Koht “Me Kin Ketin Kakairada Tuhkeo”!
“Sohte katepen me kin kamwarak de kalamwur kisin tuhkeo; a Kohtete me kesempwal, pwe ih me kin ketin kakairada tuhkeo.”—1 KOR. 3:7.
1. Nan mehnia doadoahk kitail kin wia “tohndoadoahk kei me kin iang Koht”?
“TOHNDOADOAHK kei me kin iang Koht.” Ih me wahnpoaron Pohl kin kawehwehda duwen doadoahk tohrohr ehu me kitail koaros kak wia. (Wadek 1 Korint 3:5-9.) Doadoahko me Pohl kin koasoia duwe iei doadoahk en katohnpadahk. Pohl karasahiong doadoahko ong kamwarak kisin werentuhke oh kalamwurehki pihl. Ma kitail men pweida nan doadoahk kesempwal wet, kitail anahne ale sawas sang rehn Siohwa. Pohl kin katamankin kitail me “Kohtete . . . me kin ketin kakairada tuhkeo.”
2. Dahme kahrehda ire mehlel ehu me “Kohtete . . . me kin ketin kakairada tuhkeo” kin sewese kitail en ahneki madamadau pwung ong atail doadoahk en kalohk?
2 Ire kesempwal wet kin sewese kitail en ahneki madamadau pwung ong atail doadoahk en kalohk. Kitail kin ele pwerisek en kalohk oh padahk, ahpw Siohwa me uhdahn warohng sapwellimaniki kaping ni ahnsou me emen wiahla tohnpadahk kapw men. Pwekida? Pwehki mendahki ma kitail kin doadoahk laud, sohte emen rehtail kak uhdahn wehwehki ia mwomwen aramas men pahn kekeirda oh wiahla tohnpadahk men, kahrehda kitail sohte ahneki koahiek en koasoanehdi mwomwen eh kekeirda. Nanmwarki Solomon kasalehda ire wet ni pwung ni eh ntingihdi: “Duwen omw sohte kak wehwehki wiepen nin limen Koht, sounwiepen mehkoaros.”—Ekl. 11:5.
3. Iaduwen doadoahk en katohnpadahk kin duwehte en kamwarak werentuhke?
3 Atail sohte kak wehwehki ia mwomwen aramas men eh kin kekeirda kin kahrehda atail doadoahk en kalohk en wia doadoahk kapwang ehu? Soh. Ahpw ni pali teio, e kin wia doadoahk kaperen ehu. Nanmwarki Solomon mahsanih: “Padokedi nimenseng oh pil nin soutik; pwe ke sehse ma koaros pahn pweida mwahu de soh; oh ke pil sehse ma ehu pahn pweida mwahusang ehu.” (Ekl. 11:6) Mehlel, ni ahnsou me kitail kin kamwarak werentuhke kan, kitail sehse iawasa re pahn wosada ie de ma re pahn uhdahn wosada. Mie soahng tohto me kitail sohte kak koasoanehdi. Doadoahk en katohnpadahk pil duwehte met. Sises ketin kasalehda ire mehlel wet ni eh ketin doadoahngki karasaras riau me kileldi ong kitail nan irelaud 4 en Pwuhken Mark. Kitail pahn kilang dahme kitail kak sukuhliki sang karasaras riau pwukat.
Soangsoangen Pwehl
4, 5. Kawehwehda ni mwotomwot duwen sapwellimen Sises karasaras en sounkamwarako me kin kamwarak weren tuhke kei.
4 Nan Mark 4:1-9, Sises ketin mahsanih duwen sounkamwarak men me kin kamwakamwarak werentuhke kei nan soangsoangen wasa kan. “Kumwail rong. Aramas emen mie me kohieilahng kamwarak. Eri, ni eh kamwakamwarak werentuhke kan, ekei mwerediong nan kisinial en mwahto, menpihr kei ahpw pihrdo kangasang. A ekei mwerediong nan mweli, wasa me pwehl pedeped. Re wosada mwadang, pwehki pwehlo eh sohte loal. Ni karakar en ketipin eh lel irail, re mwoatoredi; oh pwehki kalewarail kan sohte lel wasa loal, re mwadang mengila. A ekei mwerediong nanpwungen dihpw tekatek kei; ni dihpw tekatek ko ar keirda, re kasokehla kisin tuhke ko; iei me re sohte wahki. A ekei mwerediong nan pwehl mwahu; re ahpw wosada, keirda, oh wa mwahu; ekei wa silihsek, a ekei weneisek, a ekei epwiki.”
