 7:16, 18.
14. Iaduwen sounsilepe kan kin kaleke pwe re dehpa kihong lingan ohng pein irail?
14 Sounsilepe lelepek kan sohte kin raparapahki pein arail lingan. Irail kin poahsoanehda arail kaweid oh mehn kangoang, kaidehn pohn pein arail erpit, ahpw pohn sapwellimen Koht Mahsen. Irail kin wehwehki me ahn sounsilepe men ah pwukoah iei en sewese sihpw akan en alehdi “kupwuren Krais,” a kaidehn madamadau en elder kan. (1 Korint 2:14-16) Karasepe, iaduwen ma elder men me wie sewesewese pwopwoud ieu pwehki ara kahpwal en pwopwoud akan ahpw e kin kihda kaweid sang ni pein ah ekspiriens ah kaidehn sang kaweid en Paipel oh pwuhk kan me “ladu lelepek oh loalokong” ntingihda kan? (Madiu 24:45) Ah kaweid mwein pahn nohn direkihla mehkan me pid duwen tiahk en wasao oh sohte pahn nohn katapan pwehki ah loalokongki ireo me tikitik. Mehlel, ekei tiahk sohte suwed oh eldero ele mie pein ah ekspiriens nan mepwukat. Ahpw, sihpw akan pahn ale kapai me laud ma sounkaweid akan kangoangehki irail en rong kepihtien Sises oh mahsen en Siohwa kan ah kaidehn madamadau kan en aramas de kaweid en tiahk en wasao.—Melkahka 12:6; Lepin Padahk 3:5, 6.
Ale Kasukuhl Sang Rehn “Ladu Lelepek oh Loalokong”
15. Mehnia doadoahk me Sises ketikihong “ladu lelepek oh loalokong” en wia, oh ia ehu kahrepe me ahn pwihn wet doadoahk ah nohn kin pweida mwahu?
15 Sounsilepe me duwehte wahnpoaron Piter, Sohn, oh Pohl irail koaros wia kisehn sapwellimen Sises pwihn me adaneki “ladu lelepek oh loalokong.” Irail pwihn en ladu wet kin wiawihkihda rien Sises me keidi kan me mihmi nan sampah, me arail koapworopwor iei en kohdahla nanleng oh iang Krais kakaun. (Kaudiahl 5:9, 10) Ni imwin rahn akan en koasoandi wet, uwen tohto en rien Krais akan me luhluhwe pohn sampah inenen malaulaulahr. Ahpw, doadoahk me Sises kehkehlikihong irail en wia—doadoahk en kalohkiseli Rongamwahu en Wehio mwohn imwi ah pahn kohdo—ahnsou wet inenen tehlapasang mahso. Ni irair wet, pwihn en laduo inenen pweida arail doadoahk! Pwekida? Ehu kahrepe, pwehki irail kasukuhlihada irail akan me kisehn “sihpw teikan” en sewese irail nan doadoahk en kalohk oh padahk. (Sohn 10:16; Madiu 24:14; 25:40) Rahnwet, pwihn en “sihpw teikan” kin wia pali laud en doadoahk wet.
16. Iaduwen pwihn en ladu lelepek oh loalokong kin kasukuhlih ohl pilipilda kan?
16 Iaduwen pwihn en ladu lelepek oh loalokong ah kin kihda kasukuhl wet? Nan senturi keieu, weliepen pwihn en laduo ale manaman en kasukuhlih oh idihada sounapwalih en mwomwohdiso kan, oh irail kin uhd kasukuhlih sihpw akan. (1 Korint 4:17) Met pil kin wiawi nan rahnwet. Governing Body—pwihn tikitik ieu me wiawihkihda elder kan me keikihdi ngehn sarawi me kin weliwelian pwihn en ladu lelepek oh loalokong—kin kamanahiong weliaparail akan en wia kasukuhl oh pil idihada ladu kan oh elder kan nan mwomwohdiso nen kei nin sampah pwon. Pil patehng met, Governing Body kin koasoanehdi kasukuhl kan ohng tohn Branch Committee, sounapwalih en mwomwohdiso kan, elder kan oh ministerial servant kan ohng wiepe keieu mwahu en epwelpen sihpw akan. Kalaudepen kaweid kin pil kihda sang ni kisinlikou kan, oh nan artikel me kin kohda nan Kahn Iroir, oh pil sang ni pwuhk teikan, me duwehte pwuhken Organized to Do Jehovah’s Will (Koasoandi Pwehn Wia Kupwuren Siohwa).a
17. (a) Iaduwen Sises ah ketin kasalehda me e koapworopworki pwihn en laduo? (b) Iaduwen silepen sihpw akan en pali ngehn ahr kak kasalehda me irail kin koapworopworki pwihn en ladu lelepek oh loalokong?
17 Sises inenen koapworopworki laud mehlel pwihn en ladu wet me kahrehda e idihada irail en apwalih “sapwellime dipwisou kan koaros”—me wehwehki, wiewiahn pali ngehn akan koaros me wiewiawi nin sampah. (Madiu 24:47) Sounsilepen sihpw idihdda kan kasalehda me irail pil kin koapworopworki pwihn en laduo, ni arail kin doadoahngki kaweid akan me irail kin alehdihsang Governing Body. Ehi, ni ahnsou me sounsilepe kan kin kasukuhlih meteikan, oh kin mweidong pein irail en ale kasukuhl kan sang Mahsen en Koht oh kapwaiada, irail kin utungada ehupenehn pwihn sihpwo. Ia uwen atail kin kalahnganki me Siohwa kin ketin kasukuhlih ohl akan me kin apwalih kanahieng emenemen tohnmwomwohdisohn Kristian!
[Nting tikitik me mi pah]
a Sounkadehdehn Siohwa kan me ntingihda.
Iaduwen Ahmw Pahn Sapeng?
• Iaduwen sounsilepen sihpw mah kan ahr kin kasukuhlih meteikan?
• Dahme kahrehda e sohte mwahu sounapwalih kan en kihda kasukuhl me poahsoankihda pein ahr madamadau?
• Iaduwen oh dahme kahrehda sounapwalih sihpw akan kin kasalehda me re koapworopworki pwihn en ladu lelepek oh loalokong?
[Kawehwehpen kilel kan nan ehu ehu pali 11]
Elder Kristian akan kin kasukuhlih mwahnakapw akan en nan mwomwohdiso
[Kawehwehpen kilel kan nan ehu ehu pali 12]
“Ladu lelepek oh loalokong” kihda kasukuhl tohto ohng elder kan