Sewese Irail en Mwadang Pwurodo!
“Maing, ihs me se pahn patohla reh? Sapwellimomwi mahsen kan, iei mahsen en mour soutuk.”—SOHN 6:68.
1. Dahme Piter nda ni ahnsou me tohnpadahk tohto kesehla Sises?
MIE ahnsou ehu me sapwellimen Sises Krais tohnpadahk tohto kei kesehla ih pwehki re sohte perenki ehu padahk me e ketin wia. E ketin keinemwe rehn sapwellime wahnpoaron ko: “Ia duwe, kumwail pil men keseiehla?” Piter eri sapengki: “Maing, ihs me se pahn patohla reh? Sapwellimomwi mahsen kan, iei mahsen en mour soutuk.” (Sohn 6:51-69) Sohte mwahn wasa kis me re kak kohla ie. Pelien lamalam en mehn Suhs kan sohte ahneki “mahsen en mour soutuk” ahnsowo, oh pil rahnwet, soangen mahsen pwukat sohte kak dierek nan Papilon Lapalap, me iei pwihn en kaudok likamw en sampah pwon. Ong irail me salongalahsang sapwellimen Koht pelin sihpw ahpw men kaperenda Siohwa, ‘iei ahnsowo met . . . irail pahn pirida sang arail meir’ oh pwurodo nan mwomwohdiso.—Rom 13:11.
2. Dahme kitail anahne tamataman me pid duwen dihp laud?
2 Siohwa ketin kasalehda nsenoh ong mehn Israel kan me salongalahsang nan sapwellime pelin sihpw. (Wadek Esekiel 34:15, 16.) Pil duwehte, Kristian elder kan kin inengieng oh pil pwukoahki en sewese emen me salongalahsang nan pelin sihpw. Ia duwen ma elder kan koasoanehdi emen sounkalohk en onop rehn emen me salongalahr ahpw men ale sawas, oh sounkalohko diarada me aramaso wiadahr dihp laud? Sounkalohko sohte anahne en kihong ih kaweid me pid duwen dihpo, ahpw en kangoangehki ih en koasoiong elder kan. Ma e sohte wia met, sounkalohko anahne padahkihong elder kan.—Lip. 5:1; Kal. 6:1.
3. Ia pepehm en ohl me naineki sihpw 100 ni ahnsou me e diarada emen me salongalahr?
3 Iren onop en mwowe kasalehda sapwellimen Sises karasaras me pid duwen ohl men me naineki sihpw 100. Ni ahnsou me emen salongala, e pwilikihdi me 99 oh kohla rapahki me salongalahro. Ia uwen ohlo perenda ni eh diarada sihpwo! (Luk 15:4-7) Kitail kin pil perenda ni ahnsou me emen sapwellimen Koht sihpw me salongala kin pwurodo. Pwehki limpoak ong aramaso, elder kan oh tohnmwomwohdiso teikan kin mwemweitla reh. Irail pil kin men kilang aramaso en pwurodo oh ale sapwellimen Koht sawas, mehn perepe oh kapai. (Deud. 33:27; Mel. 91:14; Lep. Pad. 10:22) Ma re alehdi pwais en sewese emen en pwurodo nan mwomwohdiso, dahme re kak wia?
4. Dahme Kalesia 6:2, 5 kawehwehda?
4 Mwein irail kak kangoange emen en pwurodo nan mwomwohdiso ni arail pahn kasalehiong me Siohwa ketin poakohng sapwellime sihpw kan oh kupwurkihte uwen me re kak wia. Mepwukat pidada onopki Pwuhk Sarawi, towehda mihting en Kristian kan oh kalohki rongamwahu en Wehio. E pil konehng en wadek Kalesia 6:2, 5 oh koasoia me Kristian kan kak sawaskipene en emenemen wisik toutou kan, ahpw “emenemen kitail koaros uhdahn pahn pein wa eh wisik.” Sohte emen kak wiliandi en emen eh lelepek ong Koht.
