Kaweid Likilik kan ong Kekeirada Seri kan
“I SOUNPAR 19, oh kin kousoan dohsang ahi peneinei oh I uhdahn sohte kaunopada mwahu,” Ruth nda met ki ah keieu en liseian. E pil wia iehros emen oh e sohte nohn kaunop en wia nohno men. Iawasa e pahn kak diar ie kaweid likilik kan?
Jan, ni pali teio, naineki seri riemen me laudlahr oh tamanda mahs oh nda: “I kin ahneki koapworopwor laud nin tepio. Ahpw sohte pwand I diarada me sohte itar ahi koahiek.” Sohte lipilipil ma pahpa oh nohno kin pehm me ira sohte kaunopada mwahu sang nin tepio de mwuhr, ahpw iawasa irail kak diar sawas pwehn kaweid neirail seri kan?
Rahnwet, pahpa oh nohno tohto kin rapahki sawas kan sang nan Internet. Ele ke kin medemedewe ia uwen likilik en kaweid kan me kin dierek nan Internet. E konehng kitail en kanaiehng. Ke uhdahn ese ihs me kihong uhk kaweid kan nan Internet? Ia uwen arail pweida ni arail kin kekeirada pein neirail seri kan? Sansal me ke uhdahn anahne en kanaiehng mehkan me pidada ahmw peneinei. Ekei pak, nin duwen me artikel en mwowe kasalehda, me kaweid kan sang rehn irail me samanih kan pil kin imwila suwed. Eri, iawasa ke kak ale kaweid ie?
Wasahn ale kaweid keieu en mwahu me pid duwen kekeirada seri kan iei sang rehn Siohwa Koht, Ih me tapwin peneinei. (Episos 3:15) Ih me uhdahn samanih duwen peneinei. Nan sapwellime mahsen, Paipel, e ketikihda soangen kaweid kan me likilik, katapan oh kin uhdahn pweida mwahu. (Melkahka 32:8; Aiseia 48:17, 18) Ahpw, pein atail pilipil ma kitail men kapwaiada de soh.
Luhk kowohng ekei pwopwoud kan en kasalehda duwen dahme irail sukuhliki ni ahnsou me irail kekeirada neirail seri kan pwe irail en kak toupahrek oh lemmwiki Koht. Irail kasalehda me irail kin pweida ni arail kin doadoahngki kaweid en Paipel kan. Irail diarada me kaweid kan en Paipel kin pweida mwahu nan atail ahnsou duwehte ah kin pweida ni ahnsou me e tepin ntingdi.
Kihong Ahnsou ong Seri kan
Ni ahnsou me peidek kohwong Catherine, me naineki seri riemen duwen mehnia kaweid me keieu en sewese ih, e mwadangete kasalehda pwuhken Deuderonomi 6:7. Ire wet mahsanih: “Padahkihong noumwail seri kan. Kataman kin irail ahnsou me kumwail kin mihmi nan imwamwail oh pil ni ahnsou me kumwail kin mihmiseli ekis wasa tohrohr, ni ahnsou me kumwail kin kommoal oh pil ni ahnsou me kumwail kin wiewia amwail doadoahk.” Catherine wehwehki me ma e pahn kapwaiada kaweid wet, eri e anahne en kihong ahnsou ohng nah seri kan.
Mwein ke medemedewe, ‘e mengei en nda ahpw apwal en kapwaiada.’ Pwehki peneinei tohto anahne pahpa oh nohno koaros en doadoahk pwe en kak apwalih anahn en peneineio, eri iaduwen ara kak kihong ahnsou ohng neira seri kan pwehki ara kin kedirepw? Torlief, me nah pwutak met pil miehier pein nah seri kan, nda me kih wasaht iei en kapwaiada kaweid en Deuderonomi. En wahda noumw seri kan wasa koaros me ke kin kohla ie, eri kumwail pahn diar ahnsou en koasoakoasoipene. Torlief nda: “Ngehi oh nei pwutak kin ehu wia doadoahk kan en nan ihmw, oh se pil kin ehu seiloak. Se pil kin mwengepene.” Imwilahn met, e doula nda, “nait pwutako kin pehm me e kak en saledek en kasalehda ah pepehm kan.”
Ahpw iaduwen ma sohte kin mie saledek en koaskoasoipene oh e kin soansuwed en koaskoasoipene? Ekei pak met kin wiawi ni seri kan kin laudla. Ahpw, e pahn sawas ma ke pahn kihong irail ahnsou laud. Ahn Catherine pwoud, Ken, tamanda me ni ahnsou me neira serepeino tepida wiahla peinakapw, e kin kompleinki me e sohte kin rong ih. Me pwulopwul tohto kin wia soangen komplein wet. Dahme e pahn kak wia? Ken nda: “Ngehi eri koasoanehdi I en kihong ahi ahnsou laud reh, koaskoasoia duwen ah madamadau, pepehm oh kapwunod kan. Met inenen sawas mehlel.” (Lepin Padahk 20:5) Ken kamehlele me kahrepen met kin doadoahk, iei pwehki met kaidehn mehkot kapw nan arail peneinei. E nda: “Ngehi oh nei serepeino kin ahneki nanpwung mwahu kahrehda e kin pehm me e kak koasoi ni saledek.”
