Re “Kin Idawehn Sihmpwulo”

“Re kin idawehn Sihmpwulo wasa koaros me e pahn kin ketila ie.”​—KAUD. 14:4.

1. Ia pepehm en sapwellimen Sises tohnpadahk mehlel akan ni arail kin idawehn ih?

KERENIONG sounpar riau elep nan sapwellime doadoahk en kalohk, Sises kin “ketin padapadahkseli nan Kapernaum.” “Me tohto sang nanpwungen irail kan me ideidawehn Sises mweikihsangehr oh solahr men idawehn” ih pwehki sapwellime padahk me nohn apwal ong irail. Ni en Sises ketin keinemwe rehn sapwellime tohnpadahk 12 ko ma re pil men iang kohkohla, Saimon Piter eri sapengki: “Maing, ihs me se pahn patohla reh? Sapwellimomwi mahsen kan, iei mahsen en mour soutuk. Eri, met se pwosonlahr oh eseier me sapwellimen Koht me Sarawio komwi.” (Sohn 6:48, 59, 60, 66-69) Tohnpadahk mehlel kan en Sises sohte kin uhdihsang idawehn ih. Mwurin irail keikihdi sapwellimen Koht manaman, irail kin doulahte oh uhpah kaweid en Sises.​—Wiewia 16:7-10.

2. (a) Ihs “ladu lelepek oh loalokong” de ‘sounpapah loalopwoat’? (b) Ia duwen laduo wiahdahr adamwahu ni eh kin “idawehn Sihmpwulo”?

² Ahpw ia duwen Kristian keidi kan nan atail ahnsou? Nan sapwellime kokohp duwen “kilel dah kei me pahn kasalehda ahnsoun [eh] pahn ketido oh imwin sampah,” Sises ketin mahsanihki pwihn en me keidi kan me kin idawehn ih pohn sampah nin duwen “ladu lelepek oh loalokong,” de ‘sounpapah me loalopwoat.’ (Mad. 24:3, 45; Luk 12:42) Nin duwen pwihn ehu, ladu pwukat wiahdahr adamwahu me re kin “idawehn Sihmpwulo wasa koaros me e pahn kin ketila ie.” (Wadek Kaudiahl 14:4, 5.) Towe kan kin duwehte lih meipwon men ni arail sohte kin saminkihla padahk kan oh tiahk kan en ‘Papilon Lapalap,’ me iei palien kaudok likamw koaros en sampah. (Kaud. 17:5) Sohte padahk likamw pwoat kin “dierekda sang nan awarail kan” oh “sohte kisin samin kis” sang ahn Sehdan sampah kin mie rehrail. (Sohn 15:19) Ni ahnsou kohkohdo, irail luhwen me keidi kan pohn sampah “pahn kak idawehn” Sihmpwulo kohdahla nanleng.​—Sohn 13:36.

3. Dahme kahrehda e kesempwal en likih pwihn en laduo?

³ Sises ketin idihadahr ladu lelepek oh loalokong “pohn papah teikan,” me iei emenemen keidi kan, “pwe en kin nehkohng irail kanarail kisin mwenge ahnsou me konehng.” Oh e pil ketin idihada laduo pwehn apwalih “eh dipwisou kan koaros.” (Mad. 24:45-47) Ekei “dipwisou” pwukat iei ‘pokon kalaimwun’ sang ‘sihpw teikan’ me kin wie tohtohla. (Kaud. 7:9; Sohn 10:16) Ia duwe, emenemen irail me keidi kan oh pil ‘sihpw teikan’ sou anahne en likih ladu me idihddahro? Mie kahrepe tohto me pwihn en ladu wet warohng atail likilik. Kahrepe riau me keieu kesempwal iei: (1) Siohwa ketin likih pwihn en ladu wet. (2) Sises pil kin ketin likih irail. Kitail en tehkpene mehn kadehde kan me Siohwa oh Sises Krais sapwellimanki likilik unsek ong pwihn en ladu lelepek oh loalokong.