“Pwunod kan en Sampah Wet” Kin Kaluwetehla Irail?
5, 6. (a) Dahme kahrehda e kesempwal kitail en rong kanaiehng en aramas luwetalahr kan ar kasalehda arail pepehm kan? (b) Ia duwen ke kak sewese me luwetalahr kan en wehwehki me arail sohla iang mihting kan wia mehkot keper?
5 Pwehn ese ia duwen en sewese irail me luwet akan, elder kan oh sounkalohk koahiek teikan anahne en rong kanaiehng irail pwukat ni ar kin kasalehda arail pepehm kan. Ia duwen ma kowe elder men me mwemweitla rehn pwopwoud ehu me wereila sohte iang mihting pwehki ira luwetkihla “pwunod kan en sampah wet.” (Luk 21:34) Kahpwal en mwohni oh laudlahn pwukoa nan peneinei ele kahrehiong ira en ekis ekis uhdihsang ara doadoahk kan en Kristian. Ele ira leme me ira anahne en kommoal sang ara pwukoa kan, ahpw ke kak kasalehda me en katohrehla ira sohte pahn sewese ira. (Wadek Lepin Padahk 18:1.) Mwein ke kak ni kamantik idek rehra: “Kumwa nsenamwahusang amwa kin iang towehda mihting kan? Amwa mour en peneinei kin mwahusang mahs? Kumwa kin ahneki peren me kin kohsang amwa likih Siohwa?”—Neh. 8:10.
6 En medemedewe peidek pwukat kak sewese ira en wehwehki me ara sohla towehda mihting kan kin kahrehiong ara nanpwungmwahu rehn Siohwa en luwetala oh ira sohla kin nsenamwahu. (Mad. 5:3, Ipru 10:24,25) Ke pil kak sewese ira en pohnese me ira sohla ahneki peren me kin kohsang kalohki rongamwahu. (Mad. 28:19, 20) Eri dahme ira anahne wia?
7. Dahme kitail kak kangoangehki irail me salongalahsang pelin sihpw?
7 Sises mahsanih: “Kumwail pein mwasamwasahn kumwail. Kumwail dehr kedirepwehkin kumwail mwenge laud oh sakau kehlail, oh pwunod kan en sampah wet . . Kumwail eri mwasamwasahn, oh kapakap ahnsou koaros pwe kumwail en kehlail oh itarohng pitsang mepwukat koaros me pahn wiawi.” (Luk 21:34-36) Kitail kak kangoange irail kan me salongalahsang pelin sihpw wet ahpw men pwurehng ahneki nsenamwahu. Irail en kapakapki sapwellimen Koht manaman oh sawas oh pil ni ahnsowohte en mwekid pahrekiong arail kapakap.—Luk 11:13.
Mehkot Kahrehda Ren Pwupwudi?
8, 9. Ia duwen elder men kak sewese emen me dipekelekelki mehkot?
8 Pwehki soh unsek en aramas, ekei pak re sohte kak pwungkipene mehkot oh met kak kahrehiong irail en pwupwudi. Ekei kin dipekelekelki ma emen me tohnmwomwohdiso tohto kin wauneki wiahda mehkot me sohte pahrekiong Paipel. Ma emen me luwetalahr pwehki met, elder men me mwemweitla reh kak katamankihong ih me Siohwa sohte kin ketin kadipikelekelih emen. Eri ia kahrepen emen en kauwehla eh nanpwungmwahu rehn Koht oh Sapwellime aramas kan? E sou konehng en pousehlahte papah Koht oh kamehlele me “Sounkopwung en sampah pwon” mwahngih dahme wiawiher oh e pahn ketin apwalihala ireo ni pwung? (Sen. 18:25; Kol. 3:23-25) Ma emen uhdahn pwupwudi, e sohte pahn men mihmihte wasao ahpw pahn song en pwourda.