Ehu roporop me wiawi ahnsou keren ehu kasalehda me irail me pwulopwul kan kin kalapw nda me sohte itar ahnsou nanpwungen pahpa nohno oh neira seri kan. Eri ke soh kapwaiada kaweid en Paipel? Kihong uwen ahnsou me kak ohng noumw seri kan—ahnsoun kommoal, doadoahk, seiloak, pwourda oh pil ahnsoun wendi en meir. Ma kak, ke pil wahda irail wasa koaros ke kohla ie. Nin duwen me Deuderonomi 6:7 kasalehda, sohte mehkot kak weliandi ahmw ahnsou ohng noumw seri kan.
Padahkihong Irail Dahme Kesempwal
Mario, pahpa men me naineki seri riemen pil kaweidki: “Kasalehiong seri kan limpoak laud, oh wadawadohng irail.” Met kaidehn en ihte kamwekid lamalam en seri kan. Ke anahne en padahkiong irail iaduwen arail pahn kak ese dahme pwung oh dahme sapwung. Mario kapatahiong: “Onop Paipel rehrail.”
Ki kahrepe wet, Paipel kaweidki pahpa oh nohno kan: “Kumwail sahm oh ihn kan, kumwail dehr kamwakara mwahl noumwail seri kan. A kumwail kaiahneirailda nan padahk en Kristian oh dahme re uhdahn pahn wia nin duwen Kristian.” (Episos 6:4) Padahkiong seri kan duwen dahme pwung oh sapwung kin sohte kalapw wiawi nan peneinei. Ekei kin kamehlele me ahnsou me neirail seri kan pahn laudla ah irail nek pilada dahme kesempwal ohng irail. Iaduwen, ke pwungki soangen lamalam wet? Paliweren me pwulopwul kan anahne epwel mwahu, pil duwehte madamadau oh mohngiong en me pwulopwul kan, pil anahne kaweid. Ma seri sohte kin sukuhliki dahme pwung oh sapwung sang nan imwarail, eri irail pahn uhd pwakih mwomwen lamalam en tohnsukuhl kan, sounpadahk kan de pil dahme irail kin kilang sang wasa teikan.
Paipel kak sewese pahpa oh nohno kan pwe irail en kak padahkihong neira seri kan dahme pwung oh dahme sapwung. (2 Timoty 3:16, 17) Jeff, Kristian elder emen me apwalihada seri riemen kangoange pahpa oh nohno kan en doadoahngki Paipel ni arail pahn kasukuhlih seri kan duwen dahme kesempwal. E nda: “Ni ahmw pahn kin doadoahngki Paipel, serio pahn esehla ia pepehm en Sounkapikadao ohng irairo ahpw kaidehn pepehm en nohno de pahpa kelehpw. Dahme se diarada iei iaduwen Paipel kak kamwekid lamalam oh mohngiong ni ahl tohrohr ehu. Ni aht pahn koasoia duwen mwekid sapwung ehu, se kin kihong ahnsou en diarada iren Paipel me koasoia duwen met. Eri, ni aht kin kelehpwla, se kin mweidohng serio en wadek ireo. Pali laud en ahnsou, met kin imwikihla serio kin tepida sengiseng. Se kin pwuriamweikihla. Paipel kin inenen kamwekid serio laud. Dahme se pahn medewehda en koasoia de nda sohte kak karanih met.”
Ipru 4:12 kawehwehda: “Mahsen en Koht wie momour oh manaman. . . . E kin kadeikada ineng oh lamalam en nan kapehd en aramas.” Eri mahsen kan nan Paipel kaidehn pein lamalam kan en aramas me Koht doadoahngki pwe en ntingihada Pwuhk Sarawi. Ahpw, met iei sapwellimen Koht madamadau me pid mour. E kin weksang kaweid teikan koaros. Ni ahmw pahn kin doadoahngki Paipel pwe en kasukuhlih noumw seri kan, met kin wehwehki me ke kin sewese irail en ahneki madamadau en Koht. Ahmw kasukuhl kin katapan laud, oh ke pahn kak en lel mohngiong en noumw seri kan.
Catherine, me koasoipe pwarada nin tepio, pwungki met. E nda: “Ma irairo kin apwalla a e pil kin laudla aht kin rapahki kaweid sang nan Mahsen en Koht—oh met kin doadoahk!” Ke kak doadoahngki Paipel ni ahl kesempwal ni ahmw pahn padahkiong noumw seri kan wekpeseng en dahme pwung oh dahme sapwung?
