Awiawih Rahn en Siohwa ni Kanengamah
“Kapatahiong amwail pwoson . . . kanengamah.”—2 PITER 1:5, 6.
1, 2. Dahkot kanengamah, oh dahme kahrehda Kristian akan anahn ahneki met?
SAPWELLIMEN Siohwa rahn lapalapo kerendohr. (Soel 1:15; Sepanaia 1:14) Ni atail wia Kristian kei me koasoanedier nan kapehdetail me kitail pahn kolokolete atail lelepek ong Koht, kitail kin ngoangkihlahte wie kasikasik ahnsowo me sapwellimen Siohwa kaunda pahn ndandla. Ahpw nan ahnsou wet, kitail kin lelohng kailok, kapailok, kamakam, oh kamakamala pwehki atail pwoson. (Madiu 5:10-12; 10:22; Kaudiahl 2:10) Pwehki met, kitail anahne ahneki kanengamah—kehl en powehdi kahpwal kan. Wahnpoaron Piter kin kangoangehkin kitail: “Kapatahiong amwail pwoson . . . kanengamah.” (2 Piter 1:5, 6) Kitail anahne kanengamah pwe Sises mahsanih: “Me pahn dadaurete lel ni imwi, ih me pahn mourla.”—Madiu 24:13.
2 Kitail pil kin lelohng soumwahu, pahtou, oh pil soangen kahpwal teikan. Ia uwen Sehdan ah pahn inenen peren ma kitail pahn kin kesehla atail pwoson pwehki mepwukat! (Luk 22:31, 32) Sang ni sapwellimen Siohwa utuht, kitail pahn kak powehdi soangsoangen mehn kasongosong kan. (1 Piter 5:6-11) Kitail kak tehkpene ekspiriens kan me uhdahn wiawi me kin kadehde me kitail kak kanengamah oh awiawih rahn en Siohwa, oh atail pwoson sohte tikitikla.
Soumwahu Sohte Kin Kapweiek Iraildi
3, 4. Kihda karasepe pwehn kasalehda me kitail kak lelepek papah Siohwa mendahte ma kitail soumwahu.
3 Nan ahnsou wet Koht sohte kin ketin wiahdahte manaman pwehn kamwahwihkitailla, ahpw e kin ketikihong kitail kehl pwe kitail en kak ahneki kanengamah ni ahnsou en soumwahu. (Melkahka 41:1-3) Sharon koasoia: “Ih me I taman, wheelchair me kin wia iengei ahnsou koaros. Sangete ni ahnsou me I ipwidi, I mwoator kahrehda I sohte ahneki soangen mour en peren me seri teikan ahneki.” Ni en Sharon sukuhlikihier duwen Siohwa oh sapwellime inou me e pahn ketikihong aramas roson unsek, met kin kihong ih koapworopwor. Mendahkihte eh kin apwal ong ih en alu oh lokaia, e kin diar peren mehlel me kin kohsang ni eh kin wia doadoahk en kalohk me Kristian kin wia. Sounpar 15 samwalahro ako e koasoia: “Ei soumwahuet pahn kakete wie susuwedla, ahpw ei likih Koht oh ei nanpwungmwahu reh iei me wia uhrepen ei mour. E inenen kaperen en iang wia kisehn sapwellimen Siohwa aramas akan oh kin iang ale sapwellime utuht mehlel me sohte kak sapwungala!”
4 Wahnpoaron Pohl kin kangoangehki Kristian en Deselonika kan en kin “kakehlaka irail kan me nan kapehd tikitik” kan. (1 Deselonika 5:14) Soangen nsensuwedla laud wet, kin kak kahrehda pwunod. Nan 1993, Sharon ntingihdi: “Sang ni ei kin ahneki pepehm me ngehi aramas soh katepe men, kahrehiong ei kin . . . mihla nan irair en pahtou oh pwunod laud ki erein sounpar siluh. . . . Kamweit oh kaweid kin kohsang rehn irail elder akan. . . . Oh sang ni Kahn Iroir, Siohwa kin, ni kadek, ketikihda kasukuhl me pid dahkot pahtou oh pwunod laud. Ei, e kin ketin kupwure sapwellime aramas akan oh kin mwahngih arail pepehm akan.” (1 Piter 5:6, 7) Sharon kin wie papahte Koht ni lelepek ni eh kin awiawih sapwellimen Siohwa rahn lapalapo.
