Kakehlailla Emen Emen Ni Atail Wia Pasepeng kan nan Mihding kan
1 Kangoang kehlail kin kohwong kitail koaros en wia dahme ntingihdi nan Ipru 10:24: ‘Kitail nsenoh sawaspene ni kasalepen atail limpoak oh atail wiewia mwahu kan.’ Met kin wehwehki me kitail pahn kakehlailla mehteikan ni atail pahn wia pasepeng kan ni mihding kan en mwomwohdiso. Dahme kahrehda kitail anahne wia pasepeng kan? Iaduwen kitail kak sewese mehteikan ni atail pahn wia pasepeng kan? Ihs me kitail kak sewese?
2 Medewehla duwen ahnsou kan me ke paiekihda pasepeng kan me mehteikan kihda kin sewese iuk en wehwehkihla Pwuhk Sarawi oh kakehlailla ahmw pali ngehn. Ke ahneki pwais ehu en pil kangoange irail. Ni ahnsou me ke kin wia pasepeng kan, ke kin kasalehda me ke men kihong mehteikan “kapai ehu en pali ngehn” pwehn kangoange irail koaros me iang towehda mihding kan.—Rom 1:11, 12.
3 Iaduwen Ke Kak Wia Pasepeng Mwahu kan: E sohte pahn mwahu ma ke wia pasepeng reirei oh koasoia ire koaros me mihmi nan parakrapo. Ahnsou me emen kin wia pasepeng reirei, e sohte kak lel mouren parakrapo oh mehteikan pahn sohlahr men pasepeng. Keieun pasepeng ong parakrapo pahn anahne wia pasepeng mwotomwot oh pahn sapengla peidek en parakrapo. Mwurin mwo, mehteikan kak kapataiong ire teikan me pahn kasalehda iaduwen kitail kak doadoahngki mouren parakrapo nan atail mour oh pil koasoiahda iren Paipel kan me mihmi nan parakrapo. Pil tehk pwuhken School Guidebook, pali 90-92.
4 Ma ke kin saloh ahnsou me ke kin medemedewe en wia pasepeng, kaunopada pasepeng mwotomwot oh peki rehn brother me pahn wia onop en likweriuhk ahnsou me mwomwohdiso pahn wia parakrapo. Mwurin ke pahn wia met pak kei, re pahn mengeikihla wia pasepeng kan. Tamataman me Moses oh Seremaia kin pehm me re soakoahiek en koasoi mwohn pokon en aramas. (Eksodus 4:10; Seremaia 1:6, footnote) Ahpw Siohwa sewese ira pwe ren kak koasoi, oh Siohwa pil kak sewese iuk.
5 Ihs Pahn Paiekihda Ahmw Pasepeng kan? Pein kowe pahn paiekihda ahmw pasepeng kan pwe ahnsou me ke pahn pasepeng, e pahn kalaudehla ahmw wehwehkihla oh kalahnganki padahk mehlel, oh e pahn sewese iuk en tamanda ire pwukat mwuhr. Oh pil, mehteikan pahn paiekihda ahnsou me re pahn rong ahmw pasepeng kangoang kan. Kitail koaros kin perenki rong pasepeng kan koaros, sang irail me wereila nan padahk mehlel, me pwulopwul kan, me namenek kan, me kapw kan, pwe irail koaros kin nannanti en kasalehda arail pwoson ni arail kin iang pasepeng kan ni mihding kan.
6 “Meid kaperen diar mahsen pwung ni ahnsou me konehng” oh mehlel, mahsen pwung kan kin pil wehwehki lokaia kan me kin kangoange emen emen ahnsoun mihding kan!—Lepin Padahk 15:23.