Kolokol Kompoakepah Mwahu kan nan Sampah Sempoak Ehu

“Eri, iet ei kosonned: kumwail en poakpene nanpwungamwail.”—SOHN 15:17.

1. Dahme kahrehda tepin Kristian kan anahne kolokol arail nanpwungmwahu rehn emenemen?

NI PWOHNG mwohnte Sises pwoula, e ketin kangoange sapwellime tohnpadahk lelepek kan en kolokolte arail nanpwungmwahu rehn emenemen. Ni soutiko, e mahsanih me limpoak me re kin kasalehiong emenemen pahn kadehdehda me irail iei sapwellime tohnpadahk kan. (Sohn 13:35) Wahnpoaron ko anahne kolokolte arail nanpwungmwahu pwehn dadaur pahn kahpwal kan me mi mwohrail oh kapwaiada doadoahk me Sises pahn kereniong ketikihong irail. Ei, aramas akan kin esehki tepin Kristian kan arail kin poadidi mehlel ong Koht oh pil ong emenemen.

2. (a) Dahme kitail kin koasoanehdi teng en wia? Dahme kahrehda? (b) Peidek dah kan me kitail pahn tehkpene?

² Rahnwet, ia uwen e wia pai kaselel ehu en miniminiong pwihn ehu nan sampah pwon me towe kan kin idawehn mehn kahlemeng en irail tepin Kristian pwukat! Kitail kin koasoanehdi teng en peikiong sapwellimen Sises kehkehlik en kasalehda limpoak mehlel ong emenemen. Ahpw, ni imwin rahn pwukat, pali laud en aramas akan kin salelepek oh sempoak. (2 Tim. 3:1-3) Arail kompoakepahnki meteikan sohte kin mehlel oh e roporop. Pwehn kadehde me kitail Kristian mehlel kei, kitail en dehr ahneki soangen madamadau wet. Eri, kitail pahn tehkpene peidek pwukat: Ia poahsoanpen kompoakepah mehlel? Ia duwen atail kak wiahda kompoakepah mwahu kan? Iahd me kitail anahne kauhdi atail nanpwungmwahu rehn emen? Oh ia duwen atail kak kolokolte nanpwungmwahu me kin kakehlaka emenemen?

Ia Poahsoanpen Kompoakepah Mehlel?

3, 4. Ia poahsoanpen nanpwungmwahu me keieu kehlail? Dahme kahrehda?

³ Nanpwungmwahu me keieu kehlail kin poahsoankihda en aramas ar kin poakohng Siohwa. Nanmwarki Solomon ntingihdi: “Aramas riemen pahn kak doareirahla nan pei ehu me aramaste emen sohte pahn kakohng. Sahl silipwoat me patpene pahn apwal en mweipeseng.” (Ekl. 4:12) Ni ahnsou me Siohwa kin ketin iang ira duwehte sahl kesiluho, nanpwungara pahn wie kekehlailte.

⁴ Mehlel, irail kan me sohte kin poakohng Siohwa pil kak ahneki kompoakepah mwahu kan. Ahpw ma emenemen kin karanihala meteikan pwehki ar limpoak ong Koht, arail nanpwungmwahu pahn uhdahn kehlail. Ni ahnsou me sawehwe kin pwarada, kompoakepah mehlel kan pahn apwalih nanpwungarail ni ahl me pahn kaperenda Siohwa. Ma soun uhwong kan en Koht kin song en kahrehda saminimin, irail pahn diarada me re sohte kak kauwehla nanpwungmwahu en Kristian akan. Nan poadopoad, sapwellimen Siohwa ladu kan kin kadehdehda arail men tounmeteikihla arail mour pwehki re sohte men pangala riarail kan.—Wadek 1 Sohn 3:16.

