Sewese Irail me Salongalahsang Pelin Sihpw

“Kumwail iang ie perenda, pwe I diarehr nei sihpw me salongalahro!”—LUK 15:6.

1. Ia duwen Sises ketin kasalehda me e wia silepen sihpw limpoak men?

SAPWELLIMEN Siohwa Iehros, Sises Krais, kin mwarenki “Silepe Lapalap.” (Ipru 13:20) Pwuhk Sarawi kohpada duwen eh pekederdo, oh e kasalehda me e wia Silepen Sihpw me kin rapahki “sihpwen wehin Israel ko me salongalahr.” (Mad. 2:1-6; 15:24) Laudsang met, duwehte silepen sihpw me kin tounmeteikihla eh mour pwehn doarehla nah sihpw kan, Sises ketin pwoula nin duwen meirong en tomw ehu pwe irail akan me rasehng sihpw pahn kak paiekihda.—Sohn 10:11, 15; 1 Sohn 2:1, 2.

2. Dahme kak kahrehiong ekei Kristian en wereila sohte iang mwomwohdiso?

² Me kansensuwed me ekei me kin mwomwen kalahnganki sapwellimen Sises meirong oh inoukihong Koht arail mour kin wereila sohla patehng mwomwohdiso en Kristian. Ele irail mworuskihla irair ehu, ahneki soumwahu, de pil soangen irair teikan me kakete kaluwetehla arail ngoang oh kahrehda irail en wereila sohte patehng mwomwohdiso. Ahpw ihte irail me iang sapwellimen Koht pelin sihpw kak en ahneki meleilei oh nsenamwahu me Depit kin koasoakoasoia nan Melkahka 23. Karasepe, e kin koulki: “KAUN-O, iei silepei; solahr me I pahn anahne.” (Mel. 23:1) Irail akan me iang sapwellimen Koht pelin sihpw kin ahneki soahng koaros me irail anahne pwehn kolokol arail nanpwungmwahu rehn Siohwa, oh met sohte kin wiawi rehn irail akan me salongalahr. Ihs me kak sewese irail? Iaduwen irail kak ale sawas? Koasoandi dahieu kak sewese irail en pwuredo ong pelin sihpw wet?

Ihs me Kak Sawas?

3. Ia duwen Sises ketin kasalehda dahme anahn pwehn sewese sapwellimen Koht sihpw men me salongala?

³ Kitail anahne nantihong sewese sapwellimen Koht sihpw me salongalahr. (Mel. 100:3) Sises ketin karasahda ni eh mahsanih: “Ma aramas emen naineki sihpw epwiki, emen irail ahpw salongala, e seu pahn mweidala mahs me duwehk duwemeno re en mwengemwengeseli pohn nahna, a e ahpw pahn kohwei raparapahkiseli me salongalahro? A ma e pahn diarada, kumwail en ese pwe eh perenki memeno inenen laudsang eh perenki me duwehk duwemeno me sohte salongala.” (Mad. 18:12-14) Ihs me kak sewese irail sihpw pwukat me salongalahsang pelin sihpwo?

4, 5. Soangen madamadau dah me elder kan en ahneki ong sapwellimen Koht pelin sihpw?

⁴ Ma elder kan en mwomwohdiso men sewese sihpw me salongalahr, irail en tamataman me ‘sapwellimen Koht pelin sihpw’ iei mwomwohdiso en aramas akan me inoukihong Siohwa arail mour. (Mel. 79:13) Sihpw pwukat anahne sawas ni keneinei, met wehwehki silepen sihpw kan anahne nsenohki emenemen irail. En mwemweitla rehrail kak wia sawas laud ehu. Kangoang me elder men kin kihong irail kak sewese irail en pwurehng ahneki nanpwungmwahu rehn Siohwa.—1 Kor. 8:1.

⁵ Silepen sihpw kan en sapwellimen Koht pelin sihpw ahneki pwukoa en rapahki sihpw me salongala oh song en sewese irail. Wahnpoaron Pohl katamankihong elder kan en Episos duwen arail pwukoa en apwalih sihpw kan ni eh koasoia: ‘Kumwail mwasamwasahn pein kumwail oh pil sihpw akan koaros me sapwellimen Koht manaman ketikihong kumwail en apwahpwalih. Kumwail en wia silepen mwomwohdisohn Koht, me e ketin sapwellimankilahr pwehki ntahn sapwellime Iehros.’ (Wiewia 20:28) Duwehte met, wahnpoaron Piter kihong elder me keidi kan kaweid wet: “Kumwail en kin wia doadoahk en silepen sihpw me Koht ketikihong kumwail, oh apwalih irail, kaidehk ni mehnseiren ahpw ni kupwur mwahu duwen kupwur en Koht. Kumwail wia amwail doadoahk, kaidehk pwehki amwail pahn ale pweipweiki, a pwehki amwail kin uhdahn ngoangki papah. Kumwail dehr kin aksoupeidi ong irail kan me mi pahn epwelpamwail, ahpw kumwail en kin wia kahlemengihpen pwihn sihpw.”—1 Pit. 5:1-3.

