Nekinekid “Omw Limpoak En Mahso”

“Nekinekid mwahu dahme ke kolokol.”—KAUD. 3:11.

1, 2. Ia ahmw pepehm ni ahnsou me ke tepiada kamehlele me soahng kan ke kin sukuhliki duwen Siohwa kin uhdahn mehlel?

KE KIN tamanda ni ahnsou me ke ahpwtehn esehda duwen rong kaselel kan me Siohwa ketikihda ong aramas akan me kin peikiong ih? Ma ke iang ehu pelien lamalam tohrohr mahs, ia ahmw pepehm ni ahnsou me emen kin kawehwehiong uhk duwen sapwellimen Koht kupwur akan sang nan Pwuhk Sarawi de ni ahnsou me ke wehwehkihda duwen padahk kan me ke kin sohte nohn wehwehki? Ele ke diarada me mahs ke sohte kin alehdi padahk pwung kan me pid duwen Koht. Ahpw ia uwen kaperen met ni ahmw wehwehkihda padahk mehlel kan. Ma kowe emen me tikida rehn pahpa nohno kan me wia Kristian mehlel kei, ke kin tamanda iaduwen ahmw pepehm ni ahnsou ke tepiada kamehlele me soahng kan me ke sukuhliki duwen Siohwa iei me uhdahn mehlel oh ke piladahier en mour pahrekiong dahme ke kin sukuhlikihdi?—Rom 12:2.

² Tohto riatail Kristian kan pahn koasoiaiong uhk duwen peren laud me re pehm ni ahnsou me re karanihala Siohwa oh pil arail pepehm en kalahngan ni eh ketin kahrehiong irail en wia met. (Sohn 6:44) Soangen peren wet kahrehiong irail en men iang wia doadoahk kan en Kristian. Arail kin dirkihla peren wet kin kahrehiong irail en men ehukihong aramas koaros duwen arail pepehm. Ke kin ahneki soangen pepehm me duwehte met?

3. Soangen irair dahieu me mwomwohdiso en Episos ahneki ni ahnsou Sises ketin kadarowohng sapwellime mahsen kan ong irail?

³ Ni en Sises ketin mahmahsen ong tepin Kristian kan nan mwomwohdiso en Episos, eh mahsen kan kin pid duwen “omw limpoak en mahso.” Mehn Episos kan ahneki irair mwahu tohto, ahpw limpoak me re tepin ahneki ong Siohwa tikitikla. Ih kahrepe wet me Sises ketin mahseniong irail: “I ese omw wiewia kan; I ese apwal en omw doadoahk kan oh uwen omw kanengamah. I ese duwen omw sohte kin pwungki aramas suwed kan, oh duwen omw rapahkidahr me mwersuwed kan me kin pein wiahkin irail wahnpoaron, oh duwen omw diaradahr ar likamw. Ke inenen kanengamah; uwen omw lokolongkin ie me laud mehlel, ke ahpw sohte mwahn nan kapehd tikitikla. Ahpw iet mehkot me I suwedki rehmw: omw limpoakohng ie tikitiklahr, e sohte duwehte omw limpoak en mahso.”—Kaud. 2:2-4.

4. Dahme kahrehda sapwellimen Sises mahsan en kaweid ong mehn Episos kan kin kesempwal ong kitail rahnwet?

⁴ Sapwellimen Sises kaweid me sansalda nan pwuhken Kaudiahl ong mehn Episos kan oh mwomwohdiso teikan kin pwungiong irair akan me ahnsoukis kin pwarada nanpwungen Kristian keidi kan me mihmi erein ahnsou kan sang 1914 oh mwurihdo. (Kaud. 1:10) Ahpw met pil kak wiawi ong Kristian akan en rahnpwukat, irail kak sohla ahneki soangen “limpoak en mahso” me re ahneki ong Siohwa oh ong padahk mehlel. Ni atail kin medemedewe duwen met, kitail pahn tehkpene iaduwen atail kin tamanda oh pil medemedewe pein atail irair akan me kitail lelong kak sewese kitail en kak kolokol, kamwahwihala oh kalaudehla limpoak oh ngoang me kitail kin mahs ahneki ong Koht oh padahk mehlel.

Dahme Kin Kamehlelehiong Uhk me Ke Sukuhlikihdi Padahk Mehlel?

5, 6. (a) Dahme emenemen Kristian akan anahne en kamehlelehiong pein ih? (b) Dahme kahrehiong uhk en kamehlele me Sounkadehdehn Siohwa kan kin padahngki padahk mehlel? (c) Dahme kak sewese emen en pil ehu ahneki soangen limpoak me e ahneki mahso?