5. Dahme kahrehda nanpwungmwahu en Rud oh Naomi kin uhdahn kehlail oh mehlel?

⁵ En ahneki nanpwungmwahu rehn irail kan me poakohng Siohwa iei me keieu kansenamwahu ong kitail. Medewehla Rud oh Naomi. Nanpwungmwahu me lih riemenet ahneki kin wia ehu mehn kahlemeng me inenen kaselel nan Paipel. Dahme kahrehda ara nanpwungmwahu kin kehlail oh mehlel? Rud kawehwehda met ni eh ndaiong Naomi: “Kisehmw kan iei kisehi; oh omw Koht iei ei Koht. . . . Sohte mehkot pahn kak kadohwankitapeseng, mehlahte.” (Rud 1:16, 17) E sansal me Rud oh Naomi kin ahneki limpoak mehlel ong Koht, oh re kin mweidohng limpoak wet en kaweidih ara wiewia ong emenemen. Met imwikihla en Siohwa kin ketin kapaiada ira koaros.

Ia Duwen Atail Kak Wiahda Kompoakepah Mwahu kan?

6-8. (a) Dahme kak wiahda kompoakepah kehlail oh mehlel? (b) Ia duwen omw kak tiengla mwowe pwehn wiahda kompoakepah kan?

⁶ Mehn kahlemeng en Rud oh Naomi kasalehda me kompoakepah mwahu kan sohte kin depweila wiawi. Limpoak ong Siohwa me wia poahsoanpen met. Atail doadoahk laud oh tounmetei kin imwikihla kompoakepah kehlail oh mehlel. Nan peneinei en Kristian ehu, pirien kan me kin kaudokiong Siohwa pil anahne doadoahk laud pwe ren kak wiahla kompoakepah keren men. Eri, ia duwen omw kak wiahda kompoakepah mwahu kan?

⁷ En tiengla mwowe. Wahnpoaron Pohl kangoange kompoakepah kan nan mwomwohdiso en Rom: “Kumwail kisekisehki riamwail [“aramas sarawi,” NW] semwehmwe kan amwail dipwisou kan; oh kumwail kasamwo mehn keiru kan.” (Rom 12:13) Eri, en wiahda kompoakepah mwahu kan, kitail anahne isaneki ahnsou mwahu koaros en kasamwo meteikan. Sohte me kak wiliandi uhk oh wia met. (Wadek Lepin Padahk 3:27.) Ehu ahl me ke kak wia met iei en lukehdo riatail kan nan mwomwohdiso pwehn iang uhk mwenge. Ke kak koasoanehdi met en wiahla kisehn omw tiahk en kasamwo tohn mwomwohdiso kan?

⁸ Pil ehu ahl me ke kak tiengla mwowe en wiahda kompoakepah kan iei sang ni omw luke riatail kan en iang uhk kalohk. Ni omw rong iengomwo koasoiaiong tohnihmw duwen eh limpoak ong Siohwa, ke pahn karanihala ih.

9, 10. Soangen mehn kahlemeng dah me Pohl wiahda? Ia duwen atail kak alasang ih?

⁹ Kumwail langahda douluhl mohngiongimwail kan. (Wadek 2 Korint 6:12, 13.) Mie pak ke pehm me sohte emen nan mwomwohdiso me ke kak kompoakepahnki? Ma ei, e sou sang ni omw kin pilada ekeite me ke leme kak wia kompoakepahmw? Wahnpoaron Pohl kin wia mehn kahlemeng mwahu ni eh langahda douluhl eh mohngiong. Mahs e sohte medewe me e kak kompoakepahnki aramas me kaidehn mehn Suhs. Ahpw, e wiahla “wahnpoaron en mehn liki kan.”—Rom 11:13.