9 Ahnsou me e pahn song en sewese ih, eldero mwein pahn koasoia me ekei kin dipekelekelki mehkot mahs ahpw met re diarada me kahrepen arail dipekelekel solahr kesempwal. Mwein irair me kahrehiong irail en sohla papah Siohwa solahr mie. Ma aramaso dipekelekel pwehki e ale peneu, eh doudouloale oh kapakap kak sewese ih en wehwehki me ih pil sapwung oh sohte anahne mweidohng peneuo en kahrehiong ih en pwupwudi.—Mel. 119:165; Ipru 12:5-13.
Ehu Padahk en Paipel me Kahrehiong Ih en Luwetala?
10, 11. Ia duwen ke kak sewese emen me sohte pwungki ekei padahk kan en Paipel?
10 Ekei kin sohla iang sapwellimen Koht pelin sihpw pwehki re sohte kin pwungki ekei padahk en Paipel. Mehn Isreal kan me saledekla sang Isip ‘manokehla dahme [Koht] ketin wiadahr’ ong irail oh re “sohte awih re en rong sapwellime kaweid.” (Mel. 106:13) E pahn wia sawas mwahu en kataman ong me luwetalahro me“ladu lelepek oh loalokong” kin kihda padahk en Paipel me rasehng ketihnain. (Luk 12:42) Ni tepio, ih duwen e sukuhliki padahk mehlel. Ia kahrepen e sohte pahn pwurehng nantihong en weweidki padahk mehlel?—2 Sohn 4.
11 Ni ahnsou me elder kan kin nantihong sewese irail me salongalahr sang sapwellimen Koht pelin sihpw, re kak koasoia duwen sapwellimen Sises tohnpadahk kan me kesehla ih pwehki re sohte pwungki ehu padahk me e ketikihda. (Sohn 6:53, 66) Ni arail sohla iang Krais oh sapwellime tohnpadahk lelepek kan, irail katihasang mehkan me pid arail kaudok oh arail peren. Ia duwe, irail kan me sohla iang towehda mihting kan en mwomwohdiso kin diarada ehu wasa tohrohr me re kak paiekihda padahk mehlel? Uhdahn soh!
E Wiahda Dihp Laud?
12, 13. Ma emen me salongasang nan sapwellimen Koht pelin sihpw wehkada dihp laud ehu, ia duwen kitail kak sewese ih?
12 Ekei kin uhdihsang kalohk oh towehda mihting kan pwehki re wiahda dihp laud. Irail leme ma irail wehkada arail dihp kan ong elder ko, irail pahn piskenla. Ahpw irail sohte pahn piskenla sang mwomwohdiso ma irail uhdihsang wia dihpo oh kin koluhla mehlel. (2 Kor. 7:10, 11) Weksang met, koaros pahn perenki arail pahn pwurodo, oh elder kan pahn kihong soangen sawas kan me konehng pwehn kakehlailiada arail nanpwungmwahu rehn Siohwa.
13 Ma kowe emen sounkalohk koahiek me alehdi pwukoa en sewese emen me luwetalahr, dahme ke anahne wia ma e ndaiong uhk me e wiahdahr dihp laud ehu? Duwehte me kitail koasoiapenehr mwoweo, ke sohte anahne kaweidih ih ahpw ke anahne kangoange ih pwehn tuhwong elder kan. Ma e sohte men wia met, ke pahn kasalehda ahmw kesempwaliki mwaren Siohwa oh kamwahupen mwomwohdiso ni ahmw pahn kapwaiada sapwellimen Koht koasoandi kan me pid ire pwukat. (Wadek Lipai 5:1.) Elder kan pahn ese ia duwen irail pahn sewese emen me men pwurodo oh pwurehng mour nin duwen me Koht kupwurki. Re anahne kaweidki ni elen limpoak. (Ipru 12:7-11) Ma aramaso wehwehkier me e wiadahr dihp mwohn Koht, solahr wia dihpo, oh koluhla mehlel, elder kan pahn sewese ih, oh Siohwa pahn ketin mahkohng ih.—Ais. 1:18; 55:7; Seims 5:13-16.