⁵ Koaros me inoukihda ar mour ong Siohwa kin anahne en pein kamehlelehiong irail mahs “dahme mwahu, oh dahme e kin ketin kupwurperenki, oh dahme unsek.” (Rom 12:1, 2) Ehu kisehn soahng kan me kin pidada duwen met, iei en sukuhliki duwen padahk mehlel kan en Paipel. Dahme kin kamwakid emen en kamehlelehla me Sounkadehdehn Siohwa kan kin padahngki padahk mehlel kin ele kak weksang dahme kin kamwakid meteio. Ekei kin tamanda me arail tepin mwekidki padahk mehlel iei ahnsou irail wadekada mwaren Siohwa nan Paipel de ni ahnsou irail wehwehkihda dahme kin uhdahn wiawihong aramas ni ahnsou me re kin mehla. (Mel. 83:18; Ekl. 9:5, 10) Dahme kin kamwakid meteikan iei limpoak me sapwellimen Siohwa aramas akan kin kasalehda nanpwungarail. (Sohn 13:34, 35) Ahpw pil ong ekei, re kin mwekidki ireo me wehwehki en sohte wia kisehn sampah. Imwilahn met, re kin pwungkihla me Kristian mehlel kan sohte kak pidada uhpene en palien politik de mahwen kan nanpwungen wehi kan en sampah.—Ais. 2:4; Sohn 6:15; 17:14-16.

⁶ Ong me tohto soangen kawehwe pwukat me sansal powe oh ire mehlel teikan iei me kin katapiada arail limpoak ong Siohwa. E mwahu ke en wiahda ahmw ahnsou en medemedewe oh tamanda ire kan me kin kamwekidih iuk en kamehlelehla padahk mehlel. Ma kowe emen me ahneki irair kan me weksang en me tohto, eri kahrepe kan me katapiada ahmw limpoak ong Siohwa oh kamehlelehla sapwellime inou kan pahn uhdahn weksang en meteikan. E kak en mehlel me ire kan me kin kamwakid uhk rahn wet iei me kin pil kamwakid uhk nin tepio. Padahk mehlel sohte kin wekidekla. Ihme ni ahmw kin katamando madamadau oh pepehm kan ke kin ahneki ong padahk mehlel pahn kapwurehda de kalaudehla ahmw limpoak ong padahk mehlel duwehte mahs.—Wadek Melkahka 119:151, 152; 143:5.

Kalaudehla Ahmw Limpoak en Mahso

7. Dahme kahrehda kitail anahne en kalaudehla atail limpoak en mahs ong padahk mehlel oh iaduwen kitail kak wia met?

⁷ Ele soahng tohto kan kin wekila nan ahmw mour sang ni ahnsowo me ke inoukihda ahmw mour ong Siohwa. Ahmw limpoak en mahs kin kesempwal, ahpw mwuhr ke pahn anahne en kaloalehla limpoak wet pwe ken kak dadaur ni ahmw pahn lelohng kahpwal kan me pahn pwarada pwehn kasonge ahmw pwoson. Ahpw Siohwa pahn ketikihong uhk kehl oh sawas me ke anahne pwe ken kak kaloalehla limpoak me ke ahneki. (1 Kor. 10:13) Ihme kahrehda ahmw irair kan me ke lelohng erein sounpar kei kohkohdo kin pil kesempwal ong uhk. Irair pwukat kin sewesei iuk en kakairada limpoak me ke ahneki nin tepio oh irair pwuko kin pil kak elehieng uhk en kasalehiong pein uhk dahme mwahu, oh dahme Koht kin ketin kupwurperenki.—Sos. 23:14; Mel. 34:8.

8. Iaduwen Siohwa ketin kasalehiong Moses duwen pein ih, oh iaduwen mehn Israel kan esehla oh karanihala Siohwa?

⁸ Pwehn karasahda duwen met, medewehla irair en mehn Israel kan ni ahnsou me Siohwa ketin mahsanihong irail duwen kupwure en kapitirailla sang kalidu pahn mehn Isip kan. Koht ketin kasalehda duwen pein ih ong Moses ni eh mahsanih: “I pahn wiahla ni mehlel dahme I pahn wiahla.” (Eks. 3:7, 8, 13, 14, NW) Met wehwehki me Siohwa mahmahsanih me e pahn ketin wia mehkoaros me konehng pwehn ketin kapitala sapwellime aramas akan. Mwurin mwo oh pwehki eh konehng, mehn Israel kan kin kilang soangsoangen irair me Siohwa sapwellimaniki nin duwen—Wasa Lapalahpie, Sounkopwung Lapalap, Kaun Lapalap, Sounkomour, Sounpei, oh Sounketikihda mehkoaros me mwahu.—Eks. 12:12; 13:21; 14:24-31; 16:4; Neh. 9:9-15.