5 Ni mwehin Paipel, sounkamwarak kan kin koskihda werentuhke kei nan wehwe ong kamwarak. Sounkamwarak men kin kolokol werentuhke kei nan eh likou de nan kisin koakon ehu oh kin kamwakamwarak. Kahrehda nan karasaras wet, sounkamwarako sohte koasoanehdi en kamwarak werentuhke kei pohn soangsoangen pwehl. Ahpw werentuhke kei me kamwermwerdier kin mweredi pohn soangsoangen pwehl.
6. Iaduwen Sises ketin kawehwehda mouren karasaras en sounkamwarako?
6 Kitail sohte anahne en medemedewe ia wehwehn karasaras wet. Sises pil ketin kawehwehda mouren karasaraso, me kileldi nan Mark 4:14-20: “Sounkamwarako, iei me kin kamwarak mahsen en Koht. Ekei aramas rasehng werentuhke ko me mwerediong nan kisinial. Ni ar kin rong mahseno, Sehdan ahpw kin kohdo oh kauwehsang irail. Ekei aramas kin rasehng kisin werentuhke me mwerediong nan wasa takain. Ni ar kin rong mahseno, re kin perenkihda oh ale. Ahpw e sohte kin tengala rehrail, oh sohte kin werei. Pwe ni apwal oh kamakam eh kin lelohng irail pwehki mahseno, re kin mwadang lohdi. Ekei aramas kin rasehng kisin werentuhke ko me mwerediong nanpwungen dihpw tekatek. Iei irail me kin rong mahseno, a pwehki pwunod en mouren sampah kan, noahrok en dipwisou kan, oh soangen ineng teikan me kin pwarada oh kasokehla mahseno, me kahrehda e sohte kin wa. Ekei rasehng kisin war me mwerediong nan pwehl mwahu. Re kin rong mahseno, ale, ahpw kin wa: ekei wa silihsek, ekei weneisek, a ekei wa epwiki.”
7. Dahme weren tuhkeo oh soangsoangen pwehl ko kin rasehng?
7 Tehk wasaht me Sises sohte ketin mahsanih me sounkamwarako kin kamwarak soangsoangen weren tuhke. Ahpw e ketin mahsanih me soangen werentuhke tehieu me mweredi pohn soangsoangen pwehl, oh ehuehu pwehl kin kihda soangen wa me wekpeseng. Keieun pwehl kekeluwak, me keriau pedeped, me kesiluh dihpw tekatek kei kasokehla, oh me kapahieu pwelmwahu me kaparapar mwahu. (Luk 8:8) Dahme werentuhkeo kin karasahiong? E kin karasahiong mahsen en Wehio me dierek nan Mahsen en Koht. (Mad. 13:19) Dahme soangsoangen pwehl ko kin rasehng? Re kin karasahiong soangsoangen irair en mohngiong.—Wadek Luk 8:12, 15.
8. (a) Ihs me sounkamwarako kin karasahiong? (b) Dahme kahrehda mwomwen ahn aramas akan ar kin mwekidki doadoahk en kalohki Wehio wekpeseng?
8 Ihs me sounkamwarako kin rasehng? E kin rasehng tohndoadoahk kei me kin iang Koht, iei irail kan me kin kalohki rongamwahu en Wehio. Duwehte Pohl oh Apolos, irail kin kamwarak oh kalamwurehki pihl. Ahpw mendahki irail kin doadoahk laud, kekeiradahn aramas kin wekpeseng. Pwekida? Pwehki irair en mohngiong en aramas akan me kin rong mahsen en Wehio kin wekpeseng. Nan karasaraso, sounkamwarako sohte kak koasoanehdi ia mwomwen werentuhkeo eh kekeirda. Ia uwen ire wet wia mehn kangoang laud, ahpw keieu ong irail brother oh sister lelepek kan me kin doadoahk laud erein sounpar tohto ahpw arail doadoahk mwomwen sohte nohn pweida!a Dahme kahrehda met kin wia mehn kangoang ehu?
