Ke Sehse Iawasa E Pahn Pweida!
“Padokedi nimenseng oh pil nin soutik; pwe ke sehse ma koaros pahn pweida mwahu de soh; oh ke pil sehse ma ehu pahn pweida mwahusang ehu.”—EKL. 11:6.
1. Dahme kahrehda en kilang ia mwomwen werentuhke eh kekeirda inenen kapwuriamwei? Oh iaduwen e kak sewese kitail en aktikitik?
SOUMWET men anahne kanengamah. (Seims 5:7) Mwurin eh kamwarak werentuhke, e pahn anahne awih lao lel werentuhkeo pahn wosada oh tepida kekeirda. Ma werentuhkeo mih nan pwelmwahu, kisin dihpw tikitik pahn wosada sang nan pwehlo. Mwurin mwo, e pahn kekeirda oh kihda wah. Kedekedeo, soumweto pahn dolung nan eh mwetuwelo. E inenen kapwuriamwei en kilang ia mwomwen eh kin kekeirda! En wehwehki ihs me kin kakairada werentuhkeo kin sewese kitail en aktikitik. Kitail kak apwalih werentuhke. Kitail kak kalamwurehki pihl. Ahpw Koht kelepw me kak ketin kakairada tuhkeo.—Pil kilang 1 Korint 3:6.
2. Dahme Sises kin ketin padahngki me pid ia mwomwen emen kin kekeirda oh wiahla sapwellimen Krais tohnpadahk nan karasaras kan me kohda nan artikel en mwoweo?
2 Ni atail sukuhlikier nan artikel en mwoweo, Sises kin ketin karasahiong doadoahk en kalohki Wehio duwehte doadoahk en soumwet men eh kin kamwarak werentuhke. Nan karasaras en soangsoangen pwehl oko, Sises ketin kasalehda me mendahki ma soumwet men pahn kamwarak werentuhke mwahu, irair en emenemen aramas kin koasoanehdi ma werentuhkeo pahn kekeirda de soh. (Mark 4:3-9) Nan karasaras en sounkamwarak men me memeir, Sises kin ketin kasalehda me sounkamwarako sohte uhdahn wehwehki ia mwomwen aramas men eh kin kekeirda oh wiahla tohnpadahk men. Met pwehki sapwellimen Koht manaman me pahn kahrehda kekeirdahn werentuhkeo, ah kaidehn en aramas manaman. (Mark 4:26-29) Ahnsou wet, kitail pahn tehkpene sapwellimen Sises karasaras siluh, karasaras en werentuhke mustard, ihs oh uhk.a
Karasaras en Werentuhke en Mustard
3, 4. Ire dah kan me pid rongamwahu en Wehio me karasaras en werentuhke en mustard kin kasalehda?
3 Karasaras en werentuhke en mustard me kileldi nan pwuhken Mark irelaud 4 kin kasalehda ire riau: keieu, tohtohlahn aramas akan me kin mwekidki rongamwahu en Wehio; oh keriau, mehn perepe kan me irail akan me kin mwekidki rongamwahu pahn ale. Sises ketin mahsanih: “Dahme kitail pahn karasahiong Wehin Koht? De karasaras dah kitail pahn doadoahngki pwe en kawehwehda? Eri, e rasehng kisin werentuhke kis [“mustard,” NW], me keieu tikitik nanpwungen werentuhke kan. A ni eh kin kamweremwerdiong nan pwehl, e kin wosada oh keirda oh wiahla tuhke laud pwoat, laudsang tuhkehn nan mwetuwel kan koaros. E ahpw kin kasangpeseng, oh menpihr en pahnlahng kan kin pihrdo oh wia pasarail kan pahn mwetehn rah kan.”—Mark 4:30-32.
4 Wasaht kitail kin kilang me kekeirdahn “Wehin Koht” kin sansalda ni en rongamwahu en Wehio eh kin lohkseli oh mwomwohdisohn Kristian eh kin kekeirda sang rahnen Pendekos nan pahr 33 C.E. Werentuhke en mustard me inenen tikitik kahrehda e kak karasahiong mehkot me inenen tikitik. Ahpw tuhkehn mustard kin keirda oh kak reireiki piht 10 lel 15 oh rah kan kin kehlail oh e kin wiahla tuhke laud ehu.—Mad. 13:31, 32.
