Kahrepen Paipel Kak Wia Sawas Mwahu nan Atail Ahnsou
SANGETE mahs, Paipel kin kamwakid soangsoangen aramas akan en wiahda wekidekla kan pwehn kak ahneki mour nsenamwahu. Paipel kin pweida pwehki kaweid kan kin pwilisang rehn Koht. Mendahki aramas me ntingihdi Paipel, e kin kasalehiong kitail sapwellimen Koht madamadau. Paipel kin kawehwehda: “Ngehn Sarawi [“sapwellimen Koht manaman,” NW] me kin ti pohn aramas ni ar kin lohkihda mahsen en Koht.”—2 Piter 1:21.
Paipel kin kihda kaweid mwahu ni ahl riau. Keieu, e kin sewesehki kitail en wehwehki ahl pwung en ahneki nsenamwahu nan atail mour. Keriau, e ahneki kehl en kamwakid aramas akan en wiahda wekidekla kan pwehn ahneki mour nsenamwahu. Kitail pahn tehkpene ahl riau pwukat.
Dehdehki Mehn Akadei Katapan kan
Nan Paipel, Koht kin ketin inoukihda: “I pahn padahkihong uhk ahl me ke pahn weid ie; I pahn kaweid uhk oh panawihiuk.” (Melkahka 32:8) Tehk me kaidehn kaweidte me Koht kin ketikihong kitail ahpw e kin ketin padahkihong kitail ahl me kitail pahn weid ie. Met kak sewese kitail en dehdehki mehnia mehn akadei kan me uhdahn katapan, oh met kak pere kitail sang soahng kan me sohte katepe.
Karasepe, aramas tohto kin akadeiong en ndandla oh kepwehpwehla. Pwuhken kaweid kan kin kihda kaweid tohto ong ia duwen ke kak siksang meteikan pwehn ndandla de kepwehpwehla. Ahpw Paipel kin mahsanihong kitail: “Ar kin peirinki dipwisou kan me mehn mparail kan kin ahneki . . . iei mehkot me sohte katepe.” “Ma ke pahn poakohng mwohni, ke sohte mwahn pahn itarki.” (Eklesiasdes 4:4; 5:10) Ia duwe, kaweid pwukat kak sewese kitail nan atail ahnsou?
Pwehn karasahda ia duwen Paipel kin kihda kaweid mwahu, kitail pahn tehk duwen emen ohl nan Sapan me adaneki Akinori. E pweida mwahu nan sukuhl oh kesepwil sang ehu sukuhl laud me ndand oh alehdi doadoahk mwahu. Soahng koaros kin mwomwen mwahu nin tepio. Ahpw eh pweida sohte kin kihong ih peren me e kin kasikasik. Eh doadoahko kin kihong ih pwunod laud oh kahrehiong ih en uhdahn pwangada, oh met tepida kauwehla eh roson mwahu. Ienge tohndoadoahk kan sohte kin sewese ih. Pwehki eh nsensuwed, e tepida ahneki kahpwal en sakau en wai oh pil medemedewe en pein kemehla ih. Mwurin mwo, e tepida onopki Paipel rehn Sounkadehdehn Siohwa kan. Dahme e sukuhlki wekidala eh madamadau ong dahme kesempwal nan mour. E sohla ahneki soumwahu en pwunod. Akinori kesehla soangen madamadau en aklapalap oh men pweida. E tepida wehwehki kaweid en Paipel wet: “Nan kapehd meleilei kin karosonehda paliwar.”—Lepin Padahk 14:30.