6. Dahme kahrehda sapwellimen Koht sihpw kan anahne sawas nan ahnsou pwukat?

⁶ Silepen sihpw Kristian akan anahne alasang “silepen sihpw mwahu,” me iei Sises. (Sohn 10:11) E kin ketin nsenohki laud sapwellimen Koht sihpw kan oh kasalehda kesempwalpen en apwalih irail ni ahnsou me e mahsanihong Saimon Piter en ‘apwalih nah sihpw kan.’ (Wadek Sohn 21:15-17.) Ahpw mehlel nan ahnsou pwukat me sihpw kan anahne soangen sawas pwehki Tepil kin uhdahn nannanti en kauwehla lelepek en sapwellimen Koht aramas akan. Sehdan kin isaneki atail luwet kan oh e kin doadoahngki sampah wet pwehn kahrehiong sapwellimen Siohwa sihpw kan en wiahda dihp. (1 Sohn 2:15-17; 5:19) Irail me luwetalahr akan kak mwadang lohdi kahrehda irail anahne sawas pwehn kapwaiada kaweid en ‘weweidki sapwellimen Koht manaman.’ (Kal. 5:16-21, 25) Pwehn sewese soangen sihpw pwukat, kitail anahne kapakapki sapwellimen Koht sawas oh sapwellime manaman oh pil doadoahngki sapwellime Mahsen ni koahiek.—Lep. Pad. 3:5, 6; Luk 11:13; Ipru 4:12.

7. Ia uwen kesempwal elder kan en apwalih sihpw kan?

⁷ Silepen sihpw men en Israel mahs kin doadoahngki sokon pwehn kahluwa nah sihpw kan. Ni sihpw kan kin pidelong de pedoi sang nan kehl, sihpw pwukat pahn daulih sokono pwe silepen sihpwo kak wadekedi irail. (Lip. 27:32; Maika 2:12; 7:14) Silepen sihpw Kristian men pil anahne esehla sapwellimen Koht pelin sihpw oh ese irair en emenemen sihpw. (Pil kilang Lep. Pad. 27:23.) Kahrehda apwalih tohnmwomwohdiso iei ire kesempwal ehu me pwihn en elder kan kin koasoiapene. Met pil kin pidada en wiahda koasoandi kan pwehn sewese sihpw kan me salongala. Siohwa pein mahsanih me e pahn ketin rapahki sapwellime sihpw kan oh apwalih irail. (Esek. 34:11) Kahrehda Koht kin ketin kupwurperenki ma elder kan kin nantihong sewese sihpw kan me salongalahr en pwurodo nan mwomwohdiso.

8. Ni ahl dah kei me elder kan kak sewese sihpw men?

⁸ Ni ahnsou me emen iengetail tohnmwomwohdiso kin soumwahuda, mwemweit en silepen sapwellimen Koht pelin sihpw kak kihong ih peren oh kangoang. Met kak duwehte ni en elder kan kin sewese emen me luwetalahr nan eh nanpwungmwahu rehn Siohwa. Elder kan kak wadek iren Paipel kan, kousapahlih iren onop ehu, ehukihong ih ekei ire kesempwal kan sang nan mihting, iang ih kapakap, oh pil soangen sawas teikan. Irail kak kawehwehiong ih me tohnmwomwohdiso kan pahn perenki kilang ih pwurehng iang mihting kan. (2 Kor. 1:3-7; Seims 5:13-15) En mwemweitla reh, ekerki ih telephone, de ntinglahng ih kisinlikou kak uhdahn sewese ih! Kihong sawas mwahu ong sihpw me salongalahr men kak kalaudehla peren en eldero me kin sewese ih.

Kitail Koaros Kak Kihda Sawas

9, 10. Dahme kahrehda ke lemeleme me kaidehn elder kante me pahn nsenohki sihpw me salongalahr?

⁹ Kitail mi nan ahnsou ehu me inenen kedirepw oh apwal kahrehda kitail kakete sohte tehk me emen iengetail Kristian solahr patehng mwomwohdiso. (Ipru 2:1) Ahpw Siohwa kin ketin kesempwaliki sapwellime sihpw. Emenemen irail kesempwal duwehte kakon koaros en paliwar ehu kin kesempwal. Ihme kitail koaros anahne en nsenohki riatail kan oh sawaspene nanpwungatail. (1 Kor. 12:25) Ke kin ahneki soangen madamadauohte?

