Kisinlikou Sang Governing Body
Ni atail kin doulahte nan tepin senturi 21, e wia mehkot kaperen ong kiht en nting ong kumwail “riatail brother oh sister kan” wasa koaros nan sampah, oh kapinga kumwail duwen amwail doadoahk laud. (1 Pit. 2:17) Kereniong pahr 2,000 samwalahro, Sises keinemwe: “Eri a, kumwail lemeleme me Nein-Aramas pahn ketin diar pwoson nin sampah ni eh pahn ketido?” (Luk 18:8) Amwail doadoahk me kumwail kin wia ni ngoang nan pahr en kalohk me ahpwtehn nek kin kasalehda me pasapengpen sapwellimen Sises peidek me iei! Ekei kumwail kin ale kalokolok oh kapailok pwehki amwail pwoson. Nan wasa tohto, kumwail kin dadaurete mendahki mahwen kan, melimel kan, soumwahu kan oh duhpek. (Luk 21:10, 11) Pwehki amwail ngoangki wiewia me pwung, Sises pahn kak “diar pwoson nin sampah.” Kitail wehwehki me irail me mihmi nanleng kin inenen perenki met!
Kitail wehwehki me dadaur sohte kin wia mehkot me mengei. Medemedewe duwen kalokolok me brother oh sister kan kin lelohng nan wehi ieu me mihmi pali kapi en Eisia. Kalokolok kin kalap wiawiong Sounkadehdehn Siohwa kan wasao. Nan pahr kerendo kan, pwolis kauwehla kapokon me kereniong aramas 700 kohpene ni meleilei. Re pil wiahda koasoandi ehu me kahrehda irail me 1,300 pil sohte kak iang towehda kapokono. Pwihn en aramas mwersuwed me doadoahngki masuku (mask) me kamasepwehk—ekei irail me pwolis—lingeringer oh pedolong nan wasahn kapokon ni mwekid kehlail oh lemei oh keme brother oh sister tohto wasao oh isikada ihmwo me re pahn doadoahngki ong kapokon. Pil ekei ahnsou kan, irail me kin kailongki Sounkadehdehn Siohwa kan kin keme riatail brother oh sister kan ni lemei ni arail doadoahngki tuhke me mete kin kohsang pwehn kauwehla paliwar en aramas.
Kitail sohte kin pwuriamweikihla me soangen kalokolok pwukat kin wiawi. Wahnpoaron Pohl me mwekidki manaman en ngehn sarawi ntingihdi: “Aramas koaros me men ahneki mour mwahu ni arail pahn miniminiong Krais Sises, re pahn ale kamakam.” (2 Tim. 3:12) Nan keieun senturi, Kristian kan dadaurete mendahki aramas akan kin kauwe oh kaloke irail, oh ekei irail pil kamakamla. (Wiewia 5:40; 12:2; 16:22-24; 19:9) E pil wiawi nan senturi 20 oh e uhdahn pahn pil wiawi nan senturi 21. Ahpw, Siohwa padahkiong kitail me: “Sohte tehtehn mahwen ehu pahn kak kauweiukala.” (Aiseia 54:17) Dahme Siohwa mahsanih wasaht kin kansenamwahuwih kitail! Siohwa kin kesempwaliki kitail oh kitail wehwehki met pwe E doadoahngki soukohp Sekaraia oh mahsanih: “Mehmen me pahn sair kumwail pahn sair mehkot me keieu kesempwal rehi.” (Sekaraia 2:8) Irail me wia imwintihti kan en sapwellimen Siohwa tohnkaudok kan sohte pahn kak pweida mwahu. Kaudok min pahn pweida!
