Dahme Kahrehda Konehng Kitail en Wehwehki Ihs me Imwintihtien Krais?
Mahs, ngehn sarawi kamwakid wahnpoaron menet en ntingihdi: “Kumwail rongehr me imwintihtien Krais pahn pwarodo.” (1 Sohn 2:18) Ia wen mahsen pwukat e kin inenen kamwakid madamadau en aramas! Erein pahr epwiki kei, aramas akan kin wie mengimengloalki wehwehn mahsen pwukat. Ihs me imwintihtien Krais? Iahd me e pahn pwarodo? Dahme e pahn wia ni ahnsou me e pahn pwarodo?
INENEN tohto irail akan me aramas kin ikidiki me dene irail wia imwintihti en Krais. Mahs, irail akan me kin kileldi me dene irail wia “imwintihtien Krais” iei me iangahki mehn Suhs akan, kaun en Catholic akan, oh Emperor en Rom akan. Karasepe ehu, ni ahnsou me Emperor Frederick II (1194-1250) pilada en dehr iang pidada nan mahwen kan me kin wiawi ni eden palien sarawi Pope Gregory IX kahdanekihla ih imwintihtien Krais oh padahkihong ahr tohn sarawi kan en sohla koasoiong ih. Weliepen Gregory, Innocent IV, pil kohda oh pil padahkihong aramas akan en dehr koasoiong Emperoro. Ni pali teio, Frederick uhd pakairki me Innocent ih me wia imwintihtien Krais.
Wahnpoaron Sohn kelehpw me doadoahngki lepin lokaia “imwintihtien Krais.” Nan kisinlikou riau me e kahdaneki pein mware, lepin lokaia wet pwarada pahn pak limau, oh ekei pak lepin lokaia wet kadoadoahk ohng aramas emen oh ekei pak e kin dokedoke aramas tohto. Ire kan me lepin lokaia wet pwarada loale kileldi nan kisin koakon me mih ni pali mwurin met. Sang ni ire pwukat, kitail kak kilang me imwintihtien Krais kin wia sounlikamw men oh sounpitih aramas emen, me koasoanehdier en kauwehla nanpwungmwahu me mih nanpwungen aramas oh Krais oh pil rehn Koht. Wahnpoaron menet kangoangehki Kristian akan: “Kompoakepahi kesempwal ko! Kumwail dehr kamehlele irail koaros me kin koasoia me ngehn sarawio kin ketiket rehrail, ahpw kumwail song irail pwe kumwail en wehwehki ma ngehn me mihmi rehrailo iei ngehno me ketido sang rehn Koht. Pwehki soukohp likamw tohto kin kohkohseli wasa koaros.”—1 Sohn 4:1.
Sises pil padahkiong kitail en kalekeikitailsang irail me likamw akan, de soukohp likamw akan, ni eh mahsanih: “[Irail] kin pwarodohng kumwail ni mwomwen sihpw, a loalarail re uhdahn rasehng kidien wel kan. Kumwail pahn esehkin irail arail wiewia.” (Madiu 7:15, 16) Iaduwen, Sises pil kin padahkiong kitail en kalekeikitailsang meno me kin mwete imwintihtien Krais? Kitail pahn kilang iaduwen kitail kak ese ihs sounlikamw lemei menet.