¹⁰ Mehnda ma elder kan kin keieu pwukoahki en rapahki oh sewese sihpw me salongalahr, met sohte wehwehki me sounapwalih kante me pahn nsenohki irail pwukat. Meteikan kak pil sewese sounapwalih pwukat. Kitail kak oh pil anahne en kangoange oh sewese riatail brother oh sister kan me anahne sawas en pwurodo nan mwomwohdiso. Ia duwen kitail kak wia met?

11, 12. Pwais kaselel dahieu me ke kakete alehdi pwehn sewese emen me luwetalahr?

¹¹ Ekei ahnsou, elder kan kin koasoanehdi emen sounkalohk koahiek en wia onop en Paipel rehn me luwetalahr me kasalehda eh men ale sawas. Kahrepen met iei en sewese irail en pwurehng kakairada arail “limpoak en mahso.” (Kaud. 2:1, 4) Irail pwukat kak ale sawas pwehn kakehlaka arail pwoson sang ni arail pahn kousapahlih ire kan me re katihasang erein arail sohte kin iang towehda mihting kan.

¹² Ma elder kan pahn peki rehmw en onop rehn iengomw tohnkaudok men me anahne sawas, kapakapkiong Siohwa en ketin sewese oh kapaiada iuk. Ei, “peki rehn KAUN-O en ketin kupwuramwahwihala omw koasoandi kan, ke ahpw pahn pweida ni mehkoaros me ke koasoanehdi.” (Lep. Pad. 16:3) Doudouloale duwen iren Paipel kan oh ire kan me kin kakehlaka pwoson me ke kak doadoahngki nan omw onop rehn irail me anahne sawas. Medemedewe duwen en wahnpoaron Pohl mehn kahlemeng mwahu. (Wadek Rom 1:11, 12.) Pohl men tuhwong Kristian akan nan Rom pwehn ehukihong irail kapai kan pwe irail en kak kehlailda. E pil kin kasikasik en ehukihpene mehn kangoang kan nanpwungarail. Kitail sou anahne en ahneki soangen madamadauohte ni ahnsou me kitail nantihong sewese irail akan me salongasang nan sapwellimen Koht pelin sihpw?

13. Dahme ke kak koasoiaiong me luwetalahr men?

¹³ Ni ahnsoun amwa onop, ke kak idek, “Iaduwen ke esehla padahk mehlel?” Sewese ih en tamanda ahnsou kaperen kan mwowe ni eh kin papah Siohwa. Kangoange ih en koasoiahda dahme e perenki duwen mihting kan, doadoahk en kalohk, oh kapokon kan. Koasoia duwen ahnsou kaperen kan me kumwa kin ahnekihpene nan doadoahk en Siohwa. Koasoiahda duwen ahmw perenki karanih Siohwa. (Seims 4:8) Kasalehda ahmw kalahnganki duwen en Koht kin ketin apwalih sapwellime aramas akan ahpw mehlel ni eh ketikihong kitail nsenamwahu oh koapworopwor nan atail kahpwal kan.—Rom 15:4; 2 Kor. 1:3, 4.

14, 15. Soangen kapai dah kan me irail me luwetalahr kan kin ahneki mahs me kitail kak katamankihong irail?

¹⁴ E pahn mwahu ma ke pahn katamankihong me luwetelahro kapai kan me e ahneki mwoweo sang ni eh kin patehng mwomwohdiso. Karasepe, e perenki wehwehkihla Mahsen en Koht oh kupwure kan. (Lep. Pad. 4:18) Ni ahnsou me sapwellimen Koht manaman kin ‘kakaun eh mour,’ e kin mengei ong ih en powehdi kasongosong kan. (Kal. 5:22-26) Pwehki met, eh nsenmwakelekel kak kahrehiong ih en karanih Siohwa ni kapakap oh ahneki ‘sapwellimen Koht popohl, me inenen laudsang uwen atail dehdehki.’ (Pil. 4:6, 7) Tamataman mepwukat oh kasalehda nsenoh mehlel oh kangoange ni limpoak riomw Kristian en pwurodo nan mwomwohdiso.—Wadek Pilipai 2:4.

¹⁵ Medewehla ma kowe emen elder oh ke mwemweitla rehn me luwetalahr kan. Ele ke kak kangoange pwopwoud ehu en medemedewe ahnsou me ira tepin sukuhliki padahk mehlel en Mahsen en Koht. Ia uwen padahk mehlel kin kaselel, pwung, kansenamwahu, oh kin kihong ira saledek! (Sohn 8:32) Ia uwen ara mohngiong kin kalahnganki dahme ira sukuhliki duwen Siohwa, sapwellime limpoak, oh kupwure kaselel kan! (Pil kilang Luk 24:32.) Katamankihong ira me Kristian akan me inoukihong Koht arail mour kin ahneki nanpwungmwahu reh oh kak kapakap ong ih. Nantihong kangoange ira en pwurehng mwekidki “Rongamwahu lingan me pekederdo sang rehn Koht kalahngan.”—1 Tim. 1:11.

