Ke Kak Kangoange Kristian Men me Wereila Sohla Patehng Mwomwohdiso

Niare, April 11, tohto me wereila sohla patehng mwomwohdiso pahn iang towehda Katamano. Irail tapihadahr weiren tang en mour ahpw re ekis wawaila pwehki soangsoangen kahrepe kan. Ekei kahrepe pwukat pwarada nan kisin pwuhk Pwurodo Rehn Siohwa. (Ipru 12:1) Ahpw, irail pwukat me sohla patehng mwomwohdiso kin kesempwalte ong Siohwa, me ketin pwainkinirailda ntahn sapwellime Ohl. (Wiewia 20:28; 1 Pit. 1:18, 19) Ia duwen atail kak sewese irail en pwurodo nan mwomwohdiso?

Elder kan nan mwomwohdiso kin rapahki oh sewese irail Kristian kan me sohla patehng mwomwohdiso, duwehte sounsilepen sihpw men me kin ngoangki raparapahki sihpw me salongala sang pelin sihpw kan. (Luk 15:4-7) Met kin kasalehda sapwellimen Siohwa nsenoh ni limpoak. (Ser. 23:3, 4) Kitail koaros, kaidehn elder kante, me kak kangoange irail pwukat. Atail nannanti en kasalehda kadek oh poakohng riatail kan kin kaperenda Siohwa oh kitail kak paiekihda laud atail kin wia met. (Lep. Pad. 19:17; Wiewia 20:35) Kahrehda medewe ihs me ke kak kangoange, oh mwadang wia met!

KILANG KISIN KASDO ENCOURAGE THE INACTIVE ONES, OH MWURI KOASOIAPENE PEIDEK PWUKAT:

• Dahme Abbey wia ni eh tuhwong Sounkadehde men me e sehse?

• Dahme kahrehda kitail en tuhwong mahs elder kan ma kitail medemedewe en sewese emen me sohla patehng mwomwohdiso?

• Ia duwen Abbey eh kaunopada en pwurehng mwemweitla rehn Laura?

• Ia duwen Abbey eh kasalehda kanengamah, limpoak, oh koasoanehdi en pousehlahte sewese Laura erein eh songosong en kangoange ih?

• Dahme kitail kak sukuhlkihsang sapwellimen Sises karasaras me dierek nan Luk 15:8-10?

• Kapai dah kan me pwarada pwehki arail nantihong sewese Laura?