Kapinga Siohwa nan “Pokon en Aramas akan”
1. Iaduwen mihding en mwomwohdiso kan kin kihong kitail ahnsou mwahu en kasalehda atail limpoak?
1 Mihding en Kristian kan iei sapwellimen Siohwa koasoandi ehu me kin sewese sapwellime aramas akan en ahneki nanpwungmwahu reh. Ni atail kin kaukaule iang towehda mihding kan, kitail kin kasalehda atail kalahnganki sapwellime koasoandi kan. Patehng met, kitail kak “nsenoh sawaspene ni kasalepen atail limpoak oh atail wiewia mwahu kan,” me kin wia ahl kesempwal ehu en kasalehda atail limpoak nanpwungatail. (Ipru 10:24; Sohn 13:35) Ahpw, iaduwen kitail kak kasalehda limpoak oh wiewia mwahu ong riatail kan ni ahnsoun mihding kan?
2. Dahme Nanmwarki Depit koasoanehdi en wia?
2 Kasalehda Ahmw Pwoson ong Wehi Pokon: Nanmwarki Depit ntingihdi met duwen pein ih: “I pahn koasoiaiong nei aramas akan duwen wiepen nin limomwi kan; I pahn kapinga komwi nan pokon en aramas akan: I pahn kapinga wiepen nin limomwi kan nan pokon laud akan.” “I ahpw pahn kapingkalahngan ong komwi mwohn pokon en sapwellimomwi aramas akan; I pahn kapinga komwi mwohrail koaros.” “Nan pokon en sapwellimomwi aramas akan, I lohkidahr rongamwahu en omwi komourkitalahr. Komw mwahngih duwen ei sohte mwahn pahn tokedihsang lohlohkiseli.”—Mel. 22:22, 25; 35:18; 40:9.
3. (a) Ni ahnsoun wahnpoaron Pohl, soangen ahnsou mwahu dah kan me mihding en Kristian kan kin kihda? (b) Dahme kahrehda en iang mihding inenen kesempwal ong sapwellimen Koht aramas akan rahnwet?
3 Ni mwehin wahnpoaron Pohl, irail Kristian akan pil kin kasalehda arail pwoson Siohwa oh kapinga sapwellime lingan ni ahnsou me irail kin kohpene ong kaudok. Ni ahl wet, irail kin kangoange emenemen oh kasalehda arail limpoak oh wiewia mwahu kan. Nan atail ahnsou, ahnsou reirei mwurin ahnsoun Depit oh Pohl, kitail kin uhdahn “ese Rahnen [Siohwa] kerendohr.” (Ipru 10:24, 25) Ahn Sehdan koasoandi en sampah wet kin kohkohlahng kasohrala, oh kahpwal akan kin wie lalaudla. Laudsang mahs, kitail “uhdahn pahn kin kanengamah.” (Ipru 10:36) Ma riatail kan sohte pahn kangoange kitail, ah ihs me pahn kak kangoange kitail en dadaurete?
4. Ia kamwahupen pasapeng kan nan mihding kan en mwomwohdiso?
4 Rahnwet, duwehte mahs, koasoandi kan kin wiawihda ong emenemen Kristian en kasalehda arail pwoson “nan pokon en aramas akan.” Ehu ahl me koaros kak iang wia met iei ni arail kin iang sapeng peidek kan me kohwong tohnmwomwohdiso nan mihding kan en mwomwohdiso. Ke dehr pohnsehse kamwahupen pasapeng kan. Karasepe, pasapeng kan me kin kasalehda iaduwen kitail kak powehdi de liksang kahpwal kan kak kakehle riatail kan en koasoanehdi en idawehn mouren kosonned kan en Paipel. Pasapeng kan me pid duwen iren Paipel kan me eden pwuhk oh irelaud oh iretikitik kante me kileldi ahpw audepe kan sohte kileldi, de pasapeng kan me kin kasalehda dahme emen diarada sang pein eh roporop kak kangoange meteikan en kamwahwihala arail koasoandi en onop.
5. (a) Iaduwen kitail kak powehdi namenek? (b) Ihs me kin tiengla mwowe en iang pasapeng nan mihding?
5 Ma kitail kin tamanda me pein kitail oh meteikan pahn paiekihda atail pasapeng kan nan mihding kan, met pahn kamwakid kitail Sounkadehdehn Siohwa kan koaros en powehdi namenek de pweiek en iang pasapeng. E inenen kesempwal elder kan oh ministerial servant kan en iang pasapeng nan mihding kan, pwehki irail anahne tiengla mwowe en iang towehda mihding kan oh iang pasapeng. Ahpw, iaduwen emenemen tohnmwomwohdiso kak kamwahwihala eh pasapeng ma e lemeleme me en iang pasapeng kin apwal ong ih?