Usehlahte Kasalehiong Irail Limpoak

16. Kihda ehu karasaras me kasalehda me en sewese me luwetalahr kan kak pweida.

¹⁶ Soangen sawas pwukat kak pweida? Ei. Karasepe, emen me pwulopwul wiahla sounkalohk men ni eh sounpar 12 ahpw luwetala oh sohla iang mwomwohdiso ni eh sounpar 15. Ahpw mwuhr e pwurehng kehlailda oh iang doadoahk en pioneer daulih sounpar 30. E pwurehng kehlailda pwehki emen elder me sewese ih. Ia uwen eh kalahnganki sawas me e alehdi sang eldero!

17, 18. Soangen irair dah kan pahn seweseiuk en kak sewese emen me salongalahsang sapwellimen Koht pelin sihpw?

¹⁷ Limpoak pahn kamwakid Kristian akan en sewese me luwetalahr kan en pwurodo nan mwomwohdiso. Sises mahsanihong sapwellime tohnpadahk kan: “I pahn kihong kumwail kosonned kapw ehu: kumwail en poakpene nanpwungamwail. Duwen ei poakohng kumwail, iei duwen kumwail en poakpene. Pwe ihme aramas koaros pahn esehki me kumwail nei tohnpadahk, ma kumwail pahn limpoakpene.” (Sohn 13:34, 35) Ei, limpoak me kin kasalehda irail Kristian mehlel akan. Kitail sou anahne en kasalehda limpoak ong Kristian akan me papidaislahr ahpw met luwetalahr? Uhdahn! Ahpw ni atail kin sewese irail pwukat, kitail anahne kasalehda irair en Kristian akan.

¹⁸ Ma ke men sewese emen me salongalahsang sapwellimen Koht pelin sihpw, mehnia irair kan me ke anahne kasalehda? Patehng limpoak, ke anahne kasalehda poakehla, kadek, mpahi oh kanengamah. Nan ekei irair akan, ke pil pahn anahne en kasalehda mahk. Pohl ntingihdi: “Kumwail en . . . kadek, mpahi oh karakarahk, aktikitik oh kanengamah. Kumwail en sawaspene oh mahkpene nanpwungamwail, ni emen rehmwail eh pahn kin kaulime emen. Kumwail uhdahn pahn mahkpene nanpwungamwail, nin duwen Kaun-o eh ketin mahkohngkumwailehr. Eri, kumwail kapatahiong soahng pwukat limpoak, pwe ih me kin kapatapene oh oarepene mehkoaros pwe en wiahla ehu ni mehlel.”—Kol. 3:12-14.

19. Dahme kahrehda e katapan en nantihong sewese sapwellimen Siohwa sihpw kan en pwurodo nan mwomwohdiso en Kristian?

¹⁹ Iren onop en mwuhr pahn koasoia dahme kahrehda ekei kin salongalahsang sapwellimen Koht pelin sihpw. E pahn pil koasoia ia duwen kitail pahn kasamwo irail ahnsou me re pwurodo. Ni ahmw pahn onopki iren onop wet oh pil mehn mwuhr, ke kak kamehlele me sawas me ke kihda pwehn kapwurehdo irail nan mwomwohdiso en Kristian pahn uhdahn katapan. Nan koasoandi wet, aramas tohto kin doadoahngki arail mour pwehn kepwehpwehla. Ahpw mour en emen aramas kin kesempwal sang mwohni koaros nan sampah. Sises ketin kawehwehda mwahu met nan sapwellime karasaras en sihpw me salongalahr. (Mad. 18:12-14) Ken tamatamante ire wet ni omw kin nantihong sewese sapwellimen Siohwa sihpw kan me salongalahr en pwurodo nan sapwellime pelin sihpw.

Ia Duwen Ke Pahn Sapeng?

• Pwukoa dahieu me silepen sihpw Kristian kan ahneki ong sihpw kan me salongalahsang sapwellimen Koht pelin sihpw?

• Ia duwen ke kak sewese irail akan me sohla patehng mwomwohdiso?

• Soangen irair dah kan pahn seweseiuk en kak sewese emen me salongalahsang sapwellimen Koht pelin sihpw?

[Kawehwehpen kilel kan nan ehu ehu pali 16]

Silepen sihpw kan kin ni limpoak sewese irail akan me salongalahr