Dahkot Pahsohpao?

Paipel sapengki

Pahsohpa iei en mehn Suhs kan ar kin kasarawih ahnsou me Koht ketin kapitala mehn Israel kan sang kalidu nan Isip nan pahr 1513 Mwohn Krais. Koht ketin kehkehlingkihong mehn Israel kan en tamataman rahn kesempwal wet ehuehu pahr ni kaeisek pahieun sounpwong Abib en kalender en mehn Suhs, me mwuhr adanekihla Nisan.—Eksodus 12:42; Lipai 23:5.

Dahme kahrehda e kahdaneki Pahsohpa?

Lepin lokaia “Pahsohpa” dokedoke ahnsou me Koht ketin kapitala mehn Israel ko sang kalokolok me kemehla tepin mesenih koaros nan Isip. (Eksodus 12:27; 13:15) Mwohn Koht eh ketikihdo kalokolok laud wet, e ketin padahkihong mehn Israel ko ren usupihki arail wenihmw kan ntahn sihmpwul de kuht me re kemehla. (Eksodus 12:21, 22) Koht pahn ketin mahsanih kilel wet oh ketin “daulih” imwarail kan oh sohte pahn ketin kemehla neirail mesenih kan.​—Eksodus 12:​7, 13.

Ia duwen irail kan nan Paipel ar kin wia Pahsohpa?

Koht ketikihong mehn Israel kan kaweid kan ong ia duwen arail pahn kasarawih tepin Pahsohpao.a Ekei soahng kan me kin wiawi erein Pahsohpa me kileldi nan Paipel kin iangahki soahng pwukat.

• Meirong: Ni kaeisek en rahn en Abib (Nisan), peneinei kan kin pilada emen sihmpwul (de kuht) me sounpar ehu oh kemehla ni 14 en sounpwongo. Ni tepin Pahsohpao, mehn Suhs ko usupihki ekis ntahn mahno pohn uhr kan oh temwen arail wenihmw kan, karangada mahno pwon, oh kangala.​—Eksodus 12:​3-9.

• Dahme re kin kang: Patehng sihmpwulo (de kuhto), mehn Israel kan kin kang pilawa me sohte doal ihs oh tehntuhke katik kan ong mwengehn Pahsohpao.​—Eksodus 12:8.

• Kamadipw: Mehn Israel kan kin wia Kamadipw en Pilawa me Sohte Doal Ihs, me kin reireiki rahn isuh mwurin Pahsohpao, oh erein ahnsowo irail sohte kin kang pilawa me doal ihs.​—Eksodus 12:17-​20; 2 Kronikel 30:21.

• Kasukuhl: Pahpa nohno kan kin doadoahngki rahnen Pahsohpao pwehn padahkihong neirail seri kan duwen Siohwa Koht.​—Eksodus 12:25-27.

• Seiloak: Mwuhr mehn Israel kan kin seiloakla Serusalem pwehn kasarawih Pahsohpao.​—Deuderonomi 16:​5-7; Luk 2:​41.

• Tiahk teikan: Ni mwehin Siseso, koulki koul kan oh en kin nim wain kin iang wia kisehn Pahsohpao.​—Madiu 26:19, 30; Luk 22:15-​18.

Madamadau sapwung kan duwen Pahsohpao

Madamadau sapwung: Kristian kan anahne kasarawih Pahsohpao.

Ire mehlel: Mwurin Sises eh ketin kasarawih Pahsohpao ni Nisan 14 pahr 33, e ketin kawehwehda duwen kasarawi kapw ehu: Sak en Soutik en Kauno. (Luk 22:19, 20; 1 Korint 11:20) Sak wet wiliandi Pahsohpao pwehki e kin katamanda meirong en “Krais atail sihmpwul en Pahsohpa.” (1 Korint 5:7) Sapwellimen Sises meirong en pweinen pweipwei sapahlo manaman sang meirong en Pahsohpao pwehki e kin kasaledekihala aramas koaros sang wia lidu en dihp oh mehla.​—Madiu 20:28; Ipru 9:​15.