5. Ia mwomwen kekeirdahn mwomwohdisohn Kristian ni mwehin wahnpoaron kan?
5 Kekeiradahn mwomwohdisohn Kristian tepida nan pahr 33 C.E. ni ahnsou me tohnpadahk 120 me keikihdi sapwellimen Koht manaman sarawi. Ahpw erein ahnsou mwotomwot ehu, mwomwohdiso tikitik wet laudla oh me pwoson meh kid kei me iangala. (Wadek Wiewia 2:41; 4:4; 5:28; 6:7; 12:24; 19:20) Sounkalohk kan kin inenen tohtohla nan erein sounpar silihsek. Kahrehda wahnpoaron Pohl kak koasoiaiong mwomwohdiso nan Kolose me rongamwahu lelohng “aramas akan koaros nin sampah.” (Kol. 1:23) Met uhdahn kekeirda laud!
6, 7. (a) Soangen kekeirda dahieu wiawi sang nan pahr 1914? (b) Soangen kekeirda dahieu pil pahn wiawi?
6 Sang ahnsou me Wehin Koht kokouda nanleng nan pahr 1914, rah kan en ‘tuhkehn mustard’ kin inenen kekeirda laud. Sapwellimen Koht aramas akan kin kilang pweidahn kokohp en Aiseia me mahsanih: “Peneinei ehu me keieu tikitik oh sohte wede rehmwail pahn lapalapala rasehng wehi lapalap ehu.” (Ais. 60:22) Pwihn tikitik en me keidi kan me kin iang doadoahk en kalohk mpen sounpar epwiki samwalahro sohte kin medewe me nan pahr 2008, kereniong Sounkadehde isirar me pahn kin iang doadoahko nan sahpw me tohto sang 230. Met wia kekeirda kapwuriamwei ehu me pahrekiong sapwellimen Sises karasaras en werentuhke en mustard!
7 Ahpw kekeirda wet pahn uhdi? Soh. Lao aramas koaros me kin mih pohn sampah pahn utungada Wehin Koht. Me uhwong kan koaros pahn sohrala. Kaidehn aramas me pahn wia wekidekla wet ahpw Kaun Lapalap Siohwa me pahn ketin wia met. (Wadek Daniel 2:34, 35.) Ni ahnsowo, kitail pahn kilang pil ehu kaimwiseklahn pweidahn kokohp me Aiseia mahsanih: “Sampah pahn direkihla kupwurokong en KAUN-O, duwehte madau eh kin direkihla pihl.”—Ais. 11:9.
8. (a) Ihs me menpihr kan nan sapwellimen Sises karasaras kin karasahiong? (b) Soahng dah kan kitail kin perperla sang ahnsou wet?
8 Sises ketin mahsanih me menpihr en pahnlahng kan kak wia pasarail kan pahn mwetehn Wehi wet. Menpihr pwukat sohte kin karasahiong imwintihti kan en Wehio me kin song en kangala werentuhke mwahu kan, me duwehte menpihr kan nan karasaras en ohl me kamwarak werentuhke pohn soangsoangen pwehl. (Mark 4:4) Ahpw nan karasaras wet, menpihr pwukat kin karasahiong aramas mohngiong mehlel kan me kin rapahki mehn pereparail nan mwomwohdisohn Kristian. Ahnsou wet, irail kin perperla sang wiewia kan oh tiahk kan me kak irehsang irail en kak ahneki nanpwungmwahu rehn Koht oh pil tiahk samin kan en sampah suwed wet. (Pil kilang Aiseia 32:1, 2.) Ni mwohmwohte, Siohwa ketin karasahiong Wehin Mesaia tuhke apwoat, oh ketin kohpadahr: “Pohn nahna keieu ileile en Israel. E ahpw pahn kadarala rah kan oh wa oh wiahla tuhke sidar kaselel pwoat. Soangen menpihr koaros pahn kousoan wasao oh kin rukula pahn mweteh.”—Esek. 17:23.
Karasaras en Ihs
9, 10. (a) Dahme Sises kin ketin kasalehda nan karasaras en ihs? (b) Nan Paipel, dahme ihs kin kalapw karasahiong? Peidek dahieu me pid duwen ihs me Sises ketin mahsanih duwe me kitail pahn tehkpene?
