Dehr Manokehla Irail akan me Wereila Sohte Iang Kalohk (Inactive)
1. Dahme kahrehda kitail anahne song en kangoange irail akan me wereila sohte iang kalohk?
1 Ke ese emen me wereila sohte iang kalohk? Mwein ele e uhdihsang en patehng mwomwohdiso oh salongalahr. Mwein ke tuhwong soangen aramaso ni ahnsou me ke kin iang kalohk en ihmw lel ihmw. Kitail anahne tamataman me aramaso wia riatail brother. Kitail men kamehlelehong ih atail limpoak oh sewese ih en pwurodo nan mwomwohdiso oh rehn ‘silepatail oh sounapwalih en atail mour.’—1 Piter 2:25.
2. Iaduwen kitail pahn mwein ele kihda kangoang ong emen me wereila sohte iang kalohk?
2 Kasalehda Nsenoh: Atail koasoiong ih ni mwotomwot nan telephone de mwemweit reh mwein ele pahn kamehlelehong emen me wereila sohte iang kalohk me kitail sohte kin manokehla ih. Dahme kitail kak nda? Mwein kitail kak wia kangoang ni ihte atail pahn kahrehong ih en ese me kitail kin medemedewe duwen ih. Kolokol amwail koasoi kansenamwahu oh kangoang. (Pilipai 4:8) Mwein kitail pahn kihda ire ehu me kitail perenkihda sang mihding ehu me ahpwtehn wiawi. Kitail pil kak luhke ih ong ehu mihding de kapokon me pahn wiawi oh ndaiong ih me kitail pahn kak koasoanehdi ah wasahn mwohd oh mehn peidaid.
3. Iaduwen emen sister pwurehng tepida iang kalohk?
3 Emen sister me sohte kin iang kalohk sounpahr reireisang 20 me dierekda nan wasahn kalohk. Mendahki e sohte men wia onop en Paipel, sistero me diarada ih pwurehng pwurala reh, kihong ih makasihn kapw kan. Mwurin kapokon en district, sounkalohko ehukihong sistero me wereila sohte iang kalohk ekei ire kan sang kapokono, oh kedekedeo e pwurehng tepida iang kalohk.
4. Iaduwen kitail anahne apwalih emen me pwurehng tepida iang mihding kan?
4 Ni Ahnsou me Emen Pwurodo: Ni ahnsou me emen brother me wereila sohte iang kalohk tepida pwurehng iang towehda mihding kan, iaduwen kitail anahne apwalih ih? Eri, iaduwen Sises apwalih sapwellime tohnpadahk kan mwurin arail kesehla ih ni kisin ahnsoukis? E likwerih irail ni kadek “riei ko” oh kasalehda ah koapworopworki irail. E pil kihong irail pwukoa kesempwal ieu. (Madiu 28:10, 18, 19) Mwurin ahnsoukis, irail kin soupisengki kalohkiseli rongamwahu “ni sohte uhdihsang.”—Wiewia 5:42, NW.
5. Kihda irair kan me kitail anahne koasoiong elder kan duwen emen me wereila sohte iang kalohk.
5 Mwohn kangoange emen me wereila sohte iang kalohk en tepida onop en Paipel de mwohn luhke brother men me wereila sohte iang kalohk en iang kitail nan kalohk, kitail anahne ale kaweid sang rehn elder kan. Ma kitail tuhwong emen sounkalohk me wereila sohte iang kalohk nan wasahn kalohk, kitail anahne kehsehkin elder kan pwe ren kak kihda sawas me anahn.
6. Soangen peren dah me mwein kitail pahn ahneki sang ni atail kin sewese irail akan me wereila sohte iang kalohk?
6 Nin duwen Paipel kin kasalehda ni sansal, irail kante me pahn tang nan arail weirentang lel imwi pahn ale komourparail. (Madiu 24:13) Kahrehda, pehmitikiong irail akan me mwein dipekelekella de salongalahr. Ma kitail kin ni kanengamah kasalehda sapwellimen Siohwa limpoak ni atail kin kasalehda nsenoh mehlel ong soangen aramas pwukat, mwein ele kitail pahn ahneki peren ni atail pahn kilang irail pwukat en pwurehng iang kitail en wia doadoahk sarawi.—Luk 15:4-10.