5. Mehn kadehde dahieu me kasalehda me Kristian kan kak powehdi pwunod laud?
5 Ekei Kristian kin ahnekihda irair en pahtou laud pwehki soahng kan me re lelohng nan mour. Harley pein kilangki mese mahwen laud me wiawi ni Mahwen Keriau en Sampah oh e kin ouramanki mahwen. Nin doken eh kin memeir, e kin weriwer nda: “Tehk kanahieng! Tehk kanahieng!” Ni eh kin pirida, pwudowe kin nekila. Ahpw, e kakehr kainenehla eh mour ong papah Koht, oh ekis ekis, soangen ouraman pwukat kin malaulaula.
6. Iaduwen emen Kristian eh kin lelohng soumwahu en madamadau?
6 Emen Kristian me toahkte kan diarada me e kohwahki soumwahu ieu me ede bipolar disorder kin apwaliki iang towehda doadoahk en kalohk en ihmw lel ihmw. Ahpw e kin nantihong ieiang wia doadoahk wet pwe e ese me doadoahk en kalohk kin wehwehki komour ong ih oh ong irail akan me kin mwekidiki padahk kan. (1 Timoty 4:16) Ekei pak e sohte kak lel wenihmw en letelet, ahpw e nda: “I pahn kin koasoakoasoane ei madamadau oh mwurin ahnsou kis ni e pahn kin soandi ah I kin kolahng ehu ihmw, oh pil mwuri I pil kin wia soahngohte. Sang ni ei kin kaukaule towehda doadoahk en kalohk, I kin kak kolokol toupahrek nan ei kehlail en pali ngehn.” Towehda mihding kan pil wia kahpwal laud, ahpw brother menet kamehlele me werekpene en pali ngehn wia mehkot kesempwal. Kahrehda e kin wia uwen eh kak koaros pwe en kin iang towehda.—Ipru 10:24, 25.
7. Mendahki ekei aramas kin masak lokaia nan pokon de pil masak iang towehda mihding kan, iaduwen arail kin kasalehda kanengamah?
7 Ekei Kristian akan kin ahneki irair en madamadau me ede phobia—masak mehkot de irair ieu nohn daulihala. Karasepe, irail kakete masak uhda oh koasoi mwohn aramas de pil iang towehda mihding. Ke kak medewehla ia pahn uwen apwal ren iang pasapeng nan mihding en Kristian akan de pil iang padahk nan Theocratic Ministry Sukuhl! Ahpw irail kin nantihong kanengamah oh powehdi, oh kitail kin inenen kapingki arail kin leledohng wasahn mihding oh iang kihda pasapeng kan.
8. Dahme kin inenen kesempwal nin doken aramas emen eh pahn kin nannantihong powehdi kahpwal en pepehm akan?
8 Kalaudehla ahnsou en kommoal oh meir kak sewese aramas emen en kak kanengamah oh powehdi kahpwal en pepehm akan. E mwahu ren kin repen sawas sang ni palien imwen wini. Ahpw me keieu doadoahk mwahu nan irair wet iei kehliki Koht ni kapakap. Melkahka 55:22 mahsanih: “Mweidohng KAUN-O omw kahpwal akan, eri e pahn ketin doareiukala; pwe e sohte kin ketin mweidohng me lelepek kan en lohdi.” Ni mehkoaros, “likih KAUN-O ni mohngiongomw unsek.”—Lepin Padahk 3:5, 6.