Siohwa Ketin Likih Laduo

4. Dahme kahrehda kitail kak likih padahk kan en Paipel me pwihn en ladu lelepek oh loalokong kan kin kihda?

⁴ Medewehla ia duwen pwihn en ladu lelepek oh loalokong kin kihda padahk mehlel kan en Paipel ni ahnsou me konehng. Siohwa mahsanih: “I pahn padahkihong uhk ahl me ke pahn weid ie; I pahn kaweid uhk oh panawihiuk.” (Mel. 32:8) Ei, Siohwa kin ketin kaweidih pwihn en ladu wet. Kahrehda, kitail kak likih duwen kupwurokong, wehwe mwahu, pil kaweid kan me kin poahsoanda sang Paipel me kitail kin alehdi sang irail.

5. Dahme kin kasalehda me sapwellimen Koht manaman kin kaweidih pwihn en laduo?

⁵ Siohwa pil ketin kapaiada pwihn wet ki sapwellime manaman. Mendahki sapwellime manaman sohte kin sansal, e kin kak sansalda rehn irail akan me e kin kaweidih. Medewehla duwen dahme pwihn en ladu lelepek oh loalokong wiahdahr ni arail kin kalohki nan sampah pwon duwen Siohwa Koht, sapwellime Ohl, oh pil duwen Wehio. Sapwellimen Siohwa sounpapah kan kin padapadahngki duwen Wehio nan sahpw 230, me iangahki kisin deke kan. Met sou kin kasalehda duwen mehlelpen sapwellimen Koht manaman eh kin doadoahk rehn pwihn en laduo? (Wadek Wiewia 1:8.) Pwehn kihda padahk mehlel kan en Paipel ong sapwellimen Siohwa ladu kan sampah pwon, irail anahne en wiahda pilipil kesempwal tohto. Ni arail kin wiahda pilipil pwukat oh nantihong pwe en pweida, re kin wia met ni elen limpoak, mpahi, oh pil ni soangen irair kaselel teikan me sapwellimen Koht manaman kin kapwarehda.​—Kal. 5:22, 23.

6, 7. Ia uwen laud en sapwellimen Siohwa likilik ong pwihn en ladu lelepek?

⁶ Pwe kitail en wehwehki ia uwen laud Siohwa kin ketin likih pwihn en ladu lelepek kan, medewehla dahme e ketin inoukihong irail. Wahnpoaron Pohl ntingihdi: “Pwe ni ngilen sowio, me melahr akan ahpw pahn iasadahng mour me solahr kak mehla, a kitail koaros ahpw pahn kiewekla. Pwe me pahn mwerpeseng uhdahn pahn kieweklahng ni soahng me solahr kak mwerpeseng, oh me pahn mehla uhdahn pahn kieweklahng ni soahng me solahr kak mehla.” (1 Kor. 15:52, 53) Sounidawehn Krais me keidi kan kin papah Koht ni lelepek oh paliwararail me uduk kin mwerpeseng ni ar mehla ahpw pahn iasada ni mwohmw ehu me ileilesang tohnleng akan oh ahneki mour soutuk. Irail solahr kak mehla oh sohte imwin arail mour. Patehng met, paliwararail sohte kak mwerpeseng de ohla. Kaudiahl 4:4 kawehwehda me irail pwukat me iasada pahn ket nan mwoahl oh elin kapwat kohl pahn mi pohn moangarail. Lingan en soupeidi pahn kowohng Kristian keidi pwukat. Ahpw pil mie soahng teikan me pahn wiawi.