9 Kekeirda kin kalapw wiawi ni mwomwen sohte sansal ong aramas. Ihme Sises ketin kasalehda nan sapwellime karasaras en mwurio. E ketin mahsanih: “Wehin Koht rasehng ihs, me lih emen ale oh doalohkihda nesen pilawa ieu, nesen pilawao pwon lao mpwosada.” (Mad. 13:33) Dahme ihs wet kin karasahiong? Oh iaduwen e kin pid kekeirdahn Wehio?
10 Nan Paipel, ihs kin kalapw karasahiong dihp. Wahnpoaron Pohl kin doadoahngki ihs ni ahlohte ni ahnsou me e koasoia ia duwen me dipan men kin kasaminehla mwomwohdiso nan Korint. (1 Kor. 5:6-8) Met Sises kin ketin doadoahngki ihs pwehn karasahiong kekeirdahn mehkot sakanakan?
11. Iaduwen mehn Israel kan en mahs kin doadoahngki ihs?
11 Mwohn kitail pahn sapeng peideko, kitail anahne tehk ire mehlel siluh. Keieu, mendahki Siohwa sohte kin ketin mweidohng mehn Israel kan en doadoahngki ihs ni ahnsoun Pahsohpa, ahpw ni ahnsou teikan e kin ketin kupwurperenki meirong kan me ihs iang mih loale. Irail kin doadoahngki ihs ni ahnsou me re kin wiahda meirong en kaminimin. Irail kin wia meirong wet ni pein nsenarail pwehn kasalehda arail kalahnganki sapwellimen Siohwa kapai tohto kan. Koasoandi en wiepen tungoal wet kin kihong irail peren.—Lip. 7:11-15.
12. Dahme kitail kak wehwehki sang mwomwen Paipel eh kin doadoahngki karasaras kan?
12 Keriau, mehkot kak karasahiong mehkot suwed nan ekei iren Paipel kan, ahpw nan ekei iren Paipel teikan e kak karasahiong mehkot mwahu. Karasepe, 1 Piter 5:8 kin karasahiong Sehdan laion emen pwehki eh irair keper oh lemei. Ahpw Kaudiahl 5:5 kin karasahiong Sises laion emen ni eh kahdaneki ih “Laiono me kisehn kadaudok en Suda.” Iren Paipel wet kin doadoahngki laion pwehn karasahda irair en eimah oh kopwungpwung.
13. Dahme sapwellimen Sises karasaras en ihs kin kasalehda ong duwen mwomwen emen kin kekeirda oh wiahla sapwellimen Krais tohnpadahk men?
13 Kesiluh, nan sapwellimen Sises karasaras, e sohte mahsanih me ihs kin kasaminehla nesen pilawa pwon. E kin ihte ketin kawehwehda ia mwomwen pilawa eh kin wiawihda. Lih pwopwoud men kin dolki ihs oh e pahn pweida mwahu. Ihs kin mih nan wasa soh sansal nan nesen pilawao. Kahrehda ia mwomwen pilawao eh mpwosada sohte kin sansal ong liho. Met kin katamankin kitail ohlo me kin kamwarak werentuhke oh meir nipwong. Sises ketin mahsanih me “kisin werentuhke ko kin wos oh kekeirda, ahpw e sohte kin wehwehki duwen mepwukat eh kin wiewiawi.” (Mark 4:27) Ni ahl mengei, Sises ketin karasahda ia mwomwen emen kin kekeirda oh wiahla sapwellimen Krais tohnpadahk. Kitail sohte kak kilang eh kekeirda nin tepio, ahpw e kin kedekedeo sansalda.
14. Ihso nan karasaraso kin kahrehiong nesen pilawa pwon en mpwosada. Dahme ire wet kin karasahda duwen doadoahk en kalohk?
14 Kekeirda wet sohte kin sansal ong aramas ahpw e kin wiawi nin sampah pwon. Ire wet pil kin sansalda nan karasaras en ihso. Ihso kin kahrehiong nesen pilawao pwon en mpwosada. (Mad. 13:33) Duwehte ihs, doadoahk en Wehio kin kahrehda tohtohlahn tohnpadahk kan. Met rongamwahu en Wehio kin lelohng “ni irepen sampah.” (Wiewia 1:8; Mad. 24:14) E wia pwais kaselel en iang doadoahk en kalohki Wehio me kin inenen kekeirda!