9, 10. Soangen irair dah kei kak sewese iuk en esehla Koht oh dahme kahrehda e mwahu en tamanda soangen ahnsou pwukat?

⁹ Ahmw irair kin weksang irair en mehn Israel en mahs. Ahpw mendahki met, ele ke lelohngehr soangen irair kan me kin kahrehiong uhk en kamehlelehla me pein Koht kin ketin nsenohki en apwahpwalih iuk, oh met ele kin kalaudehla ahmw pwoson. Ele Siohwa ketin kasalehda me e ketin wia Sounketikihda men, Sounkamweit men oh Sounpadahk men. (Wadek Aiseia 30:20b, 21.) De mwein ke wehwehkihda ni sansal pasapengpen ahmw kapakap. Ele ke lelong nan kahpwal ehu oh iengomw Kristian men sewese iuk. De ahmw kin pein onop ele kasalehiong uhk iren pwuhk sarawi kan me kak sewese ahmw irair en kahpwalo.

¹⁰ Ma ke pahn koasoiaiong meteikan duwen soahng kan me ke lelong, ekei mwein sohte pahn kalahnganki irair ako duwehte ahmw kin kalahnganki. Mwein pwehki dahme wiawi kaidehn manaman kei. Ahpw ong kowe irair ako me inenen kesempwal. Ei, Siohwa kin ketin kasalehda me dahme e ketin wia iei me uhdahn anahn ong pein uhk. Nna song medewehla duwen erein sounpar kan me ke kin mihmihki nan padahk mehlel. Ke kak tamanda duwen ahnsou kan me ke kin pehm duwen en Siohwa kin ketin kasalehda eh kin ketin nsenohki oh apwahpwalih iuk nan ahmw mour? Ma iei, eri ahmw kin tamanda soangen ahnsowo oh soangen pepehm akan me ke kin ahneki kak kapwurehdo nan omw mohngiong soangen pepehm en limpoak ohte me ke ahneki ong Siohwa nin tepio. Ke anahne en kin kesempwaliki oh kalahnganki soangen irair pwukat. Doudouloale duwen irair pwukat. Mepwukat iei kasalepen en Siohwa kin nsenohki iuk oh sohte emen aramas kak kauhdi ahmw kin kamehlele duwen met.

Wia Keseupen Pein Omw Irair kan

11, 12. Ma en Kristian men eh limpoak ong padahk mehlel kin tikitikla, dahme ele kin kahrehda met oh mehnia kaweid Sises ketikihda?

¹¹ Ma ke solahr ahneki limpoak ong Koht oh padahk mehlel duwehte mahs met sohte wehwehki me sapwellime koasoandi kin ketin wekila. Siohwa sohte kin ketin wekila. (Mal. 3:6; Seims 1:17) E ketin nsenohki en apwahpwalih iuk mahs duwehte eh kin ketin nsenohki en apwalih iuk rahnwet. Eri iaduwen ma mehkot wiawi pwehn kahrehiong omwi nanpwungmwahu rehn Siohwa en wekila? Iaduwen, ke sou kin pehm me ahmw iren kapwunod kan tohtohla, oh ke nohn kin kedirepwkihla kapwunod en mour? Mwein mahs ke kin kapakap ni ngidingid, pwerisek en onop oh kin kalapw doudouloale duwen ire kan me ke onopki. Iaduwen, ke kin pwerisek en kalohk oh kaukaule towehda mihding kan rahnpwukat laudsang omw kin wia mahs?—2 Kor. 13:5.

¹² Mwein ke sohte pahn kak diarada soangen wekidekla kei me ke ahneki mwurin omw kin kasawih pein omw irair kan, ahpw ma ke pahn kak diarada, eri dahme kahrehiong uhk en ahneki wekidekla pwukat? Iaduwen, kahrepe konehng kan duwehte en apwalih omw peneinei, nsenohki irair en omw roson mwahu de soangen epwel teikan kin kihsang madamadau en karuwaru me ke ahneki ong mehkan me pid ketidohn sapwellimen Siohwa rahno? Sises ketin padahkihong sapwellime wahnpoaron kan: “Kumwail pein mwasamwasahn kumwail. Kumwail dehr kedirepwehkin kumwail mwenge laud oh sakau kehlail, oh pwunod kan en sampah wet; pwe Rahno kakete leledohng kumwail ni ahnsou mwadang. E pahn kohdo, rasehng nsar ehu ong aramas koaros nin sampah. Kumwail eri mwasamwasahn, oh kapakap ahnsou koaros pwe kumwail en kehlail oh itarohng pitsang mepwukat koaros me pahn wiawi.”—Luk 21:34-36.