Kanengamah ni Ahnsou me Kompoakpatail Mehla
9-11. (a) Dahme kak sewesei kitail en kak powehdi atail pepehm en nsensuwed ni ahnsou en mehlahn koampokepatail emen? (b) Iaduwen mehn kahlemeng en Ana eh wia mehn sawas ong kitail pwe kitail en kak powehdi nsensuwed en mehla?
9 Ni ahnsou me mehla kin katohrepeseng tohnpeneinei kan, e kak imwikihla pahtou laud. Eipraam tentenihr ni ahnsou me sapwellime werek kompoak, Sara, sipalla. (Senesis 23:2) Pil ohl unsek Sises “tentenihr” ni ahnsou me kompoakepah Lasarus kepilsalehdala. (Sohn 11:35) Kahrehda, uhdahn ke pahn nsensuwed ni doken mehla eh kin ale aramas emen me ke kin poakepoake. Ahpw Kristian akan wehwehki me pahn mie iasada. (Wiewia 24:15) Kahrehda, irail sohte “kin nsensuwed duwehte irail kan me sohte ar koapworopwor.”—1 Deselonika 4:13.
10 Iaduwen atail pahn kak alehiong kitail kaloalamwahu ni ahnsou en nsensuwed en mehla? Ele karasaras wet pahn kak sawas. Atail pahtou sohte kin nohn reirei ni ahnsou me Kompoakepatail emen eh kin seiloak pwehki kitail ese me kitail pahn pwurehng tuhpene ni eh pahn pwurodo. Ni soangen elen madamadauohte, mehlahn Kristian lelepek emen kak katikala atail nsensuwed pwehki kitail ese me e pahn iang kaiasada.—Eklesiasdes 7:1.
11 Kehliki unsek “Koht me pwarer en kansenamwahu koaros” pahn kin sewesei kitail en powehdi atail nsensuwedki atail mehla kan. (2 Korint 1:3, 4) Pil dahme pahn wia sawas ong kitail iei ni atail pahn medemedewe dahme liohdi Ana wia nan ahnsoun Sises. E wiahlahr liohdi men mwurin eh pwopwoudkihier sounparte isuh. Ahpw ni eh mahkier sounpar 84, e kin wiewiahte eh papah sarawi ong Siohwa ni tehnpas sarawio. (Luk 2:36-38) Soangen mour poadidi wet kin inenen sewese ih en powehdi eh pepehm en pahtou oh sangat. Kaukaule towehda wiewiahn Kristian akan, kak sewesei kitail en powehdi atail pepehm en nsensuwedki atail mehla kan.
Powehdi Soangsoangen Kahpwal akan
12. Mehnia soangen kahpwal akan me ekei Kristian akan kin lelong nan arail mour en peneinei?
12 Ekei Kristian akan uhdahn pahn kin nannantihong powehdi kahpwal akan me pid mour en peneinei. Karasepe, ma eh pwoud wiahda dipen kamwahl, ia uwen met eh pahn kin kahrehdo kahpwal laud! Sang ni pwuriamwei oh nsensuwed, aramas me dihpo wiawihiong pahn kakete sohte kak meir oh sohte kak kol eh men sengiseng. Wiewia eh kisin doadoahk kan kakete wia mehkot kapwang oh sapwungalahn doadoahk kin kalap pwarada. Aramas me sohte wiahda dihpo kakete kahngala mwenge, oh tihtihkihla, oh pil kak ahneki kahpwal en pepehm. E pil kak wia kahpwal en iang towehda wiewiahn Kristian akan. Oh seri kan pahn lelkihong kahpwal laud!
13, 14. (a) Mehn kangoang dahieu me ke kak alehsang ni sapwellimen Solomon loulou en ni ahnsou en kasarawi en tehnpas sarawio? (b) Dahme kitail en pekihki ngehn sarawi?