¹⁰ Patehng met, Pohl sohte kin pilada en kompoakepahnkihte irail kan me wia eh dih. Karasepe, ih oh Timoty wiahla kompoakepah keren mendahki ara sounpar oh irair wekpeseng. Rahnwet, me pwulopwul tohto kin kesempwalki arail kompoakepahnki me mah kan nan mwomwohdiso. Vanessa, emen serepein sounpar 20 samwa nda: “Mie kompoakepahi men me mahki sounpar 50 samwa. I kak koasoiaiong ih soahng koaros me I kin ndaiong kompoakepahi kan me wia ei dih. Oh e kin nsenohkin ie mehlel.” Ia duwen soangen kompoakepah pwukat eh kin miehla? Vanessa nda: “I anahne nannanti pwehn ahneki nanpwungmwahu wet.” Ke kin men kompoakepahnki irail kan me kaidehn omw dih? Siohwa uhdahn pahn ketin katingih omw nannanti.

11. Dahme kitail sukuhlki sang mehn kahlemeng en Sonadan oh Depit?

¹¹ En loalopwoat. Solomon ntingihdi: “Kompoakepah kan kin kasalehda ar limpoak ahnsou koaros. Ia katepen eh mie kompoakepahmw ma e sohte seweseiuk ni ahnsou apwal?” (Lep. Pad. 17:17) Ni eh ntingihdi mahsen pwukat, Solomon mwein medemedewe duwen nanpwungmwahu en eh pahpa Depit oh Sonadan. (1 Sam. 18:1) Nanmwarki Sohl men nah pwutak Sonadan en wiahla nanmwarkien Israel. Ahpw Sonadan pwungki me Siohwa ketin piladahr Depit en wiahla nanmwarki. Weksang Sohl, Sonadan sohte kin peirin ong Depit. E sohte kin lingeringerkihda kaping kan me kohwong Depit, oh pil sohte kamehlele karaunlikamw me Sohl kin wiahda duwen Depit. (1 Sam. 20:24-34) Ke kin duwehte Sonadan? Ni ahnsou me kompoakepatail kan ale pwais nan mwomwohdiso, kitail kin iang irail perenda? Ni ahnsou me irail lelohng kahpwal kan, kitail kin kamweit oh sewese irail? Ma emen koasoiaiong kitail mehkot suwed duwen kompoakepatail men, kitail kin mwadang kamehlele? De duwehte Sonadan, kitail kin loalopwoat uhki kompoakepatail kan?

Ahnsou me Anahne Kauhdi Nanpwungmwahu Rehn Emen

12-14. Kahpwal dahieu me ekei tohnsukuhl en Paipel kan kin lelohng? Ia duwen atail kak sewese irail?

¹² Ni ahnsou me emen tohnsukuhl en Paipel tapihada wekidala eh elen mour, mwein e pahn lelohng kahpwal me pid kompoakepah kan. Mie kompoakepah kan me e kin perenki iang, ahpw arail mour sohte pahrekiong koasoandi en Paipel. Mahs e kin kaukaule werekiong irail. Ahpw met, e wehwehki me arail wiewia kan kak kahrehiong ih en wia mehkot suwed, oh e pehm me e anahne sohla iang irail. (1 Kor. 15:33) Mendahki met, e kakete pehm me e kin soaloalopwoat ong irail ma e sohla iang irail.

¹³ Ma kowe emen tohnsukuhl en Paipel me kin lelohng kahpwal wet, ken tamataman me kompoakepah mehlel men pahn perenkihda omw song en kamwahwihala omw mour. Ele e kakete men iang uhk sukuhlki duwen Siohwa. Weksang met, kompoakepah likamw kan pahn ‘lahlahwei uhk’ pwehki ke sohte iang irail “wia soangen mwoarong suwed oh kanamenek pwukat.” (1 Pit. 4:3, 4) Ni mehlel, kaidehn kowe me soaloalopwoat ong irail ahpw irail me soaloalopwoat ong uhk.

¹⁴ Ni ahnsou me kompoakepahn tohnsukuhl en Paipel kan me sohte poakohng Koht kesehla irail, tohnmwomwohdiso kan kak kaitarala arail anahn en wia kompoakparail. (Kal. 6:10) Ke kin esehla tohnsukuhl en Paipel kan me kin iang mihting kan? Mie pak ke kak koasoiong irail mwohn de mwurin mihting kan oh ahneki ahnsou en kangoange irail?