6. Iaduwen emen sister kin kilangwohng eh pasapeng kan?
6 Iren Sawas kan ong Kamwahwihala Ahmw Pasapeng: Tamanda me Siohwa kin Iang Pidada. Emen sister Kristian kawehwehda iaduwen e kin kilangwohng eh pasapeng kan. “Ei pasapeng kan nan mihding iei ei pasapeng ong Sehdan pwehki e kin nantihong irehsang sapwellimen Koht aramas akan en kasalehda arail pwoson.” Emen brother me ahpwtehn papidaisla me pil kin iang mwomwohdisohte koasoia: “I kin kapakapki sawas ong ei pasapeng kan.”
7. Dahme pahn sewese kitail en kamwahwihala atail pasapeng kan? (Kilang koakon, “Iaduwen Kitail en Pasapeng ni Ahnsoun Mihding.”)
7 Kaunopada mwahu. Ma ke sohte kaunopada mwohn mihding, ke pahn apwaliki iang pasapeng oh ahmw pasapeng kan sohte pahn mwahu.
8. Me pid duwen pasapeng, dahme kahrehda kitail en wiahda mehn akadei ehu, oh iaduwen kitail kak lel mehn akadei wet?
8 Wiahda mehn akadei en iang pasapeng pak ehu de tohtohsang nan ehuehu mihding. Met wehwehki en kaunopada pasapeng tohto pwehki ma ke pahn kihda pehmw pak tohto, met pahn kak sewese brother me wia mihding en likwerih uhk. Ke kak padahkihong ih mwowe mehnia peidek kan me ke kaunopadahr pasapeng kan. Met pahn wia sawas laud ma ke ahpwtehn tepida iang pasapeng. Pwehki ke kin pweiek en kihda pehmw “nan pokon en aramas akan,” ahpw ma ke ese me mie ahmw parakrap en iang pasapeng oh brother me wia mihding pahn rapahki pehmw pwehn likwerih uhk, met pahn kamwakid uhk en iang pasapeng.
9. Dahme kahrehda e pahn mwahu en mwadang iang pasapeng nan mihding?
9 Mwadang iang pasapeng. Doadoahk apwal ehu sohte pahn mengei ma kitail pahn pwand en wia doadoahko. En mwadang iang pasapeng nan mihding kak sewese kitail. Ke pahn pwuriamweikihla me keriau de kesiluh en ahmw pasapeng pahn mengei ong uhk mwurin ke wiahdahr ahmw tepin pasapeng.
10. Ia kamwahupen mwohndi mwowe nan Kingdom Hall?
10 Pilada wasahn mwohndi me konehng. Ekei kin diarada me e mengei en iang pasapeng ma re kin mwohndi mwowe nan Kingdom Hall. Ma kitail pahn mwohndi mwowe, malaulau soahng kan me pahn kauwehla atail rongorong, oh e pahn mengei ong brother me wia mihding en kilang kitail. Ma ke pahn mwohndi mwowe, tamanda me ke anahne ngihl laud pwe koaros en kak rong, keieu ma mwomwohdiso sohte kin doadoahngki microphone.
11. Dahme kahrehda kesempwal ken rong kanahieng ahn meteikan pasapeng kan?
11 Rong Kanahieng. Met pahn sewese iuk en dehr kapwurehiong dahme emen ahpwtehn nda. Oh pil, pasapeng kan en meteikan kak katamankin uhk ehu iren Paipel de ire ehu me ke kak kapatahiong ire kan me irail ahpwtehn kasalehda nan arail pasapeng. Ekei pak, ekspiriens mwotomwot ehu kak kawehwehda mwahu mouren padahk ehu me kitail koasoakoasoiapene. Soangen pasapeng pwukat kak wia sawas laud.
12. Dahme ke pahn kak kasalehda ma ke pahn sapeng ni pein ahmw lokaia?
12 Song en sapeng ni pein ahmw lokaia. Wadewadek ehu pasapeng sang pwuhk me wia sawaspen Paipel kan kak kasalehda me ke diarada pasapeng pwung, oh soangen pasapeng pahn mwahu ni ahnsou me ke ahpwtehn tepida pasapeng. Ahpw, ma ke pahn koahiekla en sapeng ni pein ahmw lokaia, met pahn kasalehda me ke uhdahn wehwehki ireo. Kitail sohte anahne wadek ehuehu lepin lokaia me kileldi nan neitail sawaspen Paipel kan. Sounkadehdehn Siohwa kan sohte kin ihte kapwurehiong dahme neirail pwuhk me wia sawaspen Paipel kan kin koasoia.