13 Ni atail kin lelong soangen kahpwal pwukat, Siohwa kin ketikihda sawas me kitail anahne. (Melkahka 94:19) E sansal nan sapwellimen Nanmwarki Solomon loulou en ni ahnsou en kasarawi en Tehnpas en Siohwa, me Koht kin ketin karonge kapakap akan en sapwellime aramas akan. Solomon kapakapohng Koht, mahsanih: “Eri, komw ketin karonge arail kapakap akan, Ma mie nanpwungen sapwellimomwi aramas akan en Israel me koluhla ni mehlel, oh kapahwei pehrail ong Tehnpas wet ni kapakap, eri, komw ketin karonge arail kapakap. Komw ketin karonge irail sang nan mwoalomwi nanleng, komw ketin mahkohng irail oh seweseirailda. Komwihte me mwahngih lamalam en aramas. Komw ketin wiahiong emenemen nin duwen me konehng, pwe sapwellimomwi aramas akan en peikiong komwi ahnsou koaros ni arail koukousoan nan sahpw me komw ketikihong at pahpa kahlap ako.”—1 Nanmwarki 8:38-40.
14 E kak inenen sawas kitail en kin kaukaule kapakap oh peki ngehn sarawi. (Madiu 7:7-11) Wahn ngehn akan kin pidada soangen irair me duwehte peren oh meleilei. (Kalesia 5:22, 23) Ia uwen pepehm en kamaiau me kitail kin ahneki ni ahnsou me Samatail nanleng kin ketin sapeng atail tungoal kapakap akan—peren kin uhd weliandi sengiseng, oh meleilei kin uhd weliandi pwunod!
15. Mehnia iren Pwuhk Sarawi kan me pahn kak katikala atail pwunod?
15 Ni atail pahn kin lelong kapwunod laud akan, kitail pahn kasik me kitail pahn kin ahnekihda uwen tihwohla ieu. Ahpw atail pwunod pahn ekis tikitik ma kitail pahn kin tamanda mahsen en Sises pwukat: “Kumwail dehr kin pwunodki kisin mwenge oh pihl ong mourimwail kan, dahme kumwail pahn kin kang de dahme kumwail pahn kin nim; de amwail likou, dahme kumwail pahn kin likawih. ... Eri, kumwail rapahki mahs Wehin Koht oh dahme e kin ketin kupwurki, a soahng teikan koaros e ahpw pahn ketikihong kumwail.” (Madiu 6:25, 33, 34) Wahnpoaron Piter kangoangehkin kitail en ‘mweidohng ih atail pwunod koaros, pwehki eh kin ketin apwahpwalih kitail.’ (1 Piter 5:6, 7) E konehng kitail en nantihong song kamwahwihala kahpwal ieu. Mwurin atail wiahier dahme kitail kak wia, e sohte pahn wia sawas ehu ong kitail ma kitail mwomwohdete wie pwunpwunod, ahpw kapakap iren kahpwalo iei me pahn kak sewese kitail. Sounmelkahkao mahsanih: “Mweidohng KAUN-O pein kowe; likih, e ahpw pahn seweseiuk.”—Melkahka 37:5.
16, 17. (a) Dahme kahrehda kitail sohte kak kihsang douluhl kapwunod en mour? (b) Dahme kitail pahn ale ma kitail doadoahngki iren Pilipai 4:6, 7?