Uhk
15, 16. (a) Kawehwehda mouren karasaras en uhko. (b) Dahme uhko kin karasahiong? Ire dahieu me pid kekeirdahn Wehio me karasaras wet kin kasalehda?
15 Irair me sapwellimen Sises Krais tohnpadahk kan kin ahneki kin kesempwal sang uwen tohtohn aramas akan me kin nda irail sapwellime tohnpadahk kan. Sises kin ketin kasalehda ire wet me pid kekeirdahn Wehio ni ahnsou me e ketikihda pil ehu karasaras me pid duwen uhk. E mahsanih: “Pil ehu, Wehin Koht rasehng uhk pwoat me kin sehkpeseng nansed pwe en kehldi soangen mwahmw koaros.”—Mad. 13:47.
16 Uhk me kin karasahiong doadoahk en kalohki wehio kin kihpene soangsoangen mwahmw koaros. Sises ketin mahsanih: “Ni eh diralahr, soused kan ahpw kin wurahdekidahng ni oaroahr oh mwohndi pwe re en pilehng mwomw mwahu kan nan ar pekid kan, a me sakanakan kan kin lekdekla. Eri, ih duwen me pahn wiawi ni imwin kawa: tohnleng kan pahn pekederpeseng pwe en katohrehsang aramas suwed kan rehn me mwahu kan, oh kesepwekeiraillahng nan uhmw mwehl, wasa re pahn sengiseng ie oh ngihrail kan tehtehrek.”—Mad. 13:48-50.
17. Iahd doadoahk en katohrohr me kohda nan karasaras en uhko kin wiawi?
17 Katohrohr wet kin pid kaimwiseklahn kadeik en sihpw oh kuht me Sises ketin mahsanih me pahn wiawi ni ahnsou me e pahn ketido ni sapwellime lingan? (Mad. 25:31-33) Soh. Kaimwiseklahn kadeiko pahn wiawi ni ahnsou me Sises pahn ketido erein kahn kamakam kowahlap. Doadoahk en katohrohr me kohda nan karasaras en uhko kin wiawi “ni imwin kawa [“koasoandi wet,” NW].”b Iei ahnsou me kitail kin momour ie met—erein ahnsou ehu me pahn kohkohla lel kahn kamakam kowahlap. Iaduwen doadoahk en katohrohr kin wiawi ni ahnsou wet?
18, 19. (a) Iaduwen doadoahk en katohrohr kin wiawi rahnwet? (b) Dahme irail me mohngiong mehlel kan anahne wia? (Pil kilang footnote nan pali 27.)
18 Ni karasaras, mwahmw rar kei me kohsang nansed en tohnsampah kin iang sapwellimen Siohwa mwomwohdiso nan atail ahnsou. Ekei kin iang towehda Kataman, ah ekei kin iang towehda atail mihding kan, oh pil ekei kin onopki Paipel. Ahpw irail koaros kin kasalehda me irail Kristian mehlel kei? Soused kan pahn ‘wurahdekidahng irail ni oaroahr,’ ahpw Sises ketin mahsanih me re pahn pilehng “mwomw mwahu” kante nan pekid kan, me kin karasahiong mwomwohdisohn Kristian akan. Me sakanakan kan pahn lekdekla nan uhmw mwehl me kin karasahiong kasohrala me pahn wiawi ni ahnsou kohkohdo.
19 Me duwehte mwahmw sakanakan kan, aramas tohto me kin onop Paipel mahs rehn sapwellimen Siohwa aramas akan ahpw met irail solahr kin onop. Ekei kin tikida rehn arail pahpa oh nohno me wia Kristian, ahpw pein irail sohte men wiahla sapwellimen Sises tohnpadahk kan. Irail sohte men wiahda pilipil en papah Siohwa, de mwurin arail papah Siohwa erein ahnsou kis, irail kin uhdi sang arail papah ih.c (Esek. 33:32, 33) Ahpw aramas mohngiong mehlel kan koaros uhdahn anahne iang mwomwohdiso me rasehng pekido mwohn kaimwiseklahn kadeik pahn leledo, oh re anahne mihmi nan mwomwohdiso.
20, 21. (a) Dahme kitail sukuhliki sang atail tehkpene sapwellimen Sises karasaras me pid kekeirda? (b) Dahme ke koasoanehdi teng en wia?