9. Mehn kangoang dahieu me Pohl oh Sises ketin kasansalehda?
9 Pweidahn ahn sounkamwarako doadoahk sohte kin koasoanehdi ma e kin lelepek de soh. Pohl kin kasalehda met ni ahnsou me e kosoaia: “Koht pahn ketikihong ketingpen emenemen ira, nin duwen doadoahk me ira wiadahr.” (1 Kor. 3:8) Kating kin kohwong emenemen nin duwen ahn emenemen doadoahk, ah kaidehn pweidahn doadoahko. Sises pil ketin kasansalehda ire wet ni ahnsou me sapwellime tohnpadahk ko pwurodo sang arail seiloak en kalohk. Irail pereperen kowahlap pwehki ngehn saut kan kin peikiong irail ni ar kin doadoahngki mwaren Sises. Ni eh ketin mahsanihada arail peren, Sises ketin mahsanihong irail: “Kumwail dehr perenki en ngehn saut kan ar peikiong kumwail, ahpw kumwail en perenkihda adamwail kan eh ntingdier nanleng.” (Luk 10:17-20) Mehnda ma ahn sounkamwarak men doadoahk sohte kin imwikihla tohnpadahk kapw tohto, met sohte kin wehwehki me e sohte ahneki peren laud de sohte lelepek duwehte meteikan. Pali laud en ahnsou, emen en wiahla tohnpadahk de soh kin poahsoankihda irair en mohngiong en emenemen me rong padahk. Ahpw ni mehlel, Koht me ketin kakairada aramaso!
Pwukoa en Irail kan me Kin Rong Mahseno
10. Dahme kin koasoanehdi ma emen me rong mahsen en Wehio pahn duwehla pwelmwahu de soh?
10 Iaduwen irail kan me kin rong mahsen en Wehio? Mwomwen arail pahn mwekidki mahseno kin koasoandier? Soh. Irail me pahn pein pilada ma re pahn duwehla pwelmwahu de soh. Ni mehlel, irair en aramas men kin mih wasa loale oh irair en eh mohngiong kak wekila ong me mwahu de me suwed. (Rom 6:17) Nan sapwellime karasaraso, Sises ketin mahsanih me “ni [ekei] ar kin rong” mahseno, Sehdan ahpw kin kohdo oh kauwehsang irail. Ahpw met sohte anahne wiawi. Nan Seims 4:7, Kristian akan kin ale kaweid en “pelianda Tepil,” e ahpw pahn tangasang irail. Sises ketin kawehwehda duwen meteikan me perenki ale mahseno nin tepio ahpw sohte kin werei pwehki mahseno “sohte kin tengala rehrail.” Ahpw sapwellimen Koht ladu kan kin ale kaweid en poadidiong oh kekeirda pohn poahsoan mehlel pwe irail en dehdehki “ia uwen lauden limpoak en Krais, duwen eh tehlap, eh reirei, eh ile oh loal.”—Ep. 3:17-19; Kol. 2:6, 7.
11. Iaduwen emen me rong mahsen en Wehio kak liksang noahrok en dipwisou kan me kak kasokehla mahseno?
11 Meteikan me kin rong mahseno kin mweidohng “noahrok en dipwisou kan, oh soangen ineng teikan” en pwarada oh kasokehla mahseno. (1 Tim. 6:9, 10) Dahme irail pahn wia pwehn dehr lelohng met? Wahnpoaron Pohl sapeng: “Kumwail dehr noahroke mwohni, ahpw kumwail nsenamwahukihte dahme kumwail ahneki. Pwe Koht mahsanih: ‘I sohte pahn mweisang uhk; I sohte pahn keseiukala.’”—Ipru 13:5.
12. Dahme kahrehda irail kan me rasehng pwelmwahu kin kihda wa me wekpeseng?
12 Ni kaimwisekala, Sises ketin mahsanih me weren tuhke kei me mweredi pohn pwelmwahu “kin wa: ekei wa silihsek, ekei weneisek, a ekei wa epwiki.” Mendahki ekei me mwekidki mahsen en Wehio kin ahneki mohngiong mwahu oh kin wa, uwen laud me irail kak wia ong kalohki rongamwahu kin wekpeseng pwehki arail irair kan kin wekpeseng. Karasepe ehu, ekei sounkalohk kan kin mahla de kohwahki soumwahu laud, kahrehda re sohte kak wiahda uwen laud me meteikan kak wia ong doadoahk en kalohk. (Pil kilang Mark 12:43, 44.) Sounkamwarako sohte kak kawekila irairo, ahpw e kin perenki ni ahnsou me e kilang me Siohwa kin ketin kakairada irail.—Wadek Melkahka 126:5, 6.
Sounkamwarako me Memeir
13, 14. (a) Kawehwehda mouren sapwellimen Sises karasaras en ohl me kamwarak weren tuhke. (b) Dahme sounkamwarako oh werentuhkeo kin rasehng?
