“Dadaurete ni Limpoak en Koht”

“Dadaurete ni limpoak en Koht, ni amwail kasikasik kalahngan en atail Kaun Sises Krais me pahn ketikihong kumwail mour soutuk.”—SUD 21.

1, 2. Ia duwen Siohwa eh ketin kasalehda sapwellime limpoak ong kitail? Ia duwen atail ese me Koht sohte kin ahnsou koaros ketin kolokolte kitail nan sapwellime limpoak?

SIOHWA KOHT ketin kasalehda sapwellime limpoak ong kitail ni ahl tohto. Ahpw kadehde me keieu laud me Siohwa ketin poakohng kitail iei meirong en tomwo. Sapwellime limpoak ong aramas inenen laud ihme e ketin poaronedohngki sapwellime Ohl kesempwal sampah pwehn pwoukihla kitail. (Sohn 3:16) Siohwa ketin wia met pwehki e kupwurki kitail en mour kohkohlahte, oh e pil ketin kupwurki kitail en paiekihda sapwellime limpoak kohkohlahte!

² Ahpw ia duwe, Siohwa pahn ketin kolokolte kitail nan sapwellime limpoak sohte lipilipil dahme kitail wia? Soh. Pwe kitail wadek kaweid wet nan Sud iretikitik 21: “Dadaurete ni limpoak en Koht, ni amwail kasikasik kalahngan en atail Kaun Sises Krais me pahn ketikihong kumwail mour soutuk.” Lepin lokaia pwukat “dadaurete ni limpoak en Koht” wehwehki me kitail anahne wia mehkot. Eri, dahme kitail anahne wia pwehn dadaurete ni limpoak en Koht?

Ia Duwen Atail Kak Dadaurete ni Limpoak en Koht?

3. Nin duwen me Sises mahsanih, dahme kesempwal ong ih pwehn dadaurete ni limpoak en Seme?

³ Kitail diarada pasapengpen peidek wet sang sapwellimen Sises mahsen kan ni pwohng en kaimwiseklahn sapwellime mour nin sampah. E mahsanih: “Ma kumwail pahn kapwaiada ei kosonned akan, kumwail pahn poadidiong ei limpoak, duwehte ei kin kapwaiada mahsen en Semei, oh kin poadidiong sapwellime limpoak.” (Sohn 15:10) E sansal me Sises mwahngih me e kesempwal en peikiong sapwellimen Siohwa kosonned akan pwehn kolokol nanpwung mwahu rehn Seme. Ma sapwellimen Koht Ohl me unseko anahne peik, a ia duwen atail?

4, 5. (a) Ia ahl me keieu mwahu me kitail en kasalehda atail poakohng Siohwa? (b) Dahme kahrehda kitail sohte ahneki kahrepe en sapwungki de soikala madamadau en peikiong sapwellimen Siohwa kosonned akan?

⁴ Keieu, kitail kin kasalehda me kitail poakohng Siohwa sang ni atail peikiong ih. Wahnpoaron Sohn kasalehda ni ahl wet: “Iet duwen wehwehn poakohng Koht: kitail en peikiong sapwellime kosonned akan. Oh sapwellime kosonned akan me sohte apwal.” (1 Sohn 5:3) Mehlel, aramas tohto sohte kin perenki peikiong meteikan. Ahpw menlau tehk mahsen pwukat: “Sapwellime kosonned akan me sohte apwal.” Siohwa sohte kin ketin peki rehtail en wia mehkot me nohn apwal ong kitail.

⁵ Karasepe: Ke kin peki rehn kompoakpahmw mwahu men en wa mehkot me ke ese me toutou ong ih en pwekada? Uhdahn soh! Siohwa kin ketin kadek sang kitail oh kin mwahngih ia uwen me kitail kakohng. Paipel kamehlelehiong kitail me Siohwa kin “ketin tamataman me kitail uhdahn pwehl.” (Mel. 103:14) E sohte kin ketin peki rehtail laudsang me kitail kakohng. Eri, kitail sohte ahneki kahrepe en sapwungki de soikala peikiong sapwellimen Siohwa kosonned akan. Ni pali teio, kitail kin pohnese me en peikiong Siohwa kihong kitail ahnsou mwahu en kasalehiong Samatail nanleng me kitail uhdahn poakohng ih oh men poadidiong sapwellime limpoak.

