Kapinga Siohwa Sang ni Omw Kin Iang Pasapeng nan Mihting
1. Soangen ahnsou mwahu dah me mie nan atail mihting kan? Ia duwen kitail anahne kilangwohng met?
1 Nan atail mihting kan, mie ahnsou me kitail kak kasalehda atail pwoson oh kangoange meteikan sang ni atail kin iang pasapeng. (Lep. Pad. 20:15; Ipru 10:23, 24) Kitail anahne kilangwohng pasapeng kan nin duwen pwais ehu oh kaukaule wia met. Ia duwen kitail kak wia met ni ahl me keieu mwahu?
2. (a) Soangen pasapeng dah kan me keieu mwahu? (b) Soangen pasapeng dah kan me kitail en dehr wia?
2 Pasapeng me keieu mwahu kin mwotomwot oh sansal, oh e kin poahsoankihda pwuhk me kitail kin onopki. Tepin pasapeng anahne uhdahn sapengla peideko oh mweidohng meteikan en kihda ire teikan. Dehr wia pasapeng reirei me kak kihsang ahnsou laud oh irehdi meteikan en pil iang pasapeng. Doadoahngki pein omw lokaia ah dehr wadek omw pasapeng sang nan pwuhk me kitail kin doadoahngki. Mwurin tepin pasapeng, kitail kak kihda ire kan sang nan iren Paipel kan me kileldi. Rong kanahieng dahme meteikan kin nda pwe ke dehr kapwurehiong dahme re ndao.
3. (a) Dahme ekei kin lemeleme duwen pasapeng me irail me pwulopwul kan oh me kapw kan kin wia? (b) Ia sapwellimen Siohwa oh Sises madamadau duwen met?
3 Ekei kin lemeleme me e sohte konehng me pwulopwul kan en koasoi ma me laud kan mie. Me laud kan pil kak lemeleme me re anahne awih me mah kan oh irail me koahiek kan en pasapeng mahs. Ahpw met weksang sapwellimen Sises madamadau. Ahnsou me ekei lingeringerda ni ar kilangada seri kan me weriwerki oh kapikapinga Mesaia, Sises mahsanih: “Kumwail sohte mwahn kin wadek mahsen en Pwuhk Sarawi me mahsanih, ‘Komw ketin aleier kaping unsek sang ni ewen seri kan oh sang rehn me kin wie dihdi kan?’” (Mad. 21:15, 16) Pasapeng kan me irail me pwulopwul kan oh me kapw kan kin wia sang nan arail mohngiong kin kangoange me mah kan, keieu ma irail kin doadoahngki pein arail lokaia. Soangen pasapeng pwukat kin uhdahn kapinga Siohwa.
4. Dahme pweidahn atail mihting kan kin poahsoankihda?
4 Kitail koaros anahne kaunopada mwahu pwehn iang pasapeng nan mihting kan en mwomwohdiso. Tamanda me pweidahn mihting kin poahsoankihda atail perenki iang pasapeng ni ahl me konehng.—Mel. 26:12.