Kisinlikou Ehu Sang Governing Body
Riat Sounkadehdehn Siohwa kan:
Wahnpoaron Pohl kin doadoahngki ahnsou mwahu kan koaros en kasalehda eh limpoak oh kalahngan ong ienge Kristian kan. Ong Kristian akan nan Rom, e ntingihdi: “I kin kapingkihong ei Koht rehn Sises Krais pwehki kumwail koaros; pwehki amwail pwoson eh kalohkselier wasa koaros nin sampah.” (Rom 1:8) Ei, nan Wehin Rom pwon, irail tepin Kristian akan kin ndandkihla arail pwoson kehlail oh arail ngoangki arail doadoahk en kalohk. (1 Des. 1:8) E sohte kapwuriamwei me Pohl kin uhdahn poakohng rie Kristian akan!
Duwehte Pohl, se kin kasalehda at kalahngan ong Siohwa ni ahnsou koaros me se kin medewe kumwail. Se uhdahn poakohng kumwail! Oh kumwail kak kamehlele duwen sapwellimen Siohwa limpoak ong emenemen kumwail. Ekei kumwail kin lelohng uhwong laud, ahpw kumwail kin nannantihte en wia doadoahk en kalohk. Amwail kommwad oh eimah kin uhdahn kaperenda Siohwa!—Lep. Pad. 27:11.
Pwuhken Yearbook (Pwuhken Pahr) kin kihda mehn kadehde tohto me Kaun Sises Krais kin “mwesel kohkohla, kolahng kalowehdi eh imwintihti kan,” oh sohte ehu tehtehn mahwen me wiawihda pwehn kauwehla sapwellimen Krais tohnpadahk kan pahn pweida.—Kaud. 6:2; Ais. 54:17.
Ong Kristian akan nan Pilipai, Pohl ntingihdi: “I kin kapingkalahngankihong ei Koht . . . pwehki soangen sawas me kumwail kin sewesehkin ie nan doadoahk en rongamwahu.” (Pil. 1:3-5) Kiht pwihn en Governing Body pil ahneki soangen pepehmohte duwen kumwail. Nan pahr en kalohk 2007, sounkalohk 6,691,790 doadoahngki awa 1,431,761,554 ong doadoahk en kalohki rongamwahu nan sahpw 236 nin sampah pwon. Ia uwen doadoahk nohn laud me kumwail wiahda ong kalohki rongamwahu! Medewehla duwen aramas lopw kei me ale sawas sang doadoahk laud me kitail koaros wiahda nin duwen pwihn ehu. Soangen doadoahk pwukat koaros kin kihong Siohwa kaping!
Nan pil ehu ahnsou tohrohr, Pohl kin kasalehda me e kin uhdahn poakehla rie Kristian akan. E ntinglahng irail nan Deselonika: “Se kin tamanda . . . duwen amwail tengediong [“dadaurete,” NW] nan amwail koapworopworki atail Kaun Sises Krais.” (1 Des. 1:2, 3) Ei, mie kahpwal tohto nan mour. Kahpwal kan kin pwarada, ahpw e kesempwal kitail en dadaurete. Soangen kahpwal dah kan ke kin lelohng? Ke kin mwoarosala pwehki ke sohte kak wia uwen me ke men wia ong papah Siohwa pwehki ahmw soumwahu laud? Ahmw pwoud melahr mwurin amwa pwopwoudki sounpar tohtohie? Ke kin apwaliki diarada emen me ke kak pwoudiki oh ehukihong ih ahmw limpoakohng Siohwa, oh mendahki kahpwal wet, ke kin ni lelepek peikiong kaweid en Paipel en pwoudiki ihte emen me kin papah Siohwa? (1 Kor. 7:39) Ke kin nantihong kakairada noumw seri kan mendahki mie kahpwal laud en mwohni? Sohte lipilipil soangen irair dah kan me ke kin mih loale, ma ke kin mwohneki mehkan me pid Wehio, ke kak kamehlele me Siohwa sohte pahn ‘meliehla ahmw wiewia kan de ahmw limpoak ong ih.’ Brother kan oh sister kan, kumwail menlau dehr ‘pwangahki amwail wiewia mwahu kan’!—Ipru 6:10; Kal. 6:9.
Dahme pahn sewese uhk en dadaurete? Duwehte irail mehn Deselonika kan, “koapworopworki atail Kaun Sises Krais” pahn sewese uhk. Ki kahrepe pwung, mwuhr Pohl kin kapahrekiong “koapworopwor en mour soutuk” ong lisoarop kehlail ehu me kak pere Kristian men sang madamadau sapwung oh peikasal kan.—1 Des. 5:8.
Ni mehlel, ni ahmw kin perenki dadaurete, ke kin kihda pasapeng ehu ong ahn Sehdan iren uhwong me pid ihs me ahneki pwuhng en kaunda lahng oh sampah. Sehdan kin kose me sapwellimen Koht ladu kan kin roporop oh irail kak perenki papah Koht ong ahnsou mwotomwotte, ahpw ma arail kahpwal akan pahn laudla de koasoandi en sampah wet pahn reireila sang dahme irail kasik, irail pahn luwetala nan arail kaudokiong Koht. Mie ahmw ahnsou mwahu en kasalehda me Tepil iei sounlikamw pweipwei men! Ehuehu rahn, ke pahn kin kerekerenlahng ahnsou me ke pahn ale kapai kan me ke kin koapworopworki.
Duwehte Pohl kin doadoahngki ahnsou kan en kapingahki rie Kristian akan arail koaros kin kehlail, doadoahk laud ong kalohk, oh arail dadaur, se pil men doadoahngki ahnsouwet en kapinga kumwail oh kamehlelehong kumwail at limpoakohng kumwail. Menlau pousehlahte wia amwail doadoahk mwahu!
Se kapakapki me pahr wet pahn audaudki kapai tohto sang rehn Koht. Se kadarewei at rahnmwahu
Riamwail brother kan,
Governing Body en Sounkadehdehn Siohwa kan