Keirada oh Pwupwudi en “Irail Samanih kan”
RAHNWET, ni en aramas kan me kin doadoahngki Internet kin rapahki “kaweid kan” oh “pwukoa en pahpa oh nohno kan”, irail pahn diarada soangen mehn kaweid tohtohsang million 26. Ma ke pahn kesehla minit ehute ohng ehu ehu iren kaweid pwukat, mwohn ahmw pahn nek, noumw serio pahn laudehr oh pil mwesel sangehr rehmw.
Mwohn miehla toahkte en seri kan oh pil Internet, iawasa irail pahpa oh nohno kan kin ale sang ie kaweid kan? Pali laud kin rapahki sawas sang rehn kisehrail teikan. Nohno, pahpa oh rien ahmw nohno oh pahpa kan kin kaunopadahngehr en kaweidih iuk, sewesekin uhk mwohni de pil epwel seri ape. Ahpw nan sahpw tohto, pali laud en aramas kin uhd kohla mihla nan kahnimw oh met kin kauwehla soangen kerenpene en peneinei. Pak tohto nan rahnwet, irail nohno oh pahpa kan kin kelehpwiki doadoahk apwal en apwalihada seri kan.
Ele met me kahrehiong pisnis en apwalih seri kan kin mwadang laudla. Pil ehu kahrepe iei aramas tohto kin uhd kamehlele pelien sains. Nan pahr 1800 samwa, irail mehn America kan kamehlelehier me pelien sains kak kamwahuiala soahng koaros nan en aramas kan mour. Eri, dahme irail pahn sohte kak ki pil kamwahuiala pelien epwel seri pwung? Eri, ni ahnsou me pwihn en American National Congress of Mothers kasalehda duwen “soakoahiek en pahpa oh nohno kan” nan 1899, irail “pwihn en saintis” tohto men sawas. Irail inoukihda me irail pahn sewese pahpa oh nohno tihwohlahr kan pwe irail en kak kekeirada neirail seri kan.
Rapahki Sawas en Epwel Seri Sang nan Pwuhk kan
Ahpw dahme irail me mwomwen samanih pwukat wiahda? Pahpa oh nohno kan rahnwet sohlahr nohn pwunod oh kin koahiekla en kekeirada neirail seri kan? Roporop ehu me wiawi nan Britain kasalehda weksang met. E kasalehda me persent 35 en pahpa oh nohno kan me naineki seri tikitik kan kin wie raparapahkihte kaweid kan me irail kak liki. Oh meteikan kamehlele me sohte mehkot irail kak wia ahpw ihte en wiahte dahme irail lemeleme me pwung.
Nan ehu pwuhk me Ann Hulbert ntingihdi, me oaralap Raising America: Experts, Parents, and a Century of Advice About Children (Kekeirada America: Irail Samanih kan, Pahpa oh nohno kan, oh Kaweid kan Duwen Seri kan Erein Sounpahr Epwiki), e onopki soangen pwuhk kan me kasalehda duwen apwalihada seri kan. Hulbert, pil mie pein nah seri riemen, oh e kasalehda me ekeite soahng kan me irail me samanih pwukat kasalehda me poasoanpe teng. Ahpw pali laud en arail kaweid kan, irail kin kihsang ni dahme lelohng pein arail mour. Ni ahmw pahn medewehla dahme kin wiawi mahs, likamwete arail kaweid kan kin wia mehkot me ohngete ahnsou, oh sohte kin dokpene ahnsou koaros oh ekei pak mwomwen ehusoahng.
Eri, ia irair en pahpa oh nohno kan rahnwet? Ni mehlel, me tohto pingadahr laudsang mahs ni arail ale soangen kaweid, madamadau oh wekpeseng en kaweid kan. Ahpw kaidehn pahpa oh nohno kan koaros kin salongala. Pahpa oh nohno kan rahnwet kin paiekihda kaweid erpit kan en mahs me pil dehdehier me e kin kihda soangen kaweid mwahu kan leledo rahnwet nin duwen me artikel en mwuhr pahn kasalehda.