Ihs me Kak Ese Ahnsou Kohkohdo?

“Ngehite me Koht, . . . Sangete nin tapio I kasalehda dahme pahn wiawi mwuhr, I kohpada mahsie dahme pahn wiawi.”—Aiseia 46:9, 10.

NAN ahnsou apwal pwukat, irail kan me kin kasawih palien politik, mwohni oh koasoandi kan kin tehk poadopoad oh mwekid en aramas kan pwehn kak ese dahme pahn wiawi ni ahnsou kohkohdo. Ekei uhdahn men ese dahme pahn wiawi ong irail, kahrehda re kin kasawih usu kan de wia wunahni. Pwehki re sohte kak diarada dahme pahn wiawi re kin nsensuwedkihla. Ia duwe, kitail kak ese dahme pahn wiawi ong sampah wet, atail peneinei oh pein emenemen kitail? Mie me kak kohpada ahnsou kohkohdo?

Nan sapwellime mahsen ong soukohp Aiseia me kileldi powe, Siohwa, Koht Lapalahpie ketin kawehwehda me e kak kohpada ahnsou kohkohdo. Koht ketin doadoahngki Aiseia pwehn kohpada me mehn Israel kan mahs pahn saledek sang Papilon oh pwuralahng uhdakarail pwehn kauwada kahnimw en Serusalem oh tehnpas sarawi. Ia uwen pwung en kokohp wet? Sounpar 200 mwowe, Aiseia kasalehda me ohl me adaneki Sairus pahn kalowehdi Papilon. Patehng met, Aiseia kohpada me Sairus pahn kawetsang pillap Iupreitis me kin pere kahnimwo. E pil kohpadahr me lapalahn wenihmw kan en kahnimwo pahn langalang kahrehda e pahn mengei ong Sairus en kalowehdi kahnimwo.—Aiseia 44:24–45:7.

Aramas sohte duwehte Koht en ese dahme pahn wiawi ni ahnsou kohkohdo. Nanmwarki loalokong Solomon ntingihdi: “Dehr suweiki lakapw, pwe ke sohte ese dahme pahn wiawi sang met lel lakapw.” (Lepin Padahk 27:1) Mahsen wet kin mehlel leledo ahnsouwet. Sohte aramas men kak ese dahme pahn wiawi ong ih ni ahnsou kohkohdo. Ia duwen Koht weksang aramas? E ketin wehwehki ni unsek duwen mehkoaros me e ketin kapikada, iangahki madamadau oh irair en aramas. Ni ahnsou me e ketin kupwurki, e kak ese dahme aramas kan oh wehi kan pahn wia. Patehng met, e sapwellimanki manaman en kamwakid mehkan pwe dahme e kohpada pahn pweida. Ni ahnsou me e ketin doadoahngki sapwellime soukohp kan en kohpada mehkot, e kin ketin “tehk mwahu pwe koasoandi pwukat oh kokohp pwukat en kin pweida.” (Aiseia 44:26) Siohwa Koht kelehpw kak ketin wia met.

Aiseia kin momour sounpar daulih 700 mwohn Sises, iei Mesaia. Ahpw e kohpada duwen ketidohn Mesaia. Sang mpen sounpar 200 samwalahr, irail me kin kauwe Paipel kin koasoia me audepen pwuhk en Aiseia sohte mehlel. Irail kin koasoia me kokohp kan en Aiseia sohte kohpada dahme pahn wiawi ahpw ntingdi mwurin soahng koaros wiawiher. Met mehlel? Nan pahr 1947, ehu doaropwe en kisehn pwuhken Aiseia dierekda iangahki doaropwehn mahs teikan nan pwoahr ehu me karanih Sehd en Mehla. Samanih kan me kin onopki poadopoad en mehn Ipru kan kin nda me doaropwe wet wiawihda daulih sounpar epwiki mwohn Mesaia de Krais ipwidi. Ei, Paipel kin kohpada ahnsou kohkohdo!

Aiseia oh sounnting en Paipel teikan sohte kak kohpada dahme pahn wiawi ni ahnsou kohkohdo ki pein arail loalokong. Ahpw ‘sapwellimen Koht manaman me kin ti pohn aramas ni ar kin lohkihda mahsen en Koht.’ (2 Piter 1:21) Nan iren onop en mwuhr, kitail pahn tehk ekei oaritik kan me Aiseia kohpada duwen ahnsou kohkohdo.