16 Pohl ntingihdi: “Kumwail dehr pwunodki mehkot, ahpw nan amwail kapakap akan kumwail en peki dahme kumwail kin anahne. Amwail kasapahlkalahngan en pil iang amwail kapakap ahnsou koaros. Eri, sapwellimen Koht popohl, me inenen laudsang uwen atail dehdehki, ahpw pahn nekinekid mohngiongimwail oh pil amwail lamalam rehn Krais Sises.” (Pilipai 4:6, 7) Uhdahn, kadaudok soh unsek en Adam akan sohte kak pitsang douluhl kapwunod en mour. (Rom 5:12) Ahn Esau pwoud mehn Id kan wia utupen “nsensuwed mehlel” ong ahn Esau pahpa oh nohno pwoson akan, me iei Aisek oh Repeka. (Senesis 26:34, 35) Soumwahu ele kin wia mehn kapwunod ong mour en Timoty oh Tropimus. (1 Timoty 5:23; 2 Timoty 4:20) Pohl kin pwunodki ienge me pwoson akan. (2 Korint 11:28) Ahpw “Soun Karonge Kapakapo” kin ahnsou koaros ketikihda eh ahnsou pwehn sewese irail ako me kin limpoak ong ih.—Melkahka 65:2, NW.
17 Nin doken atail wie awiawih sapwellimen Siohwa rahno, kitail kin ale utuht oh kamweit sang rehn “Koht me kin ketikihong kitail popohl.” (Pilipai 4:9) Siohwa me kin “diren kalahngan oh kadek,” e me “kupwur mwahu oh diren mahk ong kiht,” oh ‘e ketin tamataman me kitail uhdahn pwehl.’ (Eksodus 34:6; Melkahka 86:5; 103:13, 14) Kahrehda kitail en ‘peki reh dahme kitail kin anahne,’ pwe met pahn imwikihla atail ale “sapwellimen Koht popohl”—irair en meleilei me daulih dahme tohn sampah kin ese.
18. Nin duwen atail kilangehr nan Sohp 42:5, iaduwen atail kak “kilang” Koht?
18 Ni ahnsou me kitail kin alehdi pasapeng ong atail kapakap kan, kitail kin ese me Koht kin ketin ieiang kitail. Mwurin Sohp eh powehdier eh kahpwal akan e mahsanih: “Eri, mahso I patohwan esehte dahme aramas teikan patohwanohng ie, a met I pein patohwan kilangkinkomwiher mesei kat.” (Sohp 42:5) Sang ni mesen pwoson kitail kakehr tehksapahl sapwellimen Koht wiewia ong kitail oh kitail kakehr “kilang” ih ni ahl me weksang mahso. Soangen kerenpene wet kin kahrehiong kitail en ahneki meleilei en mohngiong oh madamadau!
19. Dahme pahn wiawi ma kitail ‘mweidohng Siohwa atail pwunod koaros’?
19 Ma kitail pahn ‘mweidohng Siohwa atail pwunod koaros,’ kitail pahn kak powehdi songosong kan ni atail ahneki nan kapehd meleilei me pahn pere mohngiongitail oh atail kehl en madamadau. Nan wasa keieu loal nan mohngiongitail ni karasaras, kitail pahn diar me kitail sohte pwunod, masak, oh lingeringer. Atail madamadau sohte pahn pingada de pwunod.
20, 21. (a) Dahme lelohng Stipen wia mehn kadehde dahieu duwen nan kapehd meleilei ni ahnsou en kalokolok? (b) Kasalehda mehn karasepe ieu nan atail ahnsou me pid nan kapehd meleilei ni ahnsou en powehdi kalokolok kan.
20 Tohnpadahk Stipen kasalehda nan kapehd meleilei ni eh lelohng koasonepen eh pwoson me keieu laud. Mwohn eh wia keimwiseklahn eh kadehde, irail koaros me mih nan Mwoalen Kopwung Lapalap en Sanhedrin, ahpw “kilangada me meseo likamwete mesen tohnleng men.” (Wiewia 6:15) Pohn meseo inenen meleilei—duwehte mesen tohnleng, sounkair en Koht emen. Mwurin Stipen eh kasalehdahr arail sapwung me pid matalahn Sises, soun kopwung kan “inenen lingeringerda oh ngih tehte ong.” Stipen ahpw “direkihla Ngehn Sarawi oh saradahng nanleng oh udiahl sapwellimen Koht lingan oh pil Sises me ketiket ni palimaun en Koht.” Stipen eri kehlailkihda kasansalo, oh ih eri kolokol eh lelepek lel mehla. (Wiewia 7:52-60) Mendahte atail sohte kin ale kapoudial akan, ahpw kitail kak ale meleilei me kin pwilisang Koht ni ahnsou me kitail kin lelohng kalokolok.