Dahme ke kin keieu kesempwalki en akadeiong nan omw mour? Soangen pweida mwahu dah me pahn kihong uhk nsenamwahu mehlel? Nsenamwahu wet pahn kohsang pwopwoud me pweida mwahu? De sang noumw seri kan ar kekeirda mwahu? Sang omw kompoakepahnki me tohto? Diarada peren nan omw mour? Mehn akadei pwukat koaros katapan. Ni mehlel Paipel kin kangoange kitail en kin akadeiong soahng pwukat, ahpw dehr wiahki me mepwukat me keieu kesempwal. Paipel kasalehda dahme kitail uhdahn anahne pwehn ahneki mour nsenamwahu ni eh mahsanih: “Lemmwiki Koht, oh kapwaiada sapwellime mahsen, pwehki ih kahrepe wet me aramas kepikipikihda.” (Eklesiasdes 12:13) Ma kitail sohte pahn kapwaiada kaweid wet, atail mour pahn sohla katepe, kapwunod oh inenen kansensuwed. Ahpw Paipel kin kangoange kitail: “Likih KAUN-O, ke ahpw pahn nsenamwahu.”—Lepin Padahk 16:20.
Ia Duwen Paipel Kin Kamwakid Aramas en Wekila
Wahnpoaron Pohl ntingihdi: “Mahsen en Koht wie momour oh manaman, e keng sang kedlahs me au riau. E kin lellong loalen aramas lel wasa keieu rir.” (Ipru 4:12) Paipel ahneki manaman me kak kawekila mouren aramas pwehki e kin sewese irail en pein kasawihada dahme uhdahn mehlel duwen irail ahpw kaidehn dahme re men kamehlele duwen pein irail. Irail kan me ahneki mohngiong mehlel pahn wehwehki me re pahn anahne wiahda wekidekla kan nan arail mour. Karasepe, Pohl koasoiaiong irail kan nan mwomwohdisohn Kristian nan Korint me mahs kin wia me lipirap kan, me kamamsakau kan, me kamwahl akan oh meteikan: “Eri, ekei kumwail iang mihmi ni soangen aramas pwukat mahso, ahpw met kumwail mwakelekelsangehr dihp . . . ni ngenen atail Koht [“sapwellimen Koht manaman,” NW].” (1 Korint 6:9-11) Sapwellimen Siohwa manaman kin doadoahkte oh kehlailte duwehte mahs, oh e kak kamwakid aramas akan en wiahda wekidekla kan.
Emen ohl me adaneki Mario nan Europe kin wia aramas lemei men me kin simoak oh netiki marijuana mahs. Ehu ahnsou ni emen pilismen kihsang wini kasahliel kan me e kin doadoahngki, e inenen lingeringerda oh e peiong pilismeno oh kauwehla were sidohsa. Mario sohte kin doadoahk oh ahneki pweipwand laud. Ni eh esehda me e sohte kak pein kamwahwihala eh kahpwal kan, ih eri pwungkihda en onop Paipel. Ni eh kekeirda, Mario kamwahwihala mwomwen eh kapwat, solahr doadoahngki oh netiki wini kasahliel kan oh uhdihsang wia aramas lemei. Me tohto me kin ese ih pwuriamweikihla pwehki eh wekila. Re kin idek reh, “Mario, kowe men?”
Dahme kin kamwakid aramas akan duwehte Akinori oh Mario en wekila sang arail mour en mahs oh diarada nsenamwahu oh peren nan arail mour? E sansal me met kohsang arail onopki Paipel oh esehla Koht. Koht kelehpw kak ketikihda kaweid mwahu kan me kitail anahne pwehn pweida nan atail mour ahnsou wet oh pil ahneki koapworopwor en mour soutuk ni ahnsou kohkohdo. Duwehte Sahm men, Siohwa Koht kin ketin doadoahngki Paipel oh mahsanihong kitail: “Rong ie, samwa. Rong oh ale ei padahk kan ni mehlel, ke ahpw pahn mour werei. . . . Sohte mehkot pahn uh nan elomw ma ke pahn weweidwei ni loalokong, oh ke sohte pahn dipekelekel ni omw pahn tang. Tamataman ahnsou koaros dahme ke padahngkiher. Padahk kan me ke aleier iei omw mour—sinsile mwahu.” (Lepin Padahk 4:10-13) Mie kaweid ehu me mwahusang kaweid kan me kohsang rehn atail Sounkapikada?