Karasepe ieu, nan wehio me mihmi ni pali kapi en Eisia me kitail ahpwtehn koasoia, Sounkadehdehn Siohwa kan tohtohla oh re ahneki kekeirada kapw riau me pid tohtohlahn sounkalohk kan erein pahr en kalohk en 2001. Ei, riatail brother oh sister kan wasao kin dadaurete mendahki kalokolok, duwehte wasa teikan. Nan pahr en kalohk me ahpwtehn nek, aramas 5,066 papidaisla ehu ehu wihk wasa koaros nan sampah pwehn kasalehda me re inoukihong Siohwa arail mour. Met irail me kapw kan kin nantihong, duwehte kitail koaros, en “tengeteng nan [atail] pwoson ni peik unsek ong kupwuren Koht.”—Kol. 4:12.
Menlau pil medewehla duwen dahme kin wiawi nan rahn pwukat nan Krihs. Mendahki sounpahr tohto Greek Orthodox Church kin uhwong Sounkadehdehn Siohwa kan, met koperment en Krihs pakairki me Sounkadehdehn Siohwa kan me wia “pelien lamalam me aramas wehwehkihla.” Doaropwe me kasalehda met pil kasalehda me Greece Bethel complex kin wia “wasahn sarawi en wia kaudok ong Koht.” Se pil perenki kehsehkin uhk me, nan pahr en kalohk me ahpwtehn nek, mwoalen kopwung kan en Bulgaria, Canada, Sehmen, Sapahn, Romania, Russia and United States wiahda kopwung kan me pwungki atail wiewia kan me pid atail kaudok. Kitail kak kalahngankihong Siohwa me E kin mweidohng doadoahk en kalohk oh katohnpadahk en wiwiawihte nan sahpw pwukat!
Ni atail kin medemedewe duwen ahl akan me Siohwa kin utungada sapwellime aramas akan nan imwin rahn pwukat, kitail wehwehki me E kin wia kompoakepatail me keieu mwahu nan atail mour. Se perenki atail nanpwung mwahu rehn Siohwa, pwe kitail wehwehki me Ih me kin loalloale kitail, padahk ong kitail oh kapwungala kitail. Ei, kitail pahn lelohng kasongepen atail pwoson ni rahn kohkohdo kan. Ahpw, ma atail pwoson Siohwa me kehlail, e pahn sewese kitail en powehdi kasongosong pwukat. Seims ntingihdi: “Riei ko! Kumwail perenkihda ma soangen apwal koaros kin lelohng kumwail, pwe kumwail ese me ni amwail pwoson eh kin powehdi apwal pwukat, e kin kalaudehla amwail kanengamah ni ahnsou apwal.” (Seims 1:2, 3) Oh pil, atail dadaurete mendahki kahpwal kan kin kasalehda atail limpoak ong Siohwa, oh met kin kihong kitail peren mehlel! Menlau, riat ko, tamataman me Siohwa pahn kak sewese emen emen kumwail. Ma kitail pahn lelepek ong Ih, E uhdahn pahn sewese kitail en ale mour soutuk nan sampah kapw. E kupwurki kitail en pweida mwahu nan atail mour.
Ihme kahrehda, se men kangoange kumwail brother oh sister kan, me pwulopwul oh me mah, en kasikasik kapai kaselel kan me pahn wiawi ni ahnsou kohkohdo. E kesempwal me atail madamadau kan en duwehte wahnpoaron Pohl, me ntingihdi: “I kin lemeleme me lokolok kan me kitail kin lokolongki ahnsou wet sohte kak pahrekiong douluhl lingan me pahn pwarodohng kitail.” (Rom 8:18) Likih Siohwa ni ahnsou me ke lelohng sohte lipilipil kasongosong. Dadaurete, oh ke dehr kesehla ahmw pwoson. Ke sohte pahn koluhkihla pilipil wet. Mahsen en Koht kin kangoange kitail ni e mahsanih: “Me pwung kan pahn momourte pwehki ar loalopwoat ohng Koht.”—Apakuk 2:4.
Sang riamwail brother kan,
Governing Body en Sounkadehdehn Siohwa kan