13. Dahme kahrehda e kesempwal en koasoia duwen ire kan me kitail koasoakoasoiapene?
13 Koasoia duwen ire kan me kitail koasoakoasoiapene. Sohte konehng en kihda ire kan me sohte kin pid oaralap de weksang ire kesempwal kan me kitail koasoakoasoiapene. Met wehwehki me ahmw pasapeng anahne pid oaralap me kitail koasoakoasoiapene. Ma ke pahn wia met, ahmw pasapeng kan pahn kak sewese tohnmwomwohdiso en koasoakoasoiapene mehkan me kak kangoange kitail koaros me pid oaralap en artikel.
14. Ia atail mehn akadei ni ahnsou me kitail kin iang pasapeng, oh iaduwen kitail kak lel mehn akadei wet?
14 Nantihong en kangoange meteikan. Pwehki ehu kahrepe kesempwal en iang pasapeng iei en kangoange meteikan, kitail en dehr nda mehkan me pahn kakete kansensuwedih meteikan. Patehng met, ken dehr koasoia soahng koaros me kileldi nan parakrap pwehki ma ke pahn wia met, sohte mehkot me meteikan kak koasoia. E pahn apwal en wehwehki pasapeng reirei kan. Pasapeng mwotomwot kan me wiawihkihda lepin lokaia malaulau kak wehwe mwahu, oh soangen pasapeng kan pahn kangoange me kapw kan en kihda pasapeng mwotomwot kan.
15. Dahme kahrehda kesempwal brother me wia mihding en rong kanahieng ni ahnsou me emen wia pasapeng?
15 Pwukoa en Brother kan me Kin Wia Mihding kan: Pwe mihding en wia mehn kangoang, brother me wia mihding ahneki pwukoa laud. E kak kasalehda me e kin kesempwalki ehuehu pasapeng ni eh kin rong kanahieng oh kilikilang ni wahu aramaso me wia pasapeng, oh dehr wia mehkot tohrohr ni ahnsou me emen wia pasapeng. E uhdahn sohte konehng ma e sohte rong kanahieng ahn emen pasapeng, oh kahrehda e pahn kapwurehiong dahme meno ahpwtehn nda de idek peidek me ahpwtehn sapengla!
16. (a) Dahme pahn wiawi ma brother me wia mihding kin kalapw kapwurehiong pasapeng kan me ahpwtehn wiawi, oh pwekida? (b) Soangen peidek dah kan mwurin pasapeng ehu wiawi me konehng oh pwekida?
16 E pil pahn kansensuwedih emen me wia pasapeng ma brother me wia mihding pahn kapwurehiong dahme meno ahpwtehn nda ni lepin lokaia kan me ekiste weksang pwe met pahn kak kasalehda me dahme meno nda me sohte itar. Ahpw ni pali teio, e pahn wia mehn kangoang ma pasapeng kan pahn kalaudehla koasoiapene en ire kesempwal ehu. Soangen peidek kan me duwehte ‘Iaduwen kitail kak doadoahngki ire wet nan atail mwomwohdiso?’ de, ‘Mehnia iren Paipel nan parakrap wet kin kasalehda ire wet?’ kak kangoange tohnmwomwohdiso en kihda pasapeng mwahu kan me kak wia sawas laud.
17. Iaduwen brother me wia mihding kak kangoange me kapw kan oh irail me kin namenek oh nennen?
17 Brother me wia mihding anahne kapinga me kapw kan oh irail me kin namenek oh nennen ni ahnsou me re iang pasapeng. Brothero kak wia met ni eh tuhwong emenemen mwurin mihding pwehn dehr kasaroh irail oh brothero pil kak kihda sawas kan ma konehng.
18. Dahme pahn wiawi ma brother me wia mihding kin nohn koasoakoasoi ni ahnsoun onop?
18 Nan atail koasoakoasoipene, emen me kin ahnsou koaros koasoakoasoi kin kahrehiong meteikan en sohte koasoi. Irail me kin rongorongete ih kin pehm me re sohte anahne kasalehda arail madamadau. Irail sohla kin rong kanahieng. Met kak wiawi ma brother me wia mihding kin nohn koasoakoasoi. Ahpw ekei pak brothero kak kangoange tohnmwomwohdiso en kasalehda arail madamadau oh kamwakid arail madamadau duwen oaralap ni eh doadoahngki peidek kan me sohte kileldi. Ahpw brothero pahn kin doadoahngki soangen peidek pwukat ekeite ahnsou.