13. Dahme Seims kin karasahiong Mahsen en Koht?

¹³ Sounnting en Pwuhk Sarawi Seims kin kangoange ienge tohn kaudok mehlel kan en doadoahngki Mahsen en Koht oh kasawih pein irail ni pwung. Seims ntingihdi: “Kumwail kapwaiada mahsen en Koht, pwe ma kumwail pahn rongorongete, kumwail pahn pitih pein kumwail. Pwe mehmen me kin rongete mahsen en Koht ahpw sohte kin kapwaiada, e rasehng aramas me kin irongen nan kilahs ehu oh kin kilang uhdahn mwomwen pein ih. A ni eh kin keisang ni kilahso, e kin mwadang manokehla mwomwe. A me kin tehk mwahu kosonned unseko me kin kasaledekla aramas, me iei rongamwahu en Krais, oh kin dadaurete, sohte kin rongete oh manokehla, ahpw kapwaiada—iei aramas menet me Koht pahn ketin kapaiahda ni mehkoaros me e pahn kin wia.”—Seims 1:22-25.

14, 15. (a) Iaduwen Paipel kak sewese iuk en wiahla Kristian mwahu men? (b) Soangen peidek dahkei me ke kak ele medemedewe?

¹⁴ Aramas emen kak doadoahngki kilahs en irong pwe en kak tehk ma e mwomw mwahu. Karasepe ehu, ma aramaso kilang me eh nektaito pirek, e kak kainenehla. Ma lih emen kilang me pitenmoange kan pingada, e kak koasoanehdi. Duwehte met, Pwuhk Sarawi kin sewese kitail en kasawih duwen kitail. Ma kitail kin kapahrekiong pein kitail ong dahme Paipel ketin kaweidki, eri kitail kin doadoahngki duwehte atail kin doadoahngki kilahs en irong. Ahpw ia katepen atail kin irongen nan kilahs en kilang ma kitail sohte pahn kapwungala sapwung ehu me kitail kilangada? E pahn wia elen erpit ma kitail kin mwekidki dahme pahrekiong sapwellimen Koht “kosonned unseko,” oh en “kapwaiada.” Ihme kahrehda, ma emen kin esehda me eh limpoak ong Siohwa oh padahk mehlel kin tikitikla, e pahn mwahu en medemedewe soangen peidek pwukat: ‘Soangen pwunod dah kei I mihlahr loale oh iaduwen I kin mwekidki pwunod pwukat? Ia mwomwen ei kin mwekidki pwunod pwukat mahs? Mie mehkot me wekila?’ Ma soangen keseupen pein omwi irair kan kin kasalehda soangen luwet akan me ke ahneki, ke dehr pohnsehsehla soahng pwukat. Ma e konehng en wiahda wekidekla kan, eri ke anahne mwekid mwadang.—Ipru 12:12, 13.

¹⁵ Ni ahmw kin medemedewe duwen soahng pwukat e pil pahn kak sewese iuk en wiahda mehn akadei kan me ke kakohng pwehn kakairada ahmw pahn wiahla Kristian mwahu men. Wahnpoaron Pohl kihong kaweid sarawi ong ienge tohndoadoahk Timoty pwe en kak kamwahwihala eh doadoahk en kalohk. Pohl kin kangoange ohl pwulopwulo: “Pwerisekiong [“medemedewe,” NW] oh poadidiong wiewia soahng pwukat, pwe aramas koaros en kak kilang omw kekeirda.” E pahn mwahu ma kitail kin pil medemedewe kaweid kan en Mahsen en Koht ong duwen mehnia irair kan kitail kak en kakairada.—1 Tim. 4:15.