⁷ Kaudiahl 19:7, 8 mahsanih: “Pwe e lelehr ahnsoun kapwopwoud en Sihmpwulo, oh sapwellime lih kamwohd onopadahr. E mweimweiongehr lih kamwohdo en kapwatkihda likou min oh mwakelekel. (Likou mwakelekel, iei en sapwellimen Koht aramas akan ar wiewia mwahu kan.)” Siohwa ketin pilada Kristian keidi kan en wia lih kamwohd ong sapwellime Ohl. Ia uwen kaselel en kisakis pwukat en ahneki paliwar me sohte kak mwerpeseng de ohla, mour me sohte kak mehla, wia soupeidi kan, oh iang ‘kapwopwoud ong Sihmpwulo’! Mepwukat wia mehn kadehde me Koht ketin likih me keidi kan, me kin “idawehn Sihmpwulo wasa koaros me e pahn kin ketila ie.”

Sises Ketin Likih Laduo

8. Ia duwen Sises kin ketin kasalehdahr me e ketin likih irail me keidi kan me kin idawehn ih?

⁸ Mehn kadehde dah me kasalehda me Sises kin ketin likih ni unsek irail me keidi kan me kin idawehn ih? Ni kaimwiseklahn pwong en eh mour sampah, Sises ketin wiahda inou ehu ong sapwellime wahnpoaron 11 ko: “Kumwail kin mihmihte rehi ahnsou koaros nan ei apwal akan; oh nin duwen Semei eh ketikihongieier manaman en kaunda wasa, I pil pahn kihong kumwail soangen manamanohte. Kumwail pahn iang ie konot de sak ni ei tehpel nan ei Wehi, oh kumwail pahn iang mwohd nan mwoalomwail mwoalen kopwung pwe en wia kapwungpen kadaudok eisek riaun Israel.” (Luk 22:28-30) Inou wet pahn pil kohwong irail koaros me iang kisehn l44,000. (Luk 12:32; Kaud. 5:9, 10; 14:1) Ia duwe, Sises pahn kak ketin inoukihong irail ren iang ih kaunda sapwellime Wehi ma eh sohte ketin likih irail?

9. Ia ekei ‘dipwisou kan en [Krais]’?

⁹ Sises Krais pil ketin idihada ladu lelepek oh loalokong “en kaunda eh dipwisou kan koaros,” me wehwehki soahng koaros nin sampah me pidada Wehin Koht. (Mad. 24:47) Ekei dipwisou pwukat iei poasen kaunen Sounkadehdehn Siohwa kan, ohpis en Sounkadehdehn Siohwa kan nan sahpw teikan, Wasahn Kapokon kan oh Wasahn Kaudok kan nan sampah pwon, iangahki doadoahk en kalohki Wehio oh katohnpadahk. Mie emen me kak idihada aramas men me e sohte likih pwehn apwalih eh dipwisou kesempwal kan?

10. Dahme kasalehda me Sises Krais kin ketin ieiang sapwellime keidi kan?

¹⁰ Mwohnte Sises ketidahla nanleng, e pwarowohng sapwellime tohnpadahk kan oh wiahda inou ehu ong irail, mahsanih: “Kumwail en ese pwe I pahn ieiang kumwail ahnsou koaros lel ni imwin kawa.” (Mad. 28:20) Ia duwe, Sises ketin kapwaiada inou wet? Sounpar 15 samwalahro, mwomwohdiso en Sounkadehdehn Siohwa kan kin tohtohki 70,000 ahpw met e lelehr 100,000. Met wehwehki laudsang persent 40 laudla. Oh ia uwen tohtohlahn tohnpadahk kapw kan? Kereniong tohnpadahk 4,500,000 papidaisla nan sounpar 15 samwalahro, me wehwehki kereniong aramas daulih 800 nan ehuehu rahn. Uwen laud en kekeirda wet kin wia mehn kadehde mwahu me Krais kin ketin kaweidih sapwellime keidi kan nan arail mihting en mwomwohdiso kan oh pil utungada arail doadoahk en katohnpadahk.

Laduo Kin Lelepek oh Loalokong

11, 12. Ia duwen pwihn en laduo kin kasalehda ar lelepek oh loalokong?