15, 16.  (a) Ia duwen atail pahn mwekidki ma kompoakepatail men uhdi sang papah Siohwa? (b) Ia duwen atail kak kadehdehda atail limpoak ong Koht?

¹⁵ Ia duwen ma kompoakepatail men nan mwomwohdiso pilada en kesehla Siohwa, oh e anahne piskenla? Soangen irair wet kak wia mehkot me uhdahn kansensuwed. Emen sister kawehwehda eh pepehm ni ahnsou me kompoakepah keren men uhdi sang eh papah Siohwa. E nda: “I pehm me nan loalei uhdahn ohla. I leme me kompoakepahio uhdahn kehlail nan padahk mehlel, ahpw soh. I kin medemedewe ma e kin papah Siohwa ihte pwehn kaperenda eh peneinei. Ngehi eri tapiada kasawih pein ngehi. I kin papah Siohwa pwehki kahrepe pwung kan?” Dahme sister menet wia? E nda: “I mweidohng Siohwa ei kapwunod kan. I koasoanehdi teng en kasalehiong Siohwa me I poakohng ih kaidehn ihte pwehki e kin ketikihong ie kompoakepahi kan nan sapwellime pwihn.”

¹⁶ Kitail sohte kak kasik me kitail en kompoakepahnkihte Koht ma kitail uhki irail me pilada ren kompoakepahnki sampah wet. Seims ntingihdi: “Kumwail sehse me amwail limpoakohng sampah wet wehwehki imwintihti ong Koht? Mehmen me kin inengieng kompoakepahnki sampah wet, iei ih imwintihtien Koht.” (Seims 4:4) Kitail kak kadehdehda atail limpoak ong Koht sang ni atail likih me E pahn sewese kitail en powehdi nsensuwed me kohsang atail sohla kompoakepahnki emen. (Wadek Melkahka 31:23.) Sistero me kitail koasoia powe nda: “I sukuhlki me kitail sohte kak kahrehiong emen en poakohng Siohwa de kitail. Met pein en emenemen pilipil.” Dahme kitail kak wia pwehn kolokol nanpwungmwahu rehn tohnmwomwohdiso oh kakehlaka irail?

Kolokolete Kompoakepah Mwahu kan

17. Ia duwen kompoakepah mwahu kan kin koasoiong emenemen?

¹⁷ Kapehse mwahu kin kahrehiong riemen en kerenpene. Ni omw kin wadek iren Paipel me pid Rud oh Naomi, Depit oh Sonadan, oh Pohl oh Timoty, ke pahn kilang me kompoakepah mwahu kan kin koasoipene ni saledek oh ni wahu. Me pid ia duwen atail anahne kapehse rehn meteikan, Pohl ntingihdi: “Amwail koasoi mwohn aramas en katapan oh kansenamwahu.” Pohl kasalehda ia duwen atail en koasoi ong irail “me seupwoson” kan, met wehwehki irail me kaidehn riatail Kristian kan. (Kol. 4:5, 6) E sansal me ma kitail anahne wauneki me seupwoson kan, ia uwen riatail kan nan mwomwohdiso warohng met!

18, 19. Ia duwen atail pahn kilangwohng kaweid me kitail ale sang kompoakepatail Kristian men? Mehn kahlemeng dahieu me irail elder kan nan Episos wiahda ong kitail?

¹⁸ Kompoakepah mwahu kan kin kesempwalki madamadau en emenemen, kahrehda kapehse nanpwungarail anahne wiawi ni kadek oh inen. Nanmwarki Solomon ntingihdi: “Leh oh warpwohmwahu kan kin kaperenda mohngiong, oh pil duwehte kansenamwahu en kompoakepahn emen pwehki kaweid me kohsang nan kapehde.” (Lep. Pad. 27:9, NW) Ih duwen omw kin kilangwohng kaweid me kohsang kompoakepahmw men? (Wadek Melkahka 141:5.) Dahme ke kin wia ma kompoakepahmw men kasalehda eh madamadau duwen mehkot me ke wia? Ke kin kilangwohng dahme e nda nin duwen kasalepen limpoak-kadek, de ke kin lingeringerkihda?