21 Tehk duwen peren en ekei Kristian akan me kin kamakamala nan pehn mehn Nazi kan nan Mahwen Keriau en Sampah. Emen irail koasoia eh ekspiriens nan mwoalen kopwung: “Pwunglahn kopwung kohdahr ong me I pahn kamala. I rongehr, oh eri mwuri I ahpw nda lepin koasoi pwukat, ‘Komwi lelepek lel mehla,’ oh pil ekei sapwellimen atail Kauno mahsen teikan, eri kopwungo imwiseklahr. Soangen meleilei, soangen nan kapehd saledek me I ahneki, ke sohte kak lemehiong!” Kristian pwulopwul emen kamala ni arail lupukasang moange oh e ntingkihwohng eh pahpa oh nohno: “Met dauliher nan lukepen pwong. Miemiehte ahnsou en ien wekidala ei pilipil. Ah! kak ien pwurehng peren nan sampah wet ma I pahn kahmahmkihla atail Kauno? Uhdahn soh! Ahpw met kumwail kak koapworopworki me I mwesel sang sampah ni peren oh meleilei.” Sohte kerempwa ieu me Siohwa kin ketin utung sapwellime ladu lelepek kan.
Ke Kak Powehdi!
22, 23. Dahme ke kak koapworopworki nin doken omw kin kanengamah oh awiawih rahn en Siohwa?
22 Ele ke sohte pahn lelohng soangen songosong me duwehte dahme kitail koasoiadahr kan. Ahpw Sohp me kin lahn Koht kin pwung ni eh nda: “Aramas koaros ahneki soangen mourteieu me mwotomwot oh diren apwal.” (Sohp 14:1) Mwein ele kowe emen pahpa de nohno me kin doadoahk laud pwehn kihong noumw seri kan kaweid en pali ngehn. Irail anahne powehdi kahpwal akan nan sukuhl, ahpw ia uwen peren me ke pahn ahneki ni ahnsou me irail kin uhkihda teng Siohwa oh sapwellime mour en kosonned pwung kan! Ele ke kin lelohng apwal akan oh kasongosong kan nan omw wasahn doadoahk. Mepwukat oh pil soangen irair teikan ke kak powehdi, pwehki ‘Siohwa kin ketiki atail tungoal wisik toutou kan rahn koaros.’—Melkahka 68:19.
23 Mwein ke kin wiahki me ke sohte siksang aramas teikan, ahpw tamataman me Siohwa sohte pahn ketin likidmeliehla omw doadoahk oh limpoak me ke kasalehda pwehki mware sarawi. (Ipru 6:10) Sang ni sapwellime sawas, ke kak powehdi songepe kan en omw pwoson. Kahrehda tamataman kupwuren Koht nan omw kapakap oh pilahn akan. Eri ke pahn kak koapworopworki kapai oh utuht sarawi nin doken omw kanengamah oh wie awiawih rahn en Siohwa.
Iaduwen Ke pahn Sapeng?
• Dahme kahrehda Kristian akan anahne kanengamah?
• Dahme pahn kin sewese kitail pwe kitail en powehdi kahpwal en soumwahu oh nsensuwed en mehla?
• Iaduwen kapakap eh kin sewese kitail en powehdi apwal akan?
• Dahme kahrehda kitail kak kanengamah oh awiawih rahn en Siohwa?
[Kilel nan pali 25]
Kehliki Siohwa kin sewesei kitail en powehdi atail nsensuwedki atail mehla kan
[Kilel nan pali 27]
Kapakap sang nan mohngiongitail kin sewese kitail en powehdi apwal akan