[Kawehwehpen kilel kan nan ehu ehu pali 6]
Kaweid Mwahu kan ong Atail Ahnsou
Paipel kin kihda kaweid mwahu kan me kak kaweidih kitail ni soahng koaros nan atail mour. Iet ekei kaweid pwukat:
• Ahneki nanpwungmwahu rehn meteikan
“Eri, kumwail wiahiong meteikan me kumwail kin anahne aramas akan en kin wiahiong kumwail.”—Madiu 7:12.
“Dehr wiahki me kumwail mwahusang aramas teikan.”—Pilipai 2:3.
“Kumwail kasamwo mehn keiru kan.”—Rom 12:13.
• Kesehla tiahk suwed kan
“Ma ke pahn padahngki mehkot sang rehn me loalokong kan, ke pahn pil loalokongla. A ma ke pahn kompoakepahnki me pweipwei kan, ke pahn ohkihla.”—Lepin Padahk 13:20.
“Dehr patehng aramas me kin kamam sakau, de medkihla kisin mwenge.”—Lepin Padahk 23:20.
“Ke dehr kompoakepahnki aramas me kalap lingeringer.”—Lepin Padahk 22:24.
• Wiahda pwopwoud kehlail
“Emenemen ohl pwopwoud en poakohng eh werek duwehte eh kin poakohng pein ih, oh emenemen lih pwopwoud en wauneki eh pwoud.”—Episos 5:33.
“Kumwail en limpoak ong me mi nan apwal akan, kadek, mpahi oh karakarahk, aktikitik oh kanengamah. Kumwail en sawaspene oh mahkpene nanpwungamwail.”—Kolose 3:12, 13.
• Sewese noumw seri kan
“Padahkihong kisin seri men duwen eh pahn momour, eri, e pahn tamatamante erein eh mour.”—Lepin Padahk 22:6.
‘Kumwail sahm oh ihn kan, kumwail dehr kamwakara mwahl noumwail seri kan. A kumwail kaiahneirailda nan padahk en Kristian oh dahme re uhdahn pahn wia nin duwen Kristian.’—Episos 6:4.
• Dehr akamai
“Sapengki ngihl tikitik kin kameleilei lingeringer, ahpw ngihl kehlail kin kamwakidada.”—Lepin Padahk 15:1.
“Kumwail wahupene nanpwungamwail.”—Rom 12:10.
Kitail sohte pahn ahneki sawehwe nanpwungatail me pid duwen pesines ma kitail pahn ntingihdi soahng koaros. Ihme kahrehda Seremaia ntingihdi: “I ahpw sainihala oh sidampihedi kisinlikoun kasapwasapwo, kihong sounkadehde, oh tenekihda pohn mehn tenek mwohni ko.”—Seremaia 32:10.
• Ahneki madamadau pwung
“Kumwail en audehkihda nan kapehdamwail kan soahng mwahu kan me kapingpe mie: soahng kan me mehlel, me kesempwal, me pwung, me mwakelekel, me kaselel oh waun.”—Pilipai 4:8.
Paipel kin kangoange kitail en dehr kolokol madamadau sapwung kan oh en dehr “kin lipahned oh kaulime meteikan ahnsou koaros.” E mahsanih: “Amwail koapworopwor en kaperenkumwailda.”—Sud 4, 16; Rom 12:12.
En kin kapwaiada kaweid mwahu pwukat pahn sewese kitail en ahneki peren oh nsenamwahu, oh pil kin sewese kitail en kapwaiada sapwellimen Koht koasoandi kan oh ale sapwellime kapai kan. Paipel mahsanih: “Me pwung kan pahn koukousoan nan sahpwo oh re pahn sapwenikihla kohkohlahte.”—Melkahka 37:29.
[Kawehwehpen kilel kan nan ehu ehu pali 5]
Akinori ni eh wia ohlen pesines men mahs (palimeing), oh ih oh eh pwoud me kin kalohk rahnwet