20 Dahme kitail sukuhliki sang atail tehkpene sapwellimen Sises karasaras kan me pid duwen kekeirda? Keieu, duwehte kekeirdahn werentuhke en mustard, aramas akan me kin mwekidki rongamwahu en Wehio kin inenen tohtohla. Sohte mehkot kak kauhdi sapwellimen Siohwa doadoahk! (Ais. 54:17) Patehng met, mehn perepe kin kohwong irail akan me kin “wia pasarail kan pahn mwetehn rah kan.” Keriau, Koht me kin ketin kakairada werentuhke. Duwehte ihs me kin mihmi nan wasa rir kin kahrehiong nesen pilawa pwon en mpwosada, aramas sohte kak wehwehki ia mwomwen kekeirda wet kin wiawi, ahpw e kin uhdahn wiawi! Kesiluh, kaidehn koaros me kin perenki rong rongamwahu en Wehio kin kasalehda me irail duwehte mwahmw mwahu. Ekei kin kasalehda me irail duwehte mwahmw sakanakan nan sapwellimen Sises karasaraso.
21 Ia uwen met wia mehn kangoang laud en ese me aramas mohngiong mehlel tohto kin karanih Siohwa! (Sohn 6:44) Kekeirda laud kin wiawi nan sahpw tohto. Kaping koaros ong kekeirda wet anahne kohwong Siohwa Koht. Pwehki kitail kak kilang kekeirda wet, kitail en men peikiong kaweid wet me ntingdi mahs: “Padokedi nimenseng oh pil nin soutik; pwe ke sehse ma koaros pahn pweida mwahu de soh; oh ke pil sehse ma ehu pahn pweida mwahusang ehu.”—Ekl. 11:6.
[Nting tikitik me mi pahs]
a Kawehwehpen karasaras kan me pahn kohda nan artikel wet kin kasalehda wekilahn kawehwe kan me kohda nan The Watchtower, June 15, 1992, pali 17-22, oh October 1, 1975, pali 589-608.
b Madiu 13:39-43 kin koasoia duwen ehu ire tohrohr me pid duwen doadoahk en kalohki Wehio. Ahpw karasaraso kin pweida ni ahnsou me karasaras en uhko pil kin pweida, iei erein “imwin koasoandi wet.” Katohrohr mwahmw kan ni karasaras kin kaukaule wiawi nan erein ahnsou ehu me duwehte doadoahk en kamwarak oh dolung kin kaukaule wiawi nan erein ahnsou wet.—The Watchtower, October 15, 2000, pali 25-26; Worship the Only True God (Kaudok Ongete Koht Mehlel), pali 178-181, parakrap 8-11.
c Met wehwehki me tohnleng kan kin kesehla koaros me uhdi sang ar onop rehn sapwellimen Siohwa aramas kan de solahr patehng irail nin duwen me sakanakan akan? Soh! Ma emen uhdahn men pwurehng pwurodohng Siohwa, E pahn ketin kasamwo ih.—Mal. 3:7.
Iaduwen Ke Pahn Sapeng?
• Dahme sapwellimen Sises karasaras me pid duwen werentuhke en mustard kin padahkihong kitail duwen kekeirdahn Wehio? Oh dahme e kin padahkihong kitail me pid iaduwen kitail kin perperla sang Sehdan oh eh sampah suwed wet?
• Dahme ihs nan sapwellimen Sises karasaras kin karasahiong? Ire mehlel dahieu me pid duwen kekeirdahn Wehio me Sises ketin kasalehda?
• Ire dahieu me pid duwen kekeirdahn Wehio kin sansalda nan karasaras en uhko?
• Iaduwen kitail kak ese me kitail kin mihmihte nan ‘pekid kan’?
[Kawehwehpen kilel kan nan ehu ehu pali 24]
Dahme karasaras en werentuhke en mustard kin padahkihong kitail me pid kekeirdahn Wehio?
[Kawehwehpen kilel kan nan ehu ehu pali 25]
Dahme kitail kak sukuhliki sang karasaras en ihs?
[Kawehwehpen kilel kan nan ehu ehu pali 27]
Dahme katohrepeseng mwahmw mwahu oh mwahmw sakanakan kin karasahiong?