Kisakis Tohrohr Ehu Sang Rehn Siohwa

6, 7. (a) Dahkot kadeikpen loalatail? (b) Menlau karasahda ia duwen kadeikpen loalatail eh kak sewese kitail en dadaurete ni limpoak en Koht.

⁶ Kitail kin mour nan sampah ehu me apwal, oh kitail anahne wia pilipil tohto me kin pidada atail peikiong Koht. Ia duwen kitail kak ese ma pilipil pwukat pahrekiong kupwuren Koht? Siohwa ketikihong kitail kisakis ehu me uhdahn kak sewese kitail en peik. Met iei kadeikpen loalatail. Dahkot kadeikpen loalatail? Kadeikpen loalatail iei koahiek tohrohr ehu rehtail me kitail ahneki me kin kasawih oh kadeik atail wiewia, madamadau, oh atail pilipil me kitail kin lelohng nan atail mour.—Wadek Rom 2:14, 15.

⁷ Ia duwen kadeikpen loalatail eh kak sewese kitail? Menlau medewehla me ke alialu nanial oh e tepida rotorotala. Mie pwoahr kan oh mehkot suwed kakete wiawihong uhk. Ahpw ke ese ia wasa en alu. Dahme kahrehda? Pwehki ke wa dengki. Dengki kak kamarainih ahl me ke keid loale oh doarehla omw mour. Ma ke sohte wa dengki, ke sohte kak kilang ahlo, ke kakete pwupwudi de mehkot suwed wiawihong uhk. Duwehte met, aramas me sohte kadeikpen loale kin kalapw sapwungala ni eh song en wiahda pilipil kan me pid tiahk mwakelekel, mehlel oh pwung nan mour.

8, 9. (a) Dahme kahrehda kadeikpen loalatail kak kihong kitail kaweid sapwung? (b) Dahme kitail kak wia pwe kadeikpen loalatail en uhdahn sewese kitail?

⁸ Ahpw kadeikpen loalatail kak kihong kitail kaweid sapwung. Dahme kahrehda? Tamanda karasaras en dengki. Ma padirio luwetala, dengkio solahr kak kamarainih atail ahl. Met pil kak wiawihong kadeikpen loalatail. Ma kitail sohte kin onop Paipel, kitail sohte kak dehdehki dahme pwung oh dahme sapwung. (Mel. 119:105) Pil duwehte, ma kitail mweidohng atail ineng en mohngiong en kahluwa atail pilipil kan, dahme pahn kakete wiawi? Atail ineng en roporop kakete kaweidih kadeikpen loalatail ni sapwung. Paipel kaweidkin kitail: “Ihs me kak wehwehki audepen mohngiong en aramas? Sohte mehkot me duwehte me diren piht.” (Ser. 17:9; Lep. Pad. 4:23) E kansensuwed me aramas tohto nin sampah kin kesempwalki kapwaiada ineng kan en mohngiongirail oh sohte kin nsenohki kapwaiada koasoandi kan me mi nan Mahsen en Koht. (Wadek Episos 4:17-19.) Ihme kahrehda aramas tohto, mendahki mie kadeikpen loalarail, re kin wia me suwed.—1 Tim. 4:2.

⁹ Kitail anahne koasoanehdi teng en dehr duwehte irail! Ahpw kitail en pousehlahte mweidohng Mahsen en Koht en kasukuhlih oh kaiahne kadeikpen loalatail pwe en kak uhdahn sewese kitail. Kitail anahne idawehn atail nsenmwakelekel me Paipel kaiahnehda ahpw dehr mweidohng atail ineng roporop kan en kaweidih kitail. Ni ahnsowohte, kitail anahne nantihong wauneki kadeikpen loalen kompoakpatail Kristian kan. Kitail kin wia uwen atail kak en dehr kadipikelekelih irail, oh en tamataman me kadeikpen loalarail kak kaleke irail sang mehkan me kitail ele sohte kin dipekelekelki.—1 Kor. 8:12; 2 Kor. 4:2; 1 Pit. 3:16.