En Toupahrek
Wahnpoaron Pohl kasalehda ehu iren kasukuhl mwahu me pil katapan ohng kekeirada seri. E kaweidki rie Kristian kan: “Kumwail kasalehda toupahrek ohng aramas koaros.” (Pilipai 4:5, New World Translation of the Holy Scriptures—With References) Ni mehlel, met pil kin wehwehki en pil kasalehda lamalam en toupahrek ohng neitail seri kan. Oh en tamanda, me toupahrek kin kasalehda “erpit me kin sang powe.”—Seims 3:17.
Iaduwen toupahrek kin pidada mwomwen kekeirada neitail seri kan? Mendahki kitail kin kihong irail sawas koaros me kitail kak, ahpw kitail sohte kaunda arail mwekid koaros. Karasepe, Mario, me sansalda mwowe, wia emen Sounkadehdehn Siohwa kan, oh en nda: “Se kin ahnsou koaros kangoange nait seri en papidaisla, wiahla sounkalohk kaukaule kei, de pil ohng soangen mehn akadei ngenin teikan. Ahpw se kin kasalehda ni sansal me met pahn wia pein arail pilipil ni ahnsou konehng.” Ia imwilahn met? Neira seri riemeno koaros wiahla sounkalohk kaukaule kei.
Paipel kalekehki pahpa oh nohno kan nan Kolose 3:21: “Kumwail pahpa oh nohno kan, kumwail dehr kamwakara mwahl noumwail seri kan, pwe re dehr mworusala.” Catherine kin kalahnganki ire wet. Ni ahnsou me ahn nohno men de pahpa men kanengamah kin tikitikla, e kin mengei ohng irail en mwakarada oh idingkihong seri kan en rong irail. Ahpw e nda, “dehr nohn idingkihong seri kan en wia dahme ke leme me ke kakohng.” Catherine pil emen Sounkadehdehn Siohwa kan, oh e kapatahiong: “En wiaiong papah Siohwa en wia mehkot kaperen.”
Jeff, me sansaldahr ni tepio, kihda mehn kaweid konehng ehu: “Ni nait seri kan kin lalaudla, kompoakepahi mwahu men padahkiong kiht me e diarada uwen tohtohlahn ahnsou me e anahne en nda soh ohng pekipek en seri kan. Met kin kansensuwedirailla. Pwe kitail en dehr lelohng soangen irair wet, e nda me kitail en kilangada ekei ahl akan pwe kitail en kak nda ehng.
Jeff nda: “Se diarada me met kaweid mwahu ehu. Se kin kilangada ekei ahl tohrohr kan me nait seri kan en kak iang werekiong meteikan oh wia ni ahl akan me se kak pwungki. Eri se kin ndahiong irail: ‘Ke ese me lahpo pahn wia met? Ke soh kohla iang ih?’ De ma nait seri kan kin peki reht en wahla irail wasa teikan, se kin nantihong kapwaiada met, mehnda ma se pwang. Se kin wia met pwe sen dehr kin nda soh.” Met iei toupahrek—en kin medewe meteikan, oh wia en mengei ong irail ahpw ni ahnsowohte en dehr kauwehla kaweid en Paipel kan.
Paiekihda Kaweid Mwahu kan
Pali laud en pwopwoud pwukat wiahlahr nohno oh pahpa kahlap kei rahnwet. Irail kin perenkihda ni arail kin kilang me kaweid en Paipel kan me irail kin doadoahngki, pil kin sewese neirail seri kan en pweida nin duwen pahpa oh nohno kei. Ke kak paiekihda sang kaweid en Paipel kan?
Ni Ruth, me koasoipe wiawi nin tepio, wiahla nohno men, ih oh ah pwoud kin ekei pak pehm me sohte ara mehn sawas. Ahpw met sohte pwung. Ira ale kaweid keieu mwahu sang nan Mahsen en Koht, Paipel. Sounkadehdehn Siohwa kan kin wiahda sawasepen Paipel tohto me kak sewese irail pahpa oh nohno kan. Ekei pwuhk pwukat iei Learn From the Great Teacher (Sukuhlikihsang Sounpadahk Lapalapo), Nei Pwuhk en Poadoapoad kan en Paipel, Questions Young People Ask—Answers That Work (Peidek kan me Pwulopwul kan Kin Idek—Pasapeng kan me Kin Pweida), oh The Greatest Man Who Ever Lived (Ohl me Keieu Lapalapo Sangete Mahs). Torlief, ahn Ruth pwoudo, nda: “Rahnwet, tohto kaweid pwung kan me kin kohsang Paipel oh e mengei ohng pahpa oh nohno kan en ale. Ma irail pahn isaneki ale mehn kaweid pwukat, e pahn mie mehn sawas ohng irail ni ahl sohte lipilipil duwen mwomwen arail pahn kekeirada seri kan.”
[Kawehwehpen kilel kan nan ehu ehu pali 5]
Pahpa oh nohno erpit kan kin koasoanehdi mehn kamweit kan ong neirail seri kan