Koakon En Peidek
◼ Iaduwen kitail kak sewese emen me sohla iang kalohk wereila en pwurehng warohng iang kalohki Rongamwahu?
Ni ahnsou me emen me sohla iang kalohk kin kasalehda me e men pwurehng papah Siohwa sang mohngiongih, met kin wia mehkot me kitail uhdahn perenki. (Luk 15:4-6) Mwein aramaso mweidohng uhwong sang aramas teikan de pwunod kan en kahrehong ih en sohla pein onop Paipel, sohla iang mihding kan, oh sohla kalohk. Sawas dah me keieu mwahu en kohwong ih pwe e pahn kak kekeirada ni pali ngehn?
E pahn mwahu ma kitail koaros pahn kasalehda limpoak mehlel ong ih. Elder kan pahn mwadang tehk duwen ah anahn akan en pali ngehn. (Seims 5:14, 15) Ma ahnsou me e sohla iang kalohk mwotomwot, eri, emen sounkalohk koahiek kak iang ih pwehn kak sewese ih nan kalohk. Ahpw, ma e sohla iang kalohk wereila, sawas laud anahne kohwong ih. Pwehn kakairada eh pwoson oh kalahngan, e pahn mwahu ma emen pahn onop Paipel reh oh pahn doadoahngki sawaspen Paipel ehu. Sounapwalih en Kalohk pahn koasoanehdi pwe emen sounkalohk koahiek pahn onop reh. (Ipru 5:12-14; kilang Atail Doadoahk Ong Wehio en December 1998 Koakon en Peidek.) Ma ke ese emen me anahne sawas wet, ke kak koasoiong Sounapwalih en Kalohk nan ahmw mwomwohdiso.
Mwohn ke pahn luhke emen me sohla iang kalohk wereilahr en iang uhk nan kalohk, e pahn mwahu ma elder riemen pahn tuhwong ih pwehn tehk ma e warohng iang kalohk ahnsou wet. Re pahn idawehn koasoandi me duwehte ahnsou me re kin tuhwong irail me kapw kan me men tepida iang kalohki Rongamwahu. (Kilang Watchtower (lokaiahn wai) en November 15, 1988, pali 17.) Aramaso me men pwurehng iang kalohk pahn kasalehda me e kin inengieng en kalohki Rongamwahu rehn aramas akan. E anahne kapwaiada soahng kan me ntingdi nan pwuhken Our Ministry, ni pali 98-99 oh e pahn anahne kaukaule iang mihding kan koaros.
Ma e men pwurehng kehlailla ni pali ngehn, e pahn kesempwal me e pahn mie eh koasoandi en wadek Paipel oh sawaspen Paipel kan, kapakap, oh iang towehda mihding kan oh kapwaiada dahme e sukuhliki oh mehpwukat pahn sewese ih en pwurehng wiahda nanpwungmwahu rehn Siohwa oh kekeid nan ahlo me pahn kahluwalahng mour soutuk. (Madiu 7:14; Ipru 10:23-25) E pahn “nannanti” oh kekeirada irair en Kristian oh mehpwukat pahn sewese ih en dadaur pwe e sohlahr pahn pwurehng wia mehkot me pahn kerempwa ih en “wah mwahu oh pweida” nin duwen sapwellimen Sises tohnpadahk men.—2 Pit. 1:5-8.