10. Wasa siluh dah kan nan mour me kitail pahn koasoiapene?

¹⁰ Kitail pahn tehkpene wasa siluh nan mour me kitail kak kasalehda atail limpoak ong Siohwa sang ni atail peikiong ih. Kadeikpen loalatail pahn pidada wasa siluh pwukat, oh pwehn kihong kitail kaweid me konehng, koasoandi en Paipel duwen wiewia kan anahne kaweidih kadeikpen loalatail mahs. Ahl siluh me kitail kak kasalehda me kitail kin poakohng oh peikiong Siohwa iei: (1) Kitail en kin poakohng irail kan me Siohwa kin ketin poakohng, (2) kitail en kin wauneki oh idawehn kaweid en irail kan me ahneki manaman, oh (3) kitail en kin nantihong kolokol mwakelekel mwohn silangin Siohwa.

Poakohng Irail kan me Siohwa Kin Ketin Poakohng

11. Dahme kahrehda kitail anahne poakohng irail akan me Siohwa kin ketin poakohng?

¹¹ Keieu, kitail anahne poakohng irail kan me Siohwa ketin poakohng. Aramas kin duwehte koattun ni eh kin werekiong meteikan. Kitail kin kalapw alehdi soahng koaros me mi limwahtail. Sounkapikpatail kin mwahngih me werekiong meteikan kin kakete keper, oh pil kak wia sawas ehu, ong aramas soh unsek kan. Ihme kahrehda, e ketikihong kitail kaweid erpit wet: “Ma ke pahn padahngki mehkot sang rehn me loalokong kan, ke pahn pil loalokongla. A ma ke pahn kompoakepahnki me pweipwei kan, ke pahn ohkihla.” (Lep. Pad. 13:20; 1 Kor. 15:33) Sohte emen kin men “ohkihla” pwehki kompoakepah kan. Emenemen kitail kin men “loalokongla.” Siohwa iei utupen erpit oh sohte emen kak kasaminehla de kauwehla ih. Ahpw mendahki met, e ketikihdi mehn kahlemeng kaselel ong kitail me pid atail kin werekiong meteikan. Medewehla met, ihs rehn irail aramas soh unsek kan me Siohwa ketin pilada en kompoakepahnki?

12. Soangen aramas dah kan me Siohwa kin ketin kompoakepahnki?

¹² Siohwa kin ketin kahdaneki Eipraam “kompoakepahi.” (Ais. 41:8) Ohl menet wia mehn kahlemeng mwahu duwen lelepek, pwung, peik oh eh pwoson Koht kin sansalda nan eh mour. (Seims 2:21-23) Siohwa kin kupwurki kompoakepahnki soangen aramas duwe met. E kin ketin pilada soangen aramas pwukat rahnwet. Ma Siohwa kin ketin pilada soangen kompoakepah pwukat, e sou pil kesempwal kitail en wia met, oh iang me loalokong kan pwe kitail en loalokongla?

13. Me pid atail en pilada kompoakpatail kan, dahme kak sewese kitail en wiahda pilipil mwahu kan?

¹³ Me pid duwen met, dahme kak seweseiuk en wiahda pilipil mwahu? En onopki karasaras kan nan Paipel kak seweseiuk. Medewehla nanpwungmwahu en Rud oh en eh pwoud nohno, Naomi, duwen Depit oh Sonadan, oh pil Timoty oh Pohl. (Rud 1:16, 17; 1 Sam. 23:16-18; Pil. 2:19-22) Irail kin kerenpene pwehki irail koaros uhdahn poakohng Siohwa. Ke kak diar kompoakpahmw kan me kin poakohng Siohwa duwehte omw kin poakohng ih? Ke kak kamehlele me ke kak diar kompoakpahmw tohto nan mwomwohdiso. Irail sohte pahn kangoange iuk en wia mehkot me pahn kansensuwedihala Siohwa. Ahpw re pahn seweseiuk en peikiong Siohwa, karanihala ih, oh mweidohng sapwellimen Koht manaman en kaweidih iuk. (Wadek Kalesia 6:8, NW.a) Re pahn seweseiuk en dadaurete ni limpoak en Koht.