13 Nan Mark 4:26-29, kitail kilang pil ehu karasaras me pid sounkamwarak men: “Wehin Koht rasehng aramas emen me kamwarak kisin werentuhke kei nan sapwe. Nindokon eh memeir nipwong oh pepehd ni rahn, kisin werentuhke ko kin wos oh kekeirda, ahpw e sohte kin wehwehki duwen mepwukat eh kin wiewiawi. Pwe pwehlo me kin kawosehda kisin waro, kakairada, oh kihong wah: mahs e kin kisin dihpw tikitik, mwuhr, e kin wiahla kisin tuhke, a pil mwuri, e ahpw kin wa: a nan waho kin diren kisin war. Ni wah kan ar kin mah, aramas ahpw kin lupukedi oh kihpene, pwe ahnsowo ih ahnsoun dolung.”
14 Ihs sounkamwarak menet? Ekei nan pwihn en Kristian likamw kan kin kamehlele me sounkamwarako iei Sises. Ahpw iaduwen, kitail kak nda me Sises ketin memeir oh sohte mwahngih ia mwomwen weren tuhkeo eh kin kekeirda? Sises uhdahn ketin mwahngih ia mwomwen e kin kekeirda! Ahpw sounkamwarak menet, duwehte sounkamwarako me koasoipe kohda mwowe, kin rasehng emenemen sounkalohk en Wehio, iei irail kan me kin kamwarak werentuhke en Wehio ni ar kin ngoangki doadoahk en kalohk. Werentuhkeo me mweredi pohn pwehl iei mahsen en Wehio me irail kin kalohki.b
15, 16. Ire mehlel dahieu me pid mwomwen werentuhke eh kekeirda oh mwomwen aramas men eh kekeirda ong wiahla tohnpadahk men me Sises ketin kasalehda nan sapwellime karasaras en sounkamwarak men?
15 Sises ketin mahsanih me sounkamwarako “memeir nipwong oh pepehd ni rahn.” Met sohte kin kasalehda me sounkamwarako sohte kin wia doadoahk mwahu. E kin ihte kasalehda ehu koasoandi en mour me aramas tohto kin momourki. Lepin lokaia kan me kadoadoahk nan iretikitik wet kin kasalehda ahn emen koasoandi en doadoahk ni rahn oh en meir nipwong erein ahnsou ehu. Sises ketin kawehwehda dahme wiawi nan erein ahnsowo. Sises ketin mahsanih: “kisin werentuhke ko kin wos oh kekeirda.” Oh e ketin kapatahiong: “Ahpw e sohte kin wehwehki duwen mepwukat eh kin wiewiawi.” E ketin kasalehda me werentuhkeo kin pein kekeirda.
16 Ire dahieu me Sises ketin kasalehda wasaht? Tehk me e ketin kawehwehda mwomwen kekeirdahn werentuhkeo oh ia mwomwen e kin ekisekis wiawi. “Pwehlo me kin kawosehda kisin waro, kakairada, oh kihong wah: mahs e kin kisin dihpw tikitik, mwuhr, e kin wiahla kisin tuhke, a pil mwuri, e ahpw kin wa: a nan waho kin diren kisin war.” (Mark 4:28) Kekeirda wet kin ekis ekis wiawi ni ehuehu ahnsou. Sohte me kak idingkihong werentuhkeo en kekeirda de kamwadangehla eh kekeirda. Aramas akan kin kekeirda oh wiahla tohnpadahk kei ni soangen mwohmwohte. Kekeirda wet kin wiawi pwehki Siohwa kin ketin mweidohng padahk mehlel en kekeirda nan mohngiong en aramas men me kin ahneki irair mwahu.—Wiewia 13:48; Ipru 6:1.
17. Iaduwen sounkamwarako kin iang dolung?
17 Iaduwen sounkamwarako kin iang dolung “ni wah kan ar kin mah”? Ni ahnsou me Siohwa kin ketin kakairada padahk mehlel en Wehio nan mohngiong en tohnpadahk kapw kan, irail pahn kekeirda oh arail limpoakohng Koht pahn kamwakid irail en inoukihong ih arail mour. Irail pahn kasalehda arail inou ni arail pahn papidaisla nan pihl. Irail brother kan me kin kekeirda pahn ekisekis ale pwukoa kan nan mwomwohdiso. Sounkamwarako oh sounkalohk en Wehio kan me sohte pein iang kamwerehdi werentuhkeo me wa tohnpadahk kapwo, irail koaros kak dolung wahn Wehio. (Wadek Sohn 4:36-38.) Ni mehlel, “me kin padokedi oh me kin dolung ira koaros pahn pereperenpene.”