19. Dahme kahrehda brother me wia mihding anahne ekis awih mwohn eh likwerih emen en sapeng?
19 Brother me wia mihding sohte pahn anahne likwerih emen me keieu mwadang kihda peh. Met pahn kansensuwedih irail akan me anahne ekis ahnsou mwohn ar koasoanehdi arail madamadau. Ma brothero pahn ekis awih, e pahn kak mweidohng emen me saikinte iang pasapeng. E pil pahn kasalehda eh loalokong ni eh sohte kin likwerih kisin seri kan en sapeng peidek kan me kin pid ire kan me irail seri kan sohte kak wehwehki.
20. Dahme brother me wia mihding kak wia ma emen kihda pasapeng me sapwung?
20 Dahme brother me wia mihding kak wia ma emen pahn kihda pasapeng me sapwung? Brother me wia mihding en dehr kasaroh meno me kihda pasapengo. Pali laud en ahnsou, pil mie ire mehlel kan nan pasapeng sapwung kan. Ma brother me wia mihding pahn koasoia mehkot pwung sang pasapengo de kapwurehiong peidek, de doadoahngki pil ehu peidek, e kak kainenehla ireo ahpw sohte pahn kasaroh meno.
21. Soangen peidek dah kan brother me wia mihding en dehr doadoahngki oh pwekida?
21 Brother me wia mihding en dehr doadoahngki soangen peidek me duwehte ‘Mie me saikinte iang pasapeng’ pwehn kangoange tohnmwomwohdiso en iang pasapeng. Brothero en dehr doadoahngki soangen peidek me duwehte ‘Ihs me saikinte iang pasapeng? Met me kaimwiseklahn ahmw ahnsoun pasapeng!’ pwehn kangoange tohnmwomwohdiso en iang pasapeng, pwehki soangen peideko sohte pahn kangoange emen en kasalehda eh madamadau ni saledek. Tohnmwomwohdiso en dehr pehm me irail wiahda sapwung pwehki irail sohte iang pasapeng ni tepin onopo. Ahpw irail anahne ale mehn kangoang en kasalehda dahme irail ese pwehki met kin wia kasalepen arail limpoak. Patehng met, mwurin brothero likwerih emen, e sohte pahn nda, “Mwurin ih, kitail pahn uhd rong pasapeng en Brother meno oh mwurin mwo Sister meno.” Brother me wia mihding anahne rong mahs pasapeng oh mwurin mwo e pahn koasoanehdi ma emen pil anahne kihda pasapeng.
22. Dahme atail kin iang pasapeng kan sang nan mohngiongitail kin kasalehda?
22 En Iang Pasapeng Iei Pwais Ehu: En iang mihding en Kristian kan iei anahn ehu ong ahneki nanpwungmwahu rehn Siohwa, ahpw en iang pasapeng ni ahnsoun mihding iei pwais ehu. Uwen atail kin iang pasapeng pwehn kapinga Siohwa “nan pokon en aramas akan” kin kasalehda uwen atail kin song en kahlemengih ahn Depit mehn kahlemeng mwahu oh me kitail kin kapwaiada ahn Pohl kaweid. Atail kin iang pasapeng ni ahnsoun mihding kin kasalehda me kitail kin poakohng riatail kan oh kitail iang kisehn sapwellimen Siohwa mwomwohdiso lap. Mie ehu wasa tohrohr me ke men mih ie ni ‘ahmw ese Rahno kerendohr’?—Ipru 10:25.
[Kawehwehpen kilel kan nan ehu ehu pali 5]
IADUWEN KITAIL EN PASAPENG NI AHNSOUN MIHDING
◼ Ma ke pahn tepin pasapeng, kihda pasapeng mwotomwot ehu oh sapeng peideko
◼ Pwehn kalaudehla koasoakoasoaipene, (1) kasalehda iaduwen iren Paipel ehu me eden pwuhk oh iralaud oh iretikitik te me kileldi kin doakedoake ireo me kitail koasoakoasoaipene, (2) koasoaia iaduwen ireo pahn doakedoake atail mour, (3) kawehwehda iaduwen kitail kak doadoahngki ireo, de (4) koasoia ekspiriens mwotomwot ehu me pahn kasalehda ire kesempwal ehu
◼ Rong kanahieng pasapeng kan me meteikan kihda pwe ken kalaudehla dahme irail ahpwtehn koasoia
◼ Song en sapeng ni pein ahmw lokaia