Wauneki Irail kan me Ahneki Manaman

14. Dahme kahrehda e kin apwal ong kitail en wauneki irail kan me ahneki manaman?

¹⁴ Ahl keriau me kitail en kasalehda atail limpoak ong Siohwa kin pidada irail kan me ahneki manaman. Kitail anahne wauneki irail kan me ahneki manaman. Dahme kahrehda ekei pak e kin uhdahn apwal ong kitail en wia met? Ehu kahrepe iei soh unsek en irail kan me ahneki manaman. Patehng met, pein kitail pil sohte unsek. Kitail kin nantihong powehdi ineng en men uhwong me kitail kin ahneki.

15, 16. (a) Dahme kahrehda e kesempwal ong kitail en wauneki irail kan me Siohwa ketin likihong irail pwukoa en apwalih sapwellime aramas akan? (b) Dahme kitail sukuhlki sang duwen en Siohwa ketin kilangwohng en mehn Israel ko ar uhwong Moses?

¹⁵ Ele ke pahn medewe, ‘Ma e nohn apwal ong kitail en wauneki irail me ahneki manaman, dahme kahrehda kitail anahne wiahki met?’ Pasapengo kin pidada ire me pid duwen ihs me ahneki pwung en kaunda. Ihs me ke pahn pilada en wia omw kaun? Ma kitail pahn pilada Siohwa en ketin wia atail Kaun, kitail anahne en wauneki sapwellime manaman. Ma kitail sohte wia met, kitail kak uhdahn likwerikin ih atail Kaun? Patehng met, Siohwa kin kalapw doadoahngki sapwellime manaman ni eh kin ketin likihong ohl soh unsek kan pwukoa en apwalih sapwellime aramas akan. Ma kitail pahn uhwong aramas pwukat, ia duwen Siohwa eh pahn ketin kilangwohng kitail?—Wadek 1 Deselonika 5:12, 13.

¹⁶ Karasepe, ni ahnsou me mehn Israel ko lipahnedih oh uhwongada Moses, Siohwa ketin kilangwohng arail wiewia duwehte ar wiahiong pein ih. (Nemp. 14:26, 27) Koht sohte kin ketin wekila. Ma kitail pahn uhwong irail kan me e ketikihong manaman, met wehwehki kitail uhwongada ih!

17. Madamadau pwung dahieu me kitail en nantihong kakairada ong irail kan me ahneki manaman nan mwomwohdiso?

¹⁷ Wahnpoaron Pohl kasalehda madamadau pwung me kitail anahne kakairada ong irail kan me ahneki pwukoa nan mwomwohdiso en Kristian. E ntingihdi: “Kumwail peikiong amwail sounkaweid akan oh kapwaiada ar kosonned kan. Pwe re sohte kin tokedihsang apwahpwalih ngenomwail [“amwail mour,” NW] kan; pwehki ar uhdahn pahn wehkadahng Koht ar kohwa doadoahk wet. Ma kumwail pahn peikiong irail, re pahn perenki kapwaiada ar doadoahk; ma soh, re pahn kin nsensuwedla; eri, met sohte kak sewesei kumwail.” (Ipru 13:17) Mehlel me kitail anahne doadoahk laud pwehn kakairada madamadau en peik oh uhpah. Tamataman me kitail nannanti en dadaurete ni limpoak en Koht. E sou konehng kitail en nantihong lel mehn akadei wet?

Kolokolte Atail Mwakelekel Mwohn Silangin Siohwa

18. Dahme kahrehda Siohwa kupwurki kitail en kolokolte atail mwakelekel?

¹⁸ Kesiluh en ahl me kitail kak kasalehda atail limpoak ong Siohwa iei ni atail kin nantihong kolokolte atail mwakelekel mwohn silangih. Pahpa oh nohno kan kin kalapw doadoahk laud pwe neirail seri kan en kin mwakelekel. Dahme kahrehda? Ehu, pwehki mwakelekel kesempwal ong nsenamwahu en serio oh eh roson. Patehng met, seri mwakelekel men kin kasalehda mwomwen eh peneinei, oh limpoak oh nsenoh en eh pahpa oh nohno. Ni soangen kahrepeohte, Siohwa kupwurki kitail en mwakelekel. E mwahngih me mwakelekel kesempwal ong atail roson mwahu oh nsenamwahu. E pil ketin mwahngih me atail mwakelekel kin kasalehda soangen aramas dah Samatail nanleng. Met uhdahn kesempwal pwe aramas akan kakete men papah Koht pwehki ar kilang me kitail weksang irail kan nan sampah samin wet.