¹¹ Ma Siohwa Koht oh Sises Krais kin ketin likih ni unsek irail ladu lelepek oh loalokong, ah ia duwen kitail? Pwihn en ladu lelepeko kasaledahr me re kin lelepek ong arail pwukoa doadoahk. Karasepe, makasihn en Kahn Iroir mihmikiher sounpar 130. Mihting kan oh kapokon kan en Sounkadehdehn Siohwa kan kin usehlahte kakehlailih atail pwoson.

¹² Pwihn en ladu lelepeko pil kin loalokong pwehki re sohte kin tiengla mwowe oh wia mehkot mwohn re alehdi sapwellimen Siohwa kaweid kan, ahpw ni ahnsowohte me re kin alehdi, re kin mwadang kapwaiada. Karasepe, sarawi likamw kan kin mweidohng aramas en wia tiahk suwed kan, ahpw pwihn en laduo kin kihda kaweid kan pwehn pere kitail sang lidip kan en Sehdan. Laduo kin kak kihda kaweid erpit kan ni ahnsou me konehng pwehki Siohwa Koht oh Sises Krais kin ketin kapaiada met. Kahrehda kitail anahne likih pwihnen laduo ni unsek. Ia duwen kitail kak kasalehda atail likih irail?

Iangala me Keidi kan ni Arail Kin Idawehn Sihmpwulo

13. Nin duwen kokohp en Sekaraia, ia duwen kitail kak kasalehda me kitail likih ladu lelepek oh loalokong?

¹³ Pwuhken Sekaraia kin koasoia duwen “mehn liki ehk” me kohla rehn “mehn Suhs men” oh nda: “Se pahn iang kumwailla.” (Wadek Sekaraia 8:23.a) Pwehki ireo kin doadoahngki lepin lokaia pwukat “iang kumwailla,” eri “mehn Suhs men” kin wehwehki pwihn ehu. Nan atail ahnsou, e kin wehwehki luhwen Kristian keidi kan, me iei kisehn “Israel en Koht.” (Kal. 6:16, NW) “Mehn liki ehk sang ni lokaia koaros en wehi kan” kin wehwehki pokon kalaimwun en sihpw teikan. Duwehte Kristian keidi kan kin idawehn Sises ahnsou koaros, pokon kalaimwun kin pil “iang” ladu lelepek oh loalokong. Pokon kalaimwun sohte anahne en namenengki en kasalehda me re wia iengen ‘irail me Koht pil ketin malipeier.’ (Ipru 3:1) Sises sohte kin ketin namenengki “rie” me keidi kan.​—Ipru 2:11.

14. Ia duwen kitail kak utung rien Krais kan?

¹⁴ Sises Krais mahsanih me ni ahnsou kitail kin utung rie me keidi kan, met duwehte kitail kin utung ih. (Wadek Madiu 25:40.) Eri ni ahl dahieu irail me ahneki koapworopwor en mour pohn sampah kin utung rien Krais me keidi kan? Keieu iei sang arail kin sewese doadoahk en kalohki Wehio. (Mad. 24:14; Sohn 14:12) Ni en me keidi kan pohn sampah kin wie malaulaula, irail sihpw teikan kin wie tohtohla. Irail kin iang wia doadoahk en kalohk, ekei nin duwen pioneer kan, oh irail kin utung me keidi kan en kapwaiada pwukoahn katohnpadahk. (Mad. 28:19, 20) Kitail en dehr manokehla me ekei elen utuht kan iei en toukihda sawas en mwohni ni soangsoangen ahl akan.

15. Ia duwen emenemen Kristian kin kilangwohng padahk mehlel oh koasoandi kan sang pwihn en laduo?

¹⁵ Ia duwen emenemen Kristian kin kilangwohng padahk kan me ladu lelepek oh loalokong kin kihda sang sawasepen Paipel kan oh nan mihting oh kapokon kan? Kitail kin kalahnganki ale mepwukat oh mwadang kapwaiada dahme kitail sukuhlki? Ia duwen atail pahn mwekidki koasoandi kan sang pwihn en laduo? Atail kin men peikihong kaweid kan me kohda kin kasalehda atail pwoson sapwellimen Siohwa koasoandi kan.​—Seims 3:17.