16. Soangen keper dahkei ke anahne medemedewe ni ahmw kin kasawih pein uhk ong kaweid kan en Pwuhk Sarawi?

¹⁶ Ma ke mehleliong ahmw kasawih pein uhk, ke pahn kak diarada soangen luwet kei me ke ahneki. Met kak kahrehda ken mwoarosala, ahpw ke dehr mweidohng met en wiawi ong uhk. Pwe ni mehlel, kahrepen en emen kin kasawih pein ih iei pwehn diarada irair kan me anahn en kamwahula. Sehdan uhdahn kin men Kristian emen en ahneki pepehm me sohte katepe de me e sohte warohng mehkot pwehki eh soh unsek kan. Ni mehlel e kin kose me Koht kalahdeki en aramas ar kin nantihong en papah ih. (Sohp 15:15, 16; 22:3) Sises kin ketin uhwong laud likamw pwoatet pwehki Koht kin ketin kesempwaliki emenemen kitail. (Wadek Madiu 10:29-31.) Ahmw kin wehwehki ahmw soh unsek kan pahn kahrehiong uhk en kasalehda karakarahk oh men kamwahwihala ahmw irair kan ki sapwellimen Siohwa sawas. (2 Kor. 12:7-10) Ma soumwahu de mahla iei kahrepe kei me kin kerempwa iuk, eri wiahda mehn akadei kan me ke kakohng, ahpw dehr uhdihsang ahmw papah de mweidohng ahmw limpoak en tikitikla.

Soahng Tohto me Kitail en Kin Kalahnganki

17, 18. Soangen kamwahu dah kan me kin kohsang ahmw kin kakairada limpoak me ke tepin ahneki?

¹⁷ Kamwahu laud kin kohsang ni atail kin doulahte kakairada limpoak me kitail ahneki nin tepio. Ke pahn kak kaloalehla ahmw loalokongkihla Koht oh kalaudehla ahmw kin kalahnganki sapwellime kaweid ni elen limpoak. (Wadek Lepin Padahk 2:1-9; 3:5, 6.) Sounmelkahkao kin koasoia: “I kin ale ketingpen ei kin peikiong [sapwellimen Siohwa kosonned kan].” “Mahsen en KAUN-O me likilik, e kin kaloalokongihala me soaloalokong kan.” Oh pil, “meid pai irail kan me ar mour mwakelekel, me kin momour nin duwen kosonned en KAUN-O.”—Mel. 19:7, 11; 119:1.

¹⁸ Ke pahn uhdahn pwungki me ke ahneki soahng mwahu tohto kan me ke pahn kak kalahnganki. Ke kin wehwehki kahrepen soahng kan me kin wiawi nan sampah rahn pwukat. Ke uhdahn kin paiekihda epwel mwahu kan koaros me Koht kin ketikihong sapwellime aramas akan rahn pwukat. Ele ke kin kalahnganki en Siohwa kin ketin kahreiukdohng sapwellime mwomwohdiso me mih nan sampah pwon oh ketikihong uhk pwais kesempwal en wia emen sapwellime Sounkadehde. Ke sou perenkihda soahng mwahu pwukat me ke paiekidahr nan omw mour! Ma ke pahn ntingihdi irekidi en soahng pwukat me ke paiekidahr, ke pahn wiahda irek ehu me pahn reirei mehlel. Ni ahmw pahn kin kalapw wadewadek irekidi wet, e pahn uhdahn sewese iuk en peikiong iren kehkehlik me mahsanih: “Nekinekid mwahu dahme ke kolokol.”—Kaud. 3:11.

19. Likin en doudouloale ahmw nanpwungmwahu rehn Koht, dahme kesempwal pwehn kolokol atail pwoson en kehlail?

¹⁹ En doudouloale duwen ahmw pwoson eh kin lalaudla erein pahr kan me douwehr kin wia ehute kisehn kahk kan me kin sewese iuk en kolokolete dahme ke ahnekier. Makasihn wet kin pwurepwurehng kasalehda ire kesempwal teikan me kak sewese kitail en kak kolokolete atail nanpwungmwahu rehn Koht. Me iang pidada met iei kapakap, kaukaule iang towehda mihding kan oh iang pasapeng, oh ngoangki doadoahk en kalohk. Mepwukat koaros pahn sewese iuk en pousehlahte kamwahwihala, oh kakairada limpoak me ke ahneki nin tepio.—Ep. 5:10; 1 Pit. 3:15; Sud 20, 21.

Iaduwen Ke Pahn Sapeng?

• Iaduwen kahrepe kan me kahrehiong uhk en ahneki limpoak ong Siohwa eh kak wia mehn kangoange iuk ahnsouwet?

• Ni ahmw kin medemedewe ahmw irair kan me ke lelong mahs kohdo lel met, dahme irair pwukat kin kamehlelehiong uhk?

• Dahme kahrehda ke anahne kasawih ahmw limpoak me ke ahneki ong Koht?

[Kawehwehpen kilel kan nan ehu ehu pali 23]

Mehnia ire kan me kahrehiong uhk en kamehlelehla padahk mehlel?

[Kawehwehpen kilel kan nan ehu ehu pali 25]

Iaduwen ke kin kasawih pein uhk ong irair kan me ke anahne kamwahwihala?