Emen me Pwurodo Kin Wahdo Peren Laud
14. Ni pein ahmw lokaia, kawehwehda duwen sapwellimen Sises karasaras en pwutak me salongala.
14 Ni arail pahn nantihong en sewese me salongalahro, me alehdi pwukoa en sewese ih ele kak kataman ong ih duwen sapwellimen Sises karasaras me kileldi nan Luk 15:11-24. Nan karasaraso, pwutak pwulopwul men kesehla mwahl eh sohso ni eh kin mourki mour suwed. Kedekedeo e tepida kailongkihla soangen mour suwed me e wiewia. E duhpekla, loaleidki peneinei, oh koasoanehdi en pwurala rehn eh peneinei! Ni ahnsou me e saikinte karanih ihmwo, eh pahpao kilangada, ih eri tangalahte pwoalehdi oh metik, oh inenen perenda mehlel. En medemedewe duwen karasaras wet kak kamwakid emen me salongalahr en pwurodo nan mwomwohdiso. Pwehki koasoandi wet pahn kereniong sohrala, e anahne mwadang pwurodo nan mwomwohdiso.
15. Dahme kahrehda ekei kin peila sang nan mwomwohdiso?
15 Pali laud en irail me peila sang mwomwohdiso sohte uhdahn duwehte pwutako me salongala. Ong ekei, irail kin peila duwehte pwoht ehu me kin ekis ekis peila sang sahpw. Meteikan kin toutoukihla arail pwunod kan oh sohla nsenohki arail nanpwungmwahu rehn Siohwa. Pil ekei kin dipekelekelki emen nan mwomwohdiso de re sohla iang pwehki re sapwungki ehu padahk en Paipel. Ekei kin iang pidada wiewia kan me uhwong padahk en Paipel. Ahpw kaweid kan me kohda ong irair pwukat kak sewese iuk en sewese irail kan me sohla iang mwomwohdiso pwehki soangen kahrepe pwukat de kahrepe teikan mwohn e sohla ahnsou en wia met.
“I Perenkihda Ahmw Pwurodo!”
16-18. (a) Ia duwen elder men sewese emen brother me sohla patehng mwomwohdiso ahnsou reirei? (b) Dahme kahrehda brother menet luwetkihla? Soangen sawas dah kan e alehdi? Ia duwen mwomwohdiso kasamwo ih?
16 Emen Kristian elder koasoia: “At pwihn en elder kan kin inenen nsenohki en mwemweitla rehn irail me luwetalahr kan. I medemedewe duwen brother men me I kin onop reh oh sewese en esehla padahk mehlel. E sohla patehng mwomwohdiso ki sounpar 25 oh e mihla nan kahpwal laud. I eri kawehwehiong ih me en doadoahngki kaweid kan en Paipel pahn kak sewese ih. Mwurin ahnsou kis, e tepida iang mihting kan oh pil men wia onop en Paipel pwehn sewese eh nannanti en pwurodo nan mwomwohdiso.”
17 Dahme kahrehda brothero luwetala? E wehkada: “I tepida nohn nsenohki duwen mehkan en sampah laudsang ei nanpwungmwahu rehn Siohwa. I eri uhdihsang onop, sohla iang kalohk oh mihting kan. I sohte pehm iahd me I sohla patehng mwomwohdiso en Kristian. Ahpw I ale sawas en pwurodo sang elder men me kasalehda nsenoh mehlel ong ie.” Eh kahpwal kan tepida tikitikla mwurin e tepida onop en Paipel. E koasoia: “I wehwehkihda me dahme sohla mihmi nan ei mour iei limpoak oh kaweid sang Siohwa oh sapwellime pwihn.”