¹⁹ Wahnpoaron Pohl kin perenki kompoakepahnki irail elder kan nan mwomwohdisohn Episos. E ese duwen ekei ohl pwukat ahnsou me irail ahpwtehn wiahla Kristian kei. Ahpw, erein kaimwiseklahn eh tuhwong irail, e kihong irail kaweid inen kei. Ia duwen arail mwekidki met? Kompoakepahn Pohl kan sohte lingeringerda. Ahpw, irail kalahnganki eh nsenohkin irail, oh irail pil sengiseng ni arail esehda me re solahr pahn kilang ih.—Wiewia 20:17, 29, 30, 36-38.

20. Dahme kompoakepah limpoak men pahn wia?

²⁰ Kompoakepah mwahu kan sohte kin alehte kaweid erpit kan ahpw irail pil kin kihda kaweid. Ei, kitail anahne ese ahnsou me kitail en ‘wiewia pein atail doadoahk.’ (1 Des. 4:11) Oh kitail anahne pil pohnese me emenemen kitail “pahn wehkohng Koht duwen pein ih.” (Rom 14:12) Ahpw ma anahn, kompoakepah men me limpoak pahn katamanki kompoakepaho duwen elen Siohwa kan ni kadek. (1 Kor. 7:39) Karasepe, dahme ke pahn wia ma ke kilang me emen kompoakepahmw me sohte pwopwoud tepida mwahukihda emen me sohte kin iang padahk mehlel? Ke pahn pweiek en kasalehda omw madamadau ong ih pwe ke dehr kansensuwedihala? De ma kompoakepahmwo sohte men rong omw kaweid, dahme ke pahn wia? Kompoakepah mwahu men pahn rapahki sawas sang rehn sounsilepe limpoak kan pwehn sewese kompoakepaho me wiahda sapwung ehu? E anahne eimah pwehn wia met. Ara nanpwungmwahu sohte pahn ohla douluhl pwehki e poahsoankihda limpoak ong Siohwa.

21. Dahme kitail koaros kin wia ekei pak? Dahme kahrehda e kesempwal ong kitail en kolokol nanpwungmwahu nan mwomwohdiso?

²¹ Ekei pak, kitail pahn kahrehiong kompoakepatail kan en “kaulime” kitail, oh irail pil pahn wia de nda soahng kan me kansensuwedih kitail. Seims ntingihdi: “Kitail koaros kin kalap sapwungala.” (Kol. 3:13; Seims 3:2) Kompoakepah mehlel kan kin poahsoankihda arail kin men mahkohng sapwung kan en meteio ahpw kaidehn en medemedewe uwen tohtohn sapwung kan en emen. Ia uwen kesempwal kitail en kakairada atail nanpwungmwahu rehn meteikan sang ni atail kapehse mwahu oh mahkohng emenemen! Ma kitail kasalehda soangen limpoak wet, e pahn “kapatapene oh oarepene mehkoaros pwe en wiahla ehu ni mehlel.”—Kol. 3:14

Ia Duwen Omw Pahn Sapeng?

• Ia duwen atail kak wiahda kompoakepah mwahu kan?

• Iahd me kitail anahne kauhdi atail nanpwungmwahu rehn emen?

• Dahme kitail anahne wia pwehn kolokol nanpwungmwahu rehn meteikan?

[Kawehwehpen kilel kan nan ehu ehu pali 24]

Ia poahsoanpen nanpwungmwahu en Rud oh Naomi?

[Kawehwehpen kilel kan nan ehu ehu pali 25]

Ke kin kaukaule kasamwo meteikan?