16. Dahme kahrehda Kristian koaros anahne en rong rien Krais kan?

¹⁶ Sises mahsanih: “Nei sihpw akan kin rong ngilei; oh I ese irail, oh re kin idawehn ie.” (Sohn 10:27) Met kin mehlel rehn Kristian keidi kan. Ahpw ia duwen irail me kin “iang” me keidi kan? Irail pwukat anahne en rong Sises. Patehng met, irail anahne pil rong rie kan. Met pwehki pwukoa me keieu kesempwal me Koht ketikihong irail iei en kaweidih oh apwalih sapwellime aramas akan. Dahme kin pidada en rong rien Krais?

17. Ia wehwehn en rong pwihn en laduo?

¹⁷ Governing Body kin weliwelian ladu lelepek oh loalokong nan rahn pwukat pwehn tiengla mwowe oh koasoanehdi doadoahk en kalohki Wehio nan sampah pwon. Irail me wiahda pwihn wet iei elder keidi kan me uhdahn koahiek. Kitail kak ndahki irail pwukat me irail “sounkaweid” kei nanpwungatail. (Ipru 13:17) Ni arail kin apwalih sounkalohki Wehio kan me kereniong lel 7,000,000 nan sampah pwon nan mwomwohdiso 100,000, sounapwalih keidi pwukat kin ‘loalenohng arail doadoahk ong Kaun-o ahnsou koaros.’ (1 Kor. 15:58) Atail kin rong pwihn en laduo wehwehki kitail kin wia uwen atail kak en peikiong wilieperail kan me iei Governing Body.

Me Kin Rong Laduo Kin Ale Kapai

18, 19. (a) Ia duwen irail me kin rong ladu lelepek oh loalokong kin ale kapai? (b) Dahme kitail en koasoanehdi wia?

¹⁸ Sangete ahnsowo me e idihda, ladu lelepek oh loalokong “padahkihongehr aramas tohto en wia dahme pwung.” (Dan. 12:3) Ekei irail pwukat kin ahneki koapworopwor en pitsang koasoandi suwed wet. Ia uwen e wia kapai ehu en pwungla mwohn silangin Koht!

¹⁹ Dahme pahn wiawi ahnsou kohkohdo ong irail me kin rong ngilen laduo, ni en “Kahnimw Sarawio, Serusalem Kapw [irail 144,000] e kohkohdi sang nanleng rehn Koht, kaunopada mwahu oh kapwata, duwehte lih kamwohd emen me kapwatadahr pwe en tuhwong eh pwoud”? Paipel mahsanih: “Pein Koht pahn kin ketiket rehrail . . . E pahn kin ketin limwihasang pilen masarail koaros. Mehla solahr pahn wiawi, solahr mwahiei, solahr nsensuwed, solahr medek.” (Kaud. 21:2-4) Eri mie kahrepe mwahu tohto kitail en rong Krais oh rie me keidi loaloapwot kan.

Dahme Ke Sukuhliki?

• Ia mehn kadehde me Siohwa ketin likih ladu lelepek oh loalokong kan?

• Dahme kasalehda me Sises Krais ketin likih ni unsek pwihn en laduo?

• Dahme kahrehda sounpapah loaloapwoat kin warohng atail likilik?

• Ia duwen kitail kak kasalehda me kitail kin likih laduo?

[Kawehwehpen kilel kan nan ehu ehu pali 25]

Ihs me Siohwa ketin pilada en wia lih kamwohd ong sapwellime Ohl?

[Kawehwehpen kilel kan nan ehu ehu pali 26]

Sises Krais ketin likih ladu lelepek oh loalokong pwehn apwali sapwellime “dipwisou kan”

[Kawehwehpen kilel kan nan ehu ehu pali 27]

En iang kalohk kin kasalehda atail utung me keidi kan

[Nting tikitik me mi pah]