18 Ia duwen mwomwohdiso kasamwo ih? E koasoia: “I pehm duwehte pwutako me salongala me Sises mahsanih. Ni mehlel emen sister mah me kin mi nan mwomwohdiso sounpar 30 samwalahr oh pil kin papahte Siohwa ni lelepek ndaiong ie, ‘I perenkihda ahmw pwurodo!’ Met uhdahn kamwakid ei mohngiong. I pehm likamwete I pwurodo nan ei peneinei. I men kasalehda ei kalahnganki limpoak, kadek, kanengamah oh nsenoh me eldero oh mwomwohdiso pwon kasalehiong ie. Arail limpoak ong Siohwa oh mehn mparail uhdahn sewese ie en pwurodo nan mwomwohdiso.”
Kangoange Irail en Mwadang Pwurodo!
19, 20. Ia duwen ke kak kangoange me luwetalahr kan en mwadang pwuredo nan mwomwohdiso? Ia duwen ke kak kasalehiong irail me Koht ketin kupwurki kitail en wia uwen me kitail kak?
19 Kitail mihmi nan imwin rahn akan oh imwin koasoandi wet kerendohr. Kahrehda kitail en kangoange me luwetalahr kan en iang towehda mihting kan. Karuwa irail en tepida mwadang. Katamankihong irail me Sehdan kin nantihong kauwehla arail nanpwungmwahu rehn Koht oh men irail en medewe me re kak pitsang pwunod kan nan arail mour ma re pahn kesehla kaudok mehlel. Ke kak kamehlelehiong irail me re kak ahneki nsenamwahu mehlel ihte ma re pahn wia sapwellimen Sises tohnpadahk lelepek kan.—Wadek Madiu 11:28-30.
20 Katamankihong me luwetalahr kan me Koht kin kupwurki kitail en wia uwen me kitail kak. Ni ahnsou me ekei kauwe rien Lasarus Mery pwehki e keiehki Sises leh pweilaud ehu mwohnte e pwoula, e mahsanih: “Kumwail dehr direpwki lihet! . . . E wiadahr uwen me e kak.” (Mark 14:6-8) Sises ketin kapinga liohdi semwehmwe men me wiahda meirong me inenen tikitik nan tehnpas sarawio. E pil wiahda uwen me e kak. (Luk 21:1-4) Pali laud en kitail kak iang towehda mihting kan oh iang kalohki rongamwahu. Ki sapwellimen Siohwa sawas, me tohto me luwetalahr ahnsouwet pahn kak pil wia duwehte.
21, 22. Dahme ke kak kamehlelehiong irail kan me pwuralahng Siohwa?
21 Ma emen me salongalahr sang pelin sihpw kin pweiek en pwurehng tuhwong tohnmwomwohdiso kan, ke kak katamankihong ih duwen peren me wiawi ni ahnsou me pwutak me salongalahro pwurodo rehn eh peneinei. Irail me kin pwurodo nan mwomwohdiso kin wahdo soangen perenohte. Kangoange irail en mwekid mwadang pwehn pelianda Tepil oh karanih Koht.—Seims 4:7, 8.
22 Koaros pahn perenki kasamwo irail me kin pwuralahng Siohwa. (Koul Ked. 3:40) Ahnsou me irail kin papah Koht mahs, re kin ahneki peren laud. Irail kan me mwadang pwurodo nan mwomwohdiso pahn ale kapai tohto ni ahnsou kohkohdo!
Ia Duwen Ke Pahn Sapeng?
• Ia duwen ke kak sewese emen Kristian me dipekelekelkihda mehkot oh luwetalahr?
• Dahme kak sewese emen me salongalahsang sapwellimen Koht pelin sihpw pwehki e sapwungki ehu padahk?
• Ia duwen kitail kak sewese emen me pweiek en pwuredo nan mwomwohdiso?
[Kawehwehpen kilel kan nan ehu ehu pali 19]
Rong kanaiehng ni en me luwetalahr men pahn kasalehda eh pepehm
[Kawehwehpen kilel kan nan ehu ehu pali 21]
Karasaras en pwutak me salongala pahn kamwakid ekei en pwurodo