Peidek kan Sang Sounwadawad kan

Pwehki pahngok kohwong mehn Suhs akan en dehr doadoahngki mehkot me doaleki “ihs” nan kasarawi en Pahsohpa, ah dahme kahrehda Sises doadoahngkihki wain?—Eksodus 12:20; Luk 22:7, 8, 14-20.

Kataman en Pahsohpa, mehn wia kilelepen ahn mehn Israel kan arail pedoisang nan Isip, oh met tepin wiawi nan pahr 1513 B.C.E. Ni ahnsou me Siohwa ketikihda sapwellime kaweid ong duwen mwomwen kataman wet eh pahn wiawi, e mahsanih: “Sohte ihs pahn mihmi nan imwamwail kan.” (Eksodus 12:11, 20) Keinapwidi sarawi wet kin dokedokehte soangen pilawa me aramas akan kin kang ni ahnsou en Pahsohpa. Wasaht sohte koasoi me pid wain.

Me poahsoanihada kahrepen keinapwidi en doadoahngki ihs pwehki mehn Israel kan mweseldahsang nan wehin Isip ni karuwaru. Pwuhken Eksodus 12:34 kawehwehda, “aramas ako eri ale arail pilawa ko mwohn eh saikinte doalihsda, oh me mihmihte nan deuparail, koarukipene nan arail likou kan oh kapaikada oh mwesel.” Kahrehda arail sohte doaleki ihs nan Pahsohpa mwurinte mwo pahn wia mehn kataman ong dihen mwuri kan mwekid kesempwal wet.

Mwurin ahnsou kis, madamadau me ihs kin uhd wia kilelepen dihp oh ohla, uhd pwarada. Karasepe, ni ahnsou me Pohl koasoia duwen aramas mour suwed emen me mihmi nan mwomwohdiso, e peidengki: “Kumwail tamataman lepin kahso: ‘Kisin pwidik en ihs kin koumpwosehda nesen pilawa ieu pwon.’” Ih eri doula oh koasoia: “Eri, kumwail koahkoahsang rehmwail kisin ihs kitei en dihp wet, pwe kumwail en mwakelekella mehlel oh wiahla nesen pilawa amas kapw me sohte doal ihs kitei; pwe I ese me kumwail koaros saikinte doaleki ihs kitei wet. Pwe atail Sarawien Pahsohpa kaunopadahr, pwe Krais, atail Sihmpwul en Pahsohpa, meirongalahr. Kitail eri wiahda atail Pahsohpa, kaidehn ni pilawa doal ihs kitei, ihs en dihp oh tiahk samin, ahpw ni pilawa amas kapw me sohte doal ihs, pilawa me mwakelekel oh mehlel.” (1 Korint 5:6-8) Pilawa me sohte doaleki ihs kelehpw me kak wia karasepen paliweren Sises me sohte dipe.—Ipru 7:26.

Doadoahngki wain ni ahnsou en Pahsohpa iei wiewia kapatapat ieu me mehn Suhs akan ahpw wiahda mwuhr. Irail kakete kapatahiong met mwurin arail pwurodohsang ni arail sellahng nan Papilonia. Mahsen nan Paipel sohte kin kasalehda me e sapwung wiewia wet, oh kahrehda Sises ah kak ketin doadoahngki ni pwung, wain ni saken en Pahsohpa. Ni mehlel, karerala me uhdahn kin wiawi ong wain kawao, kin weksang dahme kin wiawihong pilawa. Me pid pilawa idaidpeseng, kampwos kin anahne ihs en doaliong loale. Wain me kin wiawihsang ni kreip sohte anahne ihs en kapatapatong. Dahme kin kahrehda en karerlahu kin uhdahn mihier loale. Sohte pilen kreip kapw kak dierek ni rahn en Pahsohpa pwe e kak mihmi ahpw sohte karerala sang ni ahnsou en dondol nan sounpwong en September ape oh lel nan March ape.

Kahrehda, ahn Sises doadoahngki wain en wia kasarawi en Kataman sohte uhwong koasoandi en Pahsohpa me pid duwen doadoahkepen ihs. Soangen wain weitahta me sohte suke kin doalehng loale, sohte ehu soahng tohrohr de pil mehn wiahda en kerengireng kin doalehng loale kak wia mehn kilel konehng ieu oh kasalepen sapwellimen Krais “nta kesempwal.”—1 Piter 1:19.