Mehn Kasukuhl kan ong Kitail Rahnwet
18, 19. (a) Iaduwen kousapahlih sapwellimen Sises karasaras kan kin kangoange uhk? (b) Dahme kitail pahn tehkpene nan artikel en mwuhr?
18 Dahme kitail sukuhlikier sang atail tehkpene karasaras riau pwukat me kileldi nan Mark irelaud 4? Kitail sukuhliki me mie doadoahk ehu me kitail anahne wia—iei kamwarak. Kitail en dehr mweidohng kahpwal kan me kitail kak lelohng en kauhkitaildihsang en wia doadoahk wet. (Ekl. 11:4) Ahpw ni ahnsowohte, kitail pil kalahnganki atail pwais kaselel en wia tohndoadoahk kei me kin iang Koht. Siohwa me kin ketin kahrehiong aramas akan en kekeirda pwehn wiahla tohnpadahk kei oh kapaiada atail doadoahk oh pil irail kan me kin rong mahsen en Wehio. Kitail wehwehki me kitail sohte kak iding ong emen en wiahla tohnpadahk. Kitail pil wehwehki me kitail sohte anahne mworusala ma aramas akan sohte kin mwadang kekeirda. Ia uwen e wia mehn kangoang laud ehu me pweidahn atail doadoahk kin poahsoankihda atail lelepek ong Siohwa oh pwais ehu me e ketikihong kitail en kalohki “Rongamwahu en Wehin Koht . . . pwe kadehde en mie ong aramas koaros.”—Mad. 24:14.
19 Dahme Sises pil ketin padahkihong kitail me pid duwen kekeirdahn tohnpadahk kapw kan oh doadoahk en Wehio? Pasapeng ong peidek wet pahn dierek nan karasaras teikan me kileldi nan pwuhken Rongamwahu. Kitail pahn tehkpene ekei karasaras pwukat nan artikel en mwuhr.
[Nting tikitik me mi pahs]
a Medewehla kahlemeng en Brother Georg Fjölnir Lindal doadoahk en kalohk nan Iceland me kohda nan 2005 Yearbook of Jehovah’s Witnesses (Pwuhken Pahr en Sounkadehdehn Siohwa kan en 2005), pali 210-11, oh pil ekspiriens kan en sounkalohk lelepek kan me kin dadaurete nan Ireland erein sounpar tohto ahpw arail doadoahk mwomwen sohte mwadang pweida, me kohda nan 1988 Yearbook of Jehovah’s Witnesses (Pwuhken Pahr en Sounkadehdehn Siohwa kan en 1988), pali 82-99.
b Mahs makasihn wet kin kawehwehda me werentuhkeo kin karasahiong ahn emen irair kan me anahne kekeirda mwahu oh irair kan me aramas kin mih loale kin kamwakid eh kekeirda. Ahpw, kitail anahne tehk me nan sapwellimen Sises karasaraso, werentuhkeo sohte pahn wiahla werentuhke suwed de wa suwed. E kin doudoula oh kekeirda.—Kilang The Watchtower, June 15, 1980, pali 17-19.
Ke Tamataman?
• Ni ahl dah kei doadoahk en kalohki Wehio kin rasehng en kamwarak werentuhke?
• Iaduwen Siohwa kin ketin kasawih lelepek en sounkalohki Wehio men?
• Ire mehlel dahieu me pid duwen mwomwen werentuhke eh kekeirda oh mwomwen aramas men eh kekeirda ong wiahla tohnpadahk men me Sises ketin kasalehda?
• Iaduwen “me kin padokedi oh me kin dolung ira koaros pahn pereperenpene”?
[Kawehwehpen kilel kan nan ehu ehu pali 19]
Dahme kahrehda Sises ketin karasahiong sounkalohki Wehin Koht men ong sounkamwarak weren tuhke men?
[Kawehwehpen kilel kan nan ehu ehu pali 21]
Irail kan me rasehng pwelmwahu kin wia uwen arail kak nan irair kan me re kin mih loale pwehn iang doadoahk en kalohki Wehio
[Kawehwehpen kilel kan nan ehu ehu pali 22]
Koht me kin ketin kakairada werentuhkeo