Padahkiong Noumw Seri kan en Kin Iang Pasapeng

PERLA, sang Mexico, kin tamanda me ni ahnsou ih kisin serepein, ah nohno kin sewese ih en kaunopada pasapeng mwotomwot kan ong onop en Kahn Iroir. Met Perla miehier nah kisin pwutak men me sounpahr limau. Iaduwen e kin sewese nah pwutako? “Keieu, pein ngehi anahne en kaunopada mahs. Ni ahnsou me I kin wia met, I kin rapahki parakrap kan me nei pwutako kak wehwehki, ehu me e kak kawehwehda ni pein eh lokaia kan. Mwuhr, se uhd kin tehkpene parakrap kan me e kin kahdaneki ‘ahi parakrap.’ I kin idek reh en kawehwe ireo ni ah doadoahngki mehn karasaras kan en ehu ehu rahn. Kiht eri praktis pwurepwurehng nda pasapengo. Se pil kin doadoahngki soangen dipwisou ehu me pahn uwen sais en microphone ehu pwehn sewese ih en esehla kolokol ahnsou me e pahn pasapeng. I inenen perenki pwehki saikinte pak ehu e sohte kin iang pasapeng de kihda peh pwehn pasapeng nan mihding kan. Kereniong ahnsou koaros mwohn mihding pahn tepida, e kin kohla rehn brother me pahn wia onop oh padahkiong ih mehnia ah parakrap.”

Jens, emen elder me kin apwalih pwihn en irail akan me kin doadoahngki lokaiahn Hindi, mie nah pwutak riemen, emen sounpahr riau oh emen sounpahr pahieu. Ni ahnsou me ih oh eh pwoud kin wia onop ong mihding kan rehn neira seri riemeno, Ira kin doadoahngki soangen ahlohte me Jens sukuhlikihsang ah pahpa oh nohno. E koasoia: “Se kin pilada mehnia pali nan onopo me seri ko kak wehwehki. Kiht eri song en oaralapihada mouren ireo ong ira oh mwuhr idek rehra peidek kan me se lemeleme ira kak pein sapeng nan ahnsou en mihding. Pak tohto se kin pwuriamweikihla pasapeng kan ira kin kihda ni pein ara lokaia. Ara kin kasalehda ara madamadau kin wia kasalepen ara wehwehkihla ire kan. Imwilahn met, ara pasapeng kan kin wia kaping laud ehu ong Siohwa oh kin wia kasalepen pein ara pwoson.”