19. Ia duwen atail ese me e kesempwal en mwakelekel ni paliwar?

¹⁹ Ia duwen atail kak kasalehda mwakelekel? Ni soahng koaros nan atail mour. Ong Israel en mahs, Siohwa ketin kasalehda me e kesempwal ong sapwellime aramas kan en mwakelekel ni paliwar. (Lip. 15:31) Kosonned en Moses kin pidada soahng me duwehte sarepedi arail kainen kan, kamwakeledahn dipwisou kan, widen nehrail oh pehrail kan, oh likou kan. (Eks. 30:17-21; Lev. 11:32; Num. 19:17-20; Deut. 23:13, 14) Kataman kin kohwohng mehn Israel kan me arail Koht, Siohwa, me sarawi. Met wehwehki “mwakelekel” oh “min.” Ladu en Koht me sarawi pil anahne en sarawi.—Wadek Lipai 11:44, 45.

20. Ia duwen atail kak kolokolte atail mwakelekel?

²⁰ Eri, kitail anahne mwakelekel ni mas loalatail oh pil mas liki. Kitail kin nantihong mwakelekel nan atail madamadau. Kitail kin nantihong lelepekiong sapwellimen Siohwa koasoandi kan en tiahk mwakelekel mendahki sampah wet saminkihla tiahk en nenek. Keieu kesempwal, kitail kin nantihong atail kaudok en mwakelekel, soikala samin koaros me kohsang kaudok likamw. Kitail sohte kin manokehla kaweid me kileldi nan Aiseia 52:11: “Kumwail mwadang mweselsang Papilonia, . . . Kumwail dehpa sair mehkot me keinepwi; kumwail pein kamwakeleikumwailda oh mweselsang nan kahnimwet.” Rahnwet, kitail pil kin kolokol atail kaudok en mwakelekel ni atail sohte kin ehuiong mehkot me pid kaudok likamw. Karasepe, kitail kin kanaiehng oh soikala kasarawi kan en kaudok likamw akan me kin wiawi nan sampah wet. Mehlel, e apwal en kolokolete atail mwakelekel. Ahpw, sapwellimen Siohwa aramas akan kin nantihong pwehki e kin sewese irail en dadaurete ni limpoak en Koht.

21. Ia duwen atail kak tehk kanahieng me kitail pahn dadaurete ni limpoak en Koht?

²¹ Siohwa kupwurki kitail en dadaurete ni sapwellime limpoak kohkohlahte. Ahpw emenemen kitail anahne en tehk kanaiehng me kitail kin wia uwen me kitail kak pwehn dadaurete ni limpoak en Koht. Kitail kak wia met ni atail pahn idawehn sapwellimen Sises mehn kahlemeng oh kadehde atail limpoak ong Siohwa sang ni atail peikiong Sapwellime kosonned kan. Ma kitail wia met, kitail kak kamehlele me sohte mehkot “kak irehdihsang kitail ni limpoak en Koht me kitail ahneki rehn Krais Sises atail Kaun.”—Rom 8:38, 39.

[Nting tikitik me mi pah]

Ke Tamataman?

• Ia duwen kadeikpen loalatail eh kak sewese kitail en dadaurete ni limpoak en Koht?

• Dahme kahrehda kitail en poakohng irail kan me Siohwa kin ketin poakohng?

• Dahme kahrehda e kesempwal en wauneki irail kan me ahneki manaman?

• Ia duwen mwakelekel eh kin wia mehkot kesempwal ong sapwellimen Koht aramas akan?

[Kawehwehpen kilel kan nan ehu ehu pali 28]

“Ma kumwail pahn kapwaiada ei kosonned akan, kumwail pahn poadidiong ei limpoak, duwehte ei kin kapwaiada mahsen en Semei, oh kin poadidiong sapwellime limpoak”